ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ
ನಮ್ಮ ಊರೂದ ತುಳುವೆರೆಗ್ ಪೊರ್ಲ ಕಂಠ ಸ್ವರೊತ ಆಯುಷ್ ಜಯರಾಮ್ ಶೆಟ್ಟಿ ತುಳುವನ ಸಾಧನೆದ ಬಗ್ಗೆ ವಂತೆ ಪೊಲಬು ಮಲ್ಪೊಡೇ.! ಪುತ್ತೂರುದ ಜಯರಾಮ್ ಶೆಟ್ಟಿ ಬೊಕ್ಕ ರೇಷ್ಮಾ ಶೆಟ್ಟಿ ಸಂಸಾರದ ಮೋಕೆದ ಬಾಲೆ ಆಯುಷ್, 2005 ಆಗಸ್ಟ್ 25ನೇ ತಾರೀಖುದಾನಿ ದ.ಕ.ಜಿಲ್ಲೆದ ಪುತ್ತೂರುದ ಊರೂಡ್ ಪುಟ್ಟುದ್ ಇತ್ತೆ ಅಪ್ಪೆ ಅಮ್ಮೆರೊನೊಟ್ಟುಗ್ ಬೆಂಗಳೂರು ರಾಜಧಾನಿ ಬೂಡುದ ಶ್ರೀ ಬನಶಂಕರಿ ದೇವೆರೆನ ಸುತ್ತಮುತ್ತದ ಪರಿಸರೊಡ್ ವಾಸವಾದ್ ಉಲ್ಲೆರ್, ಬೆಂಗಳೂರುದ ಬನಶಂಕರಿ ಕೈತಲ್ ದ ಬಿ.ಎನ್.ಎಮ್, ಪಬ್ಲಿಕ್ ಸ್ಕೂಲ್ ಡ್ ಎಸ್. ಎಸ್. ಎಲ್.ಸಿ ತರಗತಿಡ್ ಇತ್ತೆ ಕಲ್ತೊಂದು ಉಲ್ಲೆರ್ ಪನ್ಪೀನ ಪೆರ್ಮೆದ ವಿಷಯಲ ತೆರಿದ್ಂಡ್.
ಇತ್ತೆದ ಕಾಲೊಡ್ ಅಪ್ಪೆ ಅಮ್ಮೆನಕಲೆಗ್ ಜೋಕುಲೆನ್ ಇಂಜಿನಿಯರಿಂಗ್ ಕಲ್ಪಾವೊಡ್ ,ಮಗೆ ಡಾಕ್ಟರ್ ಅವೊಡ್, ವಿಜ್ಞಾನಿ ಕಲ್ಪೊಡ್,ಇಂಚ ಬೇತೆ ಬೇತೆ ಕನೊನ್ ಕಟ್ಟೊಂದು ಉಪ್ಪುವೆರ್, ಆಂಡ ಆಯುಷ್. ಜೆ. ಶೆಟ್ಟಿ ತುಳುನಾಡ್ದ ಪೆರ್ಮೆದ ಕಲಾವಿದೆನ ಕನ ಯಾನ್ ಒಂಜಿ ಕಲಾವಿದೆಯಾದ್ ಅಯಿಟೇ ಯಾನ್ ಮಲ್ಲಾ ಸಾಧನೆ ಮಲ್ಪೊಡ್ ಅಂಚನೇ ಸಮಾಜಗೊ ದಾದಂಡಲಾ ಸಕಾಯ ಮಲ್ಪೊಡ್ ಪನ್ಪೀನ ಮಹಾಮಲ್ಲಾ ಕನಕಟ್ಟಿನ ಲತ್ತ್ ಪ್ರಾಯೊದ ಮಲ್ಲ ಮನಸ್ಸುದ ಅಪ್ಪೆ- ಅಮ್ಮೆರೆನ ಮೋಕೆದ ಬಾಲೆ ಆಯುಷ್.!ಆಯುಷ್ ಜಯರಾಮ್ ಶೆಟ್ಟಿ ಈ ಎಲ್ಯ ಪ್ರಾಯೊಡ್ ಮಂತಿನ ಕೆಲವೊಂಜಿ ಸಾಧನೆಲೆನ್ ಕೆಲವು ಪುರಾ ತೆರಿದಿನಾತ್ ಪನೊಡೇ.! ಕಲರ್ಸ್ ಕನ್ನಡ ವಾಹಿನಿದ ಕಿನ್ನರಿ ಧಾರವಾಹಿಡ್ ನಟನೆ ಮಲ್ಪುನಗ ಆಯುಷ್ ಗ್ ಎಡ್ಮನೇ ವರ್ಷ ಅಂಚನೇ ಬಣ್ಣದ ಲೋಕೊಗ್ ಶುರುತ ಪಜ್ಜೆ, ಆ ಕಿನ್ನರಿ ಧಾರಾವಾಹಿ ಡ್ ಲೋಕಿ ಪನ್ಪೀನ ಪಾತ್ರೊಡ್ ಜನಮಂದೆಲೆನ ಉಡಲ್ ಗೆಂದಾಂದೆರ್ , ಮಣಿ ಬೊಕ್ಕ ಲೋಕಿನ ನಟನೆ ನ್ ಮೆಚ್ಚ್ ದ್, ಆಯುಷ್ ಸಾದಿಡ್ ಪೋನಗ ಧಾರಾವಾಹಿ ತೂಪಿನ ಅಭಿಮಾನಿಲು ಪುರಾ ”ಮಣಿ ನನಲಾ ಎಲ್ಯ’ ಆಯುಷ್ ಪೊರ್ಲುಡ್ ತೂವೊನ್ಲ ಬಾಲೆ ಪಂಡ್ದ್ ಖುಷಿಟ್ ತಮಾಷೆ ಮಲ್ತೊಂದ್ ಇತ್ತೆರ್ಗೆ ಪಂಡ್ದ್ ಎನಡ ಆಯುಷ್ ತೆರಿಪಾದೆರ್.
ಕಿನ್ನರಿ ಧಾರಾವಾಹಿದ ಲೋಕಿನ ನಟನೆ ತೂದ್ ಚಲನಚಿತ್ರ ನಿರ್ದೇಶಕಿ ಶ್ವೇತ ಎನ್ ಶೆಟ್ಟಿ ‘1098’ ಸಿನಿಮೊಗ್ ಅಭಿನಯ ಮಲ್ಪರೇ ಆಯುಷ್ ಗ್ ಲೆಪ್ಪೊಲೆ ಕೊರಿಯೆರ್. “1098 ಸಿನಿಮೊ” ಬಾಲಕಾರ್ಮಿಕೆರನ ಬದುಕ್ದ್ ಬಗ್ಗೆ ಮುಡೆದಿನ ಒಂಜಿ ಕತೆಯಾಯಿನೆಟ್ಟ್ ಇತ್ತೆಲಾ ಸರಕಾರದ ಶಾಲೆ ಕಾಲೇಜುಡ್ ಪುರಾ ಸಿನಿಮಾ ಪ್ರದರ್ಶನ ಆವೊಂದ್ ಉಂಡ್ ಪನ್ಪೀನ ಪೆರ್ಮೆದ ವಿಷಯ.
ಬಜೀ ಪದಿಮೂಜಿ ವರ್ಷೊಡೇ ಕಲರ್ಸ್ ಸೂಪರ್ ಮಾದ್ಯಮಡೊ ಮಜಾಭಾರತ ಕನ್ನಡ ರಿಯಾಲಿಟಿ ಲೇಸ್ ಡ್ 8-9 ತಿಂಗಳೊಡೇ ಮಸ್ತ್ ಪುಗರ್ತೆ ಪಡೆದ್ ಬಿರ್ದ್-ಮಾನಾದಿಗೆ ಪಡೆತಿನ ನಟೆ ಬಾಲೆ ಆಯುಷ್ ಜಯರಾಮ್ ಶೆಟ್ಟಿ..!
ಕಲರ್ಸ್ ಸೂಪರ್ ವಾಹಿನಿದ ಧಾರವಾಹಿಡ್ ಗಾಂಧಾರಿ, ಮನೆದೇವರು, ರಾಗ ಅನುರಾಗ, ಅವನು ಮತ್ತು ಶ್ರಾವಣಿ, ಇಂಚ ಬೇತೆ ಬೇತೆ ಧಾರವಾಹಿಡ್ ನಟನೆ ಮಂತಿನ ಕೀರ್ತಿ ಉಂಡು, ರಾಜ್ಯ ಬೊಕ್ಕ ಇಂಟರ್ನ್ಯಾಷನಲ್ಡ್ ಮಾನಾದಿಗೆ ಪಡೆಯಿನ ರಾಮನ ಸವಾರಿ ಸಿನಿಮೊಡ್ ‘ರಾಮನ’ ಸಖ ಅಪ್ಪುನ ಪಾತ್ರೊ ಅಭಿನಯಡೊ ಸಿನಿಮಾ ಅಭಿಮಾನಿಲೆನ್ಡ್ ಪುಗರ್ತೆ ಪಡೆತೆರ್.
ಕೊರೊನ ಮಹಾಮಾರಿದ ಪೊರ್ತುಡ್ ಜನಮಂದೆಲೆನ ಉಡಲುಡ್ ಇತ್ತಿನ ಪೋಡಿಗೆಗ್ ಮಹಾಮಲ್ಲಾ ಬೆರಿ ಬಲ ಆದ್ ಸುವರ್ಣ ಚಾನೆಲ್ ಡ್ ಬರೊಂದ್ ಇತ್ತಿನ ‘ಮಹಾಭಾರತ’ ಧಾರಾವಾಹಿ..! ಕೊರೊನ ಮಹಾಮಾರಿದ ಪೋಡಿಗೆದ ಪೊರ್ತುಡ್ ಮಾತಾ ಇಲ್ಲ ಇಲ್ಲಡ್ ಮಹಾಭಾರತ ಧಾರಾವಾಹಿ ತೂವೊಂದ್ ಇತ್ತೆರ್, ಆಂಡ ಅಯಿಟ್ ಬತ್ತಿನ ಕೆಲವು ಮುಖ್ಯ ಪಾತ್ರೊಲೆಗ್ ಸ್ವರ ಕೊರ್ತಿನಿ ನಮ್ಮ ಊರೂದ ಬಿರ್ಸೆ ಪಂಡ್ದ್ ಏರೆಗ್ ಗೊತ್ತ್ ಇತ್ತ್ಂಡ್ ? ಅಯಿಟ್ ಬಾಲ ನಟನೆ ಆದ್ ವೀರ ಅಭಿಮನ್ಯುನ ಬೊಕ್ಕ ದುರ್ಯೋಧನ ಪಾತ್ರೊಗ್ ಸ್ವರ ಕೊರ್ದು ಇಡೀ ಕರ್ನಾಟಕ ರಾಜ್ಯಡೊ ಪುಗರ್ತೆ ಪಡೆಯಿನ ಬಾಲೆ ಬೇತೆ ಎರ್ಲಾ ಅತ್ತ್ ಇಂದೇ ನಮ್ಮ ಮೋಕೆದ ಆಯುಷ್ ಜಯರಾಮ್ ಶೆಟ್ಟಿ..!
9ನೇ ವಯಸ್ಸ್ ಡೇ ಕಂಠದಾನ ಕಲಾವಿದೆ ಆದ್ ಕನ್ನಡ ಚಿಂಟೂ ವಾಹಿನಿಡ್ 7000 ಎಸಲ್ಡ್ ಕಂಠ ದಾನ ಮಲ್ತಿನ ಪುಗರ್ತೆ ಆಯುಷ್ ಗ್ ಸಂದುಂಡ್. ಮೋಕೆದ ತುಡರ್ ಪನ್ಪೀನ ತುಳು ಆಲ್ಬಂಡ್ಲ ಅಭಿನಯ ಮಂತ್ದೆರ್ ಪಂಡ್ದ್ ಖುಷಿಟ್ ತೆರಿಪಾದೆರ್.
ಬೇತೆ ಬೇತೆ ಸಂಘ ಸಂಸ್ಥೆಗಳ್ದ್ ಬಿರ್ದ್ ಮಾನಾದಿಗೆ ಪಡೆತಿನ ಪುಗರ್ತೆ ಉಂಡು. ಇಂಚಿತ್ತಿನ ಪೆರ್ಮೆದ ಕಲಾವಿದಗ್ ಭವಿಷ್ಯೊಡ್ ತುಳುನಾಡದ ನಾಟಕ, ಕಿರುಚಿತ್ರ,ಸಿನಿಮಾ ರಂಗೊಡ್ ಅವಕಾಶ ತಿಕ್ಕ್ಂಡ್ ಪಂಡ್ದ್ ಉಡಲ್ದಿಂಜಿನ ಎಡ್ಡೆಪ್ಪುನು ಬಯಕೊಂದ್ ಅಂಚನೇ ಈ ಸರ್ತಿದ ಎಸ್. ಎಸ್. ಎಸ್. ಎಲ್. ಸಿ. ಪರೀಕ್ಷೆ ಡ್ ಎಡ್ಡೆ ಮಾರ್ಕ್ ದೆತ್ತ್ಂದ್ ನಮ್ಮ ಪೆರ್ಮೆದ ಕಲಾವಿದೆ ತುಳುವೆ “ಆಯುಷ್ ಡ್ದ್ ಇಡೀ ಶಾಲೆಗೆ, ನಮ್ಮ ತುಳುನಾಡ್ ಗ್ ಎಡ್ಡೆ ಪುದರ್ ಬರಡ್ ಪಂಡ್ದ್ ದೈವ ದೇವೆರೆಡ ಭಕ್ತಿದಿಂಜಿಂದ್ ಪ್ರಾರ್ಥನೆನ್ ಸಂದಾವೊಂದುಲ್ಲ.ಸೊಲ್ಮೆಲು.
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9481252093 – info@kalpa.news
Discussion about this post