ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ
ಬಯ್ಯದ ಏಳ್ ಗಂಟೆದ ಪೊರ್ತು ನೇಸರೆ ಪಗೆಲ್ ಇಡೀ ಬೆಂದ್‌ದ್ ತನನ್ ತಾನ್ ಪೊತ್ತಾವೊಂದ್ ಲೋಕೊರ್ಮೆ ಬೊಲ್ಪುನ್ ಪರಡಾದ್ ಎನ್ನ ಇನಿತ ಬೇಲೆ ಮುಗಿಂಡ್ ಪಂದ್ ನೆಮ್ಮದಿಡ್ ರಡ್ಡುಸುಲ್ ಬುಡೊಂದ್ ಓಕುಳಿ ರಂಗ್‌ನ್ ನಾಲ್ ದಿಕ್ಕ್‌ಗ್‌ಲಾ ಪರಸಾರವೊಂದ್ ಗಿಡಮರತ ನಡುಟ್ ದೆಂಗ್‌ದ್ ಕುಲ್ಲುನ ಗೊಬ್ಬುನ್ ಗೊಬ್ಬೊಂದ್ ಮೆಲ್ಲ ಮೆಲ್ಲ ಕಂತೊಂದ್ ಇರ್ಲ್‌ದ ಬಾನೊದರಸೆ ಚಂದ್ರಗ್ ಜಾಗೆ ಮಲ್ತ್‌ದ್ ಕೊರೊಂದಿಪ್ಪುನ ಪೊರ್ಲುನ್ ಪಕ್ಕಿಲು ಬಾನೊಡ್ ತೂವೊಂದ್ ಕುಸಿ ಗಮ್ಮತ್‌ಡ್ ಮರತ ಇಡೆತ ಗೂಡು ಪನ್ಪಿನ ಅರಮನೆದಂಚಿನ ಇಲ್ಲಡ್ ಮೋಕೆದ ಕಿನ್ನಿಲೆನ್ ತೂದ್ ಎದ್ಕೊನುನ ಉಮೇದ್‌ಡ್ ಅಕ್ಲೆಗಾದ್ ಪಗೆಲ್ ಇಡೀ ಬೆಂದ್‌ದ್ ಕಂತಿನ ಬಂಜಿಗ್ ಪಾಡುನ ಅರಿಬಾರ್‌ನ್ ಬಾಯಿಡ್ ದೀವೊಂದ್ ರಾವೊಂದಿತ್ತ.ಪೆತ್ತ ಕೈಕೆಂಜಿಲು ಕಂಡ ಬೊಟ್ಟು ಬೈಲ್‌ ಇಡೀ ತಿರ್ಗ್‌ದ್ ತಿಕ್ಕಿನ ಪಜಿರ್ ತಪ್ಪುನ್ ಬಂಜಿಗ್ ಪಾಡೊಂದ್ ಪೊರ್ತು ಕಂತ್ಂಡ್ ಪಂದ್ ಕಿದೆಕ್ ಸೇರ್ದ್ ಇಲ್ಲದ ಗುರ್ಕಾರೆ ಗುರ್ಕಾದಿ ಕಲತ್‌ದ್ ದೀಪುನ ಅರ್ಕಂಜಿ ಬಾಜೆಲ್‌ಗ್ ಕಾತೊಂದಿತ್ತಡ,ಕೋರಿದ ಕಿನ್ನಿ ಪೆರಡೆ ಕೋರಿದ ಪಿರವುಡೆ ಮೆಲ್ಲ ಗೂಡ್‌ಗ್ ನೂರ್ಂಡ ಪೂಂಜೆ ರೆಕ್ಕೆನ್ ಪರಡಾಡ್ ಪೆರ್ಮೆಡ್ ಒರ ಅರಬಾಯಿ ಕೊರ್ದು ಡಬಕ್ಕ ಲಾಗಿದ್ ರಾದ್ ಇಲ್ಲೆದ್ರ್‌ದ ಬೀಜ ಮರತ ಕೊಡೀಟ್ ಪೊದ್ ಕುಲ್ಲುದ್ ಬಿರ್ದ್‌ಡ್ ಅಂಚಿಂಚಿ ಮಸೆಲ್‌ದ್ ತೂವೊಂದಿತ್ತ್ಂಡ.
ಕಾಡ್‌ದ ನಡುಟ್ ಬಾನೊದಂಚಿ ಬುಲೆದ್ ಉಂತಿನ ಮಲ್ಲ ಮಲ್ಲ ಮರಕುಲೆನ ಕೊಡಿಟ್ ಪಕ್ಕಿಲು ರಾದ್ ಬತ್ತ್‌ದ್ ಕುಲ್ಲೊಂದಿತ್ತಡ ಅವ್ವೆ ಮರಕುಲೆನ ಮುದೆಲ್‌ಡ್ ದಪ್ಪಡ್ ಪರಡಿನ ಎಲ್ಯ ಎಲ್ಯ ಪುದೆಲ್ದ ನಡುಟ್ ಬೊಲ್‌ದ್ ರಂಗ್‌ಡ್ ಮಿನ್ಕುನ ಮುಗ್ಗೆರ್‌ಲು ಸರ ಸರ ಪಂದ್ ಪಾರೊಂದಿತ್ತ.ಒರಾನೆ ನೆಲ ಮೇಲ್ ಬಾನೊ ತಿರ್ತ್ ಮಿತ್ತ್ ಆಯ್‌ಲೆಕ್ಕ ‘ಗುಜುಮ್ಮ್ ದಿಡಿಮ್ಮ್’ ಪಂದ್ ಪಾದೆ ಪುಡಯಿನಂಚ ಕೆಬಿ ಪೊಟ್ಟಾಪಿಲೆಕ್ಕ ಬತ್ತಿನ ಮಲ್ಲ ಸಬ್ದೊಗ್ ಮರತ ಇಡೆತ ಗೂಡ್‌‌ಡ್ ಪಗೆಲ್ ಇಡೀ ಬೆನ್ನ್‌ದ್ ಸಾಕಾದ್ ಕೂರೊಂದ್ ಕುಲ್ಲುದಿನ ಪಕ್ಕಿಲು ಪೋಡಿದ್ ಅರಬಾಯಿ ಕೊರಿಯರೆ ಸುರು ಮಲ್ತಂಡ ಪುದೆಲ್ದ ಇಡೆಟ್ ದೆಂಗ್‌ದ್ ಕುಲ್ಲುದಿನ ಬೊಲ್‌ದ್ ರಂಗ್‌ದ ಪೊರ್ಲ ಮುಗ್ಗೆರ್‌ಲು ಪೋಡಿಗೆಡ್ ಮುರ್ಂಟ್ ಕಟ್ಟ್‌ದ್ ತರೆ ತಗ್ಗಾದ್ ಎಲ್ಯ ಎಲ್ಯ ಕಣ್ಣ್‌ನ್ ಬುಲಾ‌ದ್ ಮಲ್ಲ ಮಲ್ಲ ಮಲ್ತ್‌ದ್ ತೂವೊಂದಿತ್ತ.’ದಡಬಡ ದುಡುದುಡ್’ ಪನ್ಪಿನ ಸಬ್ದದೊಟ್ಟ್‌ಗ್ ‘ಚರ ಚಟ ಕರ್ರ್ ಕರ್ರ್’ ಪಂದ್ ಕರ್ಕಟ ನಾಚಿಕೆ ಮುಲ್ಲ್‌ದ ಪುದೆಲ್ ಪೊಡಿ ಪೊಡಿಯಾದ್ ಬಗ್ಗ್‌ದ್ ಬೇನೆಡ್ ಮಣ್ಣ್ ಸೇರ್‌ನಗ ದೂರದ ಬೊಟ್ಟುದಿಲ್ಲ್‌ದ ನಾಯಿ ಕೈ ಕಾರ್ ಬುಡ್‌ದ್ ಗುರೆತೊಂದಿತ್ತ್ಂಡ್.
(ಬರ್ಪಿ ಎಸಲ್‌ಡ್ ದುಂಬುಸಾಂಗುಂಡು)
Get in Touch With Us info@kalpa.news Whatsapp: 9481252093
Loading ...
Discussion about this post