ನಿಸರ್ಗದ ಸಂಪತ್ತನ್ನು ಜ್ಞಾನವಿಲ್ಲದೆ ಬರಿದು ಮಾಡುತ್ತಿರುವುದು ಬೇಸರದ ಸಂಗತಿ

ಕಲ್ಪ ಮೀಡಿಯಾ ಹೌಸ್ | ಸೊರಬ |

ನಾವು ನೆಲೆನಿಂತ ಈ ಭೂಮಿ ಅಪಾರ ಸಿರಿ ಸಂಪತ್ತನ್ನು ಹೊಂದಿದ್ದು, ಪ್ರಾಥಮಿಕ ಜ್ಞಾನ ಇಲ್ಲದೆ ಅಂತಹ ಸಂಪತ್ತನ್ನು ಬರಿದು ಮಾಡಿಕೊಳ್ಳುತ್ತಿರುವುದು ಖೇದಕರ ಸಂಗತಿ ಎಂದು ಸಾರ ಸಂಸ್ಥೆಯ ಕಾರ್ಯಕರ್ತ ಧನುಷ್ ಹೇಳಿದರು.

ತಾಲ್ಲೂಕು ನಿಸರಾಣಿ ವಿಸಂ ಪ್ರೌಢಶಾಲೆ ಯಲ್ಲಿ ಸಾರ ಸಂಸ್ಥೆ ತಾಲ್ಲೂಕು ಪತ್ರಕರ್ತರ ಸಂಘದ ಸಹಯೋಗದೊಂದಿಗೆ ಆರಂಭಿಸಿರುವ ಸಹ್ಯಾದ್ರಿ ಸಂವಾದ ಕಾರ್ಯಕ್ರಮ ಉದ್ಧೇಶಿಸಿ ಮಾತನಾಡಿದರು.

ಈ ಜೀವಜಗತ್ತಿನಲ್ಲಿ ಪ್ರತಿಯೊಂದು ಜೀವಿಗೂ ಬದುಕುವ ಹಕ್ಕು ಇದೆ. ಆದರೆ, ಪ್ರಕೃತಿ ನಮ್ಮ ಭೋಗಕ್ಕಾಗಿ ಎಂಬ ಸ್ವಾರ್ಥ ಲಾಲಸೆಯಿಂದಾಗಿ ನಾವು ನಿರಂತರ ಪರಿಸರದ ಮೇಲೆ ದಾಳಿ ನಡೆಸುತ್ತಿದ್ದೇವೆ. ನಾವಿಲ್ಲದೆ ಪರಿಸರದಲ್ಲಿನ ಎಲ್ಲ ಜೀವಿಗಳು ಬದುಕಬಹುದು. ಆದರೆ, ಪರಿಸರವಿಲ್ಲದೆ ನಾವು ಬದುಕಲು ಸಾಧ್ಯವಿಲ್ಲ ಎಂಬುದನ್ನು ಮನದಟ್ಟು ಮಾಡಿಕೊಡಬೇಕಾದ ಅನಿವಾರ್ಯತೆ ಪ್ರಸ್ತುತ ಕಾಲಘಟ್ಟದಲ್ಲಿ ಅವಶ್ಯವೆನಿಸಿದೆ.

ಹಲವಾರು ವರ್ಷಗಳಿಂದ ಸಾರ ಸಂಸ್ಥೆ ರಾಜ್ಯಾದ್ಯಂತ ಪರಿಸರ ಸಂರಕ್ಷಣೆಗಾಗಿ ಇಂತಹ ಚಿತ್ತಾರ ಪಲಕಗಳೊಂದಿಗೆ ತಿರುಗಾಟ ನಡೆಸಿದ್ದು, ಪ್ರಸಕ್ತ ಸಾಲಿನಲ್ಲಿ ಬೆಳೆಯುವ ಪೀಳಿಗೆಗೆ ಅರಿವು ಮೂಡಿಸುವ ಗುರಿ ಇರಿಸಿಕೊಂಡಿದೆ. ಯಾವುದೇ ಅನುದಾನ ನಿರೀಕ್ಷಿಸದ ಸ್ವಯಂ ಸೇವಾ ಸಂಸ್ಥೆ ಇದು. ಸಂಸ್ಥೆಯ ಕಾರ್ಯಕ್ರಮ ಕ್ಕೆ ಶಾಲಾ ಕಾಲೇಜುಗಳಲ್ಲದೆ ವಿವಿಧ ಸಂಘಸಂಸ್ಥೆಗಳು, ಸಾರ್ವಜನಿಕರು ಕೈಜೋಡಿಸಬೇಕು ಎಂದು ವಿನಂತಿಸಿದರು.

ಪತ್ರಕರ್ತರ ಸಂಘದ ಗೌರವಾಧ್ಯಕ್ಷ ಶ್ರೀಪಾದ ಬಿಚ್ಚುಗತ್ತಿ ಪಾಲ್ಗೊಂಡು ಸಮಾನ ಮನಸ್ಕರ, ಸೇವಾ ಮನೋಭಾವದ ತಾಲ್ಲೂಕು ಪತ್ರಕರ್ತರ ಸಂಘ ಸಮಾಜ, ಪರಿಸರ ಮುಂತಾದ ಜನೋಪಯೋಗಿ ಕಾರ್ಯಕ್ರಮಗಳಿಗೆ ಕೈಜೋಡಿಸುತ್ತಿದ್ದು, ಮುಂದಿನ ದಿನಗಳಲ್ಲಿ ಪತ್ರಕರ್ತರ ನಡೆ ಗ್ರಾಮಗಳ ಕಡೆ ಶೀರ್ಷಿಕೆಯ ಮಹತ್ವಪೂರ್ಣ ಕಾರ್ಯಕ್ರಮ ಹಮ್ಮಿಕೊಳ್ಳುತ್ತದೆ ಎಂದರು.

ಮಕ್ಕಳ ಜೊತೆ ಸಂವಾದದಲ್ಲಿ ಪಾಲ್ಗೊಂಡ ಅವರು ಹಾವು ಮತ್ತು ನಾವು ವಿಷಯವಾಗಿ ಉರಗ ಪ್ರಬೇಧಗಳು, ಸ್ಥಳೀಯವಾಗಿ ಕಾಣಿಸುವ ವೈವಿಧ್ಯಮಯ ಹಾವುಗಳ ಬಗ್ಗೆ, ಹಾವು ಕಡಿತದಿಂದ, ಕಡಿತಗೊಂಡಾಗ ಅನುಸರಿಸಬೇಕಾದ ಜಾಗೃತಿ ಕುರಿತು ಮಾಹಿತಿ ನೀಡಿದರು.