ಪರಮೇಶ್ವರ್ ಬಗ್ಗೆ ಇದ್ದ ಗೌರವ ಕಡಿಮೆಯಾಗುತ್ತಿದೆ

ಸಿದ್ಧರಾಮಯ್ಯ ರಾಜ್ಯದ ಮುಖ್ಯಮಂತ್ರಿಯಾದ ನಂತರ ಅವರ ಹಾಗೂ ಸರ್ಕಾರದ ನಡೆಗಳು ರಾಜ್ಯದ ಜನರಲ್ಲಿನ ಆಶಾಭಾವನೆಯನ್ನೇ ಹೊಸಕಿ ಹಾಕಿದವು. ಅವರ ಒಂದೊಂದು ಕ್ರಮಗಳೂ ಜನವಿರೋಧಿಯಾಗಿ, ಕೇವಲ ಸ್ವಾರ್ಥ ರಾಜಕಾರಣದ ಮತ್ತೊಂದು ಮಜಲಾಯಿತು ಅಷ್ಟೇ. ಆದರೆ, ಜಿ. ಪರಮೇಶ್ವರ್ ಗೃಹ ಸಚಿವರಾದ ವೇಳೆ ಸರ್ಕಾರದಲ್ಲೊಬ್ಬ ಒಳ್ಳೆಯ ವ್ಯಕ್ತಿ ಸೇರ್ಪಡೆಯಾಗುತ್ತಿದ್ದಾರೆ ಎಂದು ಒಂದಷ್ಟು ಭರವಸೆ ಗಳು ಮೂಡಿದ್ದವು. ಆದರೆ, ಪರಂ ಅವರ ನಡೆ ಹಾಗೂ ಹೇಳಿಕೆಗಳು ಈಗ ಇದ್ದ ವಿಶ್ವಾಸವನ್ನೂ ಸಹ ಕಳೆದುಕೊಂಡಿದೆ.

ಕಾವೇರಿ ನದಿ ವಿಚಾರದಲ್ಲಿ ಬೆಂಗಳೂರಿನಲ್ಲಿ ನಡೆದ ಗಲಭೆಯ ಹಿಂದೆ ಆರ್‌ಎಸ್‌ಎಸ್ ಹಾಗೂ ಅದರ ಅಂಗ ಸಂಸ್ಥೆಗಳ ಕೈವಾಡವಿದೆ ಎಂಬ ಸಂಶಯ ವ್ಯಕ್ತವಾಗಿದೆ. ಈ ನಿಟ್ಟಿನಲ್ಲಿ ತನಿಖೆಯ ಕುರಿತು ಚಿಂತಿಸುತ್ತಿದ್ದೇವೆ ಎಂದು ಪರಮೇಶ್ವರ್ ಹೇಳಿದ್ದಾರೆ. ಪರಮೇಶ್ವರ್ ಅವರೇ ತಾವು ಒಂದು ರಾಜ್ಯದ ಗೃಹ ಸಚಿವರು ಸ್ವಾಮಿ, ಕೆಪಿಸಿಸಿ ಅಧ್ಯಕ್ಷರು ಮಾತ್ರವಲ್ಲ. ಆ ಮೂಡ್‌ನಿಂದ ಹೊರಬನ್ನಿ. ನಿಮ್ಮ ಸ್ಥಾನಕ್ಕೆ ಒಂದು ಗೌರವ, ಘನತೆ ಹಾಗೂ ಜವಾಬ್ದಾರಿಯಿದೆ. ಆದರೆ, ಅದನ್ನೆಲ್ಲಾ ಮರೆತು ಸಿದ್ಧರಾಮಯ್ಯ ಹಾಗೂ ಉಗ್ರಪ್ಪ ಅವರುಗಳ ರೀತಿ ಇಂತಹ ಪೂರ್ವಾಗ್ರಹ ಪೀಡಿತ ಹೇಳಿಕೆಗಳನ್ನು ನೀಡಲು ಆರಂಭಿಸಿದ್ದೀರಿ ಎಂದರೆ ನಿಮ್ಮ ಮೇಲಿರುವ ಗೌರವ ಯಾಕೋ ಕರಗುತ್ತಿದೆ.

ಈ ಕಾಂಗ್ರೆಸ್ ಹಾಗೂ ಎಡಪಂಥೀಯರಿಗೆ ಎಲ್ಲ ವಿವಾದಗಳಲ್ಲಿ ಆರ್‌ಎಸ್‌ಎಸ್‌ನ್ನು ಎಳೆದು ತರಲಿಲ್ಲ ಎಂದರೆ ಸಮಾಧಾನವಾಗುವುದಿಲ್ಲ ಎಂದು ತೋರುತ್ತದೆ.

ಗಲಭೆ ನಡೆಯಲಿದೆ ಎಂಬ ಮಾಹಿತಿ ಗುಪ್ತಚರ ಇಲಾಖೆ ನೀಡಿಲ್ಲವಾದರೆ ಅದು ನಿಮ್ಮ ಸರ್ಕಾರದ ವೈಫಲ್ಯವೇ ಹೌದು. ಒಂದು ವೇಳೆ ಗುಪ್ತಚರ ಇಲಾಖೆ ಮಾಹಿತಿ ನೀಡಿಯೂ ನೀವು ಮುಂಜಾಗ್ರತೆ ವಹಿಸಿಲ್ಲವಾಗಿದ್ದರೆ ಅದೂ ಸಹ ನಿಮ್ಮ ಸರ್ಕಾರ ವೈಫಲ್ಯವೇ ಹೌದು. ಹೇಗೆ ನೋಡಿದರೂ ಈ ಗಲಭೆ ಪ್ರಕರಣದಲ್ಲಿ ನೀವೇ ಆರೋಪಿಗಳಾಗಬೇಕು. ಹೀಗಿದ್ದಾಗ, ತಮ್ಮ ಪಾಡಿಗೆ ತಾವಿರುವ ಆರ್‌ಎಸ್‌ಎಸ್‌ನ್ನು ಈ ವಿಚಾರದಲ್ಲಿ ಎಳೆದು ತರುವ ಮಟ್ಟಕ್ಕೆ ನೀವು ಇಳಿಯುತ್ತೀರಿ ಎಂದರೆ, ನಿಮ್ಮ ನೈತಿಕತೆ ಎಷ್ಟರ ಮಟ್ಟಿಗೆ ಅಧಃಪತನಕ್ಕೆ ಇಳಿದಿದೆ ಎನ್ನುವುದು ವೇದ್ಯವಾಗುತ್ತದೆ.