ಪಾಪದ ಫಲವನ್ನು ಅನುಭವಿಸಲೇಬೇಕು: ರಾಘವೇಶ್ವರ ಶ್ರೀ

ಬೆಂಗಳೂರು: ಮಾಡಿದ ಪಾಪ ಹಾಗೂ ತಪ್ಪಿನ ಫಲವನ್ನು ಜೀವನದಲ್ಲಿ ಅನುಭವಿಸಿಯೇ ಹೋಗಬೇಕು; ಅದು ವಿಧಿ ಎಂದು ಜಗದ್ಗುರು ಶಂಕರಾಚಾರ್ಯ ಶ್ರೀಶ್ರೀರಾಘವೇಶ್ವರಭಾರತೀ ಮಹಾಸ್ವಾಮಿಗಳು ಅಭಿಪ್ರಾಯಪಟ್ಟರು.

ಗಿರಿನಗರದ ಶ್ರೀರಾಮಾಶ್ರಮದಲ್ಲಿ ನಡೆಯುತ್ತಿರುವ “ಕೃಷ್ಣಕಥಾ” ಸಪ್ತಾಹದ 3 ನೇ ದಿನ ಸಾನ್ನಿಧ್ಯವಹಿಸಿ ಪ್ರಚನವನ್ನು ಅನುಗ್ರಹಿಸಿದ ಶ್ರೀಗಳು ; ಭಾಗವತಾಧಾರಿತವಾದ ಪೂತನಿ ಸಂಹಾರದ ಪ್ರವಚನವನ್ನು ಪ್ರಸ್ತಾಪಿಸಿ, ಪೂತನಿಯು ವಾತ್ಸಲ್ಯದ ಎದೆಹಾಲನ್ನು ಉಣಿಸುವ ನೆಪದಲ್ಲಿ ಮಕ್ಕಳಿಗೆ ವಿಷವುಣ್ಣಿಸಿ ಸಂಹರಿಸುತ್ತಿದ್ದಳು. ಆಗ ಬಾಲ ಕೃಷ್ಣ ವಿಷಮಯವಾದ ಅವಳ ಎದೆಹಾಲು ಕುಡಿಯುತ್ತಾ ಅವಳ ಜೀವವನ್ನೇ ಅಪಹರಿಸಿದ. ಅವಳ ಪಾಪಕ್ಕೆ ತಕ್ಕ ಶಿಕ್ಷೆ ಕೊಟ್ಟ ಎಂದರು.

ಶ್ರೀಕೃಷ್ಣನಿಗೆ ಗೋಧೂಳಿಯ ರಕ್ಷೆ : ಪೂತನಿ ಸಂಹಾರದ ನಂತರ ಗೋಪಿಕೆಯರು ಬಾಲ ಕೃಷ್ಣನನ್ನು ಗೋಮೂತ್ರದಿಂದ ಸ್ನಾನ ಮಾಡಿಸಿ, ಗೋಧೂಳಿಯಿಂದ ರಕ್ಷೆ ಮಾಡಿದರು ಹಾಗೂ ಗೋವಿನ ಬಾಲವನ್ನು ಸ್ಪರ್ಷಮಾಡಿಸುವುದರ ಮೂಲಕ ಬಾಲ ಕೃಷ್ಣನ ದೃಷ್ಟಿ ತೆಗೆದರು ಎಂದು ಭಾಗವತದಲ್ಲಿ ಉಲ್ಲೇಖಿಸಲಾಗಿದೆ. ಇದು ಗೋವಿನ ಮಹತಿಯನ್ನು ತಿಳಿಸುತ್ತದೆ ಎಂದು ಅಭಿಪ್ರಾಯಪಟ್ಟರು.

ಪ್ರವಚನ – ಗಾಯನ – ಚಿತ್ರ – ರೂಪಕ -ವಾದನಗಳಿಂದ ಕೂಡಿದ ಈ ವಿಶಿಷ್ಟಕಾರ್ಯಕ್ರಮದಲ್ಲಿ ಶ್ರೀಗಳ ಪ್ರವಚನದ ಜೊತೆಜೊತೆಗೆ, ಕಡತೋಕ ಶ್ರೀಪಾದ್ ಭಟ್, ಶಂಕರಿಮೂರ್ತಿ ಬಾಳಿಲ, ದೀಪಿಕಾ ಭಟ್, ಪೂಜಾ ಕೊರಿಕ್ಕಾರ್,  ಪ್ರಿಯಾ ಕೊರಿಕ್ಕಾರ್ ಹಾಗೂ ರಘುನಂದನ್ ಬೇರ್ಕಡವು ಸಂಗೀತದ ಸಾಥ್ ನೀಡಿದರೆ, ಪ್ರಸಿದ್ಧ ಕಲಾವಿದ ನೀರ್ನಳ್ಳಿ ಗಣಪತಿಯವರು ಪ್ರಸಂಗಕ್ಕೆ ತಕ್ಕ ಚಿತ್ರವನ್ನು ಬಿಡಿಸಿ ಜನರ ಗಮನಸೆಳೆದರು. ಕೊರ್ಗಿ ಶಂಕರನಾರಾಯಣ ಉಪಾಧ್ಯ ಹಾಗೂ ತಂಡ ‘ಪೂತನಿ ಸಂಹಾರ’ದ ರೂಪಕವನ್ನು ಪ್ರದರ್ಶಿಸಿದರು.