ತರಬೇತಿ, ನಿರಂತರ ಶ್ರಮದಿಂದ ಸ್ಪರ್ಧಾತ್ಮಕ ಪರೀಕ್ಷೆಯಲ್ಲಿ ಯಶಸ್ಸು ಸಾಧ್ಯ: ಡಾ. ರಮೇಶ್ ಕರೆ

ಕಲ್ಪ ಮೀಡಿಯಾ ಹೌಸ್  |  ಭದ್ರಾವತಿ  |

ಸೂಕ್ತ ತರಬೇತಿ, ನಿಷ್ಠೆ ಮತ್ತು ವಿಶೇಷ ನಿರಂತರ ಪರಿಶ್ರಮದ ಮೂಲಕ ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲಿ ಯುವ ಜನರು ಉತ್ತೀರ್ಣರಾಗಿ ನಿರೀಕ್ಷಿತ ಉದ್ಯೋಗಾವಕಾಶಗಳನ್ನು ಪಡೆದುಕೊಳ್ಳಲು ಸಾಧ್ಯವಿದೆ ಎಂದು ಬೊಮ್ಮನಕಟ್ಟೆಯ ಸರ್.ಎಂ.ವಿ. ಸರ್ಕಾರಿ ವಿಜ್ಞಾನ ಕಾಲೇಜಿನ ಪ್ರಾಂಶುಪಾಲ ಡಾ.ಡಿ. ರಮೇಶ್ ಅಭಿಪ್ರಾಯ ವ್ಯಕ್ತಪಡಿಸಿದರು.

ಐಕ್ಯೂಎಸಿ, ಉದ್ಯೋಗ, ಮಾಹಿತಿ ಮತ್ತು ಮಾರ್ಗದರ್ಶನ ವಿಭಾಗವು ಶಿವಮೊಗ್ಗದ ಅಚೀವರ್ ಕೋಚಿಂಗ್ ಸೆಂಟರ್ ಸಹಯೋಗದೊಂದಿಗೆ ಏರ್ಪಡಿಸಿದ್ದ ಸ್ಪರ್ಧಾತ್ಮಕ ಪರೀಕ್ಷೆಗಳ ತರಬೇತಿಯ ಒಂದು ದಿನದ ಕಾರ್ಯಾಗಾರದಲ್ಲಿ ಅವರು ಮಾತನಾಡಿದರು.
ವಿದ್ಯಾರ್ಥಿಗಳು ತಮ್ಮ ಉದ್ದೇಶಿತ ಗುರಿಯನ್ನು ಸ್ಪಷ್ಟಪಡಿಸಿಕೊಳ್ಳದೇ ಕಾಲೇಜು ಹಂತದಲ್ಲಿ ಪದವೀಧರರಾಗಿ ಹೊರಬರುತ್ತಿದ್ದು, ಮುಂದೆ ಭವಿಷ್ಯದಲ್ಲಿ ಖಚಿತತೆ ಇಲ್ಲದೇ ಹಲವರು ನಿರಾಶರಾಗುತ್ತಿದ್ದಾರೆ. ಈ ರೀತಿ ಏಕತಾನತೆಯಿಂದ ಮುಂದುವರಿಯದೇ ಪದವಿ ಹಂತದಲ್ಲಿಯೇ ಭವಿಷ್ಯದ ದೃಷ್ಠಿಕೋನವನ್ನು ಅರಿತು, ಸೂಕ್ತ ಮಾರ್ಗದರ್ಶನ ಹಾಗೂ ಕೌಶಲ್ಯತೆಯ ಅರಿವಿನೊಂದಿಗೆ ಉತ್ತಮವಾದ ಭವಿಷ್ಯ ರೂಪಿಸಿಕೊಳ್ಳಬೇಕು ಎಂದು ಅವರು ತಿಳಿಸಿದರು.

ಅಚೀವರ್ ಕೋಚಿಂಗ್ ಸೆಂಟರ್’ನ ತಜ್ಞ ಮಾರ್ಗದರ್ಶನಕಾರ ವರುಣ್, ಮಹೇಶ್ ಮತ್ತು ಅಕ್ಷಯ್ ಅವರುಗಳು ವಿವಿಧ ವಿಷಯಗಳ ಕುರಿತು ವಿದ್ಯಾರ್ಥಿಗಳಿಗೆ ಸಮಗ್ರ ಮಾಹಿತಿ ನೀಡಿದರು.
ಕಾಲೇಜಿನ ಐಕ್ಯೂಎಸಿ ಸೆಲ್ ಸಂಚಾಲಕ ಡಾ.ಜಿ.ಎಸ್. ಸಿದ್ದೇಗೌಡ, ಪ್ರೊ.ಎಚ್.ಎಸ್. ರಘುನಾಥ್, ಉದ್ಯೋಗ ಮಾಹಿತಿ ಮತ್ತು ಮಾರ್ಗದರ್ಶನ ವಿಭಾಗದ ಪ್ರೊ.ಎಸ್.ಎಂ. ರಾಘವೇಂದ್ರ, ಡಾ.ಜಿ.ಎಂ. ಶಿಲ್ಪಾ, ಡಾ.ಅರಸಯ್ಯ ಮೊದಲಾದವರು ಉಪಸ್ಥಿತರಿದ್ದರು. ಕೌಸಲ್ಯ ಪ್ರಾರ್ಥಿಸಿ, ರಾಘವೇಂದ್ರ ಸ್ವಾಗತಿಸಿ, ಡಾ.ಸಿದ್ದೇಗೌಡ ನಿರೂಪಿಸಿದರು.

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news