ನವದೆಹಲಿ: ಇಡಿಯ ವಿಶ್ವವೇ ಇಂದು ಭಾರತದ ಚಂದ್ರಯಾನ 2ನ್ನು ಅತ್ಯಂತ ಕುತೂಹಲದಿಂದ ವೀಕ್ಷಿಸುತ್ತಿದ್ದ ವೇಳೆಯೇ ದೇಶದ ಹೆಮ್ಮೆಯ ಪ್ರಧಾನಿ ನರೇಂದ್ರ ಮೋದಿಯವರೂ ಸಹ ಇಸ್ರೋದ ಈ ಸಾಧನೆಯನ್ನು ನೇರಪ್ರಸಾರದಲ್ಲಿ ವೀಕ್ಷಿಸಿ ಸಂಭ್ರಮಿಸಿದರು.
ಚಂದ್ರಯಾನ 2ರ ಉಡಾವಣೆಯನ್ನು ತಮ್ಮ ಅಧಿಕೃತ ಕಚೇರಿಯಿಂದಲೇ ನೇರವಾಗಿ ವೀಕ್ಷಿಸಿದ ಪ್ರಧಾನಿಯವರು ದೇಶದ ವಿಜ್ಞಾನಿಗಳ ಸಾಧನೆಗೆ ಹೆಮ್ಮೆ ಪಟ್ಟರು.
ಈ ಕುರಿತಂತೆ ಟ್ವೀಟ್ ಮಾಡಿರುವ ಅವರು, ಈ ಕ್ಷಣ ದೇಶದ ಇತಿಹಾಸದಲ್ಲಿ ಸುವರ್ಣಾಕ್ಷರಗಳನ್ನು ಬರೆದಿಡುವಂತಹದ್ದಾಗಿದೆ. ಚಂದ್ರಯಾನ 2ರ ಯಶಸ್ಸಿನ ಮೂಲಕ ಇಸ್ರೋ ವಿಜ್ಞಾನಿಗಳು ಇಡಿಯ ದೇಶವಾಸಿಗಳ ಮನಸ್ಸನ್ನು ಗೆದ್ದಿದ್ದಾರೆ. ಪ್ರತಿ ಭಾರತೀಯನೂ ಇವರ ಸಾಧನೆಗೆ ಗರ್ವ ಪಡುತ್ತೇವೆ ಎಂದು ಪ್ರಶಂಸಿಸಿದ್ದಾರೆ.
ಚಂದ್ರಯಾನ್ 2 ವಿಶಿಷ್ಟವಾಗಿದೆ. ಏಕೆಂದರೆ ಇದು ಚಂದ್ರನ ಭೂಪ್ರದೇಶದ ದಕ್ಷಿಣ ಧ್ರುವ ಪ್ರದೇಶದ ಬಗ್ಗೆ ಅನ್ವೇಷಿಸುತ್ತದೆ ಮತ್ತು ಅಧ್ಯಯನ ಮಾಡುತ್ತದೆ. ಅದು ಹಿಂದಿನ ಯಾವುದೇ ಕಾರ್ಯಾಚರಣೆಯಿಂದ ಪರಿಶೋಧಿಸಲ್ಪಟ್ಟಿಲ್ಲ ಮತ್ತು ಮಾದರಿಗಳನ್ನು ಪಡೆಯುವುದಿಲ್ಲ. ಈ ಮಿಷನ್ ಚಂದ್ರನ ಬಗ್ಗೆ ಹೊಸ ಜ್ಞಾನವನ್ನು ನೀಡುತ್ತದೆ ಎಂದಿದ್ದಾರೆ.
ಚಂದ್ರಯಾನ 2ರಂತಹ ಪ್ರಯತ್ನಗಳು ದೇಶದ ಪ್ರತಿಭಾನ್ವಿತ ಯುವ ವಿಜ್ಞಾನಗಳಿಗೆ ಪ್ರೋತ್ಸಾಹಕಾರಕವಾಗಿದ್ದು, ಹೊಸ ಹೊಸ ಸಂಶೋಧನೆಗಳಿಗೆ ನಾಂದಿಯಾಗಿದೆ ಎಂದಿದ್ದಾರೆ.
