ಮೊಬೈಲ್ ಟ್ಯಾಬ್ ಮೂಲಕ ಬಜೆಟ್ ಮಂಡಿಸಿದ ಭದ್ರಾವತಿ ನಗರಸಭಾ ಆಡಳಿತಾಧಿಕಾರಿ

ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ

ಭದ್ರಾವತಿ: ನಗರಸಭೆಯ ಆಡಳಿತಾಧಿಕಾರಿ ಹಾಗು ಉಪವಿಭಾಗಾಧಿಕಾರಿ ಡಾ ಟಿ.ವಿ.ಪ್ರಕಾಶ್ ಯಾರಿಗೂ ಹೊರೆಯಲ್ಲವೆಂದು ಸಾಬೀತು ಪಡಿಸಲು ಸೂಟ್ ಕೇಸ್ ರಹಿತ ಅಂಗೈ ಅಗಲದ ಮೊಬೈಲ್ ಟ್ಯಾಬ್‌ನಿಂದ 2021-22 ನೇ ಸಾಲಿನ ಬಜೆಟ್ ಪಕ್ಷಿ ನೋಟ ಬಿಡುಗಡೆಗೊಳಿಸಿದರು.

ಆಡಳಿತವು 21-22 ನೇ ಸಾಲಿನಲ್ಲಿ ನಿರೀಕ್ಷಿಸಿರುವ ಆರಂಭ ಶಿಲ್ಕು 3103.40 ಲಕ್ಷ ರೂ. ನಿರೀಕ್ಷಿರುವ ವಿವಿಧ ಮೂಲಗಳಿಂದ ಆದಾಯ ಮತ್ತು ಅನುದಾನಗಳು 6533.25 ಲಕ್ಷ ರೂ.ಗಳು ಒಟ್ಟು ನಿರೀಕ್ಷಿಸಿದ ಮೊತ್ತ 9636.65 ಲಕ್ಷ ರೂ.ಗಳಲ್ಲಿ ಸಂಬಳ ಸಾರಿಗೆ ಮತ್ತಿತರೆ ನಿರ್ವಹಣೆ 9544 ಲಕ್ಷ ರೂ ವ್ಯಯವಾಗಿ 92.65 ಲಕ್ಷ ರೂ. ಉಳಿತಾಯ ಬಜೆಟ್ ಮಂಡನೆಯಾಗಿದೆ.

ಆಸ್ತಿ ತೆರಿಗೆಯಿಂದ 645 ಲಕ್ಷ ರೂ., ನಿವೇಶನಗಳ ಅಭಿವೃದ್ದಿ ಶುಲ್ಕ ಮತ್ತು ಬಿ ಖಾತೆಗಳಿಂದ 170ಲಕ್ಷ ರೂ., ವಾಣಿಜ್ಯ ಬಾಡಿಗೆಯಿಂದ 20ಲಕ್ಷ ರೂ, ಉದ್ದಿಮೆ ಪರವಾನಿಗೆಯಿಂದ 20ಲಕ್ಷ ರೂ, ಇತರೆ ಬಾಬುಗಳಿಂದ 243.75ಲಕ್ಷ ರೂ, ನೀರು ಬಳಕೆದಾರರಿಂದ 605 ಲಕ್ಷ ರೂ ನಿರೀಕ್ಷಿದರೆ, ಎಸ್‌ಎಫ್‌ಸಿ ವೇತನ 763ಲಕ್ಷ ರೂ, ಎಸ್‌ಎಫ್‌ಸಿ ವಿದ್ಯುತ್ ಶುಲ್ಕದಿಮದ 852ಲಕ್ಷ ರೂ, ವಿಶೇಷ ಎಸ್‌ಎಫ್‌ಸಿ ಮುಕ್ತ ನಿಧಿಯಿಂದ 541ಲಕ್ಷ ರೂ, ಡೇ ನಲ್ಮ್ 80.15ಲಕ್ಷ ರೂ., ನೇ ಹಣಕಾಸು ಯೋಜನೆಯ 751, ಅಮೃತ್ ಯೋಜನೆಯ 800ಲಕ್ಷ ರೂ, ಸ್ವಚ್ ಭಾರತ್ ಡಿಪಿಎಆರ್‌ನಿಂದ 349.75ಲಕ್ಷ ರೂ, ಇತರೆ ಇಲಾಖೆಗಳಿಗೆ ಪಾವತಿಸಬೇಕಾದ ವಸೂಲಾತಿಗಳಿಂದ 642.75ಲಕ್ಷ ರೂ., ಹಾಗು ಗೃಹ ಭಾಗ್ಯ ಯೋಜನೆಯಿಂದ 150 ಲಕ್ಷ ರೂಗಳು ಒಟ್ಟು 6533.25 ಲಕ್ಷ ರೂ.ಗಳಾಗಿದೆ.

ಅದೇ ರೀತಿ ಅಮೃತ್ ಯೋಜನೆಗೆ ಮುಂದುವರೆದ ಕಾಮಗಾರಿಗಳಿಗೆ ಸಿಬ್ಬಂದಿ ವೇತನ ಮತ್ತು ಭತ್ಯೆಗಳಿಗೆ ಹಾಗು ಬಾಕಿ ಪಾವತಿಗೆ, ರಸ್ತೆ ಮತ್ತು ಚರಂಡಿಗಳಿಗೆ, ಬಸ್ ಶೆಲ್ಟರ್, ಬೀದಿನಾಯಿ ಎಬಿಸಿ ಕಾರ್ಯಕ್ರಮಕ್ಕೆ ಹಾಗು ಪ್ರಮುಖ ವೃತ್ತಗಳ ಅಭಿವೃದ್ದಿ ಮತ್ತು ನಾಮಫಲಕಗಳಿಗೆ 50 ಲಕ್ಷ ರೂ.ಗಳನ್ನು ವಿನಿಯೋಗಿಸಲು ಅಂದಾಜಿಸಲಾಗಿದೆ.

46368 ವಾಸ, ವಾಣಿಜ್ಯ, ಖಾಲಿ ನಿವೇಶನಗಳಿದ್ದು ಇದರಿಂದ 600 ಲಕ್ಷಕ್ಕೂ ಅಧಿಕ ತೆರಿಗೆ ಸಂಗ್ರಹದ ಗುರಿ ಹೊಂದಲಾಗಿದೆ. ಮುಂದಿನ ಆರ್ಥಿಕ ವರ್ಷದಲ್ಲಿ 36 ಸಾವಿರ ನೀರಿನ ಖಾತೆಗಳನ್ನು ಹೊಂದಿ ಅದರಿಂದ 545 ಲಕ್ಷ ರೂ. ಸಂಗ್ರಹದ ಗುರಿ, ಮನೆಮನೆ ಕಸ ಸಂಗ್ರಹಣೆಗಾಗಿ 100 ಲಕ್ಷ ರೂ. ಕಾಯ್ದಿರಿಸಲಾಗಿದೆ. 4 ಸಾವಿರ ವಸತಿ ರಹಿತ ಬಡ ಕುಟುಂಬದವರಿಗೆ ಜಿ-3 ಗುಂಪು ಮನೆ ನಿರ್ಮಾಣ, ಕೊಳಚೆ ಪ್ರದೇಶಗಳಲ್ಲಿ ಹಕ್ಕು ಪತ್ರ ಪಡೆದ ಫಲಾನುಭವಿಗಳ ಸ್ವತ್ತುಗಳಿಗೆ ಖಾತೆ ದಾಖಲು, ಖಾತೆಗಳ ಆದಾರದಡಿ 500 ಗುಂಪು ಮನೆಗಳ ನಿರ್ಮಾಣ, ಕನಕ ಮಂಟಪ ಮೈದಾನ ರಸ್ತೆಯ ನಗರಸಭೆ ನಿವೇಶನದಲ್ಲಿ ಬಿ ಮತ್ತು ಸಿ ಗೂಪ್ ಸಿಬ್ಬಂದಿಗಳಿಗೆ ಅಧಿಕಾರಿಗಳಿಗೆ 180.23 ಲಕ್ಷ ರೂ ವೆಚ್ಚದಲ್ಲಿ ವಸತಿ ಗೃಹಗಳ ನಿರ್ಮಾಣ ಮುಂತಾದ ಪ್ರಗತಿಯುಳ್ಳ ಯೋಜನೆಗಳನ್ನು ಹಮ್ಮಿಕೊಂಡಿದ್ದೇವೆ ಎಂದು ನಗರಸಭೆ ಆಢಳಿತಾಧಿಕಾರಿ ಹಾಗೂ ಜಿಲ್ಲಾ ಉಪವಿಭಾಗಾಧಿಕಾರಿ ಡಾ. ಟಿ.ವಿ.ಪ್ರಕಾಶ್ ಹೇಳಿದರು.

ನಗರಸಭೆ ವ್ಯಾಪ್ತಿಯಲ್ಲಿರುವ ಖಾಸಗಿಯವರ ಖಾಲಿ ನಿವೆಶನಗಳನ್ನು ಸ್ವಚ್ಛವಾಗಿಟ್ಟುಕೊಳ್ಳದೆ ಗಿಡಗಂಟೆ ಬೆಳೆದಿರುವ ನಿವೇಶನಗಳನ್ನು ನಗರಸಭೆ ಸ್ವಚ್ಛಗೊಳಿಸಿ ಅದರ ಮಾಲಿಕರಿಂದ ಹತ್ತು ಸಾವಿರ ದಂಡ ವಸೂಲಿ ಮಾಡುವ ಯೋಚನೆ ಇದೆ ಎಂದು ನಗರಸಭೆ ಆಯುಕ್ತ ಮನೋಹರ್ ಹೇಳಿದರು.

ಬಜೆಟ್ ಅಧಿವೇಶನದಲ್ಲಿ ನಗರಸಭೆ ಪೌರಾಯುಕ್ತ ಮನೋಹರ್ ಸ್ವಾಗತಿಸಿ, ಕಂದಾಯಾಧಿಕಾರಿ ರಾಜ್‌ಕುಮಾರ್ ವಂದಿಸಿದರು. ಲೆಕ್ಕಾಧೀಕ್ಷಕ ಮಹಮ್ಮದಾಲಿ, ಇಂಜಿನಿಯರ್‌ಗಳಾದ ರಂಗರಾಜರಾಜ್‌ಪುರಿ, ಪ್ರಭಾಕರ್ ಉಪಸ್ಥಿತರಿದ್ದರು.