ಮೋದಿ ಸರ್ಕಾರಕ್ಕೆ ವಿಶ್ವಬ್ಯಾಂಕ್ ಮತ್ತೊಮ್ಮೆ ಪ್ರಶಂಸಿಸಿದ್ದು ಯಾಕೆ ಗೊತ್ತಾ?

ಮುಖ್ಯಾಂಶಗಳು:

• ಭಾರತದ ಜಿಡಿಪಿ ಬೆಳವಣಿಗೆಯು ಎರಡು ವರ್ಷಗಳಲ್ಲಿ 7.5% ಗೆ ಏರಿಕೆಯಾಗುತ್ತದೆ ಎಂದು ವಿಶ್ವ ಬ್ಯಾಂಕ್ ಊಹಿಸಿದೆ
• ಅಪನಗದೀಕರಣ ಹಾಗೂ ಜಿಎಸ್’ಟಿಗಳು ಅನೌಪಚಾರಿಕ ವ್ಯವಸ್ಥೆಯಿಂದ ಔಪಚಾರಿಕ ವ್ಯವಸ್ಥೆಗೆ ಬದಲಾಯಿಸುತ್ತಿದೆ
• 2018-19ರಲ್ಲಿ ವಿಶ್ವದಲ್ಲಿ ಅತಿ ವೇಗವಾಗಿ ಬೆಳೆಯುತ್ತಿರುವ ಮಹತ್ವ ಆರ್ಥಿಕತೆ ಭಾರತ 

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರದ ನಿರ್ಧಾರಗಳನ್ನು ಪದೇ ಪದೇ ಜಾಗತಿಕಮಟ್ಟದ ಸಂಸ್ಥೆಗಳು ಸ್ವಾಗತಿಸುತ್ತಿರುವ ಬೆನ್ನಲ್ಲೇ, ವಿಶ್ವಬ್ಯಾಂಕ್ ಮತ್ತೊಮ್ಮೆ ಮುಕ್ತಕಂಠದಿಂದ ಶ್ಲಾಘಿಸಿದೆ.

ಭಾರತ 2018-19ರಲ್ಲಿ ಜಾಗತಿಕವಾಗಿ ಅತಿ ವೇಗವಾಗಿ ಬೆಳವಣಿಗೆ ಹೊಂದುತ್ತಿರುವ ಪ್ರಮುಖ ಆರ್ಥಿಕ ವ್ಯವಸ್ಥೆಯಾಗಿದೆ ಎಂದು ನಿನ್ನೆ ಬಿಡುಗಡೆ ಮಾಡಿರುವ ವರದಿಯಲ್ಲಿ ವಿಶ್ವಬ್ಯಾಂಕ್ ಉಲ್ಲೇಖಿಸಿದೆ.

ಅತ್ಯಂತ ಪ್ರಮುಖವಾಗಿ ಭಾರತದ ಜಿಡಿಪಿ ಪ್ರಸ್ತುತ ಆರ್ಥಿಕ ವರ್ಷದಲ್ಲಿ ಶೇ.7.3ರಷ್ಟಿದ್ದು, ಈ ವರ್ಷದಾಂತ್ಯಕ್ಕೆ ಚೀನಾದ ಜಿಡಿಪಿ ಶೇ.6.3ಕ್ಕೆ ನಿಲ್ಲುವ ಮೂಲಕ ಭಾರತದ ಮುಂದೆ ಅದು ತಲೆಬಾಗಲಿದೆ ಎಂದು ಹೇಳಿದೆ.

ಪ್ರಧಾನಿ ನರೇಂದ್ರ ಮೋದಿ ಕೈಗೊಂಡ ಮಹತ್ವದ ಹಣ ಅಪನಗದೀಕರಣ ಹಾಗೂ ಜಿಎಸ್’ಟಿಯನ್ನು ವಿಶ್ವಬ್ಯಾಂಕ್ ಪ್ರಶಂಸಿಸಿದ್ದು, ಈ ಎರಡೂ ನಿರ್ಧಾರಗಳು ಭಾರತದ ಆರ್ಥಿಕತೆಯನ್ನು ಅನೌಪಚಾರಿಕ ವಲಯದಿಂದ, ಔಪಚಾರಿಕ ವಲಯಕ್ಕೆ ತರಲಿದ್ದು, ಇದು ದೇಶದ ಭದ್ರ ಬುನಾದಿಯಾಗಿದೆ ಎಂದಿದೆ.