ಸಿನಿಮಾ ಕೂಡಾ ಒಂದು ಗಂಭೀರ ಕಲಿಕೆ: ವೀರಭದ್ರಪ್ಪ

ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ

ಶಂಕರಘಟ್ಟ: ಉನ್ನತ ಶಿಕ್ಷಣದಲ್ಲಿರುವ ವಿದ್ಯಾರ್ಥಿಗಳು ಮತ್ತು ಪ್ರಜ್ಞಾವಂತರು ಸಿನಿಮಾವನ್ನು ಮನರಂಜನೆಯಾಚೆಗೆ ಕಲಿಕೆಯಾಗಿ ಪರಿಗಣಿಸಿ ವೀಕ್ಷಿಸಬೇಕು. ಗಂಭೀರ ಸಿನಿಮಾಗಳಲ್ಲಿ ಮಾನವನಿರ್ಮಿತ ಮತ್ತು ಪಾಕೃತಿಕ ವಿಕೋಪಗಳು, ಸಾಂಕ್ರಾಮಿಕಗಳ ಸಂದರ್ಭಗಳನ್ನು ನಿರ್ವಹಿಸಿದ ಕುರಿತ ಗಂಭೀರ ಮಾಹಿತಿಗಳ ಕಲಿಕೆಯಿರುತ್ತದೆ ಎಂದು ಕುವೆಂಪು ವಿಶ್ವವಿದ್ಯಾಲಯದ ಕುಲಪತಿ ಪ್ರೊ. ಬಿ.ಪಿ. ವೀರಭದ್ರಪ್ಪ ಅಭಿಪ್ರಾಯಪಟ್ಟರು.

ಕುವೆಂಪು ವಿವಿಯ ಪತ್ರಿಕೋದ್ಯಮ ಮತ್ತು ಸಮೂಹ ಸಂವಹನ ವಿಭಾಗದಿಂದ ವಿವಿಯ ಬಸವ ಸಭಾ ಭವನದಲ್ಲಿ ಪ್ರತಿ ವರ್ಷದಂತೆ ಈ ಬಾರಿ ಮಾ.೧ರಿಂದ ೬ರವರೆಗೆ ೧೧ನೇ ಸಹ್ಯಾದ್ರಿ ಸಿನಿಮೋತ್ಸವವನ್ನು ಆಯೋಜಿಸಲಾಗಿತ್ತು.

ಬದುಕುಳಿವಿಗಾಗಿ ಹೋರಾಟ ವಿಷಯಾಧರಿತ ಸಿನಿಮೋತ್ಸವ ಉದ್ಘಾಟಿಸಿ ಮಾತನಾಡಿದ ಅವರು ಚಲನಚಿತ್ರಗಳನ್ನು ಕೇವಲ ಮನರಂಜನೆ ದೃಷ್ಟಿಯಿಂದ ನೋಡಬಾರದು. ಇತ್ತೀಚಿನ ದಿನಮಾನಗಳಲ್ಲಿ ಪ್ರವಾಹ, ಚಂಡಮಾರುತ, ಬರ, ಸಾಂಕ್ರಾಮಿಕ ರೋಗಗಳ ಉಲ್ಬಣ ಹೆಚ್ಚಾಗುತ್ತಿದೆ. ಅವುಗಳ ಕುರಿತು ನಿರ್ಮಾಣವಾಗಿರುವ ಸಿನಿಮಾಗಳು ವಿಪತ್ತನ್ನು ನಿರ್ವಹಿಸಬಹುದಾದ ಉಪಾಯಗಳನ್ನು ತಿಳಿಸಿಕೊಡುತ್ತವೆ. ಹೀಗಾಗಿ ಗಂಭೀರ ವಿಷಯ, ಸಂದೇಶಗಳನ್ನು ನೀಡುವಂತ ಚಿತ್ರಗಳನ್ನು ಕಲಿಕೆಯಾಗಿ ಪರಿಗಣಿಸಬೇಕು ಎಂದರು.

ಪ್ರಾಸ್ತಾವಿಕ ನುಡಿಗಳನ್ನಾಡಿದ ವಿಭಾಗದ ಪ್ರಾಧ್ಯಾಪಕ ಡಾ. ಪೂರ್ಣಾನಂದ, ವಿಜ್ಞಾನ ತಂತ್ರಜ್ಞಾನ ಬೆಳದಂತೆ ಮಾನವನು ತನ್ನ ಜೀವನ ಮಾತ್ರವಲ್ಲದೇ ಸಮಸ್ತ ಪ್ರಕೃತಿಯೇ ತನ್ನ ಹಿಡಿತದಲ್ಲಿದೆ ಎಂದು ಭಾವಿಸಿದ್ದಾನೆ. ಅವನ ಕೈಮೀರಿದ ಪ್ರಾಕೃತಿಕ ವಿಕೋಪಗಳು, ಸಾಂಕ್ರಾಮಿಕ ರೋಗಗಳು ಪ್ರಕೃತಿಯ ಮಹತ್ವವನ್ನು ಮತ್ತು ಅದರೊಂದಿಗೆ ಸಹಬಾಳ್ವೆ ನಡೆಸಬೇಕಾದ ರೀತಿ ನೀತಿಯ ಸಂದೇಶಗಳನ್ನು ರವಾನಿಸುತ್ತವೆ. ಈ ಹಿನ್ನೆಲೆಯಲ್ಲಿ ವಿಪತ್ತಿನ ವಿಷಯಗಳ ಸುತ್ತ ನಿರ್ಮಾಣವಾಗುವ ಸಿನಿಮಾಗಳು ಪ್ರಮುಖ ಕಲಿಕೆ ಎಂದು ತಿಳಿಸಿದರು.

ಈ ಸಂದರ್ಭದಲ್ಲಿ ವಿಭಾಗದ ಉಪನ್ಯಾಸಕರಾದ ಡಾ. ಸತೀಶ್, ಡಾ. ವರ್ಗೀಸ್, ಡಾ. ಸತ್ಯಪ್ರಕಾಶ್, ಸೇರಿದಂತೆ ವಿವಿಧ ವಿಭಾಗಗಳ ವಿದ್ಯಾರ್ಥಿಗಳು ಮತ್ತು ಅಧ್ಯಾಪಕರು ಹಾಜರಿದ್ದರು.

2010ರ ಚಾರ್ಲಿಚಾಪ್ಲಿನ್ ಸಿನಿಮಾಗಳೊಂದಿಗೆ ಆರಂಭವಾದ ಸಿನಿ ಸಂಭ್ರಮವು, ನಾಗರಿಕ ಹಕ್ಕುಗಳು, ವಲಸೆ ಕಥಾದರಿತ ಚಿತ್ರಗಳು, ಸಾಂಸ್ಕೃತಿಕ ಸಂಘರ್ಷ, ಇರಾನಿ ಸಿನಿಮಾಗಳು ಸೇರಿದಂತೆ ವಿವಿಧ ವಿಷಯಗಳಾಧರಿತ ಸಿನಿಮೋತ್ಸವಗಳನ್ನು ವಿಭಾಗವು ಆಯೋಜಿಸಿದೆ. ಈ ಬಾರಿಯ ಸಿನಿಮೋತ್ಸವದಲ್ಲಿ ಕೋವಿಡ್-19 ಸಂಕಷ್ಡದ ಹಿನ್ನೆಲೆಯಲ್ಲಿ ಬದುಕುಳಿವಿಗಾಗಿ ಹೋರಾಟದ ಚಲನಚಿತ್ರ ವಿಷಯ ಆಯ್ಕೆಮಾಡಿದ್ದು, 2002-2004ರ ಸಾಸ ಮತ್ತು ಫ್ಲೂ ಸಾಂಕ್ರಾಮಿಕ ರೋಗದ ಕುರಿತ ಚಿತ್ರ “ಕಂಟೀಜಿಯನ್”, ಸತ್ಯಜಿತ್ ರೇ ಅವರು ಗಣಶತ್ರು, ಜಪಾನಿ ನಿರ್ದೇಶಕ ಅಕಿರಾ ಕುರಸೋವಾ ಅವರು 1952ರಲ್ಲಿ ನಿರ್ದೇಶಿಸಿದ “”ಇಕಿರು”, ಮಲಯಾಳಂನ ಅರುವಿ, 1995ರಲ್ಲಿ ಅಮೇರಿಕಾದಲ್ಲಿ ತೆರೆಕಂಡ ಔಟ್‌ಬ್ರೇಕ್ ಚಿತ್ರಗಳನ್ನು ಪ್ರದರ್ಶಿಸಲಾಗುತ್ತಿದೆ.

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9481252093 – info@kalpa.news