ಸೇನೆಗೆ ಆನೆಬಲ ತರುವ ಎಕೆ 203 ರೈಫಲ್’ನ ಸಾಮರ್ಥ್ಯ ಹೇಗಿದೆ ಗೊತ್ತಾ?

ನವದೆಹಲಿ: ಭಾರತ ಹಾಗೂ ಪಾಕಿಸ್ಥಾನದ ನಡುವೆ ಯುದ್ಧದ ಸನ್ನಿವೇಶದ ಕಾರ್ಮೋಡ ಕವಿದಿರುವ ಬೆನ್ನಲ್ಲೆ, ಭಾರತೀಯ ಸೇನೆಗೆ ಆನೆ ಬಲ ತರುವಂತ ಶಸ್ತ್ರಾಸ್ತ್ರ ತಯಾರಿಕಾ ಕಾರ್ಖಾನೆಯನ್ನು ಪ್ರಧಾನಿ ನರೇಂದ್ರ ಮೋದಿ ಉದ್ಘಾಟಿಸಿದ್ದಾರೆ.

ರಷ್ಯಾದ ಜಂಟಿ ಸಹಭಾಗಿತ್ವದಲ್ಲಿ ನಿರ್ಮಿಸಲಾದ ಈ ಕಾರ್ಖಾನೆಯಲ್ಲಿ 7.50 ಲಕ್ಷ ಎ.ಕೆ.203 ರೈಫಲ್ ಗಳನ್ನು ತಯಾರಿಸಿ ನಮ್ಮ ಸೇನೆಯ ಬತ್ತಳಿಕೆಗೆ ಸೇರಿಸಲಾಗುತ್ತದೆ.

ಎಕೆ 203 ರೈಫಲ್’ನ ವಿಶೇಷತೆಯೇನು ಗೊತ್ತಾ?
ಎಕೆ 203 ಎಕೆ 47ನ ಸುಧಾರಿತ ರೂಪವಾಗಿದ್ದು, ರಷ್ಯಾದ ಕಲಾಶ್ನಿಕೋವ್ ಕಂಪನಿ ತಯಾರಿಸಿದ್ದ ಜಗತ್ತಿನ ಅತ್ಯಂತ ಜನಪ್ರಿಯ ಎಕೆ 47 ರೈಫಲ್ ನ ಸುಧಾರಿತ ರೂಪವೇ ಎಕೆ 203 ರೈಫಲ್. ವಿಶ್ವದ ಅತ್ಯಂತ ವಿಶ್ವಾಸಾರ್ಹ ರೈಫಲ್ ಗಳಲ್ಲಿ ಎಂದು ಎಕೆ 203ಯನ್ನು ಗುರುತಿಸಲಾಗಿದೆ. ಈಗಾಗಲೇ ವಿಶ್ವದ ನಾನಾ ದೇಶಗಳು ಈ ಘಾತುಕ ರೈಫಲ್ ಅನ್ನು ಬಳಕೆ ಮಾಡುತ್ತಿದ್ದು, ಇದೀಗ ಭಾರತ ಕೂಡ ಈ ಶಸ್ತ್ರಾಸ್ತ್ರವನ್ನು ಬಳಕೆ ಮಾಡುತ್ತಿರುವುದಲ್ಲದೇ, ಈ ವಿನಾಶಕಾರಿ ರೈಫಲ್ ಅನ್ನು ಮೇಕ್ ಇನ್ ಇಂಡಿಯಾ ಯೋಜನೆ ಅಡಿಯಲ್ಲಿ ತಾನೇ ಉತ್ಪಾದಿಸಲು ಭಾರತ ಮುಂದಾಗಿದೆ. ಇದಕ್ಕಾಗಿ ಭಾರತ ಮತ್ತು ರಷ್ಟಾ ಪರಸ್ಪರ ಒಪ್ಪಂದ ಮಾಡಿಕೊಂಡಿದೆ.

ಎಕೆ-203 ರೈಫಲ್ ಪೂರ್ಣ ಪ್ರಮಾಣದ 7.62-39 ಎಂಎಂ ಕ್ಯಾಲಿಬರ್ ಹೊಂದಿದ್ದು, ಎರಡು ಮಾದರಿ ಹೊಂದಿದೆ. ಒಂದು ಸೆಮಿ ಆಟೋಮ್ಯಾಟಿಕ್ ಹಾಗೂ ಪೂರ್ಣ ಆಟೋಮ್ಯಾಟಿಕ್. ಅಲ್ಲದೇ ಎರಡು ಮಾದರಿಯ ಉದ್ದ ಹೊಂದಿದೆ. ಒಂದು 940 ಎಂಎಂ ಉದ್ದ, ಮತ್ತೊಂದು ಸ್ಟಾಕ್ ಪೋಲ್ಡೆಡ್ 705ಎಂಎಂ ಉದ್ದವಿರುತ್ತದೆ.

ಗ್ಯಾಸ್ ಚಾಲಿತ ಬೋಲ್ಟ್ ಲಾಕಿಂಗ್ ವ್ಯವಸ್ಥೆಯ ಎಕೆ-203 ರೈಫಲ್ ಒಂದು ನಿಮಿಷಕ್ಕೆ ಬರೋಬ್ಬರಿ 600 ರೌಂಡ್ಸ್ ಗುಂಡುಗಳು(ಸೆಕೆಂಡ್ ಗೆ 10 ರೌಂಡ್ಸ್) ಸಿಡಿಯುತ್ತದೆ. ಗನ್ ಬ್ಯಾರೆಲ್ ಉದ್ದ 415ಎಂಎಂ ಮತ್ತು ಗುಂಡುರಹಿತವಾಗಿ ಎಕೆ 203 ರೈಫಲ್ ತೂಕ 4.1 ಕಿಲೋ ಗ್ರಾಂ.

ಎಕೆ 203 ಎಕೆ 47ನ ಸುಧಾರಿತ ಶ್ರೇಣಿಯ ರೈಫಲ್ ಆಗಿದೆ. ಇದರ ಮ್ಯಾಗಜೀನ್ ನಲ್ಲಿ 30 ಬುಲೆಟ್ಸ್ ಇರುತ್ತದೆ. ಇದು 400 ಮೀಟರ್ ದೂರದವರೆಗೆ ಶತ್ರುಗಳ ಮೇಲೆ ನಿಖರವಾಗಿ ದಾಳಿ ನಡೆಸಬಹುದಾಗಿದೆ. ಇದು ಐಎನ್ ಎಸ್ ಎಸ್ ರೈಫಲ್ ಗಿಂತ ಕಡಿಮೆ ಭಾರ ಹೊಂದಿದ್ದು, ನೂರಾರು ಗುಂಡುಗಳು ಏಕಕಾಲದಲ್ಲಿ ಸಿಡಿದರೂ ಕೂಡಾ ಮ್ಯಾಗಜಿನ್ ಬ್ಲಾಕ್ ಆಗುವುದಿಲ್ಲ. ಐಎನ್ ಎಸ್ ಎಸ್ ರೈಫಲ್ ನಲ್ಲಿ ಜಾಮ್ ಆಗುವ ಸಮಸ್ಯೆ ಹೆಚ್ಚಾಗಿತ್ತು.