ಕಲ್ಪ ಮೀಡಿಯಾ ಹೌಸ್ | ಸೊರಬ |
ಶರಣರ ವಚನಗಳು ನಮ್ಮ ಜೀವನಕ್ಕೆ ಮಾರ್ಗದರ್ಶನ ನೀಡುವುದಲ್ಲದೆ, ಆತ್ಮದ ವಿಮರ್ಶೆಗೆ ಸಹಕಾರಿಯಾಗುತ್ತವೆ ಎಂದು ಜಡೆ ಹಿರೇಮಠ ಹಾಗೂ ಸೊರಬ ಕಾನುಕೇರಿ ಮಠದ ಘನಬಸವ ಅಮರೇಶ್ವರ ಶಿವಾಚಾರ್ಯ ಮಹಾಸ್ವಾಮಿಗಳು ಹೇಳಿದರು.
ಅವರು ನಗರದಲ್ಲಿರುವ ಕಾನುಕೇರಿ ಮಠದಲ್ಲಿ ಸೊರಬ ಅಕ್ಕನಬಳಗದ ಸಹಯೋಗದಲ್ಲಿ ಶ್ರಾವಣ ಮಾಸದಲ್ಲಿ ಆಯೋಜಿಸಿರುವ ಶ್ರಾವಣ ಸಂಭ್ರಮ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದರು. “ಶರಣರು ಹೇಗೆ ಬದುಕಿದರೋ ಹಾಗೆ ನುಡಿದರು, ಏನು ನುಡಿದರೋ ಹಾಗೆ ನಡೆದುಕೊಂಡರು. ಇದು ಎಲ್ಲರಿಗೂ ಸಾಧ್ಯವಿಲ್ಲ. ಪುಣ್ಯ ಬಯಸುವವರು ಪುಣ್ಯ ಕಾರ್ಯಗಳನ್ನು ಮಾಡುವುದಿಲ್ಲ, ಪಾಪವನ್ನು ತಿರಸ್ಕರಿಸುವವರು ಪಾಪ ಕಾರ್ಯಗಳಲ್ಲಿ ತೊಡಗುತ್ತಾರೆ. ಆದರೆ ಶರಣರು ನುಡಿದಂತೆ ನಡೆದುಕೊಂಡವರು,” ಎಂದು ಅವರು ಅಭಿಪ್ರಾಯಪಟ್ಟರು.
ಮಹಾಸ್ವಾಮಿಗಳು ಶರಣರ ವಚನಗಳಲ್ಲಿ ಕಠಿಣತೆಯಿಲ್ಲದೆ ಸರಳವಾದ ಶಬ್ದ ಬಳಕೆ ಇರುತ್ತದೆ, ಆದರೆ ಅವುಗಳನ್ನು ಆಚರಿಸಲು ಕಷ್ಟವಾಗುತ್ತದೆ ಎಂದು ಹೇಳಿದರು. “ಇವು ಕನ್ನಡದ ಮಂತ್ರಗಳು, ಕನ್ನಡದ ಉಪನಿಷತ್ತುಗಳು. ಸಾಂಸಾರಿಕ ಗೊಂದಲದಲ್ಲಿ ಇರುವವರಿಗೆ ವಚನಗಳು ಶಾಂತಿಯ ಮಾರ್ಗವನ್ನು ತೋರಿಸುತ್ತವೆ. ಜಾತಿ, ಮತ ಎನ್ನದೆ ಎಲ್ಲರೂ ಶ್ರಾವಣ ಸಂಭ್ರಮದಲ್ಲಿ ಪಾಲ್ಗೊಳ್ಳಬೇಕು,” ಎಂದರು.
ಕಾರ್ಯಕ್ರಮದ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿದ ಜಿಲ್ಲಾ ಪಂಚಾಯತಿ ಮಾಜಿ ಉಪಾಧ್ಯಕ್ಷ ಪಾಣಿ ರಾಜಪ್ಪ ಅವರು, “ನಾವು ವೇದಿಕೆಯ ಮೇಲೆ ವಚನಗಳನ್ನು ಹೇಳುವಾಗ, ನಾವು ತಾನೇ ಅವುಗಳನ್ನು ಜೀವನದಲ್ಲಿ ಅನುಸರಿಸುತ್ತಿದ್ದೇವೆ ಎಂಬ ಪ್ರಶ್ನೆಯನ್ನು ಕೇಳಿಕೊಳ್ಳಬೇಕು. ಮಠಗಳ ಸಂಪರ್ಕದಿಂದ ಸಮಾಜದಲ್ಲಿ ಉತ್ತಮ ವಾತಾವರಣ ನಿರ್ಮಾಣ ಸಾಧ್ಯ,” ಎಂದು ಹೇಳಿದರು.
ಈ ಸಂದರ್ಭದಲ್ಲಿ ಬ್ರಹ್ಮಕುಮಾರಿ ಚೇತಕ್ಕ ಮಾತನಾಡಿದರು. ಜಾಯಮಾಲಾ ಅಣ್ಣಾಜೀಗೌಡ ಕಾರ್ಯಕ್ರಮವನ್ನು ನಿರೂಪಿಸಿದರು. ಅಕ್ಕನಬಳಗದ ಮಾತೆಯರು ವಚನಗಳನ್ನು ವಾಚಿಸಿ ವಿಶ್ಲೇಷಿಸಿದರು. ಸೊರಬದ ಉದ್ಯಮಿಗಳಾದ ಚನ್ನಬಸಪ್ಪ ಚಿನ್ನಮ್ಮ ಗುತ್ತಿ ಇಂದಿನ ದಾಸೋಹ ಸೇವೆಯನ್ನು ನೆರವೇರಿಸಿದರು.
ವರದಿ: ಮಧುರಾಮ್, ಸೊರಬ
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news
