ಟಿಕೆಟ್ ರಹಿತ ರೈಲು ಪ್ರಯಾಣಕ್ಕೆ ಕನಿಷ್ಠ ದಂಡ ದರ ಏರಿಕೆ

ಕಲ್ಪ ಮೀಡಿಯಾ ಹೌಸ್ | ನವದೆಹಲಿ |

ಜನ ವಿಶ್ವಾಸ್ (ತಿದ್ದುಪಡಿ ವಿಧಿಗಳ) ಕಾಯ್ದೆ, 2026ರಡಿ ಭಾರತೀಯ ರೈಲ್ವೆ ಕಾಯ್ದೆ, 1989ರ ಕೆಲ ಪ್ರಮುಖ ವಿಧಿಗಳನ್ನು ತಿದ್ದುಪಡಿಗೊಳಿಸಲಾಗಿದ್ದು, ಪರಿಷ್ಕೃತ ದಂಡ ನಿಯಮಗಳನ್ನು ಜುಲೈ 1ರಿಂದ ಜಾರಿಗೆ ತರಲು ಕೇಂದ್ರ ಸರ್ಕಾರ ಮುಂದಾಗಿದೆ.

ಈ ತಿದ್ದುಪಡಿಗಳಲ್ಲಿ ಮುಖ್ಯವಾಗಿ ರೈಲ್ವೆ ಕಾಯ್ದೆಯ ಕಲಂ 137 ಮತ್ತು 138ರಲ್ಲಿ ಬದಲಾವಣೆ ಮಾಡಲಾಗಿದೆ. ಟಿಕೆಟ್ ಇಲ್ಲದೆ ಪ್ರಯಾಣಿಸುವುದು ಹಾಗೂ ಅನುಮತಿಸಿದ ದೂರಕ್ಕಿಂತ ಹೆಚ್ಚಿನ ಪ್ರಯಾಣ ಮಾಡುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವ ಉದ್ದೇಶದಿಂದ ಕನಿಷ್ಠ ದಂಡವನ್ನು ₹250ರಿಂದ ₹500ಕ್ಕೆ ಹೆಚ್ಚಿಸಲಾಗಿದೆ.
ಕಲಂ 137ರಡಿ ಮಾನ್ಯ ಟಿಕೆಟ್ ಅಥವಾ ಪಾಸ್ ಇಲ್ಲದೆ ಪ್ರಯಾಣಿಸುವವರಿಗೆ ಈಗ ಕನಿಷ್ಠ ₹500 ದಂಡ ವಿಧಿಸಲಾಗುತ್ತದೆ. ಗರಿಷ್ಠ ಶಿಕ್ಷೆಯಲ್ಲಿ ಯಾವುದೇ ಬದಲಾವಣೆ ಇಲ್ಲದೇ, ಆರು ತಿಂಗಳವರೆಗೆ ಜೈಲು ಶಿಕ್ಷೆ ಅಥವಾ ₹1,000ರವರೆಗೆ ದಂಡ ಅಥವಾ ಎರಡನ್ನೂ ವಿಧಿಸುವ ಅವಕಾಶ ಮುಂದುವರಿದಿದೆ.

Also read: ಪರಿಷತ್ ಚುನಾವಣೆಗೆ ಮುಕ್ತ ಮತದಾನ ಪದ್ಧತಿ ಜಾರಿಗೆ MLC ಡಿ.ಎಸ್. ಅರುಣ್ ಆಗ್ರಹ

ಇದಲ್ಲದೆ, ಕಲಂ 138ರಡಿ ಟಿಕೆಟ್ ಇಲ್ಲದೆ ಅಥವಾ ಅನುಮತಿಸಿದ ದೂರಕ್ಕಿಂತ ಹೆಚ್ಚಿನ ದೂರ ಪ್ರಯಾಣಿಸುವವರ ಮೇಲಿನ ಕನಿಷ್ಠ ಹೆಚ್ಚುವರಿ ಶುಲ್ಕವನ್ನು ₹500ಕ್ಕೆ ಹೆಚ್ಚಿಸಲಾಗಿದೆ. ಈ ಕ್ರಮವು ಟಿಕೆಟ್ ರಹಿತ ಪ್ರಯಾಣವನ್ನು ತಡೆಯುವ ಜೊತೆಗೆ ರೈಲ್ವೆ ಆದಾಯವನ್ನು ಸಂರಕ್ಷಿಸುವ ಉದ್ದೇಶ ಹೊಂದಿದೆ.

ಪರಿಷ್ಕೃತ ನಿಯಮಗಳು ‘ಪೆನಾಲ್ಟಿ’ ಮತ್ತು ‘ಫೈನ್’ ನಡುವಿನ ವ್ಯತ್ಯಾಸವನ್ನೂ ಸ್ಪಷ್ಟಪಡಿಸುತ್ತವೆ. ರೈಲ್ವೆ ಅಧಿಕಾರಿಗಳು ಪೆನಾಲ್ಟಿ ವಿಧಿಸುವ ಅಧಿಕಾರ ಹೊಂದಿದ್ದರೆ, ಫೈನ್ ಅನ್ನು ನ್ಯಾಯಾಲಯ ವಿಧಿಸುತ್ತದೆ. ಪ್ರಯಾಣಿಕರು ಪೆನಾಲ್ಟಿ ಪಾವತಿಸಲು ನಿರಾಕರಿಸಿದರೆ ಅಥವಾ ವಿಫಲರಾದರೆ ಮಾತ್ರ ಪ್ರಕರಣ ನ್ಯಾಯಾಲಯದ ಮುಂದೆ ತರಲಾಗುತ್ತದೆ.