ಚಿತ್ರರಂಗದ ಒಳಿತಿಗಾಗಿ ಬ್ರಾಹ್ಮಣರಿಂದ ಹೋಮ ಮಾಡಿಸಿ, ಈಗ ಅದೇ ಬ್ರಾಹ್ಮಣರ ಅವಹೇಳನ ಯಾಕೆ?

ಕಲ್ಪ ಮೀಡಿಯಾ ಹೌಸ್  |  ಬೆಂಗಳೂರು  |

ಈಗಾಗಲೇ ಹಲವು ವಿವಾದಗಳಲ್ಲಿ ಮುಳುಗೇಳುತ್ತಿರುವ ಕನ್ನಡ ಚಿತ್ರರಂಗದ ಲಂಗೋಟಿಮ್ಯಾನ್ ಎಂಬ ಚಿತ್ರದ ವಿರುದ್ಧ ಬ್ರಾಹ್ಮಣ ಸಮಾಜ ಆಕ್ರೋಶ ವ್ಯಕ್ತಪಡಿಸಿದ್ದು, ಚಿತ್ರವನ್ನು ಬಿಡುಗಡೆ ಮಾಡದಂತೆ ಎಚ್ಚರಿಕೆ ನೀಡಿದೆ.

ಈ ಕುರಿತಂತೆ ರಾಜ್ಯ ಬ್ರಾಹ್ಮಣ ಅರ್ಚಕರ ಹಾಗೂ ಪುರೋಹಿತರ ಪರಿಷತ್ ಕಾರ್ಯಾಧ್ಯಕ್ಷ ರಾಘವೇಂದ್ರ ಭಟ್ ಮಾತನಾಡಿದ್ದು, ವಿಪ್ರ ಸಮುದಾಯದ ಪರವಾಗಿ ಆಕ್ರೋಶ ಹೊರ ಹಾಕಿದ್ದಾರೆ.ಲಂಗೋಟಿಮ್ಯಾನ್ ಎಂಬ ಚಿತ್ರದ ಟೀಸರ್ ನೋಡಿ ಆಶ್ಚರ್ಯವಾಯಿತು. ಸನಾತನ ಸಂಪ್ರದಾಯದಲ್ಲಿ ವಸ್ತ್ರ ಸಂಹಿತೆ ಎನ್ನುವುದು ಅನಾದಿಕಾಲದಿಂದಲೂ ನಡೆದುಕೊಂಡು ಬಂದಿದೆ. ಲಂಗೋಟಿ ಹಾಗೂ ಜನಿವಾರ ಬ್ರಾಹ್ಮಣರಿಗೆ ಸಂಬಂಧಿಸಿದ್ದು ಎಂದಲ್ಲ. ಬದಲಾಗಿ ಸನಾತನ ಧರ್ಮದ ವಸ್ತ್ರ ಸಂಹಿತೆ. ಇದನ್ನು ಮುಂದಿಟ್ಟುಕೊಂಡು ಚಿತ್ರಗಳಲ್ಲಿ ಅವಹೇಳನ ಮಾಡುವುದು ಅಕ್ಷಮ್ಯ ಎಂದು ಕಿಡಿ ಕಾರಿದ್ದಾರೆ.

ಪ್ರತಿಯೊಂದು ಧರ್ಮದಲ್ಲೂ ಅವರದ್ದೇ ಆದ ವಸ್ತ್ರ ಸಂಹಿತೆ ಇರುತ್ತದೆ. ಯಾವುದೇ ಧರ್ಮದ ಆಚರಣೆ ಹಾಗೂ ವಸ್ತ್ರ ಸಂಹಿತೆಯನ್ನು ಚಿತ್ರಗಳಲ್ಲಿ ಹಾಸ್ಯಮಯವಾಗಿ ತೋರಿಸುವುದು ಹಾಗೂ ಅದರ ಹೆಸರನ್ನು ಇರಿಸುವುದು ತಪ್ಪು. ಇದನ್ನು ನಾವು ವಿರೋಧಿಸುತ್ತೇವೆ ಎಂದರು.
ಲಂಗೋಟಿ ಮ್ಯಾನ್ ಎಂದು ಶೀರ್ಷಿಕೆ ಇಟ್ಟು, ನಮ್ಮನ್ನು ಅಪಹಾಸ್ಯ ಮಾಡಿ ಚಿತ್ರಯಾಕೆ ತೆಗೆಯುತ್ತೀರಿ? ಚಲನಚಿತ್ರ ವಾಣಿಜ್ಯ ಮಂಡಳಿ ಅಧ್ಯಕ್ಷರ ಗಮನಕ್ಕೆ ಈಗಾಗಲೇ ಈ ವಿಚಾರವನ್ನು ತರಲಾಗಿದೆ. ಕನ್ನಡ ಚಿತ್ರರಂಗಕ್ಕೆ ಒಳಿತಾಗಲಿ ಎಂದು ಬ್ರಾಹ್ಮಣರ ಮೂಲಕ ಪೂಜೆ, ಹೋಮ ಹವನ ಮಾಡಿಸಿದ್ದಾರೆ. ಇಲ್ಲಿ ಇವರ ಅಭಿವೃದ್ಧಿಗಾಗಿ ಪೂಜೆ ಮಾಡಿದವರು ಬ್ರಾಹ್ಮಣ ಪುರೋಹಿತರೇ. ಆದರೆ, ಇವರಿಗೆ ಒಳ್ಳೆಯದಾಗಲಿ ಎಂದು ಪೂಜೆ ಮಾಡಲು ಬ್ರಾಹ್ಮಣರು ಬೇಕು. ಆದರೆ, ಅದೇ ಬ್ರಾಹ್ಮಣರು ಅನುಸರಿಸುವ ಜನಿವಾರ ಹಾಗೂ ವಸ್ತ್ರ ಸಂಹಿತೆಯನ್ನು ಅವಹೇಳನ ಮಾಡಿ ಚಿತ್ರ ಮಾಡುವುದನ್ನು ನಮ್ಮ ಸಮಾಜ ವಿರೋಧಿಸುತ್ತದೆ ಎಂದರು.

ಎಂದೂ ನಮ್ಮ ಧರ್ಮದ ಯಾವುದೇ ಆಚರಣೆ ಹಾಗೂ ಸಂಪ್ರದಾಯಗಳನ್ನು ಹಾಸ್ಯವನ್ನಾಗಿ ತೋರಿಸುವುದು ಹಾಸ್ಯವಾಗುವುದಿಲ್ಲ. ಬದಲಾಗಿ ಧರ್ಮವಿರೋಧಿಯಾಗುತ್ತದೆ ಎಂದರು.

ಈ ಹೆಸರಿನ ಚಿತ್ರ ಯಾವುದೇ ಕಾರಣಕ್ಕೂ ಬಿಡುಗಡೆಯಾಗಬಾರದು. ಒಂದು ವೇಳೆ ಬಿಡುಗಡೆಯಾದರೆ ಪ್ರತಿಭಟನೆ ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿದರು.

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news