ಕಲ್ಪ ಮೀಡಿಯಾ ಹೌಸ್ | ಮಿಜೋರಾಂನಿಂದ ಪ್ರತ್ಯಕ್ಷ ವರದಿ-1 |
ಅದು ಹಸಿರು ಹೊದ್ದು, ಕಣಿವೆ ಕಂದರ, ನದಿ-ತೊರೆಗಳನ್ನು ಹೊಂದಿರುವ, ಮ್ಯಾನ್ಮಾರ್ ಹಾಗೂ ಬಾಂಗ್ಲಾದೇಶಗಳ ನಡುವೆ ಗಡಿಯನ್ನು ಹಂಚಿಕೊಂಡಿರುವ, ನೋಡಲೇ ಮೈ ಝುಮ್ಮೆನಿಸುವ ದುರ್ಗಮವಾದ ಪ್ರದೇಶ. ಅದೇ, ಈಶಾನ್ಯ ಭಾಗದ ಏಳು ಸಹೋದರಿ ರಾಜ್ಯಗಳಲ್ಲಿ ಒಂದು ಮಿಜೋರಾಂ.
ಅಕ್ಷರಶಃ ದುರ್ಗಮ ಪರ್ವತ ಪ್ರದೇಶದಲ್ಲಿರುವ ಮಿಜೋರಾಂ ರಾಜ್ಯದ ಐಜ್ವಾಲ್ ನಗರ ಅಲ್ಲಿನ ರಾಜಧಾನಿಯಾಗಿದ್ದರೂ, ತನ್ನಲ್ಲಿನ ಭೌಗೋಳಿಕ ಪರಿಸ್ಥಿತಿಗಳ ಪರಿಣಾಮ ಹಲವಾರು ಸವಾಲುಗಳನ್ನು ಎದುರಿಸುತ್ತಿರುವ ಜನವಸತಿ ಪ್ರದೇಶ. ಮಾತ್ರವಲ್ಲ ಒಂದಕ್ಕೊಂದು ಒತ್ತಿಕೊಂಡಿರುವ ಗುಡ್ಡಗಾಡುಗಳು, ಆಳವಾದ ಕಣಿವೆಗಳನ್ನು ಹೊಂದಿರುವ ಪ್ರದೇಶ.
ಪ್ರಮುಖವಾಗಿ, ನಮ್ಮ ದೇಶದ ಮಿಜೋರಾಂ, ಅಸ್ಸಾಂ, ಮಣಿಪುರ, ತ್ರಿಪುರ ರಾಜ್ಯಗಳ ಜೊತೆ ಅಲ್ಲದೆ, ಮ್ಯಾನ್ಮಾರ್ ಹಾಗೂ ಬಾಂಗ್ಲಾದೇಶದೊಂದಿಗೂ ಸಹ ಗಡಿಯನ್ನು ಹಂಚಿಕೊಂಡಿರುವ ಪ್ರದೇಶ. ಇಂತಹ ಒಂದು ಪ್ರದೇಶದಲ್ಲಿ ನಮ್ಮ ರೈಲ್ವೇ ಇಂಜಿನಿಯರುಗಳು ಅದ್ಭುತವೊಂದನ್ನೇ ಸೃಷ್ಠಿ ಮಾಡಿದ್ದಾರೆ. ಅದೇ ಮಿಜೋರಾಂ ರಾಜಧಾನಿ ಐಜ್ವಾಲ್ ನಗರದ ಸನಿಹದಲ್ಲೇ ನಿರ್ಮಾಣಗೊಂಡಿರುವ ಬೈರಾಬಿ – ಸೈರಾಂಗ್ ನೂತನ ಬ್ರಾಡ್ ಗೇಜ್ ರೈಲು ನಿಲ್ದಾಣ.
ಎಲ್ಲಿಂದ ಎಲ್ಲಿಗೆ ರೈಲು ಮಾರ್ಗ?
ರಾಜಧಾನಿ ಐಜ್ವಾಲ್ ನಗರದಿಂದ 22.5 ಕಿಲೋ ಮೀಟರ್ ದೂರದಲ್ಲಿರುವ ದಕ್ಷಿಣದ ಕಣಿವೆ ಪ್ರದೇಶ ಸೈರಾಂಗ್’ನಿಂದ ಉತ್ತರ ದಿಕ್ಕಿನಲ್ಲಿರುವ ಬೈರಾಬಿವರೆಗೆ ನೂತನ ಬ್ರಾಡ್ ಗೇಜ್ ರೈಲು ಮಾರ್ಗ ನಿರ್ಮಾಣಗೊಂಡಿದೆ.
ಸೈರಾಂಗ್’ನ ನೂತನ ರೈಲು ನಿಲ್ದಾಣದಿಂದ ಬೈರಾಬಿ ನಿಲ್ದಾಣದವರೆಗೂ 51.38 ಕಿಲೋ ಮೀಟರ್ ಉದ್ದದ ಮಾರ್ಗ ಇದಾಗಿದ್ದು, ಐಜ್ವಾಲ್ ಹಾಗೂ ಕೊಲಸಿಬ್ ಜಿಲ್ಲೆಗಳ ಮೂಲಕ ಸಾಗುತ್ತದೆ.
ಈ ಮಾರ್ಗದಲ್ಲಿ ಹೋರ್ಟೋಕಿ, ಕವನ್ಪುವಿ, ಮುಆಲ್ಖಾಂಗ್ ಮತ್ತು ಸೈರಾಂಗ್ ಎಂಬ ನಾಲ್ಕು ನಿಲ್ದಾಣಗಳಿವೆ. ಆರಂಭಿಕವಾಗಿ 5,029 ಕೋಟಿ ರೂ. ಯೋಜನಾ ವೆಚ್ಚವಾಗಿದ್ದರು, ಮುಕ್ತಾಯದ ವೇಳೆಗೆ ಸುಮಾರು 8,071 ಕೋಟಿ ರೂ. ಆಗಲಿದೆ.
ಏನೆಲ್ಲಾ ರೈಲ್ವೆ ಇಂಜಿನಿಯರಿಂಗ್ ಅದ್ಭುತಗಳಿವೆ?
ದಟ್ಟ ಹಾಗೂ ದುರ್ಗಮ ಭಾರೀ ಕಣಿವೆಗಳ ನಡುವೆ ಸಾಗಿರುವ ಈ ರೈಲು ಮಾರ್ಗವೇ ಒಂದು ರೈಲ್ವೆ ಇಂಜಿನಿಯರಿಂಗ್ ಅದ್ಬುತವಾಗಿದೆ.
ಈ ಮಾರ್ಗದಲ್ಲಿ ಒಟ್ಟು 153 ಸೇತುವೆಗಳು, 45 ಸುರಂಗಗಳು, ನಾಲ್ಕು ನಿಲ್ದಾಣಗಳು ನಿರ್ಮಾಣಗೊಂಡಿದ್ದು, ಈ ಮಾರ್ಗದ ಗರಿಷ್ಠ ವೇಗ ಪ್ರತಿ ಗಂಟೆಗೆ 100 ಕಿಲೋ ಮೀಟರ್’ಗಳಾಗಿವೆ.
ಸೇತುವೆ ಮತ್ತು ಸುರಂಗಗಳನ್ನು ಹೊರತುಪಡಿಸಿ 23.715 ಕಿ.ಮೀ (46%) ಮಾರ್ಗವು ಬಯಲಿನಲ್ಲಿ ಇದೆ. ಕೆಲವೆಡೆ 65 ಮೀ. ಆಳದ ಕಡಿತಗಳನ್ನು ಮಾಡಲಾಗಿದೆ. ಮಳೆಯಿಂದಾಗಿ ಭೂಕುಸಿತ ತಡೆಯಲು ಗುಡ್ಡಗಳನ್ನು ಸೂಕ್ತ ರಕ್ಷಣಾ ಯೋಜನೆಗಳೊಂದಿಗೆ ಬಲಪಡಿಸಲಾಗಿದೆ.
- 70 ಮೀಟರ್’ಗಿಂತಲೂ ಎತ್ತರದ 6 ಸೇತುವೆಗಳು (ಗರಿಷ್ಠ 114 ಮೀ)
- ದುರ್ಗಮ ಸವಾಲಿನ ಭೂವೈಜ್ಞಾನಿಕ ಪರಿಸ್ಥಿತಿಗಳಲ್ಲಿ 45 ಸುರಂಗಗಳು
- ಎಲ್ಲಾ ಸುರಂಗಗಳಲ್ಲಿ ಬ್ಯಾಲೆಸ್ಟ್ಲೆಸ್ ಟ್ರ್ಯಾಕ್ ಅಳವಡಿಕೆ
- ಒಟ್ಟು ಸೇತುವೆಗಳ ಉದ್ದ – 11.78 ಕಿ.ಮೀ (23%)
- ಒಟ್ಟು ಸೇತುವೆಗಳು – 153
- ಸಣ್ಣ ಸೇತುವೆಗಳು – 88
- ಆರ್’ಒಬಿ ಮತ್ತು ಆರ್’ಯುಬಿ – 10
- ದೊಡ್ಡ ಸೇತುವೆಗಳು – 55
- ಮಾರ್ಗದ ಒಟ್ಟು ಸುರಂಗಗಳು – 45
- ಸುರಂಗಗಳ ಒಟ್ಟು ಉದ್ದ – 15.885 ಕಿ.ಮೀ (31%)
- ಅತಿದೊಡ್ಡ ಸುರಂಗ – 1.868 ಕಿ.ಮೀ
ಇನ್ನು, ಪಾರಂಪರಿಕ ಗುಡ್ಡಗಾಡು ಪ್ರದೇಶದ ಸಂಸ್ಕೃತಿಯನ್ನು ಈ ಭಾಗದ ಜನರ ಹಾಗೂ ವ್ಯವಸ್ಥೆ ಇಂದಿಗೂ ಉಳಿಸಿಕೊಂಡು ಬಂದಿದೆ. ಈ ಕಾರಣಕ್ಕಾಗಿ, ಸುರಂಗಗಳ ಮುಖಭಾಗಗಳಲ್ಲಿ ಮಿಜೋರಾಂ ಸಂಸ್ಕೃತಿಯನ್ನು ಪ್ರತಿಬಿಂಬಿಸುವ ಕಲಾತ್ಮಕ ಚಿತ್ರಗಳು ಮೂಡಿಸಲ್ಪಟ್ಟಿವೆ. ಇವುಗಳಲ್ಲಿ ಮಿಜೋರಾಂ ಜನರ ಉಡುಪು, ಹಬ್ಬ, ಸಂಪ್ರದಾಯಗಳು, ಹಳ್ಳಿಗಳ ಜೀವನ ಶೈಲಿ, ಹಾಗೆಯೇ ರಾಜ್ಯದ ಸಸ್ಯಜೀವಿ ಮತ್ತು ಪ್ರಾಣಿಜೀವಿಗಳ ಚಿತ್ರಣ ನೀಡಲಾಗಿದೆ.
ನಾಳೆ: ಮಿಜೋರಾಂ | ದುರ್ಗಮ ಪ್ರದೇಶದ ಕಷ್ಟ ಮೆಟ್ಟಿ ದಾಖಲೆ ಬರೆದ ಭಾರತೀಯ ರೈಲ್ವೆ | ಎದುರಿಸಿದ ಸವಾಲುಗಳೇನು?
(ಸೈರಾಂಗ್-ಬೈರಾಬಿ ನಡುವಿನ ಈ ಯೋಜನೆಯ ಪ್ರತ್ಯಕ್ಷ ಅನುಭವ ಪಡೆಯಲು ಭಾರತೀಯ ರೈಲ್ವೆ ಆಯೋಜಿಸಿದ್ದ ಮೂರು ದಿನಗಳ ಕ್ಷೇತ್ರ ಭೇಟಿಯಲ್ಲಿ ಕಲ್ಪ ನ್ಯೂಸ್ ಸಂಪಾದಕರು ಪಾಲ್ಗೊಂಡಿದ್ದ ಖುದ್ಧು ಅನುಭವದ ಲೇಖನ)
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news
