ದೇವರಲ್ಲಿ ನಂಬಿಕೆ ಇಟ್ಟಮೇಲೆ ಕಷ್ಟಗಳಿಗೆ ಆತನನ್ನು ದೂಷಿಸಬಾರದು: ಹರಿಹರಪುರ ಶ್ರೀ

ಕಲ್ಪ ಮೀಡಿಯಾ ಹೌಸ್ | ಶಿವಮೊಗ್ಗ |

ಪ್ರಪಂಚವನ್ನು ಜೋಡಿಸುವುದೇ ಧರ್ಮ. ಸುಖ ದುಃಖಗಳಿಗೆ ನೀವು ಮಾಡಿದ ಕರ್ಮಗಳೇ ಕಾರಣ ಎಂದು ಶ್ರೀಕ್ಷೇತ್ರ ಹರಿಹರಪುರದ ಶ್ರೀಶ್ರೀ ಸ್ವಯಂ ಪ್ರಕಾಶ ಸಚ್ಚಿದಾನಂದ ಸರಸ್ವತಿ ಮಹಾಸ್ವಾಮಿಗಳು ಹೇಳಿದ್ದಾರೆ.

ಅವರು ಇಂದು ರವೀಂದ್ರನಗರ ಗಣಪತಿ ದೇವಸ್ಥಾನದಲ್ಲಿ ಭಜನಾ ಪರಿಷತ್ ಶಿವಮೊಗ್ಗ ಅರ್ಚಕ ವೃಂದ ಹಾಗೂ ಸಂಸ್ಕಾರ ಪ್ರತಿಷ್ಠಾನ ಶಿವಮೊಗ್ಗ ಇವರ ಸಂಯುಕ್ತಾಶ್ರಯದಲ್ಲಿ ಮಹಾಶಿವರಾತ್ರಿ ಪ್ರಯುಕ್ತ ಲೋಕಕಲ್ಯಾಣಾರ್ಥವಾಗಿ ನಡೆಯುವ 4ನೇ ವರ್ಷದ ಸಾಮೂಹಿಕ ಓಂ ನಮಃ ಶಿವಾಯ ಜಪ ಯಜ್ಞ, ಶ್ರೀ ರುದ್ರಹೋಮ ಹಾಗೂ ಶ್ರೀರಾಮನುಗ್ರಹ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಸಾನಿಧ್ಯ ವಹಿಸಿ ಆರ್ಶೀವಚನ ನೀಡಿದರು.
ಭಾರತೀಯ ಸಂಸ್ಕøತಿಯಲ್ಲಿ ವಿಚಾರಕ್ಕೆ ಮುಕ್ತ ಅವಕಾಶವಿದೆ. ಧಾರ್ಮಿಕ ವೈವಿಧ್ಯತೆಯನ್ನು ಒಪ್ಪಿಕೊಳ್ಳುವ ಹೃದಯ ವೈಶ್ಯಾಲತೆ ಇದೆ. ಎಲ್ಲರಲ್ಲಿ ಒಂದಾಗಿ ಬಾಳುವಂತಿರುವುದೇ ಧರ್ಮ. ನಾವು ಮಾಡಿದ ಕರ್ಮಗಳ ಫಲ ನಮಗೆ ಸಿಗುತ್ತದೆ. ಪುನರ್‍ಜನ್ಮ, ಪೂರ್ವ ಜನ್ಮ ಮತ್ತು ದೇವರಲ್ಲಿ ನಂಬಿಕೆ ಇಟ್ಟವರು ಕಷ್ಟಗಳಿಗೆ ದೇವರನ್ನು ದೂಷಿಸಬಾರದು ಎಂದರು.

Also read: ಡಿಸಿಎಂ ಡಿಕೆ ಶಿವಕುಮಾರ್ ವಿರುದ್ಧ `ಇಡಿ’ ಪ್ರಕರಣ ವಜಾ: ಸುಪ್ರೀಂ ಕೋರ್ಟ್

ದೇವರು ಕರ್ಮಗಳ ಕಾರ್ಯಾಧ್ಯಕ್ಷ ಅಷ್ಟೇ, ಸುಪ್ರೀಂ ಕೋರ್ಟ್‍ನಲ್ಲಿ ಅಂತಿಮವಾಗಿ ನ್ಯಾಯಾಧೀಶರು ನಿರಾಪರಾಧಿಯನ್ನು ಅಪರಾಧಿಯೆಂದು ಹೇಳಲಾಗುವುದಿಲ್ಲ. ಅಪರಾಧಿಗೆ ಶಿಕ್ಷೆಯನ್ನು ಕಡಿಮೆ ಮಾಡಬಹುದಷ್ಟೇ. ಅದೇ ರೀತಿ ದೇವರ ಮೊರೆ ಹೋದರೆ ಕಷ್ಟ ಬಂದಾಗ ತಮ್ಮ ಸಂಕಷ್ಟಗಳಿಗೆ ದೇವರು ಪರಿಹಾರ ನೀಡಿ ಶಿಕ್ಷೆ ಕಡಿಮೆ ಮಾಡಬಹುದಷ್ಟೇ ಆದರೆ, ಸಂಪೂರ್ಣ ಕರ್ಮಫಲ ಅದು ಕೆಟ್ಟದಾಗಿದ್ದಲ್ಲಿ ವಿಧಿ ಬರಹದಂತೆ ಅನುಭವಿಸಲೇಬೇಕಾಗುತ್ತದೆ ಎಂದರು.

ವಿಧಿ ಎಂದರೆ, ನಿನ್ನೆ ಮಾಡಿದ ಪುರುಷ ಪ್ರಯತ್ನ ಅದು ಇವತ್ತು ವಿಧಿಯಾಗುತ್ತದೆ. ಇವತ್ತು ಮಾಡಿದ ಪುರುಷ ಪ್ರಯತ್ನ ನಾಳೆ ವಿಧಿಯಾಗುತ್ತದೆ. ಬೆಂಕಿ ಸುಡುತ್ತೆ ಎಂಬುವುದು ಮನುಷ್ಯರಿಗೆ ಗೊತ್ತಿರಬೇಕು. ಕಾಳ ಎಂದರೆ ನಮ್ಮ ಕರ್ಮದ ಮೂಲಕ ಬದುಕನ್ನು ನಿಯಂತ್ರಿಸುವವ, ಮಾಡಿರುವ ಕೆಟ್ಟ ಮತ್ತು ಒಳ್ಳೆಯ ಕೆಲಸಕ್ಕೆ ಕೂಡಲೇ ಫಲ ಬರುವುದಿಲ್ಲ ಅದು ಬೀಜರೂಪದಲ್ಲಿದ್ದು ಅನೇಕ ವರ್ಷಗಳ ನಂತರ ಹೆಮ್ಮರವಾಗಿ ಫಲ ನೀಡುತ್ತದೆ. 20 ವರ್ಷದಲ್ಲಿ ಮಾಡಿದ ನಿರ್ಲಕ್ಷ್ಯ ನಂತರ ವೃದ್ಧಾಪ್ಯಾದಲ್ಲಿ ಫಲ ನೀಡುವುದನ್ನು ತಪ್ಪಿಸಿಕೊಳ್ಳಲಾಗುವುದಿಲ್ಲ ಎಂದರು.