ಕಲ್ಪ ಮೀಡಿಯಾ ಹೌಸ್ | ಬೆಂಗಳೂರು |
ವಿಶ್ವದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಕ್ರೀಡೆಗಳಲ್ಲಿ ಒಂದಾಗಿರುವ ಪಾಡೆಲ್ (Padel) ಇದೀಗ ಏಷ್ಯನ್ ಗೇಮ್ಸ್ಗೆ (Asian Games) ಸೇರ್ಪಡೆಯಾಗಿದ್ದು, ಕ್ರೀಡಾ ಜಗತ್ತಿನಲ್ಲಿ ಹೊಸ ಅಧ್ಯಾಯ ಆರಂಭವಾಗಿದೆ. ಸ್ಪೇನ್, ಅರ್ಜೆಂಟೀನಾ, ಯುರೋಪ್ ಹಾಗೂ ಮಧ್ಯಪ್ರಾಚ್ಯ ಸೇರಿದಂತೆ ಹಲವು ಭಾಗಗಳಲ್ಲಿ ಜನಪ್ರಿಯತೆ ಗಳಿಸಿರುವ ಪಾಡೆಲ್, ಏಷ್ಯಾ ಖಂಡದಲ್ಲಿಯೂ ತನ್ನ ವ್ಯಾಪ್ತಿಯನ್ನು ವಿಸ್ತರಿಸಲು ಸಜ್ಜಾಗಿದೆ.
ಏಷ್ಯನ್ ಗೇಮ್ಸ್ನಲ್ಲಿ ಪಾಡೆಲ್ ಸೇರ್ಪಡೆ ಕೇವಲ ಪದಕಗಳ ಸ್ಪರ್ಧೆಗೆ ಸೀಮಿತವಾಗದೆ, ಏಷ್ಯಾದಾದ್ಯಂತ ಕ್ರೀಡೆಯ ಬೆಳವಣಿಗೆ, ಹೂಡಿಕೆ, ಮೂಲಸೌಕರ್ಯ ಅಭಿವೃದ್ಧಿ ಹಾಗೂ ಹೊಸ ಪ್ರತಿಭೆಗಳ ಉತ್ತೇಜನಕ್ಕೆ ಮಹತ್ವದ ವೇದಿಕೆಯಾಗಲಿದೆ ಎಂದು ಕ್ರೀಡಾ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ವರ್ಲ್ಡ್ ಪಾಡೆಲ್ ಲೀಗ್ ಸಹ-ಸ್ಥಾಪಕ ಮಹೇಶ್ ಭೂಪತಿ ಮಾತನಾಡಿ, “ಪದಕಗಳು ಈ ಪ್ರಯಾಣದ ಒಂದು ಭಾಗ ಮಾತ್ರ. ಏಷ್ಯನ್ ಗೇಮ್ಸ್ನಂತಹ ದೊಡ್ಡ ವೇದಿಕೆಗಳು ಪಾಡೆಲ್ ಕ್ರೀಡೆಗೆ ಸರ್ಕಾರದ ಗಮನ, ಹೆಚ್ಚಿನ ಹೂಡಿಕೆ ಹಾಗೂ ಪೋಷಕರ ಬೆಂಬಲವನ್ನು ತಂದುಕೊಡುತ್ತವೆ. ವಿಶ್ವದ ಶ್ರೇಷ್ಠ ಆಟಗಾರರನ್ನು ಭಾರತಕ್ಕೆ ಕರೆತರುವ ಕೆಲಸವನ್ನು ವರ್ಲ್ಡ್ ಪಾಡೆಲ್ ಲೀಗ್ ಮಾಡುತ್ತಿದೆ. ಏಷ್ಯನ್ ಗೇಮ್ಸ್ ಸೇರ್ಪಡೆ ಈ ಪಯಣದ ಮತ್ತೊಂದು ಪ್ರಮುಖ ಹೆಜ್ಜೆಯಾಗಿದೆ” ಎಂದು ಹೇಳಿದರು.
Asian Games : ಭಾರತದಲ್ಲಿ ಪಾಡೆಲ್ ಬೆಳವಣಿಗೆಗೆ ಹೊಸ ಅವಕಾಶ
ಸ್ಪೇನ್ ಮತ್ತು ಅರ್ಜೆಂಟೀನಾ ದೇಶಗಳು ಪಾಡೆಲ್ಗೆ ಬಲವಾದ ಸಂಸ್ಕೃತಿ ನಿರ್ಮಿಸಲು ಹಲವು ವರ್ಷಗಳ ಕಾಲ ಶ್ರಮಿಸಿವೆ. ಇದೀಗ ವರ್ಲ್ಡ್ ಪಾಡೆಲ್ ಲೀಗ್ ಮೂಲಕ ಈ ದೇಶಗಳ ಪ್ರಮುಖ ಆಟಗಾರರನ್ನು ಭಾರತಕ್ಕೆ ಕರೆತರುವ ಅವಕಾಶ ದೊರೆತಿದೆ.
Also read>> ಬೆಂಗಳೂರು: ದಾಸ ಸಾಹಿತ್ಯದ ವೈಭವ ಮೆರೆದ ‘ದಾಸ ಭಜನೋತ್ಸವ–2026’
ಏಷ್ಯನ್ ಗೇಮ್ಸ್ನ ಸೇರ್ಪಡೆಯಿಂದ ಏಷ್ಯಾದ ಹಲವು ರಾಷ್ಟ್ರಗಳು ಪಾಡೆಲ್ ಕ್ರೀಡೆಯಲ್ಲಿ ಹೂಡಿಕೆ ಮಾಡಲು, ಉತ್ತಮ ಮೂಲಸೌಕರ್ಯ ನಿರ್ಮಿಸಲು ಹಾಗೂ ಪ್ರತಿಭಾವಂತ ಆಟಗಾರರನ್ನು ಬೆಳೆಸಲು ಪ್ರೇರಣೆ ಪಡೆಯಲಿವೆ ಎಂದು ಮಹೇಶ್ ಭೂಪತಿ ತಿಳಿಸಿದರು.
ಪಾಡೆಲ್ ಕ್ರೀಡೆ ಹೆಚ್ಚಿನ ಜನರನ್ನು ತಲುಪುತ್ತಿರುವುದು ಸಂತಸದ ಸಂಗತಿ. ಏಷ್ಯಾದಂತಹ ದೊಡ್ಡ ಮಾರುಕಟ್ಟೆಗೆ ಪ್ರವೇಶಿಸಿರುವ ಈ ಕ್ರೀಡೆಗೆ ಉತ್ತಮ ಪ್ರತಿಕ್ರಿಯೆ ದೊರೆಯುವ ನಿರೀಕ್ಷೆಯಿದೆ. ಏಷ್ಯನ್ ಗೇಮ್ಸ್ ಮೂಲಕ ಅನೇಕ ಹೊಸ ಆಟಗಾರರು ಪಾಡೆಲ್ ಪರಿಚಯಿಸಿಕೊಂಡು ಕ್ರೀಡೆಯತ್ತ ಆಕರ್ಷಿತರಾಗಲಿದ್ದಾರೆ ಎಂದು ಅವರು ಹೇಳಿದರು.
ವಿಶ್ವದರ್ಜೆಯ ಆಟಗಾರರಿಂದ ಮೆಚ್ಚುಗೆ
ವಿಶ್ವದ 10ನೇ ಶ್ರೇಯಾಂಕದ ಪಾಡೆಲ್ ಆಟಗಾರ ಕೋಕಿ ನೀಟೊ ಮಾತನಾಡಿ, ಹಿಂದೆ ಪಾಡೆಲ್ ಆಡಲು ಸಾಧ್ಯವಿಲ್ಲ ಎಂದು ಭಾವಿಸಲಾಗಿದ್ದ ಹಲವು ದೇಶಗಳಲ್ಲಿಯೂ ಇಂದು ಈ ಕ್ರೀಡೆ ಬೆಳೆಯುತ್ತಿರುವುದು ಅದರ ಜನಪ್ರಿಯತೆಯನ್ನು ತೋರಿಸುತ್ತದೆ ಎಂದು ಹೇಳಿದರು.
“ಪಾಡೆಲ್ ಅನ್ನು ಹೆಚ್ಚಿನ ದೇಶಗಳಿಗೆ ತಲುಪಿಸುವಲ್ಲಿ ವರ್ಲ್ಡ್ ಪಾಡೆಲ್ ಲೀಗ್ ಅತ್ಯುತ್ತಮ ಕಾರ್ಯ ಮಾಡುತ್ತಿದೆ. ಏಷ್ಯನ್ ಗೇಮ್ಸ್ ಸೇರ್ಪಡೆ ಈ ಕ್ರೀಡೆಯ ಬೆಳವಣಿಗೆಗೆ ಮತ್ತಷ್ಟು ವೇಗ ನೀಡಲಿದೆ” ಎಂದು ಅವರು ಅಭಿಪ್ರಾಯಪಟ್ಟರು.
ವಿಶ್ವದ 10ನೇ ಶ್ರೇಯಾಂಕದ ಪಾಡೆಲ್ ಆಟಗಾರ್ತಿ ಮಾರ್ತಾ ಒರ್ಟೆಗಾ ಮಾತನಾಡಿ, “ಪಾಡೆಲ್ಗೆ ಇದು ಅತ್ಯಂತ ಮಹತ್ವದ ಹೆಜ್ಜೆಯಾಗಿದೆ. ಹೊಸ ದೇಶಗಳು ಮತ್ತು ಅಥ್ಲೀಟ್ಗಳಿಗೆ ಕ್ರೀಡೆಯನ್ನು ಪರಿಚಯಿಸಲು ಇದು ಸಹಕಾರಿಯಾಗಲಿದೆ. ಒಲಿಂಪಿಕ್ಸ್ ತಲುಪುವ ನಮ್ಮ ಗುರಿಗೂ ಇದು ಮತ್ತಷ್ಟು ಹತ್ತಿರ ಕರೆದೊಯ್ಯಲಿದೆ” ಎಂದರು.
ಮುಂಬೈನಲ್ಲಿ ವರ್ಲ್ಡ್ ಪಾಡೆಲ್ ಲೀಗ್ ನಾಲ್ಕನೇ ಸೀಸನ್
ವರ್ಲ್ಡ್ ಪಾಡೆಲ್ ಲೀಗ್ ತನ್ನ ನಾಲ್ಕನೇ ಸೀಸನ್ಗಾಗಿ ಆಗಸ್ಟ್ 12ರಿಂದ 16ರವರೆಗೆ ಮುಂಬೈನ DOME, SVP ಸ್ಟೇಡಿಯಂನಲ್ಲಿ ನಡೆಯಲಿದೆ. ಐದು ದಿನಗಳ ಈ ಪ್ರತಿಷ್ಠಿತ ಸ್ಪರ್ಧೆಯಲ್ಲಿ ವಿಶ್ವದ ಪ್ರಮುಖ 36 ಅಂತಾರಾಷ್ಟ್ರೀಯ ಆಟಗಾರರು ಭಾಗವಹಿಸಲಿದ್ದಾರೆ.
ಪಾಡೆಲ್ ತನ್ನ ಐತಿಹಾಸಿಕ ಏಷ್ಯನ್ ಗೇಮ್ಸ್ ಪದಾರ್ಪಣೆಗೆ ಸಜ್ಜಾಗುತ್ತಿರುವ ಸಂದರ್ಭದಲ್ಲಿ, ಭಾರತದಲ್ಲಿ ಈ ಕ್ರೀಡೆಯ ವ್ಯಾಪ್ತಿಯನ್ನು ವಿಸ್ತರಿಸುವುದು, ವಿಶ್ವಮಟ್ಟದ ಸ್ಪರ್ಧೆಗಳನ್ನು ಆಯೋಜಿಸುವುದು, ಭವಿಷ್ಯದ ಪ್ರತಿಭೆಗಳನ್ನು ಪ್ರೋತ್ಸಾಹಿಸುವುದು ಹಾಗೂ ಏಷ್ಯಾದಲ್ಲಿ ಪಾಡೆಲ್ಗೆ ದೀರ್ಘಕಾಲೀನ ಬೆಳವಣಿಗೆಯ ವಾತಾವರಣ ನಿರ್ಮಿಸುವಲ್ಲಿ ವರ್ಲ್ಡ್ ಪಾಡೆಲ್ ಲೀಗ್ ಪ್ರಮುಖ ಪಾತ್ರ ವಹಿಸುತ್ತಿದೆ
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news
