ಪಂಢರಪುರ ವಿಠ್ಠಲ-ರುಕ್ಮಿಣಿ ಮೂರ್ತಿಗೆ ರಾಸಾಯನಿಕ ಲೇಪನಕ್ಕೆ ತಾತ್ಕಾಲಿಕ ತಡೆ

ಕಲ್ಪ ಮೀಡಿಯಾ ಹೌಸ್  | ಪಂಢರಪುರ |

ಪಂಢರಪುರದ ಶ್ರೀ ವಿಠ್ಠಲ-ರುಕ್ಮಿಣಿ ಮೂರ್ತಿಯ ಮೇಲೆ ಪ್ರಸ್ತಾಪಿಸಲಾಗಿದ್ದ ರಾಸಾಯನಿಕ ವಜ್ರಲೇಪನಕ್ಕೆ ಸ್ಥಳೀಯ ಸಿವಿಲ್ ನ್ಯಾಯಾಲಯ (ಕಿರಿಯ ಶ್ರೇಣಿ) ತಕ್ಷಣದಿಂದ ಜಾರಿಗೆ ಬರುವಂತೆ ತಡೆಯಾಜ್ಞೆ ನೀಡಿದೆ. ಕೋಟ್ಯಂತರ ಭಕ್ತರ ಆರಾಧ್ಯ ದೈವವಾಗಿರುವ ಈ ಮೂರ್ತಿಗೆ ಜೂನ್ 23 ಮತ್ತು 24ರಂದು ಲೇಪನ ಪ್ರಕ್ರಿಯೆ ನಡೆಸಲು ಮಂದಿರ ಸಮಿತಿ ಮತ್ತು ಪುರಾತತ್ವ ಇಲಾಖೆ ನಿರ್ಧರಿಸಿತ್ತು.

ಈ ನಿರ್ಧಾರವನ್ನು ಪ್ರಶ್ನಿಸಿ ವಾರಕರಿ ಸಂಪ್ರದಾಯದ ಪ್ರತಿನಿಧಿಗಳು, ಬಾಲಕೃಷ್ಣ ಡಿಂಗ್ರೆ ಹಾಗೂ ಮಹಾರಾಷ್ಟ್ರ ಮಂದಿರ ಮಹಾಸಂಘದ ಪುರುಷೋತ್ತಮ್ (ಗಣೇಶ್) ಲಂಕೆ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿದ್ದರು. ವಿಚಾರಣೆ ನಡೆಸಿದ ನ್ಯಾಯಾಧೀಶೆ ಸೋನಾಲಿ ರಾವುಲ್ ಅವರು ಆಡಳಿತ ಮಂಡಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿ, ಮುಂದಿನ ಆದೇಶದವರೆಗೆ ಯಾವುದೇ ರೀತಿಯ ರಾಸಾಯನಿಕ ಲೇಪನ ಮಾಡದಂತೆ ತಡೆ ವಿಧಿಸಿದ್ದಾರೆ.
ಅರ್ಜಿದಾರರ ಪರವಾಗಿ ವಕೀಲ ಸುಧೀರ್ ರಾನಡೆ ವಾದ ಮಂಡಿಸಿ, ಮೂರ್ತಿಯು ಕೇವಲ ಶಿಲ್ಪವಲ್ಲ, ದೈವತ್ವ ಹೊಂದಿರುವ ಸಜೀವ ಅಸ್ತಿತ್ವವಾಗಿದ್ದು, ಅದರ ಸಂರಕ್ಷಣೆಯಲ್ಲಿ ಧರ್ಮಶಾಸ್ತ್ರ ಮತ್ತು ಸಂಪ್ರದಾಯ ಪಾಲನೆ ಅತ್ಯಗತ್ಯ ಎಂದು ಒತ್ತಿಹೇಳಿದರು. ‘ಎಪಾಕ್ಸಿ’ ಸೇರಿದಂತೆ ಕೃತಕ ರಾಸಾಯನಿಕಗಳಿಂದ ಮೂರ್ತಿಯ ಬಿರುಕುಗಳನ್ನು ತುಂಬುವ ಪ್ರಕ್ರಿಯೆ ಕಲ್ಲಿನ ನೈಸರ್ಗಿಕ ಶ್ವಾಸಕ್ರಿಯೆಯನ್ನು ತಡೆಯಬಹುದು, ಇದರಿಂದ ಮೂರ್ತಿಯು ಒಳಗಿನಿಂದ ದುರ್ಬಲಗೊಳ್ಳುವ ಅಪಾಯವಿದೆ ಎಂದು ಅವರು ಹೇಳಿದರು.

Also read: ‘ಚಂದ್ರಗಿರಿ’ ಸಿನಿಮಾ: ಮೊದಲ ಹಂತದ ಚಿತ್ರೀಕರಣ ಪೂರ್ಣ

ಈ ಹಿಂದೆ ನಾಲ್ಕು ಬಾರಿ ನಡೆಸಿದ ರಾಸಾಯನಿಕ ಲೇಪನ ವಿಫಲವಾಗಿರುವುದನ್ನೂ ನ್ಯಾಯಾಲಯದ ಗಮನಕ್ಕೆ ತರಲಾಗಿದ್ದು, ಅದೇ ವಿಧಾನವನ್ನು ಪುನಃ ಅನುಸರಿಸುವುದನ್ನು ಪ್ರಶ್ನಿಸಲಾಗಿದೆ. ಉಜ್ಜಯಿನಿಯ ಮಹಾಕಾಳೇಶ್ವರ ದೇವಸ್ಥಾನ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್ ನೀಡಿದ ನಿರ್ದೇಶನಗಳನ್ನೂ ಉಲ್ಲೇಖಿಸಿ, ಭಕ್ತರ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತರುವ ನಿರ್ಧಾರಗಳನ್ನು ಆಡಳಿತ ಮಂಡಳಿ ಏಕಪಕ್ಷೀಯವಾಗಿ ಕೈಗೊಳ್ಳಲು ಸಾಧ್ಯವಿಲ್ಲ ಎಂದು ವಾದಿಸಲಾಯಿತು.

ಕರವೀರ ಪೀಠದ ಜಗದ್ಗುರು ಶಂಕರಾಚಾರ್ಯರ ವಿರೋಧದ ಪತ್ರವನ್ನೂ ನ್ಯಾಯಾಲಯಕ್ಕೆ ಸಲ್ಲಿಸಲಾಗಿತ್ತು. ಈ ಎಲ್ಲಾ ಅಂಶಗಳನ್ನು ಪರಿಗಣಿಸಿದ ನ್ಯಾಯಾಲಯವು ಲೇಪನಕ್ಕೆ ತಾತ್ಕಾಲಿಕ ತಡೆ ನೀಡಿದೆ.

ಈ ತೀರ್ಪನ್ನು ಸ್ವಾಗತಿಸಿದ ಮಹಾರಾಷ್ಟ್ರ ಮಂದಿರ ಮಹಾಸಂಘದ ರಾಷ್ಟ್ರೀಯ ಸಂಘಟಕ ಸುನಿಲ್ ಘನವಟ, ಮೂರ್ತಿಯ ಪಾದಗಳಲ್ಲಿ ಉಂಟಾದ ಹಾನಿಗೆ ಸಂಬಂಧಿಸಿದಂತೆ ಮಂದಿರ ಸಮಿತಿಯಿಂದ ಸಮರ್ಪಕ ಸ್ಪಷ್ಟನೆ ದೊರೆತಿಲ್ಲ ಎಂದು ಆರೋಪಿಸಿದರು. ರಾಸಾಯನಿಕ ಲೇಪನ ಬದಲು ‘ಆಯುರ್ವೇದ ವಜ್ರಲೇಪನ’ವೇ ಸುರಕ್ಷಿತ ಮತ್ತು ಸಂಪ್ರದಾಯಕ್ಕೆ ಅನುಗುಣವಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.

ಭವಿಷ್ಯದಲ್ಲಿ ಮಂದಿರ ಸಮಿತಿ ಯಾವುದೇ ನಿರ್ಧಾರ ಕೈಗೊಳ್ಳುವ ಮುನ್ನ ವಾರಕರಿ ಸಂಪ್ರದಾಯ, ಧರ್ಮಾಚಾರ್ಯರು ಹಾಗೂ ಭಕ್ತರ ಭಾವನೆಗಳನ್ನು ಗೌರವಿಸಬೇಕೆಂದು ಅವರು ಒತ್ತಾಯಿಸಿದರು.

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news