ಸಾವಿರ ಆನೆ ಬಲದ ನಿಜವಾದ ಹೀರೋ `ಅಪ್ಪ'

ಕಲ್ಪ ಮೀಡಿಯಾ ಹೌಸ್ | ಆನಂದಕಂದ ಲೇಖನ ಮಾಲಿಕೆ-2 |
ನಾವು ಯಾವಾಗಲೂ ನಾಟಕ ಆಡುವ ಹೀರೋಗಳನ್ನು ನೋಡಿರುತ್ತೇವೆ. ಆದರೆ ನಿಜವಾದ ಜೀವನದ ಹೀರೋ ಬೇರೆ ಯಾರೂ ಅಲ್ಲ, ಅವರೇ `ಅಪ್ಪ’.

ತಾನು ಎಲ್ಲಾ ಕಡೆ ಇರಲು ಸಾಧ್ಯವಿಲ್ಲ ಎಂದು ತಾಯಿಯನ್ನು ಸೃಷ್ಟಿ ಮಾಡಿದ ದೇವರು, ಏಕಕಾಲದಲ್ಲಿ ತನ್ನಿಂದ ಎಲ್ಲರನ್ನು ಸಲಹಲು ಸಾಧ್ಯವಿಲ್ಲ ಎಂದು ತಿಳಿದು ಅಪ್ಪನನ್ನು ಸೃಷ್ಟಿಸಿದ. ಅಪ್ಪ #Father ಅನ್ನೋ ಪದಕ್ಕೆ ಸಾವಿರ ಆನೆಗಳ ಬಲ, ದರ್ಪ, ಕೋಪ ಅತಿ ಎನ್ನಿಸುವ ಶಿಸ್ತು, ಅನುಮಾನ, ಇವೆಲ್ಲದರ ಸಮ್ಮಿಲನವೇ ಅಪ್ಪ. ಅಪ್ಪನ ಬಗ್ಗೆ ಅದೆಂಥದ್ದೇ ಅಮೂರ್ತ ಭಯ. ಅಷ್ಟೇ ಪ್ರೀತಿ ಹಾಗೂ ಮಮತೆಯ ಮಡಿಲೂ ಸಹ ಅಪ್ಪ.

ಅಮ್ಮ #Mother ನನಗೆ ಏನು ಕಾಣಿಸುತ್ತದೋ ಅದು ಮಗುವಿಗೆ ಕಾಣಿಸಲಿ ಎಂದು ನಮ್ಮನ್ನು ಟೊಟಕದ ಮೇಲೆ ಕೂಡಿಸಿಕೊಳ್ಳುತ್ತಾರೆ. ಆದರೆ ಅಪ್ಪ ತನಗೆ ಏನು ಕಾಣಿಸುವುದಿಲ್ಲವೋ ಅದನ್ನು ಮಗು ನೋಡಲಿ ಎಂದು ಕುತ್ತಿಗೆಯ ಮೇಲೆ ಕೂಡಿಸಿಕೊಳ್ಳುವಂತಹ ಬೆಲೆ ಕಟ್ಟಲಾಗದ ಉಡುಗೊರೆ ಅಪ್ಪ.
ಮಕ್ಕಳ ಪಾಲಿಗೆ ಅಪ್ಪನೇ ಮೊದಲ ಹೀರೋ… ತೋರು ಬೆರುಳು ಹಿಡಿದು ಸಂತೆಯಲ್ಲಿ ಜಗತ್ತನ್ನೇ ತೋರಿದವ… ದಶಕಗಳ ಹಿಂದೆ ಅಪ್ಪ ಎಂದರೆ ಮಕ್ಕಳ ಮೊಗದಲ್ಲಿ ಮೂಡುತ್ತಿದ್ದ ಭಾವ ಭಯ. ಸಣ್ಣಪುಟ್ಟ ಕಾರಣಕ್ಕೂ ತಲೆಯ ಮೇಲೆ ಆಕಾಶವೇ ಕಳಚಿ ಬಿದ್ದಂತೆ ಭಾವಿಸಿ, ಕೂಗಾಡಿ ದನಕ್ಕೆ ಬಡಿದ ಹಾಗೆ ಬಡಿಯುತ್ತಿದ್ದ ಆತನ ಕೋಪಕ್ಕೆ ಆತನೇ ಸಾಟಿ… ಹಾಗೆಂದು ಆತ ಸರ್ವಾಧಿಕಾರಿಯಲ್ಲ. ಬದಲಿಗೆ ಸರಿ ತಪ್ಪುಗಳನ್ನು ತಿದ್ದುವ ಮಾರ್ಗದರ್ಶಕ.

ಅಮ್ಮ ಮನೆಗೆಲಸಗಳನ್ನು ಮಾಡುತ್ತಾಳೆ, ಆದರೆ ಅಪ್ಪ ಕೆಲಸಕ್ಕೆ ಹೋಗಿ ದುಡಿದು ಸಂಪಾದಿಸಿ ಮನೆಗೆ ಬಂದು ಮಗುವಿನ ಜೊತೆ ಆಟ ಆಡಿ, ಅದಾದ ಮೇಲೆ ಮಗುವನ್ನು ಮಲಗಿಸುವ ಮಾತೃಹೃದಯಿ ಅಪ್ಪ.

ಇಷ್ಟು ಮಾತ್ರ ಎಂದುಕೊಂಡಿರಾ! ಅಮ್ಮನಿಗೆ ಮನೆಕೆಲಸಗಳಲ್ಲೂ ಸಹ ಸಹಾಯ ಮಾಡಿ, ಕಚೇರಿ ಕೆಲಸಗಳನ್ನು ದೂರವಾಣಿ ಮೂಲಕವೇ ಒಂದಷ್ಟು ಮುಗಿಸಿ ಮಲಗುತ್ತಾರೆ. ಬೆಳಗ್ಗೆ ಎದ್ದು ಸ್ನಾನ, ಸಂಧ್ಯಾವಂದನೆ, #Sandhyavandane ದೇವರ ಪೂಜೆ ಪೂರ್ಣಗೊಳಿಸಿ, ತಿಂಡಿ ಮಾಡಿ ಮತ್ತೆ ಕೆಲಸಕ್ಕೆ ತೆರಳುತ್ತಾರೆ. ಇವೆಲ್ಲವನ್ನೂ ಅವರು ಮಕ್ಕಳು ಏಳುವುದರೊಳಗೇ ಮುಗಿಸುತ್ತಾರೆ ಎನ್ನುವುದು ವಿಶೇಷ. ಎಲ್ಲಿ ಮಗು ಎದ್ದು ಬಿಡುತ್ತದೆಯೋ ಎನ್ನುವುದೂ ಇದರ ಹಿಂದಿನ ಕಾಳಜಿ. ಹೋಗುವಾಗಲೂ ಹೆಂಡಿತಿಗೆ ಮಗು ಹುಷಾರು ಎಂದು ಸಾವಿರ ಬಾರಿ ಹೇಳಿ ದುಃಖದಿಂದ ಕೆಲಸಕ್ಕೆ ಹೋಗಿ ಮಗು ಏನು ಮಾಡುತ್ತಿರಬಹುದು ಎಂಬ ಯೋಚನೆಯಲ್ಲೇ ಇರುತ್ತಾರೆ.