ಸಂಗೀತನೇ ದೇವೆರೆನ್ಪಿ ಕಲಾ ಲೋಕದ ಸಪ್ತಸ್ವರ ಮಾಂತ್ರಿಕೆ – ಸತೀಶ್ ಪೂಂಜ ವಾಮದಪದವು

Kalpa News Digital Media

ಸಾಹಿತ್ಯ ಸಂಗೀತ ಕಲಾ ವಿಹೀನಃ| ಸಾಕ್ಷಾತ್ ಪಶು ಪುಚ್ಛ ವಿಷಾಣ ಹೀನಃ|| ತೃಣಂ ನ ಖಾದನ್ನಪಿ ಜೀವಮಾನಃ| ತದ್ಭಾಗದೇಯಂ ಪರಮಂ ಪಶೂನಾಂ|| ಸಾಹಿತ್ಯ, ಸಂಗೀತ, ಕಲೆತ ಪೊಲಬು ದಾಂತಿನಾಯೆ ಪಜಿರ್ ತಿನಂದಿ, ಬೀಲ ಕೊಂಬು ಇಜ್ಜಂದಿ ಪೆತ್ತಗ್ ಸಮ ಪನ್ಪೆರ್ ಭತೃಹರಿ. ನರಮಾನ್ಯನ ಭಾವನೆಲೆನ ಮೂರ್ತ ರೂಪೊನೇ ಕಲೆ. ಸಂಗೀತ, ಸಾಹಿತ್ಯ ಉಡಲ್‌ಡ್ ದಿಂಜಿದಿತ್ತ್ಂಡ ಮೆದು, ಮೆತ್ತೆನ ಭಾವನೆ ಪುಟ್ಟ್‌ದ್ ಮಾನಿಗ್ ನಯನಾಜೂಕುನು ಕಲ್ಪಾವುಂಡು ಪನ್ಪಿ ಹಿರಿಯೆರೆ ನುಡಿಕ್ ಅರ್ಥ ಕೊರ್ಪಿಲೆಕ ಸಂಗೀತನೇ ಬದ್ಕ್ ಪಂದ್ ಪನೊಂದು ಆಡಂಬರದ ಪ್ರಪಂಚಗ್ ತನನ್ ಬುಡ್ಪದ್ ದೀವಂದೆ, ಸೊರೊ ಲೋಕೊಡು ವಜ್ರ ಮಣಿಯಾದ್ ಮೆನ್ಕೊಂದು, ಸಂಗೀತ ಜಗತ್ತ್‌ದ ಕನ್ನಡಿಯಾದ್, ಸಂಗೀತ ಸಾಹಿತ್ಯಲೆನ್ ತನ್ನ ಸೊರೊ ಬಿರೆಲ್ಡ್ ನಲಿಪಾವುನ ಬಂಟ ಮುತ್ತು ಈ ಸತೀಶ್ ಪೂಂಜೆರ್.

ಸತೀಶ್ ಪೂಂಜೆರ್ 1982ನೇ ಏಪ್ರಿಲ್ 10ನಾನಿ ವಾಮದಪದವುದ ಎಲ್ಯ ಕುಟುಮೊ ಒಂಜೆಡ್ ಪುಷ್ಪಾ ಬೊಕ್ಕ ಗೋಪಾಲ ಪೂಂಜೆರ್‌ನ ಏಳ್ ಜೋಕ್ಲೆಡ್ ಆಜಿನೆದ ಬಾಲೆ ಆದ್ ಪುಟ್ಟಿಯೆರ್. ಆಂಡ ಪುಟ್ಟುದು ಪತ್ತ್ ತಿಂಗೊಲುಡು ಅಪ್ಪೆ ಮಟ್ಟೆಲ ಬೆಪ್ಪು ಬುಡ್ದ್ ಜೋಕ್ಲುದಾಂತಿ ತಮ್ಮಲೆ ಇಲ್ಲ ಪೊಲ್ಸು ಆದ್ ದತ್ತು ಬಾಲೆ ಆದ್ ಮಾಮಿನ ಮಟ್ಟೆಲ ಬೆಪ್ಪುಡು ಬುಲೆಯೆರ್. ಪುಟ್ಟ್‌ನ ಇಲ್ಲಡ್ ಕೂಲಿ ಬೇಲೆಗ್ ಪೋಪಿ ಅಮ್ಮೆರ್, ಬೀಡಿ ಸುರುಂಟ್‌ದ್ ಬಡಪತ್ತ ಬದ್ಕ್‌ಡ್ ಕಂಡನ್ಯಗ್ ಆಧಾರ ಆದ್ ಜೋಕ್ಲೆಗ್ ಬಂಜಿ ದಿಂಜಯೆರೆ ಪುಣೆಪುನ ಅಪ್ಪೆ ಆಂಡಲಾ ತಾಂಕನದ ಇಲ್ಲಡ್ ಬೆನ್ನಿ ಸಾಗೊಲಿ ಇತ್ತ್‌ನೆಡ್ ಬಂಜಿಗ್ ತತ್ವಾರದಾಂತೆ ಸತೀಶೆರ್ ಬುಲೆಯೆರ್. ಆಂಡ ಆ ಭಾಗ್ಯಲಾ ಜಾಸ್ತಿ ಸಮಯ ಇಜ್ಜಂಡ್. ಸತೀಶೆರ್ ಐನ್ನೇ ಕ್ಲಾಸ್ ಓದೊಂದು ಇಪ್ಪುನಗ ಆರೆನ ಮಾಮಿ ತಮ್ಮಲೆನ ಬದ್ಕ್ ಬೆಳಗುನ ಪೊಣ್ಣು ಮಗಳೊರ್ತಿ ಪುಟ್ಯಲ್. ಅಯಿಡ್ದ್ ಬೊಕ್ಕ ಕುಡ ಇಂಬೆರ್ ಅಪ್ಪೆ ಮಟ್ಟೆಲ್‌ಗ್ ಸೇರ್ಯೆರ್.

ನನ ಕಲ್ಪುನ ವಿಷಯಗ್ ಬತ್ತ್ಂಡ ಐನ್‌ನೇ ಕ್ಲಾಸ್ ಮುಟ್ಟ ಓಡಿಲ್ನಾಳ ಕಟ್ಟದಬೈಲ್‌ ಹಿರಿಯ ಪ್ರಾಥಮಿಕ ಶಾಲೆಡ್ ಕಲ್ತೆರ್. ಆಜೆಡ್ದ್ ಬೊಕ್ಕ ಚೆನ್ನೈತ್ತೊಡಿಡ್ ಶಾಲೆಗ್ ಸೇರಿಯೆರ್. ವಾಮದಪದವುದ ಸರಕಾರಿ ಪದವಿಪೂರ್ವ ಕಾಲೇಜ್ ಕಲಾ ವಿಭಾಗಡ್ ಪಿಯುಸಿ, ಸರಕಾರಿ ಪದವಿ ಕಾಲೇಜ್‌ಡ್ ಪದವಿ ಶಿಕ್ಷಣ ಮುಗಿತೆರ್.

ಯಕ್ಷಗಾನದ ಮೋಕೆ ಇತ್ತಿ ಪೂಂಜೆರ್ ಚೆನ್ನೈತ್ತೋಡಿ ಶಾಲೆಡ್ ಕಲ್ಪುನ ಪೊರ್ತು ಮೋನಪ್ಪ ಕೆ ಬೊಕ್ಕ ಭಾಸ್ಕರ ರೈಕ್ಲೆಡ ಯಕ್ಷಗಾನ ನಾಟ್ಯಾಭ್ಯಾಸ ಕಲ್ಪೆರೆ ಸುರು ಮಲ್ತೆರ್. ಶಾಲೆಡ್ ಇಡೀ ಇರ್ಲ್ ಜೋಕ್ಲೇ ನಡಪಾಯಿನ ದೇವಿಮಹಾತ್ಮೆ ಆಟಡ್ ಏಸ ಪಾಡಿನೆನ್ ಇತ್ತೆಲಾ ನೆಂಪು ಮಲ್ತೊನ್ಪೆರ್.

ಅಯಿಡ್ಡ್ ಬೊಕ್ಕ ಮಾಂಬಾಡಿ ನಾರಾಯಣ ಭಟ್ರೆಡ ಯಕ್ಷಗಾನದ ಭಾಗವತಿಕೆ ಕಲ್ತೊಂಡೆರ್. ಕಾಲೇಜ್ ಕಲ್ಪುನಗ ಎನ್.ಎಸ್.ಎಸ್ ಶಿಬಿರಲೆಡ್ ಯಕ್ಷಗಾನಡ್ ಭಾಗವತಿಕೆ ಬೊಕ್ಕ ಏಸ ಮಲ್ತೊಂದಿತ್ತೆರ್. ಕಟೀಲ್ ಉಲ್ಲಂಜೆ ಬೊಕ್ಕ ಪಿಲಿಕುಲಡ್ ನಡತಿ ರಾಜ್ಯಮಟ್ಟದ ಎನ್.ಎಸ್.ಎಸ್ ಶಿಬಿರಲೆಡ್ ಮಾನಾದಿಗೆ ಪಡೆಯೆರ್. ಕಾಲೇಜ್ ಕಲ್ಪುನ ಪೊರ್ತು ಪುಸ್ತಕ ಓದುನ ಅಭ್ಯಾಸ ಇತ್ತ್ಂಡಲಾ ಪೂಂಜೆರ್ ಏಪಲ ಬರೆಯೆರೆ ಮನಸ್ ಮಲ್ತ್‌ಜೆರ್.

ಕಲ್ತ್‌ನ ಯಾವು ಎನ್ನಿದ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಸೇವಾನಿರತೆರಾದ್ ಕಲ್ಲಡ್ಕಡ್ ವೃತ್ತಿಜೀವನ ಸುರು ಮಲ್ತೆರ್. ಅವುಲೇ ರಡ್ಡ್ ಒರ್ಸೊ ಇತ್ತಿ ಪೂಂಜೆರೆಗ್ ಬಂಟ್ವಾಳಗ್ ವರ್ಗಾವಣೆ ಆಂಡ್. ಅಲ್ತ್ ಆಜಿ ತಿಂಗೊಲುಡು ಉತ್ತರಕನ್ನಡಗ್ ವರ್ಗಾವಣೆ ಆನಗ ಮದಿಮೆ ನಿಗಂಟ್ ಆಯಿನ ಕಾರಣಡ್ ಪೋಯರೆ ಆವಂದೆ ಬೇಲೆಗ್ ರಾಜಿ ಕೊರಿಯೆರ್.

ಬೆನ್ಕೆನೆ ದೇವೆರೆನ್ಪಿ ಉಡಲ ಅಂಗಲಾಪುದ ಪೂಂಜೆರ್ ಮದಿಮೆ ಆಯಿಬೊಕ್ಕ ಸಂಸಾರದ ತೇರ್ ಒಯ್ಪೆರೆಗಾದ್ ಕುಡ್ಲಡ್ ಹಾರ್ಡ್‌ವೇರ್ ಒಂಜೆಡ್ ಬೇಲೆಗ್ ಸೇರಿಯೆರ್. ಐನ್ ಒರ್ಸೊ ಅಲ್ಪನೆ ಬೆಂದಿನಾರೆಗ್, ಬದ್ಕ ಓಡೊ ಸರಿಟ್ಟೆ ಪೋವೊಂದುಂಡು ಪನ್ನಗ ಒಯಿಲೊಂಜಿ ಒಯ್ತ್ ಕಲ್ಲ್‌ಗ್ ಹಾಕಿಲೆಕಾಯಿನಿ ಆಯಿನ ಒಂಜಿ ಆಕ್ಸಿಡೆಂಟ್‌ಡ್ ಕಾರ್‌ಗ್ ಎಲುಕ್ಕು ಪೆಟ್ಟಾದ್, ನಡಪೆರೆ ಆವಂದೆ ರಡ್ಡ್ ವರ್ಷ ಕುಲ್ಲಿನಲ್ಪಾನಗ. ಬೇಲೆ ದಾಂತೆ ಕುಲ್ಲಿನಲ್ಪ ಆಯಿನ ಪೂಂಜೆರ್ ಚೂರು ಅಂಚಿಂಚಿ ಪೋಯರಾನಗ ವಾಮದಪದವುಡೊಂಜಿ ಕುಂಟುದಂಗಡಿಡ್ ಬೇಲೆಗ್ ಸೇರಿಯೆರ್.

ಮಲ್ಪಿ ಬೇಲೆ ತೃಪಿದಾಯಕ ಆಂಡ ಮಾತ್ರ ಜೀವನ ಸಂತೃಪ್ತ ಆಪುಂಡು ಪನ್ಪಿಲೆಕ ಸತೀಶ್ ಪೊಂಜೆರೆನ ಬದ್ಕ್‌ದ ಸುದೆ ಪರಿಪು ಒಂಜಿ ನಿಲೆ ತೂವೊಡಾಂಡ ಅಲ್ಪ ಆರೆಗ್ ಆದೆರ್ಪು ಆಯಿನಿ ಆರ್ ಎಲ್ಯ ಪ್ರಾಯಡ್ ಕಲ್ತ್‌ದಿತ್ತಿ ಯಕ್ಷಗಾನ ಭಾಗವತಿಕೆ.

ಭಾಗವತಿಕೆದ ಗಟ್ಟಿ ಪಂಚಾಂಗ ತನ್ನೊಲಯಿ ಇತ್ತಿನೆಡ್ ಸುಗಮ ಸಂಗೀತ, ಭಜನೆದಂಚಿ ಲೇಸ್‌ಲೆಡ್ ಪಾಲ್ ಪಡೆಯೆರೆ ಸುಲಭ ಆಂಡ್. ಅಲ್ಪಲ್ಪ ಭಜನಾ ಕಮ್ಮಟ ಬೊಕ್ಕ ಭಜನಾ ತಂಡಲೆ ಒಟ್ಟುಗು ಸ್ವರ ಸೇವೆಗ್ ಸುರು ಮಲ್ತೆರ್. ಹವ್ಯಾಸ ಆದ್ ಸುರು ಮಲ್ತಿ ಸ್ವರ ಸೇವೆ ಬೊಕ್ಕ ತನ್ನ ಬೇಲೆನ್ ಒಟ್ಟಿಗೆ ಕೊನೊಯೆರೆ ಆವಂದೆ ರಡ್ಡ್ ಓಡೊದ ಮಿತ್ತ್ ಕಾರ್ ದೀಲೆಕ ಅಂಚಿಗೊರ ಇಂಚಿಗೊರ ಒಚ್ಚುನ ಪೊರ್ತು ಹವ್ಯಾಸ ಆದಿತ್ತಿ ಸಂಗೀತನೇ ಬದ್ಕ್‌ಗಾಧಾರ ಆದ್ ಮಲ್ತೊಂದು ದುಂಬು ಇತ್ತಿನ ಬೇಲೆ ಬುಡಿಯೆರ್.

ನಿತ್ಯ ಭಜನೆಲೆಗ್ ಪೋವೊಂದು ಇತ್ತಿನ ಪೂಂಜೆರ್ ಅಲ್ಪ ಹಾರ್ಮೋನಿಯಂ ಬಾರ್ಸವುನೆನ್ ತೂದು ಅಯಿಕ್ಕ್ ಮರ್ಲಾಯೆರ್. ದೈವ ಕೃಪೆ ಬೊಕ್ಕ ಕಲ್ಪುನ ಅಂಗಲಾಪುದ ಉಡಲ್ ಒಂಜಾಯಿಕಾರಣ ಪೂಂಜೆರ್ ತೂವೊತೂವೊಂದು ಇತ್ತಿಲೆಕನೆ ತನ್ನಾತೆಗೆ ಹಾರ್ಮೋನಿಯಂ ಕಲ್ತೆರತ್ತಂದೆ, ಸಪ್ತಸ್ವರ ಪನ್ಪಿ ಕೂಟೊ ಕಟ್ಟೊಂದು ನಾಟಕಲೆಗ್ ಬೆರಿಸಂಗೀತ ಕೊರ್ಪುನ ಒಟ್ಟುಗು ಪದರಂಗೀತ, ಸುಗಮ ಸಂಗೀತ ಲೇಸ್ ಮಲ್ತೊಂದು ಜನ ಮನಸ್ ಗೆಂದೊಂದು ಬತ್ತ್ ಒಂಜಿ ದಿನ ಮಾತೆರ್ಲಾ ಮೆಚ್ಚಿದ್ ಕೊಂಡಾಡುನ, ದೈರೊಡು ಲೆತ್ತ್ ಲೇಸ್ ಒಪ್ಪವುನಂಚಿನ ಸಂಗೀತ ಕಲಾವಿದೆ ಆಯೆರ್.

ಅಯಿನ್ನ ಒಟ್ಟುಗು ತನ್ನ ಕಲ್ಪುನ ಅಂಗ್‌ಡ್ ಮೈಸೂರು ವಿಶ್ವವಿದ್ಯಾಲಯಡ್ದ್ ಅಂಚೆತೆರಪಿನ ಶಿಕ್ಷಣದ ಒರುಟು ರಾಜ್ಯಶಾಸ್ತ್ರಡ್ ಸ್ನಾತಕೋತ್ತರ ಪದವಿ ಮಲ್ತೆರ್. ಕೀಬೋರ್ಡ್ ಸೇರಿನಂಚ ಹಿನ್ನಲೆ ಸಂಗೀತದ ಬೇತೆ ಬೇತೆ ಮರ್ಗಿಲ್‌ದ ತೆರಿಯೊಂದು ಕಲ್ತೊಂದು ಬಂಟ ಸಮಾಜಡ್ ಹಿನ್ನಲೆ ಸಂಗೀತಡ್ ಬೇತೆ ಏರ್ಲಾ ಮಲ್ಪಂದಿಲೆಕ ಸಾಧನೆ ಮಲ್ತೆರ್. ತಾನ್ ಕಲ್ತಿ ಕಲ್ಪೊ ತನ್ನ ಉಲಯಿಯೇ ಉಪ್ಪುನ ಬದಲ್ ನಾಲ್ ಜನಕ್ಕ್ ಕಲ್ಪವುನ ಎಡ್ಡೆ ಪಂದ್ ಎನ್ನಿನ ಪೂಂಜೆರ್ ಕುಲಶೇಖರ, ಪೊಳಲಿ, ಕಿನ್ನಿಗೋಳಿ, ಬೆಳ್ತಂಗಡಿ, ಬೆಂಜನಪದವು ಸೇರಿನಂಚ ಮಸ್ತ್ ಕೋಡಿಡ್ ಜೋಕ್ಲೆಗ್, ಮಲ್ಲಕ್ಲೆಗ್, ಪೊಂಜೋವುನಕ್ಲೆಗ್ ಭಜನಾ ಕ್ಲಾಸ್ ಮಲ್ತೊಂದು, ಅಯಿತ್ತ ಒಟ್ಟುಗು ಸತ್ಸಂಗ, ಸನಾತನ ಸಂಸ್ಕೃತಿ, ಆಚಾರ ವಿಚಾರ ಜೋಕ್ಲೆಗ್ ತೆರಿಪಾವುನ ಒರುಟು ಬೇತೆ ಬೇತೆ ಗೊಬ್ಬುಲೆನ್ ಕೊರ್ಯರೆ ಸುರು ಮಲ್ತೆರ್.

ಏರೆಗ್ ಕುಡೊರಿಯನ್ ಬುಲೆಪಾವುನ ಮಲ್ಲ ಉಡಲ್ ಉಪ್ಪುಂಡಾ ಆಯಗೆ ತೆರಿಯಂದಿ ಲೆಕ ಆಯೆ ತನ್ನಾತೆಗೆ ಬಲತ್ತೊಂದು ಪೋಪೆ ಪನ್ಪಿ ಹಿರಿಯೆರೆ ಪಾತೆರದಂಚನೆ ಭಜನೆ, ಸಂಸ್ಕಾರ ಕಲ್ಪವೊಂದು ಒಟ್ಟುಗು ಕೆಲವು ದೋಸ್ತಿನಕ್ಲೆಗ್ ಪಿ.ಎಚ್.ಡಿ ಮಲ್ಪುನಕ್ಲೆನ ಪೊರ್ತು ಕ್ಷೇತ್ರ ಕಾರ್ಯಡ್ ಒಟ್ಟುಗು ಇತ್ತೊಂದು ಅಕ್ಲೆಗ್ ಮಾರ್ಗದರ್ಶನ ಮಲ್ತೊಂದು ಪೋಯಿಲೆಕನೆ ಜ್ಞಾನಭಂಡಾರ ದಿಂಜೊಂದು ಪೋಂಡು. ಒಟ್ಟುಗು ಪೂಂಜೆರ್ ಆರೆಗೆ ತೆರಿಯಂದಿಲೆಕ ಬಲತ್ತೊಂದು ಪೋಯೆರ್.

ಯೋಗ, ಧ್ಯಾನ, ಶಾಕಾಹಾರ, ಸಾತ್ವಿಕ ಜೀವನ ನಡಪಾವುನ ಸತೀಶ್ ಪೂಂಜೆರ್ನ ಕೈತಾಡೆ ಅಹಂಕಾರ, ಗರ್ವ ಏಪಲಾ ಕಾರ್ ದೀತ್‌ಜಿ. ಸಾಧನೆದ ಮಿತ್ತ ಮರ್ಗಿಲ ಬೊಲ್ಲಿ ದಾರಗೆ ಆದ್ ಮೆನ್ಕುನ ಪೂಂಜೆರ್ ಬುಲೆದ್ ಉಂತಿ ಕುರಲ್ದಂಚ ಬೂಮಿ ಮುಟ್ಟ ಬಗ್ಗುನ ರೀತಿ, ಸರಳ ಜೀವನ ಬೊಕ್ಕ ಸೌಮ್ಯ ಸ್ವಭಾವಡ್ ಮಾತೆರೆಗ್ಲಾ ಇಷ್ಟ ಆಪೆರ್. ವರ್ಷಡ್ 300ಡ್ದ್ ಜಾಸ್ತಿ ಭಜನೆ ಬೊಕ್ಕ 60 ಕೋಡಿಡ್ ಏಕಾಹ ಭಜನೆಲೆಗ್ ಅಂಚನೆ 200ಡ್ದ್ ಜಾಸ್ತಿ ಯಕ್ಷಗಾನ, ತಾಳಮದ್ದಳೆಗ್ ಭಾಗವತೆರಾದ್ ಸರಸ್ವತಿನ ಸೇವೆ ಮಲ್ಪುವೆರ್. ಕಟೀಲ್, ಬಪ್ಪನಾಡ್, ಸುಂಕದಕಟ್ಟೆ ಮೇಳಲೆಗ್ ತುರ್ತು ಪೊರ್ತುಡು ಬದಲಿ ಭಾಗವತೆರಾದ್ಲಾ ಯಕ್ಷ ಸೇವೆ ಮಲ್ಪುವೆರ್. ದಿನಟ್ ಪದಿನಾಜೆಡ್ದ್ 18 ಗಂಟೆದಾತ್ ಪೊರ್ತು ಸಂಗೀತಗೆ ದೀತಿನ ಪೂಂಜೆರೆಗ್ ಒರಿನ ಸಮಯಡ್ ಜಾಸ್ತಿ ಪೊರ್ತು ಒಂಜಿ ಕೋಡಿಡ್ದ್ ಬೊಕ್ಕೊಂಜಿ ಕೋಡಿಗ್ ಪೋಯರೆನೇ ಆಪುಂಡು. ಅವೆನ್ನ ಒಟ್ಟುಗು ಸಾಹಿತ್ಯ ಬರೆಪುನೆಡ್ಲಾ ಪೂಂಜೆರ್ ಬಾರಿ ಬಿರ್ಸೆ.

ಕಾಲೇಜ್‌ಡ್ ಡಿಗ್ರಿ ಕಲ್ಪುನ ಸಮಯಡ್ದ್ ಸಾಹಿತ್ಯ ಕ್ಷೇತ್ರಗ್ ಪಜ್ಜೆ ದೀನಾರ್ ಭಜನೆ ಕಲ್ಪವುನ ಪೊರ್ತುಗು ಬೋಡಾಪುಂಡು ಪಂದ್ ಸುಗಿಪು ಬೊಕ್ಕ ಕಿನ್ಯ ಕತೆ ಬರೆಪುನ ಒರುಟು ಸಾಹಿತ್ಯ ಕ್ಷೇತ್ರದ ತನ್ನ ಪಜ್ಜೆ ಗಟ್ಟಿ ಮಲ್ತೊಂಡೆರ್. ‘ಪುಷ್ಪತನಯ’ ಕಾವ್ಯನಾಮಡ್ ಕನ್ನಡ ಬೊಕ್ಕ ತುಳುಟ್ಟು ಕಬಿತೆ ಕಟ್ಟುನ ಆರ್ನ ಸಾಹಿತ್ಯ ಓದುನಕ್ಲೆಗ್ ಕುಡ ಕುಡ ಓದೊಡು ಪನ್ಪಿ ಅಂಗಲಾಪು ಪುಟ್ಟವುನವಂತೂ ಕಳು ಅತ್ತ್. ಅರ್ಥ, ಸತ್ವ ಒಟ್ಟುಗು ನೀತಿ ದಿಂಜಿ ಬರವು ಬರೆಪುನ ಪೂಂಜೆರ್ ಬೇತೆ ಬೇತೆ ಸಾಹಿತ್ಯ ಓದುನ ಒರುಟು ಸಾಹಿತ್ಯದ ಮರ್ಗಿಲ್‌ಡ್ ಸಾಧ್ಯ ಆಪುನಾತ್ ಕಲ್ತೊಂದು ಪೋಪೆರ್. ಭರತನಾಟ್ಯದ ಕಲೆ ಬೊಕ್ಕ ಅನುಭವಲಾ ಪೂಂಜೆರೆಗ್ ಉಂಡು.

ಓಂಕಾರ ಅಖಿಲೇಶ್ವರ ಭಜನಾ ಮಂಡಳಿದ ಖಾಯಂ ಪದುಕೆರಾದುಪ್ಪುನ ಪೂಂಜೆರ್ ಪೊಸ ಕಲ್ಪನೆಡ್ ‘ತೀರ್ಥಯಾತ್ರಾ’ ಪನ್ಪಿ ಭಜನಾ ಯಾತ್ರೆ ಮಲ್ಪುನ ಒರುಟು ಪ್ರತಿ ವರ್ಷ ದೇಶಡ್ ಸಂಚಾರ ಮಲ್ತೊಂದು ಬೇತೆ ಬೇತೆ ಪುಣ್ಯಕ್ಷೇತ್ರಲೆಡ್ ಕೀರ್ತನಾ ಸೇವೆ ಕೊರ್ಪೆರ್. ಯಡಿಯೂರು ಸಿದ್ದಗಂಗಾ ಮಠಟ್ ಭಜನೆ ಸೇವೆ ಕೊರ್ದು ಅಲ್ತ ಪೆರಿಯ ಸ್ವಾಮಿಲೆಡ್ದ್ ಆಶೀರ್ವಾದ ಬೊಕ್ಕ ಗೌರವ ತಮ್ಮನ ಪಡೆತಿನ ದಿನನ್ಲಾ ನೆಂಪುದ ಸಂಚಿಡ್ ಕೋತೊಂದೆರ್.

ಏಕಾಹ ಭಜನೆ ಒಂಜೆಕ್ 18 ಗಂಟೆ ಹಾರ್ಮೋನಿಯಂ ಬಾರ್ಸಯಿನ ಪೊರ್ತುನು ಪೆರ್ಮೆಡ್ ಪಟ್ಟೊನುನ ಪೂಂಜೆರ್ ಪೊಳಲಿ ದೇವಸ್ಥಾನದ ಬ್ರಹ್ಮಕಲಶದ ಪೊರ್ತು ನಿತ್ಯ ಅಪ್ಪೆನ ಸನ್ನಿಧಾನಡ್ ಭಜನಾ ಸೇವೆಗ್ ತನಡ್ದ್ ಶ್ರೀ ರಾಜರಾಜೇಶ್ವರಿ ಹಾರ್ಮೋನಿಯಂ ಬೊಕ್ಕ ಸಂಕೀರ್ತನ ಸೇವೆ ಮಲ್ಪದಲ್ ಪಂದ್ ಸಾರ್ಥಕತೆನ್ ಪಟ್ಟೊನ್ಪೆರ್. ಪುರಲ್, ಕಟೀಲ್, ಒಡಿಪು ಕೃಷ್ಣಮಠ ಸೇರಿನಂಚ ಮಸ್ತ್ ದೇವಸ್ಥಾನಲೆಡ್ ಸಂಗೀತ ಸೇವೆ ಮಲ್ತಿ ಪುಣ್ಯ ಸತೀಶ್ ಪೂಂಜೆರೆಗುಂಡು. ಅತ್ತಂದೆ ಅಜಾತಶತ್ರು ಪನ್ಪವೊನ್ನ ಪೂಂಜೆರೆಗ್ ಸುಮಾರ್ ಮಾನಾದಿಗೆಲಾ ಸಂದೀಂಡ್. ಆಂಡ ಮಾನಾದಿಗೆ, ಪ್ರಶಸ್ತಿಗ್ ಬಯಕಂದಿ ಪೂಂಜೆರ್ ತನ್ನ ಶಿಷ್ಯೆರೆಗ್ ಬರ್ಪಿ ಮಾನಾದಿಗೆನೇ ಎಂಕ್ ಮಾಮಲ್ಲ ತಮ್ಮನ ಬಲ್ಮನ ಪನ್ಪೆರ್.

ಕೆಲವು ಒರ್ಸೊದ ಪಿರವು ಮೂಡುಶೆಡ್ಡೆ ಭಜನಾ ಕೂಟೊದ ಪುಗರ್ತೆದ ಭಜಕೆ ಆದ್ ಜಿಲ್ಲಾಮಟ್ಟದ ಭಜನಾ ಪಂತೊಡು ಸುರುತ ಇನಾಮು ಪಡೆತೆರ್.

ಪೂಂಜೆರ್ ಕುಂದಾಪುರಡ್ ನಡತಿ ಉಡುಪಿ ಜಿಲ್ಲಾಮಟ್ಟದ ಭಜನಾ ಪಂತೊಡುಲಾ ಇನಾಮು ಗೆಂದಿನಾರ್. ಭಜನೆ, ಏಕಾಹ ಭಜನೆದೊಟ್ಟುಗು ನಲಿಕೆ ಭಜನೆಡ್ಲಾ ತನ್ನ ಚಾತಿರ್ಪು ಮೆರೆತೆರ್. ಕುಡ್ಲದ ನೆಹರೂ ಮೈದಾನಡ್ ನಡತಿ ಕುಣಿತಾ ಭಜನಾ ತಂಡ ಒಂಜೆಡ್ ಪದುಕೆ ಆದ್ ರಡ್ಡನೇ ಇನಾಮು ಪಡೆತೆರ್.
ಭವಿಷ್ಯಡ್ ತಾನೊರಿ ಹರಿಕಥಾ ದಾಸೆರ್ ಆದ್ ಮೆನ್ಕೊಡು ಪನ್ಪಿ ಅಂಗಲಾಪುದ ಪಂಡರೀಪುರತ ಪಾಂಡುರಂಗ ಭಕ್ತೆ ಆದುಪ್ಪುನ ಪೂಂಜೆರ್ ಸಂಗೀತಡ್ ಮಾತ್ರ ಅತ್ತಂದೆ ಹರಿಕಥೆತ ಕ್ಷೇತ್ರಡ್ಲಾ ಮೇರ್ನ ಪೊಲಬು ಉಂಡು. ಆಳ್ವಾಸ್ ನುಡಿಸಿರಿ ಲೇಸ್‌ಡ್ ಕರಿನ ಕೆಲವು ವರ್ಷಡ್ದಿಂಚಿ ‘ಹರಿಕೀರ್ತನಾ’ ಪನ್ಪಿ ಪುದರ್ಡ್ ಹರಿಕಥೆ ಮಲ್ಪುವೆರ್. ಒಡಿಪು ಮಠೊಟ್ಟುಲಾ ಹರಿಕೀರ್ತನಾ ಸೇವೆ ಮಲ್ತ್ ವಿಜಯ ವಿಠ್ಠಲ ಶ್ರೀ ಕೃಷ್ಣನ ಕೃಪೆ ಪಡೆತೆರ್.

ತುಳುನಾಡ ಜಾನಪದ ದರ್ಶನ ಪನ್ಪುನ ಸಂಗೀತಮಯ ಕಾರ್ಯಕ್ರಮದ ಒರುಟು 50 ಪ್ರದರ್ಶನ ಆಯಿನ ಮೊಕ್ಲೆನ ಕೂಟೊ ತಾಲೂಕು ಮಟ್ಟದ ವಿಶ್ವತುಳು ಸಮ್ಮೇಳನಡ್ ಮಾತೆರೆ ಪುಗಾರ್ತೆ ಪಡೆವೊಂದ್ಂಡ್.

ಕಡಬದ ಭಜನೋತ್ಸವ, ಸಾಣೂರು ಪದವು ಧರ್ಮಶಾಸ್ತ ಭಜನಮಂಡಲಿಲೆಡ್ದ್ ತಮ್ಮನ ಬಲ್ಮನ ಪಡೆಯಿನ ಪೂಂಜೆರ್ ತನ್ನ ಸಾಂಸ್ಕೃತಿಕ ಕ್ಷೇತ್ರದ ಆಯ್ಕೆ ಬೊಕ್ಕ ಸಾಧನೆದ ತಾದಿಗ್ ಮೂಲಪ್ರೇರಣೆ ಪಂದ್ ತನ್ನ ತಿದ್ಯಪ್ಪೆ ಅಂಚನೆ ನಟನಾ ಕ್ಷೇತ್ರಡ್ ಮಾಮಲ್ಲ ಕಲಾವಿದೆರಾಯಿನ ಶ್ರೀಮತಿ ಸರೋಜಿನಿ ಶೆಟ್ಟಿನ್ ತೋಜಾವುನ ಒಟ್ಟುಗು ದಿಂಜಿನ ಕಡ್ಯ ಅಲೆಂಕುಜಿ ಪನ್ಪಿ ಪಾತೆರಗ್ ಸರಿಯಾಯಿನ ಉದಾರ್ಮೆ ಪಂದೇ ಪನೊಲಿ. ಏತೇ ಬಚ್ಚೆಲ್ ಇತ್ತುಂಡಲಾ ಮೋನೆದ ಪ್ರಸನ್ನತೆ ಬೊಕ್ಕ ಉಡಲ ಉಲ್ಲಾಸ ಮಾಜಂದಿಲೆಕ ಮಾತೆರೆಡಲೊಂಜಾದ್ ಬುಡ್ಪುನಾರ್.

ಎಸ್.ವಿ ಎಸ್ ಕಾಲೇಜ್ ಬಂಟ್ವಾಳಡ್ ಕಲ್ಪಾದಿ ಆದುಪ್ಪುನ ನಯನಾ ಎಸ್ ಪೂಂಜ ಬೊಕ್ಕ ಮಗೆ ಸುಜ್ಞಾನ್ ಗೋಪಾಲ್‌ ಪೂಂಜೆರ್ನೊಟ್ಟುಗು ವಾಮದಪದವುಡು ಸಂತೃಪ್ತ ಬದ್ಕ್ ನಡಪವೊಂದುಪ್ಪುನ ಕಲಾಮಾತೆನ ಕೊಂಡಾಟದ ಮಗೆ ಸತೀಶ್ ಪೂಂಜೆರೆ ಬದ್ಕ ನಂದಲ ನಿರಂತರ ಬೊಲ್ಪು ಪಸರೊಂದುಪ್ಪಡ್. ‘ಆಸರೆ’ದ ಒಸರ್ ಸಂಗೀತ ಸಾಮ್ರಾಜ್ಯಡ್ ಪಸರೊಂದುಪ್ಪಡ್.

-ಶ್ರೀವಿ ತುಳುನಾಡ್

Contact for News and Advertisement: info@kalpa.news Whatsapp: 9481252093