ಕಲ್ಪ ಮೀಡಿಯಾ ಹೌಸ್ | ವಿಶೇಷ ಲೇಖನ |
(World Patient Safety Day – ವಿಶ್ವ ರೋಗಿ ಸುರಕ್ಷತಾ ದಿನ) ದೀರ್ಘಕಾಲದ ಕಾಯಿಲೆಗಳಾದ ಮಧುಮೇಹ, ಅಧಿಕ ರಕ್ತದೊತ್ತಡ, ಹೃದ್ರೋಗ ಹಾಗೂ ಮೂತ್ರಪಿಂಡದ ಸಮಸ್ಯೆಗಳಂತಹ ಅಸಾಂಕ್ರಾಮಿಕ ರೋಗಗಳ (NCDs) ನಿರ್ವಹಣೆಯಲ್ಲಿ ನಿಯಮಿತ ಔಷಧಿ ಸೇವನೆ ಅತ್ಯಂತ ಮಹತ್ವದ್ದು. ಆದರೆ, ಪ್ರತಿದಿನ ಚಿಕಿತ್ಸಾಲಯಗಳಲ್ಲಿ ನಾವು ಕಾಣುವ ಒಂದು ಸತ್ಯವೆಂದರೆ—ರೋಗಿಗಳು ರೋಗದ ತೀವ್ರತೆಯಿಂದ ಮಾತ್ರವಲ್ಲದೆ, ಔಷಧಿಗಳನ್ನು ತೆಗೆದುಕೊಳ್ಳುವಾಗ ಮಾಡುವ ಸಣ್ಣಪುಟ್ಟ ತಪ್ಪುಗಳಿಂದಲೂ ಗಂಭೀರ ಆರೋಗ್ಯ ಸಮಸ್ಯೆಗೆ ತುತ್ತಾಗುತ್ತಿದ್ದಾರೆ. ಇವು ನಮ್ಮ ಕಣ್ಣಿಗೆ ಕಾಣದಂತೆ ಅಡಗಿರುವ ದೊಡ್ಡ ಅಪಾಯಗಳು.
ಸಾಮಾನ್ಯವಾಗಿ ಕಂಡುಬರುವ ಔಷಧಿ ದೋಷಗಳು
ತಪ್ಪಾದ ಡೋಸ್ (Wrong Dosage)
ವೈದ್ಯರು 25 mg ಸೂಚಿಸಿದ್ದರೆ ಅರಿಯದೆ 50 mg ತೆಗೆದುಕೊಳ್ಳುವುದು ಅಥವಾ ರಕ್ತದೊತ್ತಡ ಸಾಮಾನ್ಯ ಮಟ್ಟಕ್ಕೆ ಬಂದಾಗ ತಾವೇ ಡೋಸ್ ಕಡಿಮೆ ಮಾಡಿಕೊಳ್ಳುವುದು. ಇದು ರೋಗ ಲಕ್ಷಣಗಳನ್ನು ದಿಢೀರ್ ಉಲ್ಬಣಗೊಳಿಸಬಹುದು.
ಒಂದೇ ರೀತಿಯ ಔಷಧಿಗಳ ನಕಲು (Duplicate Medicines)
ಬೇರೆ ಬೇರೆ ಬ್ರಾಂಡ್ ಹೆಸರುಗಳಲ್ಲಿ ಒಂದೇ ಅಂಶವಿರುವ (ಉದಾಹರಣೆಗೆ ಪ್ಯಾರಾಸಿಟಮಾಲ್ ಅಥವಾ ಆಮ್ಲೋಡಿಪಿನ್) ಮಾತ್ರೆಗಳನ್ನು ಎರಡು ವೈದ್ಯರು ಬರೆದಾಗ, ಎರಡನ್ನೂ ಒಟ್ಟಿಗೆ ಸೇವಿಸಿ ಓವರ್ಡೋಸ್ ಆಗುವುದು.
ಔಷಧಿ ತಪ್ಪಿಸುವುದು (Missed Doses)
“ಇವತ್ತು ನನಗೆ ಆರೋಗ್ಯವಾಗೇ ಅನಿಸುತ್ತಿದೆ” ಎಂದು ಬಿಪಿ ಅಥವಾ ಇನ್ಸುಲಿನ್ ತಪ್ಪಿಸುವುದು. ಇದರಿಂದ ರಕ್ತದೊತ್ತಡ ದಿಢೀರ್ ಏರಿ ಪಾರ್ಶ್ವವಾಯು (Stroke) ಉಂಟಾಗುವ ಅಪಾಯವಿರುತ್ತದೆ.
ಸ್ವಯಂ ಚಿಕಿತ್ಸೆ (Self-Medication)
ಸಣ್ಣ ತಲೆನೋವು ಅಥವಾ ಕೀಲುನೋವಿಗೆ ವೈದ್ಯರ ಸಲಹೆಯಿಲ್ಲದೆ ನೋವು ನಿವಾರಕ (NSAIDs) ಮಾತ್ರೆಗಳನ್ನು ಮೆಡಿಕಲ್ ಶಾಪ್ನಿಂದ ತಂದು ಸೇವಿಸುವುದು. ಇದು ಬಿಪಿ ಹೆಚ್ಚಿಸುವುದಲ್ಲದೆ ಮೂತ್ರಪಿಂಡಕ್ಕೆ (Kidney) ಹಾನಿ ಉಂಟುಮಾಡುತ್ತದೆ.
Also Read>> SPARSH Hospital Sarjapur Celebrates 1st Anniversary, Expands Advanced Healthcare Access
ಔಷಧಿಗಳ ಪರಸ್ಪರ ಪ್ರತಿಕ್ರಿಯೆ (Drug Interactions)
ಕೆಲವು ಆಂಟಿಬಯೋಟಿಕ್ಗಳು, ರಕ್ತ ತೆಳು ಮಾಡುವ ಔಷಧಿಗಳು (Blood thinners) ಅಥವಾ ಆಯುರ್ವೇದ/ಗಿಡಮೂಲಿಕೆ ಔಷಧಿಗಳನ್ನು ಒಟ್ಟಿಗೆ ತೆಗೆದುಕೊಂಡಾಗ ದೇಹದಲ್ಲಿ ಅಡ್ಡಪರಿಣಾಮಗಳು ಉಂಟಾಗಬಹುದು.
World Patient Safety Day : ಔಷಧಿ ಪಟ್ಟಿಯನ್ನು ನಿರ್ವಹಿಸಲು ಪ್ರಾಯೋಗಿಕ ಸಲಹೆಗಳು:
1. ಸಂಪೂರ್ಣ ವಿವರಗಳನ್ನೊಳಗೊಂಡ ಪಟ್ಟಿ ಸಿದ್ಧಪಡಿಸಿ: ಒಂದು ಡೈರಿ ಅಥವಾ ಮೊಬೈಲ್ನಲ್ಲಿ ನೀವು ತೆಗೆದುಕೊಳ್ಳುವ ಪ್ರತಿ ಔಷಧಿಯ ಬ್ರಾಂಡ್ ಹೆಸರು, ಜೆನೆರಿಕ್ ಹೆಸರು, ಪ್ರಮಾಣ (mg), ಸೇವಿಸುವ ಸಮಯ (ಬೆಳಿಗ್ಗೆ/ಮಧ್ಯಾಹ್ನ/ರಾತ್ರಿ) ಮತ್ತು ಊಟಕ್ಕೆ ಮುಂಚೆಯೋ ಅಥವಾ ನಂತರವೋ ಎಂಬುದನ್ನು ಸ್ಪಷ್ಟವಾಗಿ ಬರೆದಿಡಿ.
2. ವೈದ್ಯರ ಭೇಟಿಯ ವೇಳೆ ಪಟ್ಟಿ ನಿಮ್ಮೊಂದಿಗಿರಲಿ: ಯಾವುದೇ ತಜ್ಞರನ್ನು ಕಾಣಲು ಹೋದಾಗ, ಈ ನವೀಕರಿಸಿದ ಪಟ್ಟಿಯನ್ನು ಅಥವಾ ಔಷಧಿಯ ಅಸಲಿ ಸ್ಟ್ರಿಪ್ಗಳನ್ನೇ ನೇರವಾಗಿ ತೋರಿಸಿ.
3. ಪಿಲ್ ಬಾಕ್ಸ್ (Pill Organizer) ಬಳಸಿ: ವಾರದ ದಿನಗಳ ಪ್ರಕಾರ ಮಾತ್ರೆಗಳನ್ನು ವಿಂಗಡಿಸಿ ಇಡುವ ಬಾಕ್ಸ್ ಬಳಸುವುದರಿಂದ ಡೋಸ್ ಮರೆತುಹೋಗುವುದು ಅಥವಾ ಎರಡು ಬಾರಿ ತೆಗೆದುಕೊಳ್ಳುವುದು ತಪ್ಪುತ್ತದೆ.
4. ಯಾವುದೇ ಬದಲಾವಣೆಯನ್ನು ತಕ್ಷಣ ನಮೂದಿಸಿ: ವೈದ್ಯರು ಡೋಸ್ ಬದಲಾಯಿಸಿದಾಗ ಅಥವಾ ಹಳೆಯ ಔಷಧಿ ನಿಲ್ಲಿಸಿದಾಗ, ಕೂಡಲೇ ಪಟ್ಟಿಯಿಂದ ಹಳೆಯದನ್ನು ತೆಗೆದು ಹೊಸ ವಿವರವನ್ನು ಸೇರಿಸಿ.
ಔಷಧಿ ರೋಗವನ್ನು ಗುಣಪಡಿಸುವ ಸಂಜೀವಿನಿಯಾಗಬೇಕೇ ಹೊರತು ಮತ್ತೊಂದು ಕಾಯಿಲೆಗೆ ಕಾರಣವಾಗಬಾರದು. ಸರಿಯಾದ ಮಾಹಿತಿ ಮತ್ತು ಜಾಗರೂಕತೆಯೇ ನಮ್ಮ ಆರೋಗ್ಯದ ರಕ್ಷಾಕವಚ.
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news
