ಹೆಗಲ ಬಿಡದ ಜೊತೆಗಾತಿಗೊಂದು ಧನ್ಯವಾದ

ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ

ಜೀವನವೆಂಬ ಪಯಣದಲ್ಲಿ ಕೊನೆಯವರೆಗು ನಮ್ಮ ಜೊತೆಯಾರಿರುತ್ತಾರೋ ಗೊತ್ತಿಲ್ಲ. ಆದರೆ ನಮ್ಮೊಟ್ಟಿಗಿದ್ದವರು ಇದ್ದಷ್ಟು ದಿನ ಪ್ರೀತಿಯನ್ನು ಹಂಚಿ, ದೂರಾಗುವ ಹೊತ್ತಿಗೆ ಏನಾದರೊಂದು ಪಾಠವನ್ನು ಕಲಿಸಿ ಹೋಗುತ್ತಾರೆ. ಒಬ್ಬ ವ್ಯಕ್ತಿಯ ಜೀವಮಾನದಲ್ಲಿ ಒಂದೊಂದು ಕಾಲಘಟ್ಟದಲ್ಲಿ ಒಬ್ಬೊಬ್ಬರು ಜೊತೆಯಾಗುತ್ತಾರೆ. ಬಾಲ್ಯದಲ್ಲಿ ಮನೆಯವರು, ಶಾಲಾ-ಕಾಲೇಜುಗಳಲ್ಲಿ ಸ್ನೇಹಿತರು, ಯೌವನಕ್ಕೆ ಕಾಲಿಟ್ಟಾಗ ಜೀವನ ಸಂಗಾತಿ, ಕೊನೆಗೆ ಏಕಾಂಗಿತನ. ಇದಿಷ್ಟೇ ಅಲ್ಲದೇ ಅನೇಕ ವಸ್ತುಗಳು ಸಹ ನಮ್ಮ ಈ ಪುಟ್ಟ ಪಯಣದಲ್ಲಿ ಜೊತೆಯಾಗಿ ನಮ್ಮೊಡನೆ ಹೆಜ್ಜೆಗಳನ್ನಿಡುತ್ತವೆ. ಕೆಲವರಿಗೆ ಬೈಕ್, ಇನ್ನೂ ಕೆಲವರಿಗೆ ಪುಸ್ತಕ, ಅನೇಕರಿಗೆ ಅವರು ಪ್ರೀತಿಸುವ ಯಾವುದಾದರೊಂದು ವಸ್ತು.

ಹಾಗೆ ನನಗೆ ಅಚ್ಚುಮೆಚ್ಚಿನ ವಸ್ತುವಾಗಿ, ನನ್ನ ಬೆಂಗಾವಲಾಗಿ, ಚಿಕ್ಕಂದಿನಿಂದನಾನು ಕೋಪಗೊಂಡಾಗಲೆಲ್ಲಾ ನಿರ್ಲಕ್ಷಿಸಿ ಎಸೆದರೂ, ಮತ್ತೇ ಅಷ್ಟೇ ಪ್ರೀತಿಯಿಂದ ಹೆಗಲನ್ನೇರಿನನ್ನೊಟ್ಟಿಗೇ ಇರುವ ಸ್ನೇಹಿತ, ಪ್ರೇಯಸಿ ಎಲ್ಲವೂ ಒಂದೇ ಅದು ನನ್ನ ಬ್ಯಾಗ್. ಸ್ನೇಹಿತರೊಡನೆ ಮನಃಸ್ಥಾಪ ಬಂದಾಗ, ನನ್ನ ಹೆಗಲ ಮೇಲೆ ಕೈ ಇಟ್ಟು ನಿನ್ನೊಂದಿಗೆ ನಾನಿದ್ದೇನೆ ಎನ್ನುವುದಕ್ಕೆ, ಹಾಸ್ಟೆಲ್‌ನಲ್ಲಿರುವುದರಿಂದಲೋ ಏನೋ ಮನೆಯವರ ನೆನಪಾದಾಗಲೆಲ್ಲ ನನ್ನ ಕಂಬನಿಗೆ ಜೊತೆಯಾಗುವುದಕ್ಕೆ, ಹದಿಹರೆಯದ ಕೊನೆಯ ಹಂತದಲ್ಲಿ ನಾನಿನ್ನು ‘‘ಸಿಂಗಲ್’’ ಅನಿಸಿದಾಗಲೆಲ್ಲಾ ನನಗಿಂತ ಹೆಚ್ಚು ನಿನ್ನನ್ನು ಯಾರು ಪ್ರೀತಿಸುತ್ತಾರೆ ಎಂದು ಮುದ್ದಾಗಿ ಕೋಪಿಸಿಕೊಂಡರೂ ಜೊತೆಗಿರುವ ನನ್ನ ಏಕೈಕ ಜೊತೆಗಾತಿ ನನ್ನ ಬ್ಯಾಗ್.

ಹೀಗೆ ನನ್ನ ನೋವಲ್ಲೂ, ನಲಿವಲ್ಲೂ, ಗೆಲುವಲ್ಲೂ, ಸೋಲಿನಲ್ಲೂ ಎಲ್ಲರೂ ಜೊತೆಗಿದ್ದಾಗಲೂ, ಏಕಾಂಗಿಯಾಗಿದ್ದಾಗಲೂ ನನ್ನ ಬೆನ್ನು ಬಿಡದೆ, ನನ್ನನ್ನು ತಬ್ಬಿಕೊಂಡು ನನ್ನೊಡನೆ ಇರುವ ಪ್ರೇಯಸಿ ನನ್ನ ಬ್ಯಾಗ್. ನನ್ನ ಇಲ್ಲಿಯವರೆಗಿನ ಪಯಣದಲ್ಲಿ ಜೊತೆಯಾಗಿದ್ದಕ್ಕೆ ಮತ್ತು ಮುಂದೆಯೂ ಜೊತೆಯಾಗಿರುತ್ತೇನೆ ಎಂಬ ವಿಶ್ವಾಸವನ್ನು ನೀಡಿದ್ದಕ್ಕೆ ಧನ್ಯವಾದಗಳು.

ವಿಶ್ವಾಸಗಳೊಂದಿಗೆ

ತೃತೀಯ ಬಿ.ಎ
ಪತ್ರಿಕೋದ್ಯಮ ವಿಭಾಗ
ವಿವೇಕಾನಂದ ಕಾಲೇಜು,
ಪುತ್ತೂರು

Get in Touch With Us info@kalpa.news Whatsapp: 9481252093