ಕಲ್ಪ ಮೀಡಿಯಾ ಹೌಸ್ | ಅಥಣಿ (ಬೆಳಗಾವಿ) |
ಬೆಳಗಾವಿ (Belgaum) ಜಿಲ್ಲೆಯ ಅಥಣಿ (Athani) ತಾಲೂಕಿನ ಪಟ್ಟದ ಮರುಳಶಂಕರ ದೇವರು ಕನ್ನಡ ಮಾಧ್ಯಮ ಶಾಲೆಯ 1997-2007ನೇ ಸಾಲಿನ ಹಳೆಯ ವಿದ್ಯಾರ್ಥಿಗಳ ಸ್ನೇಹ ಮಿಲನ ಹಾಗೂ ‘ಅಕ್ಷರದ ನೆನಪು’ ಗುರುವಂದನಾ (Guruvandane) ಕಾರ್ಯಕ್ರಮವು ಭಾವನಾತ್ಮಕ ಹಾಗೂ ಅರ್ಥಪೂರ್ಣವಾಗಿ ನಡೆಯಿತು. ಸುಮಾರು 25 ವರ್ಷಗಳ ಬಳಿಕ ಹಳೆಯ ವಿದ್ಯಾರ್ಥಿಗಳು ಒಂದೆಡೆ ಸೇರಿ ತಮ್ಮ ಶಾಲಾ ದಿನಗಳ ನೆನಪುಗಳನ್ನು ಮೆಲುಕು ಹಾಕುವುದರ ಜತೆಗೆ, ತಮಗೆ ಅಕ್ಷರ ಜ್ಞಾನ ಹಾಗೂ ಜೀವನದ ಮೌಲ್ಯಗಳನ್ನು ಕಲಿಸಿದ ಗುರುಗಳನ್ನು ಗೌರವಿಸಿದರು.
ಸಸಿಗೆ ನೀರು ಎರೆಯುವ ಮೂಲಕ ಕಾರ್ಯಕ್ರಮಕ್ಕೆ ಸಾಂಕೇತಿಕವಾಗಿ ಚಾಲನೆ ನೀಡಲಾಯಿತು. ಪೂಜ್ಯ ಮರುಳಸಿದ್ದ ಸ್ವಾಮೀಜಿಯವರ ದಿವ್ಯ ಸಾನಿಧ್ಯದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಶಾಲೆಯ ಆಡಳಿತ ಮಂಡಳಿಯ ನಿರ್ದೇಶಕರು, ಶಿಕ್ಷಕ ವೃಂದ ಹಾಗೂ ಹಳೆಯ ವಿದ್ಯಾರ್ಥಿಗಳು ಪಾಲ್ಗೊಂಡಿದ್ದರು.
ವಿದ್ಯಾರ್ಥಿನಿಯರ ನಿಷ್ಠೆ, ಸಮಯಪ್ರಜ್ಞೆ ಪ್ರಶಂಸನೀಯ: ರಾಮನಗೌಡ ಪಾಟೀಲ
ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದ ಶಾಲೆಯ ಆಡಳಿತ ಮಂಡಳಿ ನಿರ್ದೇಶಕ ರಾಮನಗೌಡ ಪಾಟೀಲ, ಕುಟುಂಬದ ಜವಾಬ್ದಾರಿಗಳು ಹಾಗೂ ಗೃಹಸ್ಥ ಜೀವನದ ನಡುವೆಯೂ ತಮ್ಮ ಗುರುಗಳಿಗೆ ಗೌರವ ಸಲ್ಲಿಸಲು ಹಳೆಯ ವಿದ್ಯಾರ್ಥಿನಿಯರು ತೋರಿದ ಆಸಕ್ತಿ, ನಿಷ್ಠೆ ಹಾಗೂ ಸಮಯಪ್ರಜ್ಞೆ ಪ್ರಶಂಸನೀಯವಾಗಿದೆ ಎಂದರು.
ಸೆಪ್ಟೆಂಬರ್ 27ರ ‘ಮಗಳ ದಿನಾಚರಣೆ’ಯನ್ನು ಸ್ಮರಿಸಿ ಶುಭಾಶಯ ಕೋರಿದ ಅವರು, ಭಾರತೀಯ ಸಂಸ್ಕೃತಿಯಲ್ಲಿ ಗುರುವಿಗೆ ಅತ್ಯುನ್ನತ ಸ್ಥಾನವಿದೆ ಎಂದು ಹೇಳಿದರು.
‘ಗುರು ಬ್ರಹ್ಮ, ಗುರು ವಿಷ್ಣು, ಗುರು ದೇವೋ ಮಹೇಶ್ವರಃ’ ಎಂಬ ಶ್ಲೋಕದಂತೆ ಗುರುವಿಗೆ ತ್ರಿಮೂರ್ತಿಗಳ ಸ್ಥಾನ ನೀಡಲಾಗಿದೆ. ಗುರು ಕೇವಲ ಪಠ್ಯಪುಸ್ತಕದ ಅಕ್ಷರಗಳನ್ನು ಕಲಿಸುವ ವ್ಯಕ್ತಿಯಲ್ಲ; ಶಿಷ್ಯರ ಬದುಕಿಗೆ ಆಕಾರ ನೀಡುವ ಶಿಲ್ಪಿ. ಶಿಕ್ಷಣದ ಜತೆಗೆ ಜೀವನದ ಮೌಲ್ಯಗಳು, ಶಿಸ್ತು, ಮಾನವೀಯತೆ ಹಾಗೂ ಸತ್ಯದ ಹಾದಿಯಲ್ಲಿ ಬದುಕುವುದನ್ನು ಕಲಿಸಿಕೊಟ್ಟ ಗುರುಗಳನ್ನು ಸದಾ ಗೌರವಿಸುವುದು ಪ್ರತಿಯೊಬ್ಬರ ಕರ್ತವ್ಯ ಎಂದು ಅವರು ಹೇಳಿದರು.
Athani : ನಿಷ್ಕಲ್ಮಶ ಸ್ನೇಹವೇ ಜೀವನದ ದೊಡ್ಡ ಆಸ್ತಿ: ಮರುಳಸಿದ್ದ ಸ್ವಾಮೀಜಿ
ಕಾರ್ಯಕ್ರಮದ ಸಾನಿಧ್ಯ ವಹಿಸಿ ಆಶೀರ್ವಚನ ನೀಡಿದ ಪೂಜ್ಯ ಮರುಳಸಿದ್ದ ಸ್ವಾಮೀಜಿಯವರು, ಹಳೆಯ ವಿದ್ಯಾರ್ಥಿಗಳ ‘ಸ್ನೇಹ ಮಿಲನ ಮತ್ತು ಗುರುವಂದನೆ’ ಕಾರ್ಯಕ್ರಮವು ಕೇವಲ ಔಪಚಾರಿಕ ಸಮಾರಂಭವಲ್ಲ. ಇದು ಹಳೆಯ ನೆನಪುಗಳನ್ನು ಮತ್ತೆ ಜೀವಂತಗೊಳಿಸುವ ಹಾಗೂ ಗುರುಗಳ ಮೇಲಿನ ಕೃತಜ್ಞತೆಯನ್ನು ವ್ಯಕ್ತಪಡಿಸುವ ಅಪೂರ್ವ ಸಂದರ್ಭವಾಗಿದೆ ಎಂದು ಹೇಳಿದರು.
ಗುರು ಎಂದರೆ ಅಜ್ಞಾನದ ಕತ್ತಲೆಯನ್ನು ದೂರ ಮಾಡಿ ಜ್ಞಾನದ ಬೆಳಕನ್ನು ತೋರಿಸುವ ಮಾರ್ಗದರ್ಶಕ. ತಾನು ಸವೆದು ಶಿಷ್ಯರ ಜೀವನವನ್ನು ಉಜ್ವಲಗೊಳಿಸುವವನೇ ನಿಜವಾದ ಗುರು. ಅಂತಹ ಗುರುಗಳನ್ನು ವರ್ಷಗಳ ನಂತರವೂ ನೆನಪಿಸಿಕೊಂಡು ಗೌರವಿಸುತ್ತಿರುವುದು ಹಳೆಯ ವಿದ್ಯಾರ್ಥಿಗಳಲ್ಲಿರುವ ಕೃತಜ್ಞತಾ ಭಾವಕ್ಕೆ ಸಾಕ್ಷಿಯಾಗಿದೆ ಎಂದರು.
ಜೀವನದಲ್ಲಿ ದೊರೆಯುವ ದೊಡ್ಡ ಆಸ್ತಿಗಳಲ್ಲಿ ಉತ್ತಮ ಸ್ನೇಹವೂ ಒಂದು. ಯಾವುದೇ ಸ್ವಾರ್ಥವಿಲ್ಲದ ನಿಷ್ಕಲ್ಮಶ ಸ್ನೇಹವು ಮನಸ್ಸಿಗೆ ನೆಮ್ಮದಿ ನೀಡುತ್ತದೆ. ಜೀವನದಲ್ಲಿ ಎಷ್ಟೇ ವರ್ಷಗಳು ಕಳೆದರೂ, ಎಷ್ಟೇ ಎತ್ತರಕ್ಕೆ ಬೆಳೆದರೂ ಬಾಲ್ಯ ಹಾಗೂ ಶಾಲಾ ದಿನಗಳ ಸ್ನೇಹವನ್ನು ಉಳಿಸಿಕೊಂಡು ಹೋಗಬೇಕು ಎಂದು ಸಲಹೆ ನೀಡಿದರು.
ಕಷ್ಟ-ಸುಖದ ಸಂದರ್ಭದಲ್ಲಿ ಒಬ್ಬರಿಗೊಬ್ಬರು ಹೆಗಲಾಗಿ ನಿಲ್ಲುವುದೇ ನಿಜವಾದ ಸ್ನೇಹದ ಧರ್ಮ. ಸಮಾಜದಲ್ಲಿ ಎಷ್ಟೇ ದೊಡ್ಡ ಸ್ಥಾನಮಾನ ಗಳಿಸಿದರೂ ವಿನಯ ಮತ್ತು ಕೃತಜ್ಞತೆಯನ್ನು ಮರೆಯಬಾರದು. ತಂದೆ-ತಾಯಿ, ಗುರು-ಹಿರಿಯರನ್ನು ಸದಾ ಗೌರವಿಸುವ ಮೂಲಕ ಉತ್ತಮ ಜೀವನ ರೂಪಿಸಿಕೊಳ್ಳಬೇಕು ಎಂದು ಆಶೀರ್ವದಿಸಿದರು.
ಮತ್ತೆ ಬಾಲ್ಯದ ದಿನಗಳಿಗೆ ಮರಳಿದ ಅನುಭವ
ಹಳೆಯ ವಿದ್ಯಾರ್ಥಿ ಶಿವಾನಂದ ಮಾತನಾಡಿ, ವೃತ್ತಿ, ಸಂಸಾರ ಮತ್ತು ವಿವಿಧ ಜವಾಬ್ದಾರಿಗಳ ನಡುವೆ ತೊಡಗಿಸಿಕೊಂಡಿದ್ದ ಎಲ್ಲರೂ ಈ ಸ್ನೇಹ ಮಿಲನದ ಮೂಲಕ ಮತ್ತೆ ತಮ್ಮ ಬಾಲ್ಯದ ಶಾಲಾ ದಿನಗಳಿಗೆ ಮರಳಿದ ಅನುಭವವಾಗಿದೆ ಎಂದು ಹೇಳಿದರು.
ಶಾಲೆಯಲ್ಲಿ ಕಳೆದ ದಿನಗಳು, ಸ್ನೇಹಿತರೊಂದಿಗಿನ ಒಡನಾಟ ಹಾಗೂ ಗುರುಗಳ ಮಾರ್ಗದರ್ಶನವನ್ನು ನೆನಪಿಸಿಕೊಳ್ಳಲು ಈ ಕಾರ್ಯಕ್ರಮ ಅವಕಾಶ ಕಲ್ಪಿಸಿದೆ. ಪಠ್ಯದ ಜತೆಗೆ ಜೀವನದ ಮೌಲ್ಯಗಳನ್ನು ಕಲಿಸಿ ಸಮಾಜದ ಜವಾಬ್ದಾರಿಯುತ ಪ್ರಜೆಗಳನ್ನಾಗಿ ರೂಪಿಸಿದ ಗುರುಗಳಿಗೆ ‘ಅಕ್ಷರದ ನೆನಪು’ ಕಾರ್ಯಕ್ರಮದ ಮೂಲಕ ಗೌರವ ಸಲ್ಲಿಸುತ್ತಿರುವುದು ಸಂತಸ ತಂದಿದೆ ಎಂದರು.
ಗುರು-ಶಿಷ್ಯರ ಬಾಂಧವ್ಯಕ್ಕೆ ಸಾಕ್ಷಿಯಾದ ಕಾರ್ಯಕ್ರಮ
25 ವರ್ಷಗಳ ಬಳಿಕ ಒಂದೆಡೆ ಸೇರಿದ ಹಳೆಯ ವಿದ್ಯಾರ್ಥಿಗಳು ಪರಸ್ಪರ ಹಳೆಯ ನೆನಪುಗಳನ್ನು ಹಂಚಿಕೊಂಡರು. ಶಾಲಾ ದಿನಗಳಲ್ಲಿ ತಮ್ಮೊಂದಿಗೆ ಇದ್ದ ಸ್ನೇಹಿತರು, ಶಿಕ್ಷಕರು ಹಾಗೂ ಅಂದಿನ ಘಟನೆಗಳನ್ನು ಮೆಲುಕು ಹಾಕಿದರು. ಹಲವು ವರ್ಷಗಳ ಅಂತರದ ಬಳಿಕ ಮತ್ತೆ ಭೇಟಿಯಾದ ಸ್ನೇಹಿತರಲ್ಲಿ ಸಂಭ್ರಮದ ವಾತಾವರಣ ನಿರ್ಮಾಣವಾಗಿತ್ತು.
ಕಾರ್ಯಕ್ರಮವು ಹಳೆಯ ವಿದ್ಯಾರ್ಥಿಗಳ ನಡುವಿನ ಬಾಂಧವ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸುವುದರ ಜತೆಗೆ, ತಮ್ಮ ಬದುಕಿಗೆ ದಾರಿ ತೋರಿದ ಶಿಕ್ಷಕರಿಗೆ ಕೃತಜ್ಞತೆ ಸಲ್ಲಿಸುವ ವೇದಿಕೆಯಾಯಿತು.
Also Read>> ಶಿವಮೊಗ್ಗ, 5 ವರ್ಷದಿಂದ ತಲೆಮರೆಸಿಕೊಂಡಿದ್ದ ವ್ಯಕ್ತಿ ಬಂಧನ, ಏನಿದು ಪ್ರಕರಣ?
ಕಾರ್ಯಕ್ರಮದಲ್ಲಿ ಆಡಳಿತ ಮಂಡಳಿ ನಿರ್ದೇಶಕರಾದ ಡಿ.ಎಸ್. ಗೊಟ್ಟಿ, ಬಸವರಾಜ ಕೋಟಿ, ರವಿ ಪಾಟೀಲ, ಸುರೇಶ ಹೊನ್ನಳ್ಳಿ, ಸೋನಕರ, ಮುರುಗೇಪ್ಪ ಗೇಪ ದಿವಾನಮಳ, ಬಡಕಂಬಿ, ವಿಜಯ ಹಿರೇಮಠ, ಮಲ್ಲನಗೌಡ ಪಾಟೀಲ, ಆರತಿ ಜೋಶಿ, ಮಮದಾಪೂರ, ಪ್ರಕಾಶ ದೊಡ್ಡನವರ, ಶೋಭಾ ಉಕ್ಕಲಿ, ಭಾರತಿ ಕೊಪ್ಪದ, ಮಠಪತಿ, ಮಹಾಂತೇಶ ಕಾವೇರಿ, ಅರವಿಂದ ಮೂರನಾಳ, ಸುರೇಶ ಕಟ್ಟಿ, ಶಂಕರ ಕಮತಗಿ, ಶಾಂತಾ ಅಡಹಳ್ಳಿ, ಶಿವಪುತ್ರ ಕೋತ, ಬಸವರಾಜ ಯಳ್ಳೂರ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
ಶಾಲೆಯ ಮುಖ್ಯೋಪಾಧ್ಯಾಯಿನಿ ನಿರ್ಮಲಾ ಚನಗೌಡರ, ಬಸವರಾಜ ಕನ್ನಾಳ, ಬಿ.ಆರ್. ಜನಗೌಡ, ಸಂಗಮೇಶ ಚನಗೌಡರ, ಕಲ್ಪನಾ ಅಂಬಲಿ, ಗುರುಬಸು ದೊಡ್ಡನವರ, ಶಿವಲೀಲಾ ಮಮದಾಪೂರ, ಕಲ್ಯಾಣಕುಮಾರ ಪೂಜಾರಿ, ರಾಜೇಶ್ವರಿ ಒಡೆಯರ, ಎ.ಬಿ. ಮುಧೋಳ ಹಾಗೂ ಶಾಲೆಯ ಶಿಕ್ಷಕ ವೃಂದದವರು ಮತ್ತು ಹಳೆಯ ವಿದ್ಯಾರ್ಥಿಗಳು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.
ಹಳೆಯ ವಿದ್ಯಾರ್ಥಿಗಳ ಪುನರ್ಮಿಲನ, ಗುರುಗಳ ಸನ್ಮಾನ ಹಾಗೂ ಬಾಲ್ಯದ ನೆನಪುಗಳ ಹಂಚಿಕೆಯ ಮೂಲಕ ನಡೆದ ‘ಸ್ನೇಹ ಮಿಲನ’ ಮತ್ತು ‘ಅಕ್ಷರದ ನೆನಪು’ ಕಾರ್ಯಕ್ರಮವು ಗುರು-ಶಿಷ್ಯರ ಬಾಂಧವ್ಯದ ಮಹತ್ವವನ್ನು ಮತ್ತೊಮ್ಮೆ ಸಾರಿತು.
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news
