ರಂಗಗ್ ರಂಗ್ ದಿಂಜಾವುನ ಖಡಕ್ ಖಳನಾಯಕೆ: ರಮೇಶ್ ರೈ ಕುಕ್ಕುವಳ್ಳಿ

ತುಳುನಾಡ್ ಕಲೆ ಸಂಸ್ಕೃತಿ ಮನೋರಂಜನೆದ ನೆಲ. ಆಚರಣೆ ಆರಾಧನೆ ಮಿನದನ ಒಂಜೆದ ಬೆರಿಕ್ಕೊಂಜಿ ಚಾತಿರ್ಪು ಮೆನ್ಕವುನ ಕಲ. ಆಟ ನಾಟಕ ಸಿನೆಮಾ ರಂಗೊಲು ಚಾತಿರ್ಪುದ ಕಲಾವಿದೆರೆನ್ ನಾಲೂರು ಪೊಲಬು ಮಲ್ಪುನ ಮತ್ತರ್ಮೆಲು. ರಂಗಭೂಮಿಡ್ದ್ ಚಂದನವನ ಮುಟ್ಟ ಪಾದೊ ಬುಲೆಪಾಯಿ ಬಿರ್ಸೆ, ಗಟ್ಟಿ ಮುಟ್ಟ ಜೂವ, ರಂಗೊಡೊಂಜಿ ಪೊಸ ಖದರ್ ಮೂಡಾವುನ ಖಳ ನಾಯಕೆ ಒರಿ ತುಳುನಾಡ್‌ಡ್ ಉಲ್ಲೆರ್ ಪಂಡ ಅವ್ವು ರಮೇಶ್ ರೈ ಕುಕ್ಕುವಳ್ಳಿ. ತುಳು ನಾಟಕ ಪರ್ಬೊಡು ರಂಗ್‌ದ ಮಿತ್ತ್ ರಂಗೊಡು ಕಳೆ ದಿಂಜದ್ ಕೊರ್ನಾರ್ ರಮೇಶ್ ರೈಕುಲು.

ಪುತ್ತೂರು ತಾಲೂಕುದ ಇರ್ದೆ ಗ್ರಾಮೊದ ಪ್ರತಿಷ್ಠಿತ ಬಾಲ್ಯೊಟ್ಟು ಗುತ್ತುದ ಕುಕ್ಕುವಳ್ಳಿಡ್ ಕರಿದ್ ಪೋಯಿನ ಕರಿಯಪ್ಪ ರೈ ಕಲ್ಲಡ್ಕ ಬೊಕ್ಕ ಕರಿದ್ ಪೋಯಿನ ಗಿರಿಜಾ ಕೆ ರೈ ಕುಕ್ಕುವಳ್ಳಿ ದಂಪತಿಲೆನ ಮಗೆಯಾಯಿನ ರಮೇಶ್ ರೈ ಕುಕ್ಕುವಳ್ಳಿ 1990ಡ್ ತನ್ನ 16ನೇ ಒರ್ಸೊಡು ಕರಿದ್ ಪೋಯಿನ  ಶಾಂತರಾಮ ಕಲ್ಲಡ್ಕ ಬರೆತಿ ಶೀಲಾವತಿ ನಾಟಕೊಡು ಖಳನಾಯಕೆ ಆದ್ ಬಣ್ಣ ಪಾಡ್ದ್ ಮತ್ತರ್ಮೆ ಏರ್ನಾರ್ ಪಿರ ತೂವಂದೆ ನಾಟಕರಂಗೊಡು ನೆಗತ್ತೊಂದೆ ಪೋಯೆರ್.

1200 ನಾಟಕೊಲೆಡ್ ಅಭಿನಯ ಮಲ್ತ್, 3000ಡ್ದುಲಾ ಜಾಸ್ತಿ ಪ್ರದರ್ಶನ ಕೊರ್ನ ರೈಕುಲೆಗ್ ಯಕ್ಷಗಾನೊಡು ಏಸ ಪಾಡ್ನ ಅನುಭವೊಲಾ ಉಂಡು. ಸುಮಾರ್ ನಾಟಕ ಪಂತೊಲೆಡ್ ಪಾಲ್ ಪಡೆದ್ ಉತ್ತಮ ಖಳನಾಯಕ ಇನಾಮುಲೆನ್ ಪಡೆಯಿನ ಪೆರ್ಮೆಲಾ ಮೇರೆಗುಂಡು.

ನಿಸರ್ಗ ಕಲಾವಿದೆರ್ ಕುಡ್ಲ ಪನ್ಪಿ ವೃತ್ತಿಪರ ನಾಟಕ ಕೂಟೊ ಕಟ್ಟೊಂದು ಸುಮಾರ್ ನಾಟಕೊಲೆನ್ ರಂಗಭೂಮಿಗ್ ಕೊರ್ನ ಅನುಭವದೊಟ್ಟುಗು ಕಲಾ ಸಂಗಮ ಮಂಗಳೂರು, ಗಡಿನಾಡ ಕಲಾವಿದರು ಕಾಸರಗೋಡು, ಮಸ್ಕಿರಿ ಕುಡ್ಲ, ಶಾರದಾ ಆರ್ಟ್ಸ್ ಮಂಜೇಶ್ವರ, ರಂಗ ತರಂಗ ಕಾಪು, ನಮ್ಮ ಕಲಾವಿದೆರ್ ಬೆದ್ರ ಕೂಟೊಲೆಡ್ ಬಣ್ಣ ಪಾಡ್ದ್ ಮನೋರಂಜನೆ ಮಲ್ದಿನ ನೆಂಪುಲುಲಾ ಉಂಡು. ಇತ್ತೆ ವಿಧಾತ್ರಿ ಕಲಾವಿದೆರ್ ಕೈಕಂಬ ಕುಡ್ಲ ಕೂತೊಡ ಸಮಗ್ರ ಸುಧಾರಿಕೆದೊಟ್ಟುಗು ಅಭಿನಯ ಮಲ್ತೊಂದುಲ್ಲೆರ್.

ನಾಟಕದ ಅಭಿನಯಗಾದ್ ರಂಗಭೂಮಿದ ಸೇವೆಗಾದ್ ರಂಗಕೇಸರಿ, ತುಳುನಾಡ ಚಾಣಕ್ಯ, ರಂಗದ ರಾಜ, ರಂಗ ವಿಚಕ್ಷಣ ಪನ್ಪಿ ಬಿರುದುಲೆನೊಟ್ಟುಗು ಸುಮಾರ್ ಪುಗರ್ತೆ ಬೊಕ್ಕ ಸುಮಾರ್ ಸಂಘ ಸಂಸ್ಥೆಲೆನ ಮಾನಾದಿಗೆಲು ರಮೇಶ್ ರೈಕುಲೆನ ಮಟ್ಟೆಲ್‌ಗ್ ಸೇರ್ದ್ಂಡ್. ಸುಮಾರ್ ನಾಟಕ ಪಂತೊಲೆನ ತೀರ್ಪುಗಾರೆರ್ ಆದ್ ಪಾಲ್ ಪಡೆತೆರ್.  ತುಳುನಾಡ್‌ಡೇ ಅತ್ತಂದೆ ಬೆಂಗಳೂರು, ಮೈಸೂರು, ಮಹಾರಾಷ್ಟ್ರಲೆಡ್ ನಾಟಕ ಗೊಬ್ಬಿನ ಅನುಭವೊಲಾ ರೈಕುಲೆಡ ಉಂಡು. ಸಾಮಾಜಿಕ ನಾಟಕೊಲು ಮಾತ್ರ ಅತ್ತಂದೆ ಹಾಸ್ಯ, ಪೌರಾಣಿಕ, ಐತಿಹಾಸಿಕ  ಬೊಕ್ಕ ಜಾನಪದ ನಾಟಕೊಲೆಡ್ ಅಭಿನಯ ಮಲ್ದೆರ್.

2007ಡ್ ಡಾ. ರಿಚರ್ಡ್ ಕ್ಯಾಸ್ಟಲಿನೋರೆನ ಬದಿ ತುಳು ಸಿನಿಮಾಡು ಕೋಸ್ಟಲ್‌ವುಡ್ ಪ್ರವೇಶ ಮಲ್ತಿ ರೈಕುಲು 20 ತುಳು ಬೊಕ್ಕ 8 ಕನ್ನಡ ಸಿನೆಮಾಲೆಡ್ ನಟನೆ ಮಲ್ದೆರ್. 6 ತುಳು ಕನ್ನಡ ಧಾರಾವಾಹಿಲೆಡ್ ಅಭಿನಯ ಮಲ್ದಿನ  ರಮೇಶ್ ರೈಕುಲು ಡಿಡಿ ಚಂದನಡ್ ಬರೊಂದಿತ್ತಿ ಪುಗರ್ತೆದ ಸಜ್ಜಿಗೆ ಬಜಿಲ್ ಧಾರಾವಾಹಿದ ನಿರ್ಮಾಣದೊಟ್ಟು ಪ್ರಧಾನ ಪಾತ್ರ ಮಲ್ದೆರ್.

ಕಿನ್ಯೆಡ್ ಯಕ್ಷಗಾನೊಡು ಬಣ್ಣ ಪಾಡಿ ಅನುಭವ ಇತ್ತಿನ ರಮೇಶ್ ರೈ ಕುಕ್ಕುವಳ್ಳಿ ಸುಮಾರ್ ಯಕ್ಷಗಾನೊಲೆಡ್ ಏಸ ಪಾಡ್ದ್ ಯಕ್ಷ ಸೇವೆಲಾ ಮಲ್ದೆರ್. ರೇಡಿಯೋ ಯಕ್ಷಗಾನ ತಾಳಮದ್ದಳೆಡ್ ಅರ್ಥಗಾರಿಕೆಲಾ ಮಲ್ದೆರ್.

ದಾಸ್ ಪ್ರಕಾಶ್ ಮೀಡಿಯಾ, ಬೊಕ್ಕ ಸಹಾಯ ಟಿವಿಲೆಡ್ ತಾತ್ಕಾಲಿಕ ತುಳು ವಾರ್ತಾ ವಾಚಕೆರಾದ್ ಬೆನ್ತಿನ ರೈಕುಲು ಸುಮಾರ್ ಸಂಘ ಸಂಸ್ಥೆಲೆಡ್ ತನನ್ ತಾನ್ ಒಪ್ಯವೊಂದಿನಾರ್. ಸುಮಾರ್ ನಾಟಕೊಲೆಗ್ ನಿರ್ದೇಶನ ಮಲ್ತ್ ಸುಮಾರ್ ಜನ ಕಲಾವಿದೆರೆನ್ ರಂಗಭೂಮಿಗ್ ಪೊಲಬು ಮಲ್ತ್ ಕೊರ್ನ ಪೆರ್ಮೆಲಾ ರಮೇಶ್ ರೈ ಕುಕ್ಕುವಳ್ಳಿಗ್ ಉಂಡು.

ಪ್ರಕೃತಿ ಕಲಾವಿದೆರ್ ಪನ್ಪಿ ಕೂಟೊ ಕಟ್ಟೊಂದು ಆಯಿಟ್ಟ್ ಕೆಲವು ನಾಟಕ ಗೊಬ್ಬದ್ ರಂಗ ಸೇವೆ ಮಲ್ಪುನೊಟ್ಟುಗು ಕುತ್ತಾರ್ ಶ್ರೀ ರಾಜರಾಜೇಶ್ವರಿ ದೇವಸ್ಥಾನೊಡು ಏಳ್ ದಿನೊತ್ತ ನಾಟಕ ಪಂತೊ ಮಲ್ತ್ ರಂಗಭೂಮಿಡ್ ಸೇವೆ ಸಂದದ್ ಅಕಾಲಿಕವಾದ್ ಕರಿದ್ ಪೋಯಿನ  ರಂಗ ಗುರುಕುಲಾಯಿನ ಜಯರಾಮ ಗಟ್ಟಿ ಬೊಕ್ಕ ಮನಮೋಹನ್ ಕದ್ರಿಯೆರೆನ ಸಬಿನೆಂಪುಗಾದ್ ದಾನಿಲೆನ ಸಕಾಯೊಡು 5 ಲಕ್ಷ ರೂಪಾಯಿದ ರಂಗಮಂಟಮೆನ್ ಶ್ರೀ ಕ್ಷೇತ್ರಗ್ ಸಮರ್ಪಣೆ ಮಲ್ದಿನ ಪೆರ್ಮೆಲಾ ರೈಕುಲೆಗ್ ಸಂದೊಡು.

ಇತ್ತಿನೆನ್ ಇತ್ತಿಲೆಕ ಪನ್ಪಿ ಸಾದ ಸೀದಾ ವ್ಯಕ್ತಿತ್ವದ ರಮೇಶ್ ರೈ ಕುಕ್ಕುವಳ್ಳಿಯೆರೆಗ್ ಮೋನೆಗ್ ಸರಿಯಾದ್ ಪಾತೆರುನ ಅಭ್ಯಾಸ ಇಜ್ಜಿ. ಜೊತೆಟ್ ಬಣ್ಣ ಪಾಡುನ ಕಲಾವಿದೆರ್‌ನೊಟ್ಟುಗು ಎಡ್ಡೆ ಸ್ನೇಹ ಸಮ್ಮುಂದೊ ದೀವೊನುನ ರೈಕುಲೆನ ಪೊಸ ಕಲಾವಿದೆರೆನ್ ಬುಲೆಪಾವುನ ಗುಣೊ ಮೆಚ್ಚೊಡಾಯಿನನೆ. “ತುಳು ರಂಗಭೂಮಿ ಬುಲೆವೊಡು, ಒರಿಯೊಡು, ಅಯಿಕ್ಕಾದ್ ಪೊಸ ಕಲಾವಿದೆರ್ತುಳು ರಂಗಭೂಮಿಗ್ ಬರೊಡು” ಪನ್ಪಿ ರೈಕುಲು ಈರ್ನ ಮೋಕೆ ನಾಟಕಗಾ ಸಿನಿಮೊಗಾ ಕೇನ್ನಗ ಇನಿತ ಎನ್ನ ಪುಗರ್ತೆಗ್ ಅಡಿಪಾಯ ರಂಗಭೂಮಿ. ಅಂಚಾದ್ ನಾಟಕ ರಂಗೊಗೆ ಎನ್ನ ಸುರುತ ಮಣೆ. ಬಾಕಿದ ವೊವ್ವಿತ್ತ್ಂಡಲಾ ಬೊಕ್ಕನೇ ಪನ್ಪೆರ್. ಅಂಚನೆ ಸಾಧನೆಗ್ ತಾದಿ ತುಡರಾಯಿ ಗುರುಕುಲು  ಕ| ಜಯರಾಮ್ ಗಟ್ಟಿ, ಕ| ಮನಮೋಹನ್ ಕದ್ರಿ, ಶಿವಪ್ರಕಾಶ್ ಪೂಂಜಾ ಹರೇಕಲ, ಜಗದೀಶ್ ಶೆಟ್ಟಿ ಕೆಂಚನಕೆರೆ ದುಂಬಾಯಿನಕ್ಲೆನ್ ನೆಂಪು ಮಲ್ತೊನುವೆರ್.

ರಮೇಶ್ ರೈ ಕುಕ್ಕುವಳ್ಳಿಯೆರೆನ ಸಾಧನೆಗ್ ಸ್ಫೂರ್ತಿಯಾದ್ ಬೊಡೆದಿ ಲತಾ ಆರ್ ರೈ ಒಟ್ಟುಗುಲ್ಲೆರ್. ಜೋಕುಲಾಯಿನ ವರ್ಷ, ದೀಕ್ಷಾ ಬೊಕ್ಕ ರಕ್ಷಾನೊಟ್ಟುಗು ಪೊರ್ಲ ಸಂಸಾರ ನಡಪಾವೊಂದುಲ್ಲೆರ್. ಸಾಹಿತ್ಯ ಸರಸ್ವತಿನ ಮಟ್ಟೆಲ್ ಬೆಳಗುನ ನಾರಾಯಣ ರೈ ಕುಕ್ಕುವಳ್ಳಿ, ಭಾಸ್ಕರ ರೈ ಕುಕ್ಕುವಳ್ಳಿಯೆರೆರೆನ ಮೋಕೆದ ಮೆಗ್ಯೆ ಆಯಿನ ರಮೇಶ್ ರೈಕುಲು ತುಳು ರಂಗೊಡು ಮಾತ್ರ ಅತ್ತಂದೆ ಕನ್ನಡ ಸಿನೆಮಾ ರಂಗೊಡುಲಾ ಬುಲೆವೊಂದುಪ್ಪುನ ಕಲಾವಿದೆ. ಆರೆನ ಕಲಾ ಸೇವೆ ನನಲಾತ್ ಪುಗರ್ತೆ ಬೊಕ್ಕ ಮಾನಾದಿಗೆ ಪಡೆವಡ್. ಆರೋಗ್ಯಪೂರ್ಣ ಪೊರ್ಲ ಜೀವನ ಆರೆನವಾವಡ್.

ಬರವು✍🏻ವಿದ್ಯಾಶ್ರೀ ಶೆಟ್ಟಿ ಎಸ್ ತುಳುನಾಡ್
ಪಟ/ಬೊಕ್ಕ/ವೀಡಿಯೋ: ಸತೀಶ ಶೆಟ್ಟಿ ಚೇಕಾ೯ಡಿ ದೊಡ್ಡಮನೆ