ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ
ಅಗಲಗಲಡ್ ಅಕ್ಕಸದೆತ್ತರಗ್ ಬುಲೆದುಂತಿನ ಅತ್ತಸಮರ, ಪೆಜ, ಪೆಲಕಾಯಿ, ಬೀಜ, ಬೋವು, ತಂದೊಲ್, ಕುಂಟೊಲ್, ಕಾಯೆರಿ, ಕಾಟ್ ತಾರೆ, ಇಜಿನ್, ಶ್ರೀಗಂದೊ, ಸಾಗೊನಿ, ಕರ್ಮರ್ ಮರೊಕುಲೆನ ಇಡೆಟ್ ಬಿರ್ಕ್‌ದ್ ದೀಯಿಲೆಕ್ಕ ಅರ್ಕೆಲ್ ಅರ್ಕೆಲ್ ಪಾಡೊಂದು ಅಡ್ಡಡ್ಡ ಬುಲೆದಿನ ಕರ್ಕಟ್ ಮುಲ್ಲುಲು, ಕಾಡ ಬೆದ್‌ರ್‌ದ ಪುಂಡೆಲು, ಅರಣೆಬೂರು ಉದಿರುಬೂರು ಉರುಂಡೆ ಬೂರುಲು. ಅಲ್ಪಲ್ಪ ಸಾಲ್ ಸಾಲ್‌ಡ್ ಪರಡಿನ ಪಚ್ಚ ಪುದೆಲ್ ಬಲೆ ಬಲ್ಲೆದ ಅಡಿಟ್ ಪಸೆ ಮಣ್ಣ್‌ದ ನಡುಟ್ ಎಲ್ಯ ಮಲ್ಲ ಕಲ್ಲ್‌ದಿಟೆಟ್ ಒಸರ್ ಪುಟ್ಟುದ್ ಕಾಡ್ ಪಾಡಿರ್ದ್ ನಾಡ್‌ದಂಚಿ ’ಜುಲುಜುಲು’ ಸಬುದದೊಟ್ಟುಗು ಪೆರ್ಮೆಡ್ ಪರತೊಂದಿಪ್ಪುನ ಸುದ್ದ ಪನಿನೀರ್‌ದ ತೋಡು ಪತ್ತ್‌ ನಲ್ಪ ಜನಮಂದೆಲು ಅಡಿ ಚಡಿ ಬುಡಂದೆ ಪಜ್ಜೆದೀವೊಂದು ದೊಕ್ಕೊಂದು ಬಡು ಕುಡರಿ ಕೊಟ್ಟು ದೋಂಟೆಡ್ ದರ್ತೊಂದು ಅರೆ ಬಾಯಿ ಕೊರೊಂದು ಬೋಂಟೆ ದೇರೊಂದು ಬಲ್ಪುನ ರಬೊಸೊಗ್ ರಡ್ಡ್‌ ಗಳಿಗೆದುಲಯಿ ಎರುಗಿಡಪುನ ಕಂಬುಲದ ಕಂಡದಲೆಕ್ಕ ಕಲಂಕ್ ಕೆಸರ್ ಆದಿತ್ತ್‌ಂಡ್.
ಜನಮಂದೆಲೆನ ಬೊಬ್ಬೆ ಅರೆಬಾಯಿದಿಂಜಿನ ಬೋಂಟೆ ದೇರುನ ಅಬತಾರಗ್ ಪೋಡಿದ್ ಕಲ್ಲ್‌ ಮುಲ್ಲ್‌ ಪುದೆಲ್‌ದುಲಯಿಡ್ ಕಂಡ್ ದೆಂಗ್‌ದ್ ಮೆಲ್ಲಡ್ ಕಣ್ಣ್‌ ಬುಲಾದ್ ನಿಲ್ಕೊಂದು ತೂವೊಂದಿತ್ತಿನ ಪಿರಣಿಲು ಪಾದೆಪುಡವುನಂಚಿನ ತಾಂಪಣ್ಣನ ತೋಟೆದ ಸಬುದೊಗು ಪಿರಣ ಒರಿತೊನರೆ ’ದರ್ರ್ ಬರ್ರ್ ಸರ್ರ್ ಸರ್ರ್ ಡುಡ್‌ಬುಡ್’ ಸಬುದದೊಟ್ಟುಗು ಬಲಿತೊಂದಿತ್ತಡ ಮರತ ಕೊಡಿ ಗೆಲ್ಲ್‌ಡ್ ಗಡಗಡ ಕುಂಬರೊಂದು ಕುಲ್ಲ್‌ದಿತ್ತಿನ ಪಕ್ಕಿಲು ’ಪುರ್ರ್ ರ್ಪುರ್ಂದ್’ ರಾವೊಂದಿಪ್ಪುನ ಪೊರ್ತುಡ್ ನಡು ಬಲ್ಲೆ ಪುದೆಲ್‌ದ ಉಲಯಿರ್ದ್ ಪಿದಯಿ ಪಜ್ಜೆ ದೀಯಿನ ನಾಲ್ ಕಾರ್‌ದ ಕಪ್ಪು ರಂಗ್‌ದ ರಡ್ಡ್‌ ಮಲ್ಲ ಮಲ್ಲ ಪಿರಣಿಲೆನ್ ದೂರರ್ದೆ ತೂಯಿನ ಕೃಷ್ಣಪ್ಪಣ್ಣೆ ಒಂಜಿ ಪಿರಣಿಗ್ ಒಂಜೇ ಕಣ್ಣ್‌ಡ್ ನೋಟ ದೀದ್ ಬೆಡಿಟ್ ಈಡ್ ದೀರ್ಯೆ.
(ಬರ್ಪಿ ಎಸಲ್‌ಡ್ ದುಂಬರಿಯುಂಡು)
Get in Touch With Us info@kalpa.news Whatsapp: 9481252093
Loading ...
Discussion about this post