ಶಿವಮೊಗ್ಗ: ಸಾಮೂಹಿಕ ಭೋಜನ, ಅನ್ನ ಸಂತರ್ಪಣೆ ಮುಂತಾದ ಸಂದರ್ಭಗಳಲ್ಲಿ ಕೈಗೊಳ್ಳಬೇಕಾದ ಕ್ರಮಗಳ ಕುರಿತು ಮಾರ್ಗಸೂಚಿ ಜಾರಿಗೊಳಿಸಲಾಗಿದ್ದು, ಇದನ್ನು ಕಡ್ಡಾಯವಾಗಿ ಪಾಲಿಸಬೇಕು ಎಂದು ಜಿಲ್ಲಾಧಿಕಾರಿ ಕೆ.ಎ.ದಯಾನಂದ ತಿಳಿಸಿದ್ದಾರೆ.
ಮಾರ್ಗಸೂಚಿ ಹೀಗಿದೆ:
- ಸಾಮೂಹಿಕ ಭೋಜನ, ಅನ್ನಸಂತರ್ಪಣೆ ನಡೆಸುವ ವಿವರವನ್ನು ಸ್ಥಳೀಯ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿಗೆ ಮುಂಚಿತವಾಗಿ ತಿಳಿಸಬೇಕು.
- ಅಡುಗೆ ಕೋಣೆಗೆ ಅಪರಿಚಿತ/ಅನಧಿಕೃತ ವ್ಯಕ್ತಿಗಳು ಪ್ರವೇಶಿಸದಂತೆ ಮುಂಜಾಗರೂಕತೆ ವಹಿಸಬೇಕು.
- ಕೋಣೆಯಲ್ಲಿ ಗಾಳಿ ಮತ್ತು ಬೆಳಕಿನ ವ್ಯವಸ್ಥೆ, ಬೆಂಕಿ ನಂದಿಸುವ ಯಂತ್ರದ ವ್ಯವಸ್ಥೆ ಇರಬೇಕು.
- ಪ್ರಥಮ ಚಿಕಿತ್ಸಾ ಪೆಟ್ಟಿಗೆ ತಕ್ಷಣ ಲಭ್ಯವಿರುವಂತೆ ಇರಬೇಕು.
- ಊಟದ ಕೋಣೆಯಲ್ಲಿ ಕುಡಿಯಲು ಉಪಯೋಗಿಸುವ ನೀರು, ಅಡುಗೆಗೆ ಬಳಸುವ ನೀರು ಶುದ್ಧವಾಗಿರುವ ಬಗ್ಗೆ ಖಾತ್ರಿಪಡಿಸಿಕೊಳ್ಳಬೇಕು.
- ಅಡುಗೆ ಮಾಡುವವರ, ಸಹಾಯಕರ, ಊಟ ಬಡಿಸುವವರನ್ನು ನೇಮಕ ಮಾಡುವ ಮುನ್ನ ಕಡ್ಡಾಯವಾಗಿ ಆರೋಗ್ಯ ತಪಾಸಣೆ ಮಾಡಬೇಕು.
- ಅಡುಗೆ ತಯಾರಿ ಸಂದರ್ಭದಲ್ಲಿ ಕೈಗವಸು, ತಲೆಗೆ ಟೊಪ್ಪಿ ಬಳಸಬೇಕು. ಪ್ರತಿ ಸಿಬ್ಬಂದಿಯನ್ನು 6 ತಿಂಗಳಿಗೊಮ್ಮೆ ಆರೋಗ್ಯ ತಪಾಸಣೆ ಮಾಡಬೇಕು.
- ಪ್ರತಿ ಆರು ತಿಂಗಳಿಗೊಮ್ಮೆ ಜಂತು ಹುಳು ನಿವಾರಣಾ ಮಾತ್ರೆ ನೀಡಲು ಕ್ರಮ ಕೈಗೊಳ್ಳಬೇಕು.
- ಅಡುಗೆ ಕೋಣೆಯಲ್ಲಿ ಮದ್ಯಪಾನ, ಧೂಮಪಾನ ಮತ್ತು ತಂಬಾಕು ಸೇವನೆ ಮಾಡುವುದನ್ನು ನಿಷೇಧಿಸಬೇಕು.
- ಪಾತ್ರೆ ತೊಳೆದ ನೀರು, ಕೈ ತೊಳೆದ ನೀರು ಸಮರ್ಪಕವಾಗಿ ಹರಿದು ಹೋಗುವಂತೆ ವ್ಯವಸ್ಥೆ ಇರಬೇಕು.
- ತರಕಾರಿ, ಆಹಾರ ಧಾನ್ಯಗಳನ್ನು ಇಡುವ ಕೊಠಡಿಯಲ್ಲಿ ಹಾವು, ಹಲ್ಲಿ, ಜಿರಳೆಗಳಿರದಂತೆ ಎಚ್ಚರಿಕೆ ವಹಿಸಬೇಕು.
- ಅಡುಗೆಗೆ ಅಲ್ಯೂಮಿನಿಯಂ ಪಾತ್ರೆ ಉಪಯೋಗಿಸುವಂತಿಲ್ಲ.
- ಪಾತ್ರೆ, ತಟ್ಟೆ, ಲೋಟಗಳನ್ನು ಬಿಸಿ ನೀರಿನಲ್ಲಿ ತೊಳೆಯಬೇಕು.
- ಕಲಬೆರಕೆ ಆಹಾರ ಪದಾರ್ಥ ಕಂಡು ಬಂದಲ್ಲಿ ಅವುಗಳನ್ನು ಬಳಸದೆ, ಆಹಾರ ಸುರಕ್ಷತಾ ಇಲಾಖೆಗೆ ಮಾಹಿತಿ ನೀಡಬೇಕು.
- ಅಡುಗೆ ತಯಾರಿಸಿದ ಬಳಿಕ ಪಾತ್ರೆಯನ್ನು ಸುರಕ್ಷಿತವಾಗಿ ಮುಚ್ಚಿಡಬೇಕು.
- ಆಹಾರ ಪದಾರ್ಥಗಳ ಎಕ್ಸ್ಪಯರಿ ದಿನಾಂಕವನ್ನು ಗಮನಿಸಬೇಕು.
- ಊಟದ ನಂತರ ಎಲೆ, ಪೇಪರ್ತಟ್ಟೆ ಇತ್ಯಾದಿಗಳನ್ನು ಸೂಕ್ತವಾಗಿ ವಿಲೇವಾರಿ ಮಾಡಬೇಕು.
- ಅನ್ನ ಸಂತರ್ಪಣೆ ಮೊದಲು ಹಾಗೂ ನಂತರ ಸ್ಥಳ ಸ್ವಚ್ಛತೆ ಇರುವಂತೆ ನೋಡಬೇಕು.
- ಸ್ಥಳದಲ್ಲಿ ಸೂಕ್ತ ಶೌಚಾಲಯದ ವ್ಯವಸ್ಥೆ ಇರಬೇಕು.
- ಲಘು ಉಪಾಹಾರಗಳನ್ನು ಮುದ್ರಿತ ಕಾಗದದಲ್ಲಿ ವಿತರಿಸದಂತೆ ಎಚ್ಚರಿಕೆ ವಹಿಸಬೇಕು.ದೇವಸ್ಥಾನ, ಅಂಗನವಾಡಿ, ಶಾಲೆ, ವಸತಿಶಾಲೆ, ಹಾಸ್ಟೆಲ್, ಕಾಲೇಜು ಕ್ಯಾಂಟೀನ್, ಕಾರಾಗೃಹ, ಆಸ್ಪತ್ರೆ ಕ್ಯಾಂಟೀನ ಇತ್ಯಾದಿ ಕಡೆಗಳಲ್ಲಿ ಈ ಎಲ್ಲಾ ಅಂಶಗಳನ್ನು ಕಡ್ಡಾಯವಾಗಿ ಪಾಲಿಸಬೇಕು. ಈ ಮಾರ್ಗಸೂಚಿ ಪಾಲಿಸದೆ ಅವಘಡಗಳು ಸಂಭವಿಸಿದರೆ ಅಂತಹ ಸಂಸ್ಥೆ ಮುಖ್ಯಸ್ಥರನ್ನು ಹಾಗೂ ಸಮಾರಂಭ ಆಯೋಜಕರನ್ನು ಹೊಣೆಗಾರರಾಗಿ ಮಾಡಿ ಕಾನೂನು ಅನುಸಾರ ಕ್ರಮ ಕೈಗೊಳ್ಳಲಾಗುವುದು ಎಂದು ಜಿಲ್ಲಾಧಿಕಾರಿಯವರು ಎಚ್ಚರಿಕೆ ನೀಡಿದ್ದಾರೆ.
ವರದಿ: ಡಾ.ಸುಧೀಂದ್ರ
