ವಿದ್ಯಾರ್ಥಿಗಳು ಸಮಾಜಕ್ಕೆ ಸ್ಫೂರ್ತಿ ಮತ್ತು ಮಾದರಿಯಾಗಬೇಕು: ಎಸ್’ಪಿ ಡಾ. ಅಶ್ವಿನಿ

ಶಿವಮೊಗ್ಗ: ನಮ್ಮ ಸಮಾಜದಲ್ಲಿ ಕೇವಲ ಡಾಕ್ಟರ್, ಇಂಜಿನಿಯರ್ ಆಗುವ ಕನಸು ಕಾಣದೇ ದೇಶಸೇವೆ ಮಾಡುವಲ್ಲಿ ಕೂಡ ನಾವು ಆಸಕ್ತಿ ತಾಳಬೇಕು. ನಮ್ಮಲ್ಲಿ ಕೇವಲ ಕೆಲವು ಪ್ರಾದೇಶಿಕ ಜನತೆ ಮಾತ್ರ ಸೈನ್ಯ ಸೇರುವ ಆಶಯ ರೂಢಿಸಿಕೊಂಡಿದ್ದಾರೆ. ಹಾಗಾಗದೇ ದೇಶದ ಎಲ್ಲೆಡೆಯ ಜನತೆಯೂ ಈ ಬಗ್ಗೆ ಮುಂದಾಗಬೇಕು ಎಂದು ಶಿವಮೊಗ್ಗ ಜಿಲ್ಲಾ ರಕ್ಷಣಾಧಿಕಾರಿ ಡಾ.ಎಂ. ಅಶ್ವಿನಿ ಕರೆ ನೀಡಿದರು.

ಸಿಹಿಮೊಗೆ ಸಂಯುಕ್ತ ವಿಶ್ರಾಂತ ನೌಕರರ ಸಂಘ, ಸಹ್ಯಾದ್ರಿ ಕಲಾ ಕಾಲೇಜು ಸಂಯುಕ್ತ ಆಶ್ರಯದಲ್ಲಿ ಏರ್ಪಡಿಸಿದ್ದ ಕಾರ್ಗಿಲ್ ವಿಜಯ ದಿವಸ್ ಆಚರಣಾ ಸಮಾರಂಭ ಉದ್ಘಾಟಿಸಿ ಅವರು ಮಾತನಾಡಿದರು.

ವಿದ್ಯಾರ್ಥಿಗಳು ತಮ್ಮ ವ್ಯಾಸಂಗದ ಅವಧಿಯಲ್ಲಿ ಸಮಯಕ್ಕೆ ಬಹಳ ಮಹತ್ವ ನೀಡಬೇಕು. ಕಳೆದ ಕಾಲ ಮತ್ತೆ ಬರುವುದಿಲ್ಲ. ಮುಂದೆ ಭವಿಷ್ಯದಲ್ಲಿ ತಾನೇನಾಗಬೇಕು ಎಂಬುದನ್ನು ನಿರ್ಧರಿಸಬೇಕು. ಸಮಾಜದಲ್ಲಿ ಯಾವುದೇ ವೃತ್ತಿಯಾಗಲೀ ಕೇವಲ ತಾನು ಮಾತ್ರ ಬದುಕಬೇಕೆಂಬುದಲ್ಲ. ಸಮಾಜಕ್ಕೆ ತಾನೇನು ಕೊಡುಗೆಯನ್ನು ನೀಡಬಲ್ಲೆ ಎಂಬ ಬಗ್ಗೆ ವಿವೇಚಿಸಬೇಕು. ವೃತ್ತಿಯಾರಂಭಿಸಿದಾಗ ಸಂಗಡವೇ ಸಾಮಾಜಿಕ ಹೊಣೆಯೂ ನಮ್ಮದಾಗುತ್ತದೆ. ಅದೇ ದೇಶ ಸೇವೆಯಾಗುತ್ತದೆ ಎಂದು ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ನುಡಿಯಾಡಿದರು.

ಕಾರ್ಗಿಲ್ ಸಮರ ಸ್ಮರಣಾ ಭಾಷಣ ಮಾಡಿ ಮಾತನಾಡಿದ ಸಹ್ಯಾದ್ರಿ ಕಲಾ ಕಾಲೇಜಿನ ಪ್ರಾಂಶುಪಾಲ ಡಾ. ಧನಂಜಯ, ಸೈನಿಕರ ದೇಶಸೇವೆಯ ಫಲವಾಗಿ ನಾವೆಲ್ಲರೂ ಇಂದು ನಮ್ಮ ಬಾಳನ್ನು ನೆಮ್ಮದಿಯಿಂದ ಸಾಗಿಸುತ್ತಿದ್ದೇವೆ. ನಿಜಕ್ಕೂ ಯುದ್ಧದಲ್ಲಿ ಹೋರಾಡುವ ಯೋಧರ ಜೀವನ ತ್ಯಾಗಮಯ. ನಮ್ಮ ಯುವಜನ ಯೋಧರ ಸೇವೆಯನ್ನು ಸ್ಮರಿಸಬೇಕು. ಸಮಾಜದಲ್ಲಿ ವಿವಿಧ ಉನ್ನತ ಹುದ್ದೆಗಳನ್ನು ನಿರ್ವಹಿಸುವ ಮೂಲಕ ದೇಶೋಪಕಾರಿಯಾದ ಕೆಲಸ ಮಾಡಬೇಕು ಎಂದು ವಿದ್ಯಾರ್ಥಿಗಳಿಗೆ ಹಿತೋಪದೇಶ ಮಾಡಿದರು.

ಮಾಜಿ ಯೋಧರಾದ ಸರ್ವಶ್ರೀ ಮಾಲತೇಶ್, ಹನುಮಂತಪ್ಪ, ಸ್ಟ್ಯಾನ್ಲೀ ಮುಂತಾದವರನ್ನು ಕಾರ್ಗಿಲ್ ವಿಜಯೋತ್ಸವದ ನಿಮಿತ್ತ ಆದರ ಪೂರ್ವಕ ಸನ್ಮಾನಿಸಲಾಯಿತು.

ಕರ್ನಲ್ ಕೆ.ಎ. ರಾಮಚಂದ್ರ ಅವರು ರಾಷ್ಟ್ರರಕ್ಷಣೆಯಲ್ಲಿ ಯುವಜನರ ಪಾತ್ರ ವಿಷಯ ಕುರಿತು ವಿಡಿಯೋ ಕ್ಲಿಪಿಂಗ್ ಆಧರಿತ ಉಪನ್ಯಾಸ ನೀಡಿದರು.

ಅವಿಭಜಿತ ಭಾರತದ ಪರಿಸ್ಥಿತಿ ಮತ್ತು ಸ್ವಾತಂತ್ರ್ಯಾ ನಂತರ ಭಾರತದ ಸಮಗ್ರ ಸೇನಾ ವ್ಯವಸ್ಥೆ, ಯೋಧರು ಸಮರ ಸನ್ನಿವೇಶದಲ್ಲಿ ಎದುರಿಸುವ ಸವಾಲುಗಳನ್ನು ರೋಮಾಂಚನಕಾರಿಯಾಗಿ ವಿವರಿಸಿದರು.

ಇದೇ ಸಂದರ್ಭದಲ್ಲಿ ಕಾಲೇಜಿನ ಯುವ ರೆಡ್ ಕ್ರಾಸ್ ವಿಭಾಗ ಉದ್ಘಾಟನೆಯನ್ನೂ ಹಮ್ಮಿಕೊಳ್ಳಲಾಗಿತ್ತು.

ಭಾವಗಾನ ತಂಡದ ಸದಸ್ಯರು ಸುಶ್ರಾವ್ಯ ದೇಶಭಕ್ತಿ ಗೀತೆಗಳ ಗಾಯನವನ್ನು ಪ್ರಸ್ತುತಪಡಿಸಿದರು.

ರಂಗಕರ್ಮಿ ಶ್ರೀಕಾಂತೇಶ್ ಕದರಮಂಡಲಗಿ ಅವರು ಕಾರ್ಯಕ್ರಮ ನಿರೂಪಿಸಿದರು. ವಿಶ್ರಾಂತ ನೌಕರರ ಸಂಘದ ಪ್ರಧಾನ ಕಾರ್ಯದರ್ಶಿ ಕೆ.ಟಿ ಶ್ರೀನಿವಾಸರಾವ್ ಎಲ್ಲರಿಗೂ ಸ್ವಾಗತ ಕೋರಿದರು. ಕಾಲೇಜಿನ ರೆಡ್ ಕ್ರಾಸ್ ವಿಭಾಗದ ಅಧಿಕಾರಿ ಪ್ರೊ.ಮಂಜುನಾಥ್ ವಂದಿಸಿದರು.

ಸಮಾರಂಭದ ಅಧ್ಯಕ್ಷತೆಯನ್ನು ನೌಕರರ ಸಂಘದ ಅಧ್ಯಕ್ಷ ಶ್ರೀ ಪಿ.ಓ. ಶಿವಕುಮಾರ್ ವಹಿಸಿದ್ದರು.

(ವರದಿ: ಡಾ.ಸುಧೀಂದ್ರ)