ಕೆ-ಪಾಪ್ ಅಭಿಮಾನಿಗಳಿಗೆ ಭರ್ಜರಿ ಸುದ್ದಿ: ಭಾರತದಲ್ಲಿ ವೆವರ್ಸ್ ಕಾನ್ ಫೆಸ್ಟಿವಲ್‌ಗೆ ಕ್ಷಣಗಣನೆ!

ಕಲ್ಪ ಮೀಡಿಯಾ ಹೌಸ್  |  ನವದೆಹಲಿ  |

ವೆವರ್ಸ್ ಕಾನ್ ಫೆಸ್ಟಿವಲ್ ಇಂಡಿಯಾದ (Weverse Con Festival India) ಮೊದಲ ಆವೃತ್ತಿಯಲ್ಲಿ ಭಾಗವಹಿಸಲಿರುವ ಕಲಾವಿದರ ಪಟ್ಟಿಯನ್ನು ಪ್ರಕಟಿಸಲಾಗಿದೆ. ಕೆ-ಪಾಪ್ (K Pop) ಮತ್ತು ಭಾರತೀಯ ಸಂಗೀತ ಕ್ಷೇತ್ರದ ಜನಪ್ರಿಯ ಕಲಾವಿದರು ಈ ಫೆಸ್ಟಿವಲ್‌ನಲ್ಲಿ ಒಂದೇ ವೇದಿಕೆಯಲ್ಲಿ ಪ್ರದರ್ಶನ ನೀಡಲಿದ್ದಾರೆ.

2027ರ ಮಾರ್ಚ್ 27 ಮತ್ತು 28ರಂದು ನವದೆಹಲಿಯಲ್ಲಿ ಈ ಫೆಸ್ಟಿವಲ್ ನಡೆಯಲಿದೆ. ವಿಶೇಷವೆಂದರೆ, ದಕ್ಷಿಣ ಕೊರಿಯಾದ ಹೊರಗೆ ನಡೆಯುತ್ತಿರುವ ವೆವರ್ಸ್ ಕಾನ್ ಫೆಸ್ಟಿವಲ್‌ನ ಮೊದಲ ಆವೃತ್ತಿ ಇದಾಗಿದೆ.

ಎರಡು ದಿನಗಳ ಈ ಸಂಗೀತ ಉತ್ಸವದಲ್ಲಿ Bumzu, Dayoung, ENHYPEN, Eric Nam, Hwasa, ಜಾಗತಿಕ ಗರ್ಲ್ ಗ್ರೂಪ್ KATSEYEಯ Lara, Lee Hyun, LE SSERAFIM, Rhea Raj ಮತ್ತು TOMORROW X TOGETHER ಸೇರಿದಂತೆ ಹಲವು ಜನಪ್ರಿಯ ಕೆ-ಪಾಪ್ ಕಲಾವಿದರು ಭಾಗವಹಿಸಲಿದ್ದಾರೆ.

ಇವರೊಂದಿಗೆ ಭಾರತದ ಸಂಗೀತ ಕಲಾವಿದರಾದ Gini, King, RANJ X Clifr, Reble ಮತ್ತು DJ Zelo ಕೂಡ ತಮ್ಮ ಸಂಗೀತ ಪ್ರದರ್ಶನ ನೀಡಲಿದ್ದಾರೆ. ವಿಭಿನ್ನ ತಲೆಮಾರುಗಳ ಕಲಾವಿದರು ಮತ್ತು ಸಂಗೀತ ಪ್ರಕಾರಗಳನ್ನು ಒಂದೇ ವೇದಿಕೆಯಲ್ಲಿ ಸಂಭ್ರಮಿಸುವ ಅವಕಾಶವನ್ನು ಈ ಫೆಸ್ಟಿವಲ್ ಕಲ್ಪಿಸಲಿದೆ.

HYBE INDIA ಮತ್ತು BookMyShow Live ಜಂಟಿಯಾಗಿ ಈ ಫೆಸ್ಟಿವಲ್ ಆಯೋಜಿಸುತ್ತಿದ್ದು, HYBE ಮತ್ತು Weverse ಕೂಡ ಇದಕ್ಕೆ ಕೈಜೋಡಿಸಿವೆ. Kia India, Mastercard, Project B ಮತ್ತು Samsung Galaxy ಪ್ರೆಸೆಂಟಿಂಗ್ ಪಾರ್ಟ್‌ನರ್‌ಗಳಾಗಿದ್ದು, NONGSHIM ಅಸೋಸಿಯೇಟ್ ಪಾರ್ಟ್‌ನರ್ ಆಗಿದೆ.

HYBE INDIAಯ ಬಿಸಿನೆಸ್ ಡೆವಲಪ್‌ಮೆಂಟ್ ವಿಭಾಗದ ಮುಖ್ಯಸ್ಥ ಸಾರ್ಥಕ್ ಅರೋರಾ ಮಾತನಾಡಿ, “ಭಾರತೀಯ ಅಭಿಮಾನಿಗಳು ಹಲವು ವರ್ಷಗಳಿಂದ ಕೆ-ಪಾಪ್ ಕಲಾವಿದರಿಗೆ ಅಪಾರ ಪ್ರೀತಿ ಮತ್ತು ಬೆಂಬಲ ನೀಡುತ್ತಾ ಬಂದಿದ್ದಾರೆ. ಅವರ ಸಂಗೀತದ ಮೇಲಿನ ಅಭಿಮಾನ ಮಾತ್ರವಲ್ಲದೆ, ಭಾರತದಲ್ಲಿ ಕೆ-ಪಾಪ್ ಅಭಿಮಾನಿಗಳ ಸಮುದಾಯವೂ ನಿರಂತರವಾಗಿ ಬೆಳೆಯುತ್ತಿದೆ. ಇದೇ ಮೊದಲ ಬಾರಿಗೆ ಕೊರಿಯಾದ ಹೊರಗೆ ಭಾರತದಲ್ಲಿ ಈ ಫೆಸ್ಟಿವಲ್ ನಡೆಯುತ್ತಿರುವುದು, ಕಲಾವಿದರು ಮತ್ತು ಅಭಿಮಾನಿಗಳನ್ನು ಇನ್ನಷ್ಟು ಹತ್ತಿರಕ್ಕೆ ತರುವ ಮಹತ್ವದ ಅವಕಾಶವಾಗಿದೆ,” ಎಂದರು.

“ವರ್ಷಗಳಿಂದ ತಮ್ಮನ್ನು ಬೆಂಬಲಿಸುತ್ತಿರುವ ಅಭಿಮಾನಿಗಳನ್ನು ನೇರವಾಗಿ ಭೇಟಿಯಾಗಲು ಕಲಾವಿದರು ಕೂಡ ಉತ್ಸುಕರಾಗಿದ್ದಾರೆ. ಅಭಿಮಾನಿಗಳ ಪ್ರೀತಿ ಮತ್ತು ಬೆಂಬಲಕ್ಕೆ ಕೃತಜ್ಞತೆ ಸಲ್ಲಿಸುವ ಉದ್ದೇಶದಿಂದ, ಈ ಫೆಸ್ಟಿವಲ್ ಸಾಧ್ಯವಾದಷ್ಟು ಹೆಚ್ಚಿನ ಜನರನ್ನು ತಲುಪುವಂತೆ ಮಾಡಲು ನಾವು ಪ್ರಯತ್ನಿಸುತ್ತಿದ್ದೇವೆ. ಕಲಾವಿದರು ಮತ್ತು ಅಭಿಮಾನಿಗಳು ಮುಖಾಮುಖಿಯಾಗಿ ಭೇಟಿಯಾಗಿ, ತಮ್ಮ ನೆಚ್ಚಿನ ಸಂಗೀತವನ್ನು ಒಟ್ಟಿಗೆ ಸಂಭ್ರಮಿಸಲು ಇದು ವಿಶೇಷ ವೇದಿಕೆಯಾಗಲಿದೆ,” ಎಂದರು.

BookMyShowನ ಲೈವ್ ಈವೆಂಟ್ಸ್ ವಿಭಾಗದ ಮುಖ್ಯ ವ್ಯವಹಾರ ಅಧಿಕಾರಿ ನಮನ ಪುಗಲಿಯಾ ಮಾತನಾಡಿ, “ಕೆ-ಪಾಪ್ ಇಂದು ಜಾಗತಿಕ ಮಟ್ಟದಲ್ಲಿ ಅಪಾರ ಜನಪ್ರಿಯತೆ ಗಳಿಸಿದೆ. ಈ ಬಾರಿಯ ಕಲಾವಿದರ ಪಟ್ಟಿಯಲ್ಲಿ ಈಗಾಗಲೇ ಜನಪ್ರಿಯತೆ ಗಳಿಸಿರುವ ಕಲಾವಿದರ ಜೊತೆಗೆ, ಮುಂದಿನ ತಲೆಮಾರಿನ ಸಂಗೀತವನ್ನು ರೂಪಿಸುತ್ತಿರುವ ಕಲಾವಿದರೂ ಇದ್ದಾರೆ. ಈ ಎಲ್ಲ ಕಲಾವಿದರು ಭಾರತದಲ್ಲಿ ಒಂದೇ ವೇದಿಕೆಯಲ್ಲಿ ಪ್ರದರ್ಶನ ನೀಡಲಿರುವುದು ವಿಶೇಷ,” ಎಂದರು.

“HYBE INDIA ಜೊತೆಗೂಡಿ ಈ ಫೆಸ್ಟಿವಲ್ ಅನ್ನು ಭಾರತಕ್ಕೆ ತರುತ್ತಿರುವುದು ಸಂತಸದ ವಿಚಾರ. ಭಾರತೀಯ ಕೆ-ಪಾಪ್ ಅಭಿಮಾನಿಗಳು ಈ ಸಂಗೀತದೊಂದಿಗೆ ವಿಶಿಷ್ಟವಾದ ಬಾಂಧವ್ಯ ಬೆಳೆಸಿಕೊಂಡಿದ್ದಾರೆ. ಅವರ ಆಸಕ್ತಿ ಮತ್ತು ಉತ್ಸಾಹಕ್ಕೆ ತಕ್ಕಂತೆ, ಜಾಗತಿಕ ಮಟ್ಟದ ಫೆಸ್ಟಿವಲ್ ಅನುಭವವನ್ನು ಭಾರತದಲ್ಲೂ ಒದಗಿಸುವುದು ನಮ್ಮ ಉದ್ದೇಶ,” ಎಂದು ಅವರು ಹೇಳಿದರು.

K Pop : ಅನುಭವಿ ಕಲಾವಿದ Lee Hyun ಗಾಯನ

ಕಲಾವಿದರ ಪ್ರದರ್ಶನದ ವಿಚಾರಕ್ಕೆ ಬಂದರೆ, ENHYPEN ತಮ್ಮ ವಿಶಿಷ್ಟ ಸಂಗೀತ ಶೈಲಿಯೊಂದಿಗೆ ಅಭಿಮಾನಿಗಳನ್ನು ರಂಜಿಸಲಿದ್ದಾರೆ. ಕೆ-ಪಾಪ್ ಕ್ಷೇತ್ರದ ಅನುಭವಿ ಕಲಾವಿದ Lee Hyun ತಮ್ಮ ಭಾವಪೂರ್ಣ ಗಾಯನದ ಮೂಲಕ ಗಮನ ಸೆಳೆಯಲಿದ್ದಾರೆ. LE SSERAFIM ತಮ್ಮ ವಿಭಿನ್ನ ಸಂಗೀತ ಶೈಲಿ ಮತ್ತು ಶಕ್ತಿಯುತ ಪ್ರದರ್ಶನದೊಂದಿಗೆ ವೇದಿಕೆಗೆ ಬರಲಿದ್ದು, TOMORROW X TOGETHER ತಮ್ಮ ವೈವಿಧ್ಯಮಯ ಹಾಡುಗಳ ಮೂಲಕ ಪ್ರೇಕ್ಷಕರನ್ನು ರಂಜಿಸಲಿದ್ದಾರೆ.

SEVENTEENನ ಸಂಗೀತ ನಿರ್ಮಾಣದಲ್ಲಿ ಕೆಲಸ ಮಾಡಿರುವ ಖ್ಯಾತ ಸಂಗೀತ ನಿರ್ಮಾಪಕ BUMZU ಈ ಬಾರಿ ವಿಭಿನ್ನ ರೂಪದಲ್ಲಿ ಅಭಿಮಾನಿಗಳ ಮುಂದೆ ಬರಲಿದ್ದಾರೆ. Dayoung ತಮ್ಮ ಆತ್ಮವಿಶ್ವಾಸಭರಿತ ಪ್ರದರ್ಶನದ ಮೂಲಕ ಗಮನ ಸೆಳೆಯಲಿದ್ದಾರೆ. ಈ ಹಿಂದೆ ಭಾರತಕ್ಕೆ ಭೇಟಿ ನೀಡಿರುವ Eric Nam, ಭಾರತೀಯ ಅಭಿಮಾನಿಗಳೊಂದಿಗಿನ ಬಾಂಧವ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸಲು ಮತ್ತೊಮ್ಮೆ ಭಾರತಕ್ಕೆ ಆಗಮಿಸಲಿದ್ದಾರೆ.

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news

Hwasa ತಮ್ಮ ವಿಶಿಷ್ಟ ವ್ಯಕ್ತಿತ್ವ ಮತ್ತು ಪ್ರಭಾವಶಾಲಿ ವೇದಿಕೆ ಪ್ರದರ್ಶನದ ಮೂಲಕ ಪ್ರೇಕ್ಷಕರನ್ನು ಆಕರ್ಷಿಸಲಿದ್ದಾರೆ. KATSEYEಯ Lara ಜಾಗತಿಕ ಪಾಪ್ ಸಂಗೀತದ ಹೊಸ ತಲೆಮಾರನ್ನು ಪ್ರತಿನಿಧಿಸಲಿದ್ದು, Rhea Raj ತಮ್ಮ ವಿಶಿಷ್ಟ ಸಂಗೀತ ಶೈಲಿ ಮತ್ತು ಉತ್ಸಾಹಭರಿತ ಪ್ರದರ್ಶನದ ಮೂಲಕ ಫೆಸ್ಟಿವಲ್‌ಗೆ ಮತ್ತಷ್ಟು ಮೆರುಗು ನೀಡಲಿದ್ದಾರೆ.

ಭಾರತೀಯ ಕಲಾವಿದರ ತಂಡವೂ ವೈವಿಧ್ಯಮಯವಾಗಿದೆ. ಹಿಪ್-ಹಾಪ್ ಕ್ಷೇತ್ರದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿರುವ King ಜೊತೆಗೆ Gini, RANJ X Clifr, Reble ಮತ್ತು DJ Zelo ಪ್ರದರ್ಶನ ನೀಡಲಿದ್ದಾರೆ. ಹಿಪ್-ಹಾಪ್, ಇಂಡಿ ಮತ್ತು ಎಲೆಕ್ಟ್ರಾನಿಕ್ ಸಂಗೀತ ಸೇರಿದಂತೆ ವಿಭಿನ್ನ ಪ್ರಕಾರಗಳ ಮೂಲಕ ಈ ಕಲಾವಿದರು ಭಾರತದ ಸಮಕಾಲೀನ ಸಂಗೀತದ ವೈವಿಧ್ಯತೆಯನ್ನು ಅನಾವರಣಗೊಳಿಸಲಿದ್ದಾರೆ.

ಟಿಕೆಟ್‌ಗಳ ವಿಚಾರಕ್ಕೆ ಬಂದರೆ, Mastercard ಕಾರ್ಡ್ ಹೊಂದಿರುವವರಿಗೆ ಅಕ್ಟೋಬರ್ 27ರಿಂದ ವಿಶೇಷ ಪ್ರೀ-ಸೇಲ್ ಮೂಲಕ ಟಿಕೆಟ್ ಖರೀದಿಸುವ ಅವಕಾಶವಿದೆ. ಸಾಮಾನ್ಯ ಟಿಕೆಟ್ ಮಾರಾಟ ಅಕ್ಟೋಬರ್ 30ರಿಂದ ಆರಂಭವಾಗಲಿದೆ. ಎಲ್ಲಾ ಟಿಕೆಟ್‌ಗಳು BookMyShow ಮೂಲಕ ಲಭ್ಯವಿರಲಿವೆ.

ಫೆಸ್ಟಿವಲ್‌ನ ಟಿಕೆಟ್ ಮಾಹಿತಿ, ಹೊಸ ಅಪ್‌ಡೇಟ್‌ಗಳು ಮತ್ತು ಮುಂದಿನ ಪ್ರಕಟಣೆಗಳಿಗಾಗಿ ಅಭಿಮಾನಿಗಳು HYBE INDIAಯ Instagram ಪುಟ, Weverse Zone Community ಮತ್ತು BookMyShow Live ಅನ್ನು ಫಾಲೋ ಮಾಡಬಹುದು.