ಸಾಧನೆ ಎಂಬ ಪದ ಕೇವಲ ಮೂರಕ್ಷರದಾಗಿದ್ದರೂ ಅದರ ಅರ್ಥ ಆಳ ಅಗಲ ತುಂಬಾ ದೊಡ್ಡದು. ಅದು ಎಲ್ಲರಿಗೂ ಸಿಗುವಂತಹದಲ್ಲ. ಅದೊಂದು ತಪ್ಪಸ್ಸಿನಂತೆ. ಸಾಧನೆ ಮಾಡಲು ಬಯಸುವಾತ ತನ್ನ ಗುರಿಯತ್ತಲೇ ತನ್ನನ್ನು ತಾನು ಕೇಂದ್ರಿಕೊಳಿಸಬೇಕು. ಆದಾಗ ಮಾತ್ರ ಯಶಸ್ಸು ಸಿಗುತ್ತದೆ.
ಇಂತಹ ಪಟ್ಟಿಯಲ್ಲಿ ಬರುವ ಪ್ರತಿಭೆಯೇ ಪುತ್ತೂರಿನ ಮುತ್ತು ಖ್ಯಾತಿಯ 12ರ ಹರೆಯದ ದೀಕ್ಷಾ ರೈ. ಈಕೆಯದು ಬಹುಮುಖ ಪ್ರತಿಭೆ. ಗಾಯನ ನೃತ್ಯ ಮಾತುಗಾರಿಕೆ ಹೀಗೆ ಹಲವು ರಂಗದಲ್ಲಿ ತೊಡಗಿಸಿಕೊಂಡಿದ್ದು ಈ ರಂಗಗಳಲ್ಲಿ ತರಬೇತಿ ಪಡೆಯುತ್ತಿದ್ದಾಳೆ. ಜೊತೆಗೆ ನಟನಾ ತರಬೇತಿ ಸಹ ಪಡೆಯುತ್ತಿದ್ದಾಳೆ.
ಜ್ಯೂನಿಯರ್ ಮಸ್ತಿ ಶೋನಲ್ಲಿ ಮೂರನೆಯ ಸ್ಥಾನ ಪಡೆದಿದ್ದಾಳೆ. ಜೊತೆಗೆ ಸ್ಟಾರ್ ಸುವರ್ಣ ವಾಹಿನಿಯ ರಿಯಾಲಿಟಿ ಶೋನಲ್ಲಿ ಎರಡನೇ ರನ್ನರ್ ಅಪ್ ಕಿರಿಟ ಬಾಚಿಕೊಂಡಿದ್ದಳು. ಹಾಗೆಯೆ ಅದೆ ವಾಹಿನಿಯ ಭರ್ಜರಿ ಕಾಮಿಡಿ ಶೋದಲ್ಲಿ ಕೂಡ ಭಾಗವಹಿಸಿದ್ದಳು. ಡಾನ್ಸ್ ಡಾನ್ಸ್ ಜ್ಯೂನಿಯರ್ ಶೋನಲ್ಲಿ ಮೂರು ಬಾರಿ ಏರಿಯಲ್ ಡಾನ್ಸ್ ಮಾಡುವ ಮೂಲಕ ಏರಿಯಲ್ ಕ್ವೀನ್ ಎಂಬ ಖ್ಯಾತಿ ಪಡೆದಿದ್ದಳು.
‘ಸುಳಿಯೊಳಗೆ’ ಎನ್ನುವ ಅಲ್ಬಂ ಹಾಡಿನಲ್ಲಿ ನಟನ ಚಾತುರ್ಯ ತೋರಿದ ಈ ಬಾಲೆ ಕನ್ನಡದ ‘ಪೆನ್ಸಿಲ್ ಬಾಕ್ಸ್’ಚಿತ್ರದಲ್ಲಿ ಪ್ರಮುಖ ಪಾತ್ರ ಮಾಡಿದ್ದಾಳೆ. ಅದ್ಬುತ ಪ್ರತಿಭೆಯಾದ ನವರಸ ಚತುರೆ ದೀಕ್ಷಾಳಿಗೆ ಅವಕಾಶಗಳು ಕೈಬೀಸಿ ಕರೆಯುತ್ತಿದೆ. ಇದಿಷ್ಟೇ ಅಲ್ಲದೆ ಮುನ್ನೂರಕ್ಕೂ ಹೆಚ್ಚಿನ ವೇದಿಕೆಗಳಲ್ಲಿ ತನ್ನ ಕಲಾ ಪ್ರದರ್ಶನ ನೀಡಿದ್ದಾಳೆ.
ಈಕೆಯ ಸಾಧನೆ ಗಮನಿಸಿ ಹಲವು ಸಂಘ-ಸಂಸ್ಥೆಗಳು ಸುಮಾರು ಎಪ್ಪತ್ತರಷ್ಟು ಗೌರವ ಸನ್ಮಾನ ಮಾಡಿದ್ದಾರೆ. ತನ್ನದೇ ಆದ ಅಭಿಮಾನಿಗಳನ್ನ ಈ ಸಣ್ಣ ವಯಸ್ಸಿನಲ್ಲೇ ಈಕೆ ಸಂಪಾದನೆ ಮಾಡಿದ್ದು ರಾಜ್ಯಮಟ್ಟದ ವಾಹಿನಿಗಳು ಮತ್ತು ಅಭಿಮಾನಿಗಳು ಈಕೆಗೆ ಪಟ್ ಪಟ್ ಪಟಾಕಿ ಮಾತಿನ ಮಲ್ಲಿ ಏರಿಯಲ್ ಕ್ವೀನ್ ಪುತ್ತೂರಿನ ಮುತ್ತು ನವರಸನಾಯಕಿ ಮೊದಲಾದ ಬಿರುದು ನೀಡಿದ್ದಾರೆ.
ಮಗಳ ಸಾಧನೆಗೆ ತಂದೆಯೇ ಸ್ಪೂರ್ತಿ ಎನ್ನಬಹುದು. ಕಾರಣ ಈಕೆಯ ತಂದೆ ದಯಾನಂದ ರೈ ಬೆಟ್ಟಂಪಾಡಿ ನಾಟಕ ನಿರ್ದೇಶನ ಮತ್ತು ಅಭಿನಯದಲ್ಲಿ ತನ್ನದೇ ಆದ ಹೆಸರು ಮಾಡಿದ್ದಾರೆ. ಸದಾ ಬೆಂಬಲವಾಗಿ ಈಕೆಗೆ ಪಾಲಕರು ನಿಂತಿದ್ದು ನಟಿಯಾಗಬೇಕೆಂಬ ಬಯಕೆ ಹೊಂದಿದ್ದು ದೀಕ್ಷಾಳ ಭವಿಷ್ಯದ ಕನಸು ಸಹ ಅದೇ ಆಗಿದೆ.
ದೀಕ್ಷಾಳ ಪಠ್ಯೇತರ ಚಟುವಟಿಕೆಗೆ ಬೆಂಗಾವಲಾಗಿ ನಿಂತ ತಾಯಿ ಶಶಿಕಲಾರೈ ವಿದ್ಯಾಭ್ಯಾಸದ ಕಡೆಗೂ ಬಹಳ ಗಮನ ಹರಿಸುತ್ತಿದ್ದಾರೆ. ಪ್ರಸ್ತುತ ಈಕೆ ಸುದಾನ ವಸತಿ ಶಾಲೆ ಪುತ್ತೂರಿನಲ್ಲಿ 7ನೆಯ ತರಗತಿ ಓದುತ್ತಿದ್ದಾಳೆ.
ತನ್ನೆಲ್ಲ ಸಾಧನೆಗೆ ಹೆತ್ತವರ ಪ್ರೋತ್ಸಾಹ ಮತ್ತು ತನ್ನೆಲ್ಲ ಗುರುಗಳ ಪರಿಶ್ರಮವೇ ಕಾರಣ ಎನ್ನುತ್ತಾ ಅವರೆಲ್ಲರಿಗೂ ತಾನು ಋಣಿ ಎನ್ನುವ ಮಾತನ್ನು ಹೇಳುತ್ತಾಳೆ.
ಈಕೆಯ ಭವಿಷ್ಯದ ದಿನಗಳು ಸಂತೋಷದಿಂದ ತುಂಬಿರಲಿ ಈಕೆಯ ಭವಿಷ್ಯದ ಕನಸು ನನಸಾಗಲಿ ಇನ್ನೂ ಹೆಚ್ಚು ಸಾಧನೆ ಮಾಡುವಂತಾಗಲಿ ಎನ್ನುವ ಹಾರೈಕೆ ನಮ್ಮದು..
ಲೇಖನ: ರೋಹನ್ ಪಿಂಟೋ ಗೇರುಸೊಪ್ಪ
ಮಾಹಿತಿ ಮತ್ತು ಚಿತ್ರಕೃಪೆ: ಸತೀಶ ಶೆಟ್ಟಿ ಚೇರ್ಕಾಡಿ ದೊಡ್ಡಮನೆ
