ಬಿಜೆಪಿ ಜನರ ಭಾವನೆಗೆ ಬೆಲೆ ನೀಡದೇ ಕಾರ್ಪೊರೇಟ್ ಸಂಸ್ಥೆಗಳಿಗೆ ಮಣೆ ಹಾಕುತ್ತಿದೆ: ಮಧು ಬಂಗಾರಪ್ಪ ಆರೋಪ

ಕಲ್ಪ ಮೀಡಿಯಾ ಹೌಸ್   |  ಸೊರಬ  |

ಅನೇಕ ಗ್ರಾಮೀಣ ಭಾಗದ ರೈತ ಕೂಲಿ ಕಾರ್ಮಿಕರು ಜೀವನ ಸಾಗಿಸುವ ಉದ್ದೇಶದಿಂದ ಕಾಫಿ ಸೀಮೆಯತ್ತ ವಲಸೆ ಹೋಗುತ್ತಿದ್ದರು, ಅರಣ್ಯ ಹಕ್ಕು ಮತ್ತು ಬಗುರ್‌ಹುಕುಂ ಸಾಗುವಳಿಯಿಂದ ವಲಸೆ ಹೋಗುವುದನ್ನು ತಡೆಗಟ್ಟಿ, ಸ್ವಂತ ಬದುಕು ಕಟ್ಟಿಕೊಂಡರು ಎಂದು ಮಾಜಿ ಶಾಸಕ ಎಸ್. ಮಧು ಬಂಗಾರಪ್ಪ Former MLA Madhu Bangarappa ಹೇಳಿದರು.

ಭಾನುವಾರ ತಾಲೂಕಿನ ಅಂಡಗಿ ಗ್ರಾಮದಲ್ಲಿ ಕರೆದಿದ್ದ ಕಾಂಗ್ರೆಸ್ ಮುಖಂಡರ ಮತ್ತು ಕಾರ್ಯಕರ್ತರ ಸಭೆಯಲ್ಲಿ ಮಾತನಾಡಿದ ಅವರು, ಹಿಂದೆ ಬೇಸಿಗೆ ಆರಂಭವಾಗುತ್ತಿದ್ದಂತೆ ರೈತ ಕೂಲಿ ಕಾರ್ಮಿಕರು ತುತ್ತು ಅನ್ನಕ್ಕಾಗಿ, ಕೂಲಿ ಕೆಲಸಕ್ಕಾಗಿ ಕಾಫಿ ಸೀಮೆಯತ್ತ ಹೋಗುತ್ತಿದ್ದುದು ಸಾಮಾನ್ಯವಾಗಿತ್ತು. ಮಾಜಿ ಮುಖ್ಯಮಂತ್ರಿ ಎಸ್. ಬಂಗಾರಪ್ಪ ಅವರು ಬಗರ್‍ಹುಕುಂ ಮತ್ತು ಅರಣ್ಯ ಹಕ್ಕು ಸಾಗುವಳಿದಾರರಿಗೆ ಬೆನ್ನೆಲುಬಾಗಿ ನಿಂತ ತರುವಾಯ ಕೂಲಿ ಕಾರ್ಮಿಕರು ಸ್ವಂತ ಭೂಮಿಯ ಹಕ್ಕನ್ನು ಹೊಂದುವ ಕನಸು ಕಂಡರು. ತಾವು ಶಾಸಕರಾಗಿದ್ದ ಅವಧಿಯಲ್ಲಿಯೂ ಎಸ್. ಬಂಗಾರಪ್ಪ ಅವರ ಹಾದಿಯಲ್ಲಿಯೇ ಸಾವಿರಾರು ಸಾಗುವಳಿದಾರರಿಗೆ ಹಕ್ಕು ಪತ್ರ ನೀಡಿದ್ದೇನು. ಆದರೆ, ಪ್ರಸ್ತುತ ಸಾಗುವಳಿದಾರರಿಗೆ ನೀಡಿದ ಹಕ್ಕು ಪತ್ರಗಳನ್ನು ಶಾಸಕರು ಅಧಿಕಾರಿಗಳ ಮುಖೇನ ವಜಾಗೊಳಿಸುವ ಮೂಲಕ ಮತ್ತೆ ರೈತರನ್ನು ಕಾಫಿ ಸೀಮೆಯತ್ತ ಕಳಿಸುವ ಕುತಂತ್ರ ನಡೆದಿದೆ ಎಂದು ಆರೋಪಿಸಿದರು.

ಕೇಂದ್ರ ಮತ್ತು ರಾಜ್ಯದಲ್ಲಿರುವ ಬಿಜೆಪಿ ಸರ್ಕಾರ ಜನ ವಿರೋಧಿ ಸರ್ಕಾರವಾಗಿದ್ದು, ಅಗತ್ಯ ವಸ್ತುಗಳ ಬೆಲೆ ಗಗನಕ್ಕೇರಿದೆ. ಜಾತಿ-ಧರ್ಮಗಳ ಆಧಾರದಲ್ಲಿ ಅಧಿಕಾರಕ್ಕೆ ಬರುವ ಬಿಜೆಪಿ ಜನ ಸಾಮಾನ್ಯರ ಭಾವನೆಗಳಿಗೆ ಬೆಲೆ ನೀಡದೇ, ಕಾರ್ಪೋರೇಟ್ ಸಂಸ್ಥೆಗಳಿಗೆ ಮಣೆ ಹಾಕುತ್ತದೆ. ಆರಂಭದಲ್ಲಿ ಉಜ್ವಲ ಗ್ಯಾಸ್ ನೀಡುವ ಮೂಲಕ ಸಾಕಷ್ಟು ಪ್ರಚಾರ ಪಡೆದ ಕೇಂದ್ರ ಸರ್ಕಾರ ತದ ನಂತರ ಗ್ಯಾಸ್ ಮೇಲಿನ ಸಬ್ಸೀಡಿಯನ್ನು ಜನತೆಗೆ ಅರಿವಿಗೇ ಬಾರದ ಹಾಗೆ ತೆಗೆದು ಹಾಕಿತು. ಬಿಜೆಪಿಯವರು ಪ್ರಚಾರ ಪಡೆಯುವದರಲ್ಲಿ ನಿಸ್ಸೀಮರಾಗಿದ್ದಾರೆ ಎಂದು ವ್ಯಂಗ್ಯವಾಡಿದರು.

Also read: ಲಾರಿಗೆ ಟೆಂಪೊ ಟ್ರಾವೆಲರ್ ಢಿಕ್ಕಿ : ಇಬ್ಬರು ಸಾವು

ಸಮರ್ಪಕ ವಿದ್ಯುತ್ ಪೂರೈಕೆ ಇಲ್ಲದೇ ಗ್ರಾಮೀಣ ಭಾಗದ ರೈತರು ಕಂಗಾಲಾಗಿ ಹೋಗಿದ್ದಾರೆ. ರೈತರು ಬೆಳೆದ ಬೆಳೆಗಳು ಒಣಗುತ್ತಿವೆ. ರೈತರು ಬೆಳೆಗಳನ್ನು ಉಳಿಸಿಕೊಳ್ಳು ಹರಸಾಹಸ ಪಡುವ ಸ್ಥಿತಿ ನಿರ್ಮಾಣವಾಗಿದೆ. ತಾವು ಶಾಸಕರಾಗಿದ್ದಾಗ ಅಂದಿನ ಇಂಧನ ಸಚಿವರಾಗಿದ್ದ ಡಿ.ಕೆ. ಶಿವಕುಮಾರ್ ಅವರ ಗಮನಕ್ಕೆ ತಂದು ಮಾವಲಿ, ಉಳವಿ, ಜಡೆ ಮೂರು ಕಡೆ ಗ್ರಿಡ್‍ಗಳನ್ನು ಮಂಜೂರು ಮಾಡಿಸಿಕೊಂಡು ರೈತರಿಗೆ ಸಮರ್ಪಕವಾಗಿ ವಿದ್ಯುತ್ ಪೂರೈಸುವ ನಿಟ್ಟಿನಲ್ಲಿ ಯೋಜನೆ ರೂಪಿಸಲಾಗಿತ್ತು, ಆದರೆ ಇಂದಿನ ಸರ್ಕಾರಗಳಿಗೆ ವಿದ್ಯುತ್ ಪೂರೈಸಲು ಸಹ ಆಗುತ್ತಿಲ್ಲ ರೈತರೊಂದಿಗೆ ಕಣ್ಣಾಮುಚ್ಚಾಲೆ ಆಟವಾಡುತ್ತಿದೆ ಎಂದು ಆರೋಪಿಸಿದರು.

ಸಭೆಯಲ್ಲಿ ಸೊರಬ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಅಣ್ಣಪ್ಪ ಹಾಲಘಟ್ಟ, ಮುಖಂಡರಾದ ಎಚ್. ಗಣಪತಿ, ಎಂ.ಡಿ. ಶೇಖರ್, ನಾಗರಾಜ ಚಿಕ್ಕಸವಿ, ಸುರೇಶ ಬಿಳವಾಣಿ, ನಿರಂಜನಮೂರ್ತಿ ದೇವತಿಕೊಪ್ಪ, ಶಿವಕುಮಾರ ಕಾಸ್ವಾಡಿಕೊಪ್ಪ, ರವಿ ಬರಗಿ, ಕೆ.ಪಿ. ಪ್ರವೀಣ್ ಶಾಂತಗೇರಿ, ಜಗದೀಶ್ ಅಂಡಿಗೆ, ವಾಸಪ್ಪ, ಅಮೀರ್ ಸಾಬ್, ಹೊಳಿಯಪ್ಪ ದೇವತಿಕೊಪ್ಪ, ಶರಣಪ್ಪ ಹರೂರು, ಓಂಕಾರಪ್ಪ, ನಾಗೇಂದ್ರಪ್ಪ ಶಾಂತಗೇರಿ, ಬಸವರಾಜ ಅಂಬ್ಲಿ, ಆನಂದ ಅಂಬ್ಲಿ, ರಾಜು ಅಂಬ್ಲಿ, ಸಂಜೀವ್ ದೇವತಿಕೊಪ್ಪ, ಪಾಂಡು ಕೊಡಕಣಿ, ಮಧು ಆರೇಕೊಪ್ಪ, ಸಚಿನ್ ಮಾವಲಿ, ಸಿದ್ದೇಶ ಮಾವಲಿ, ಪುರುಷೋತ್ತಮ, ಯುವರಾಜ, ರೋಹಿತ್ ಉರುಗನಹಳ್ಳಿ, ದೇವರಾಜ್ ಸೇರಿದಂತೆ ಮತ್ತಿತರರಿದ್ದರು.

ವರದಿ: ಮಧುರಾಮ್, ಸೊರಬ

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news