ನವದೆಹಲಿ: ಭಾರತದ ಮಣ್ಣಿನಲ್ಲಿ ಉದಯಿಸಿದ ಯೋಧರೇ ಹಾಗೆ.. ತಮ್ಮ ಪ್ರಾಣವನ್ನಾದರೂ ಕೊಡುತ್ತಾರೆ. ಆದರೆ, ದೇಶವನ್ನು ಬಿಟ್ಟುಕೊಡುವುದಿಲ್ಲ. ಇಂತಹ ವೀರ ಸಾಧಕರಿಗೆ ಉದಾಹರಣೆ ವಿಂಗ್ ಕಮಾಂಡರ್ ಅಭಿನಂದನ್.
ನಿನ್ನೆ ಪಾಕಿಸ್ಥಾನ ಅಚಾನಕ್ ಆಗಿ ಬಂಧಿಸಿದ ಭಾರತೀಯ ವಾಯುಸೇನೆಯ ವಿಂಗ್ ಕಮಾಂಡರ್ ಅಭಿನಂದನ್ ಅವರು ಇಡಿಯ ದೇಶವೇ ಮೆಚ್ಚಿ, ಕೊಂಡಾಡುವಂತಹ ಅಪ್ರತಿಮ ತ್ಯಾಗಮಯಿ ಎಂದರೆ ಅತಿಶಯೋಕ್ತಿಯಲ್ಲ.
ನಿನ್ನೆ ಅವರನ್ನು ಪಾಕ್ ಪಡೆಗಳು ಬಂಧಿಸುವ ಕೆಲವೇ ಕ್ಷಣಗಳ ಮುನ್ನ, ಎಲ್ಲಿ ನನ್ನನ್ನು ಬಂಧಿಸಿದರೆ ದಾಖಲೆಗಳು ಶತ್ರುಗಳ ಪಾಲಾಗುತ್ತವೋ ಎಂಬ ಉದ್ದೇಶದಿಂದ ತಾವೂ ನೀರಿಗೆ ಹಾರಿ, ತಮ್ಮ ಬಳಿಯಿದ್ದ ಮ್ಯಾಪ್, ಪತ್ರಗಳು, ಬಂದೂಕು ಹಾಗೂ ಮಹತ್ವದ ದಾಖಲೆಗಳನ್ನು ನೀರಿನಲ್ಲಿ ಮುಳುಗಿಸಿದ್ದರು.
ಇದೆಲ್ಲಕ್ಕೂ ಮಹತ್ವದ ವಿಚಾರವೆಂದರೆ ಅವರನ್ನು ಬಂಧಿಸಿದ ವೇಳೆ ಅವರ ಬಳಿ ಉಳಿದುಕೊಂಡಿದ್ದ ಕೆಲವು ಸಣ್ಣ ದಾಖಲೆಗಳನ್ನು ನುಂಗಿ ನೀರು ಕುಡಿದಿದ್ದರು. ಯಾವುದೇ ಕಾರಣಕ್ಕೂ ನಮ್ಮ ದೇಶದ ರಹಸ್ಯ ಶತ್ರುಗಳಿಗೆ ದೊರೆಯಬಾರದು ಎಂಬುದು ಅವರ ಉದ್ದೇಶವಾಗಿತ್ತು.
ಇನ್ನು, ಭಾರತದ ಕುರಿತಾಗಿ ಕೆಲವು ರಹಸ್ಯಗಳನ್ನು ಅವರಿಂದ ತಿಳಿದುಕೊಳ್ಳಲು ಪಾಕ್ ಸೈನಿಕರು ಅಭಿನಂದನ್ ಅವರನ್ನು ಚಿತ್ರಹಿಂಸೆಗೆ ಗುರಿ ಮಾಡಿದ್ದಾರೆ. ಆದರೆ, ನನ್ನ ಜೀವ ಹೋದರೂ ಸಹ ನನ್ನ ದೇಶದ ರಹಸ್ಯಗಳನ್ನು ಬಿಟ್ಟುಕೊಡುವುದಿಲ್ಲ ಎಂಬ ಅಪ್ರತಿಮ ದೇಶಪ್ರೇಮದ ಮಾತುಗಳನ್ನು ಗುಂಡು ಹೊಡೆದಂತೆ ಶತ್ರುಗಳಿಗೆ ಅವರ ಸಮ್ಮುಖದಲ್ಲೆ ಹೇಳಿದ್ದಾರೆ.
ಈ ಎಲ್ಲ ವಿಚಾರಗಳನ್ನು ಅಂತಾರಾಷ್ಟಿಯ ಮಾಧ್ಯಮವೊಂದು ವರದಿ ಮಾಡಿದ್ದು, ಪಾಕ್ ಸೇನೆಯ ಕ್ರೌರ್ಯವನ್ನು ಜಗತ್ತಿಗೆ ಮತ್ತೊಮ್ಮೆ ತೆರೆದಿಟ್ಟಿದ್ದಾರೆ. ಅಂತೆಯೇ, ಭಾರತೀಯ ಸೇನೆಯ ಯೋಧರ ತ್ಯಾಗ ಹಾಗೂ ಬಲಿದಾನದ ಮಹತ್ವ ಎಂತಹುದ್ದು ಎಂಬುದನ್ನೂ ಸಹ ತೋರಿಸಿದ್ದಾರೆ.
