ದಾಯೆ ಬೋಡು ಅಧಿಕೃತ ಭಾಷೆದ ಮಾನದಿಗೆ??

1. ತುಳುವನಾಡುಡ್ ನಮ್ಮ ಭಾಷೇನೇ ಮಾತೆರ್ಲ ಪಾತೆರೊಂದಿತ್ತೆರ್ನ್ಡಲಾ.. ಸರಕಾರಿ ಸಭೆಕುಲೆಡ್ ನಮ ತುಳು ಪಾತೆರ್ಲೆಕ ಇಜ್ಜಿ.
2. ಒವ್ವೆ ಒಂಜಿ ದಾಖಲೆನ್ ಉದಾರ್ಮೆಗ್ ಉಯಿಲ್, ಡಿಕ್ಲೆರೇಷನ್, ರಿಕ್ವೆಸ್ಟ್ ಲೆಟರ್, appointment, ಉದ್ಯೋಗ ಅರ್ಜಿ, ಕಾನೂನು ದಾಖಲೆ ಇಂಚಿನ ಒವೆನ್ಳ ನಮ ತುಳುಟು ಮಲ್ಪಿಲೆಕ ಇಜ್ಜಿ.
3. ಸರಕಾರಿ ಕಚೇರಿ,ಬ್ಯಾಂಕ್, ಕೋರ್ಟ್ ರ್ದ್ ತಿಕ್ಕುನಂಚಿನ ಒವ್ವೆ ರೀತಿದ ನೋಟೀಸ್ ಲು ತುಳು ಭಾಷೆಡ್ ಇಪ್ಪುಜಿ.
4. ತುಳು ಟು ದೊತೊನಿನ ಒವ್ವೆ ಒಂಜಿ ನಿರ್ಣಯಲು ಅಧಿಕೃತ ಆಪುಜಿ.

5. ಹೆಚ್ಚಿನ ಸಭೆ ಸಮಾರಂಭಡ್ ನಮ ತುಳುಟೇ ಪಾತೆರೊಡಾಪುಂಡು.
6. ಶಾಲೆ ಕಾಲೇಜುಡ್ ಅಧಿಕೃತ ಅತ್ತಂದಿನ ಭಾಷೆನ್ ಪಾತೆರುಂಡ ದಂಡ ತಿಕ್ಕುಂಡು. ಇಜ್ಜಿನ್ಡ ನೆರಡೇ ತಿಕ್ಕುಂಡು.
7. ಕರ್ನಾಟಕ ಬುಕ್ಕಾ ಭಾರತ ಸರ್ಕಾರ ಕೊರ್ಪಿನ ಹೆಚ್ಚಿನ ರೀತಿದ ಮಲ್ಲ ಮಟ್ಟುದ ಪ್ರಶಸ್ತಿಲೆಡ್ ಉದಾರ್ಮೆಗ್ ಜ್ಞಾನಪೀಠ, ಕೇಂದ್ರ ಸಾಹಿತ್ಯ ಅಕಾಡೆಮಿ, ಪಂಪ ಪ್ರಶಸ್ತಿ, ಕರ್ನಾಟಕ ಅಕಾಡೆಮಿ ಪ್ರಶಸ್ತಿಲೆಡ್ ತುಳು ಸಾಹಿತಿಲೆನ್ ಬುಕ್ಕಾ ಸಾಹಿತ್ಯೋಲೆನ್ ಗೆನ್ಪುಜೆರ್.
8. ತುಳುನಾಡುದ ದೇವಸ್ಥಾನ ಬುಕ್ಕಾ ಪ್ರವಾಸಿ ಕೇಂದ್ರೋಲೆಡ್ ತುಳುಟು ಸೂಚನೆಲೆನ್ ಪಾಡುಜೆರ್.

9. ತುಳುನಾಡುದ ಸರ್ಕಾರಿ ಕಚೇರಿಲೆಡ್, ಸರ್ಕಾರಿ ಬೇಲೆಲೆಡ್ ತುಳು ಗೊತ್ತಿಪ್ಪುನಕುಲೆ ಬೋಡುಂದು ಅಗತ್ಯ ಇಜ್ಜಿ. ಅಂಚಾದ್ ತುಳುನಾಡುದಕ್ಲೆಗ್ ತಿಕ್ಕೋಡಾಯಿನ ಊರುದ ಸರ್ಕಾರಿ ಬೇಲೆಲು ಬೇತಕ್ಲೆನ ಪಾಲವೊಂದುಂಡು.
10. ತುಳು ಭಾಷೆ ಯುನೆಸ್ಕೋ ಬುಡುಗಡೆ ಮಲ್ತಿನ ವಿನಾಶದ ಕೈತಲ್ ಡ್ ಇಪ್ಪುನ ಭಾಷೇಲೇದ ಲಿಸ್ಟ್ ಡ್ ಜಾಗ ಪಡೆವೊಂದುಂಡು. ಅಂಚಾದ್ ತುಳು ಭಾಷೆಡ್ ಒರಿಪಾಯಿರಾ ಪೂರಾ ರೀತಿದ ಪ್ರಯತ್ನ ಬತ್ತೀಜಿನ್ಡಾ ನಮ್ಮ ಭಾಷೆ ಒರಿವುಜಿ.
11. ಒಂಜಿ ಭಾಷೆ ಬುಳೆವೋಡುಂದ್ ಪಂದ್ ಅವೊಡಾಂಡ ಐಕ್ ರಾಜಾಶ್ರಯ ಬೋಡು. ತುಳು ಭಾಷೆ ಪಿರ ಒರಿಯರ ಕಾರಣೊನೇ ರಾಜೆರ್ನಕ್ಲ್ ತುಳುಕ್ ಸ್ಥಾನಮಾನ ಕೊರಂದಿನವ್ವೆ ಕಾರಣ. ಅಂಚಾದ್ ನಮಕ್ ನನ ರಾಜ್ಯ ಭಾಷೆದ ಮಾನದಿಗೆ ಬೋಡು.

12. ತುಳುನಾಡುದಕ್ಲೆನ ಕೊಡುಗೆ ಕರ್ನಾಟಕಗ್ ಮಸ್ತ್ ಉಂಡು. ಜನಸಂಖ್ಯೆ ಕಮ್ಮಿ ಇತ್ತುಂಡಲಾ ಬೇತೆ ಒವ್ವೆ ಭಾಷೆದಕುಲು ಕರ್ನಾಟಕೊಗು ಕೊರಂದಿನಾತ್ ಕೊಡುಗೆಲೆನ್ ತುಳುನಾಡುದಕ್ಲ್ ಕೊರ್ತೆರ್. ಅಂಚಾದ್ ಕರ್ನಾಟಕೊಡು ನಮ್ಮ ಭಾಷೆಗುಲ ಒಂಜಿ ಸ್ಥಾನ ತಿಕ್ಕೋಡ್. ಅವ್ವು ನಮ್ಮ ಹಕ್ಕ್.
13. ಬೇತೆ ಅಲ್ಪ ಸಂಖ್ಯಾತ ಭಾಷೆದ ಜನಕುಲು ನಮೆನೈರ್ದ್ ಜಾಸ್ತಿ ಇತ್ತುಂಡಲ. ಆ ಭಾಷೆಲೆದ ಲೆಕಾ ತುಳು ಭಾಷೆ ವಲಸಿಗ ಭಾಷೆ ಅತ್ತ್. ಕರ್ನಾಟಕೊಡೆ ಇಪ್ಪುನ ತುಳುನಾಡುದ ಭಾಷೆ. ಒಂಜಿ ಪ್ರದೇಶೊಡು ವ್ಯಾವಹಾರಿಕವಾದ್ ಇಪ್ಪುನ ಭಾಷೆ. ಆ ಭಾಷೆಲು ಐಕುಲೆನ ಮಾತೃಭೂಮಿಲೆಡ್ ಅಧಿಕೃತ ಆತುಂಡ್. ಬುಕ್ಕಾ ಆ ಭಾಷೆಲು 8ನೇ ಪರಿಚ್ಛೇದಡ್ ಸ್ಥಾನ ಪಡೆದುನ್ಡ್ ಅಂಚಾದ್ ಆ ಭಾಷೆಲು ರಾಜ್ಯಭಾಷೆ ಸ್ಥಾನ ಕೋರಿಜಿಂಡಲ ಅಧಿಕೃತ ಆದಿಪ್ಪುವ.
13. ಬೇತೆ ಮಲ್ಲ ಭಾಷೆಲೆಗ್ ಇಪ್ಪುನಂಚಿನ ಪ್ರಾಧಿಕಾರೊಲ್, ಅಭಿವೃದ್ಧಿ ಮಂಡಳಿಲು, ಸಚಿವ ಸ್ಥಾನೊಳು ತುಳು ಭಾಷೆಗ್ ಇಜ್ಜಿ. ಐತಾ ಅಗತ್ಯ ತುಳುಕ್ ಮಸ್ತ್ ಉಂಡು.

14. ವಿಧಾನಸಭೆಟ್ ತುಳುವೆರ್ ತುಳುಟ್ ಪ್ರಮಾಣವಚನ ದೊತೊನುನಗಾ ಅಧಿಕೃತ ಭಾಷೆ ಅತ್ತ್ ಪಂದ್ ಅರ್ಧೊಡೇ ಉಂತಾಯೆರ್. ಅವ್ವು ನಮ್ಮ ಅಪ್ಪೆ ಭಾಷೆಗ್ ಆಯಿನ ಮಲ್ಲ ಅಪಮಾನ. ನಮ್ಮನೇ ಅಪ್ಪೆ ಭೂಮಿಗ್ ಸಂಬಂಧ ಪಟ್ಟಿನ ಸರಕಾರೊಡು ನಮ ನಮ್ಮ ಅಪ್ಪೆ ಭಾಷೆಡೇ ಪ್ರಮಾಣವಚನ ದೊತೊನರ ಸಾಧ್ಯ ಇಜ್ಜಿ ಪಂಡಾ ಅಯಿರ್ದ್ ಮಲ್ಲ ಅವಮಾನ ಬೋಡ ತುಳುವೆರೆಗ್.

15. ಒಂಜಿ ರಾಜ್ಯೋದ ಭಾಷೆ ಮಲ್ತುನ್ಡಾ ದೇಶೊದ 8ನೇ ಪರಿಚ್ಛೇದೋಗ್ ಸೆರಾವೋರಾ ಮಲ್ಲ ಬೆರಿ ಬಲ ತಿಕ್ಕುಂಡು.ಕೊಂಕಣಿ ಭಾಷೆನ್ ಗೋವಾ ದ ಅಧಿಕೃತ ಭಾಷೆ ಮಲ್ತಿ ಬೊಕ್ಕ 8ನೇ ಪರಿಚ್ಛೇದೋಗ್ ಸೇರಾಯೇರ ಸುಲಭ ಆಂಡ್.

15. “ನಿನ್ನ ಭಾಷೆನ್ ನಿನ್ನ ಇಲ್ಲಡ್ ದೀವೊನು ಎಂಕ್ಲೆಡ ನಾಡುದ ಭಾಷೆಡ್ ಪಾತೆರ್ ”
“ಈ ಒವ್ವ್ ಏಲಿಯನ್ ಭಾಷೆಡ್ ಪಾತೆರೊಂದುಲ್ಲ.. ಎಂಕುಲೆನ ಭಾಷೆಡ್ ಪಾತೆರ್ಯ”
” ನಿನ್ನವ್ವು ಗ್ರಾಮೋದ ಭಾಷೆ”

“ನಿಕುಲು ಉನ್ಪಿನ ಎಂಕುಲ್ನ ಭಾಷೆದ ನುಪ್ಪು, ನಿಕುಲು ಪರ್ಪಿನ ಎಂಕುಲೆನ ಭಾಷೆದ ನೀರ್ ”
ಇಂಚಿನ ಏತೋ ಪಾತೆರೊಲೆರ್ದ್ ಮುಕ್ತಿ ತಿಕ್ಕೊಡು ಆಂಡಾ ನಮ್ಮ ಭಾಷೆಲಾ ರಾಜ್ಯೋದ ಅಧಿಕೃತ ಆವೊಡು.

ಬರವು: ಕಡಬ ದಿನೇಶ್ ರೈ