ಚಿತ್ರೀಕರಣದಲ್ಲಿ ಕಿರಿಕ್ ಹುಡುಗನ ‘ಮೀಟೂ’ ಕಾಂಟ್ರೊವರ್ಸಿ! ನಟಿ ಯಾರು?

ರಾಜ್ಯ ಸೇರಿದಂತೆ ರಾಷ್ಟ ಮಟ್ಟದಲ್ಲಿ ಕಿರಿಕ್ ಮಾಡಿದ್ದ ಮೀಟೂ ಪ್ರಕರಣಗಳು ಇಡಿಯ ದೇಶವನ್ನೇ ತಲ್ಲಣಗೊಳಿಸಿದ್ದವು. ರಾಜ್ಯದ ಮಟ್ಟಿಗೆ ನೋಡುವುದಾದರೆ, ಚಿತ್ರರಂಗದ ಇತಿಹಾಸದಲ್ಲೇ ಈ ವಿಚಾರದ ಭಾರೀ ಕೋಲಾಹಲ ಎಬ್ಬಿಸಿದ್ದು ತಿಳಿದೇ ಇದೆ.. ಈಗ ಇದೇ ವಿಚಾರವನ್ನು ಆಧರಿಸಿದ ಚಿತ್ರ ಸಿದ್ದವಾಗುತ್ತಿದೆ.

ಕೆಲವು ತಿಂಗಳ ಹಿಂದೆ ಯುವ ನಿರ್ದೇಶಕನೊಬ್ಬರಿಗೆ ನಟ ಹುಚ್ಚ ವೆಂಕಟ್ ಬೆದರಿಕೆ ಹಾಕಿದ್ದ ವಿಚಾರ ನೆನಪಿರಬಹುದು. ಹಾಗೆ, ಬೆದರಿಕೆ ಹಾಕಿಸಿಕೊಂಡಿದ್ದ ಯುವ ಪ್ರತಿಭೆಯೇ ಮಲೆನಾಡ ಮೂಲದ ಕಿರಿಕ್ ಹುಡ್ಗ ಕೀರ್ತನ್ ಈ ಮೀಟೂ ಚಿತ್ರದ ನಿರ್ದೇಶಕ.

ಚಿತ್ರದ ಕುರಿತಂತೆ ಕಲ್ಪ ನ್ಯೂಸ್ ಜೊತೆಯಲ್ಲಿ ಮಾತನಾಡಿದ ಕೀರ್ತನ್, ಕನ್ನಡ ಸಿನಿಮಾ ಇಂಡಸ್ಟ್ರಿಯ ಕರಾಳ ಮುಖ ಬಿಚ್ಚಿಡುವ ಸಿನಿಮಾ ಮಾಡಲು ಮುಂದಾಗಿದ್ದು, ವಿವಾದಾತ್ಮಕ ನಟಿ ಶ್ರೀ ರೆಡ್ಡಿಯನ್ನು ಸ್ಯಾಂಡಲ್‌ವುಡ್‌ಗೆ ಪರಿಚಯಿಸುವುದಾಗಿ ತಿಳಿಸಿದ್ದಾರೆ.

ಫೇಸ್ ಬುಕ್ ಲವ್ ಅರ್ಧಕ್ಕೆ ನಿಂತ ವೇಳೆ ತಲೆಗೆ ಬಂದಿದ್ದು ಮೀಟೂ. ಹೀಗಾಗಿ ಈ ಅಭಿಯಾನದ ಕುರಿತಂತೆ ಕಥೆಯನ್ನು ಬರೆದೆ. ಈ ಚಿತ್ರಕ್ಕಾಗಿ ದೊಡ್ಡವರ ಸಹಾಯದಿಂದ ತೆಲುಗು ನಟಿ ಶ್ರೀ ರೆಡ್ಡಿಯನ್ನು ಸಂಪರ್ಕಿಸಿ, ಒಪ್ಪಿಸುವಲ್ಲಿ ಯಶಸ್ವಿಯಾದೆವು. ಈ ಚಿತ್ರದಲ್ಲಿ ಅವರದ್ದು ನಾಯಕಿಯ ಪಾತ್ರ ಅಲ್ಲದಿದ್ದರೂ, ಚಿತ್ರದಲ್ಲೊಂದು ಪ್ರಮುಖ ಪಾತ್ರ ಮಾಡಲಿದ್ದಾರೆ.

ಶೃತಿ ಹರಿಹರನ್ ಪ್ರಕರಣವೇ?
ಇನ್ನು, ಈ ಚಿತ್ರದಲ್ಲಿ ಶೃತಿ ಹರಿಹರನ್ ಅವರ ಮೀಟೂ ಪ್ರಕರಣವನ್ನು ಹೇಳಲು ನಿರ್ದೇಶಕರು ಹೊರಟಿದ್ದಾರೆಯೇ ಎಂಬ ಅನುಮಾನಗಳು ಗಾಂಧೀನಗರದಲ್ಲಿ ಚರ್ಚೆಗೆ ಎಡೆ ಮಾಡಿಕೊಟ್ಟಿವೆ. ಆದರೆ, ಮಿಟೂ ಅನುಭವಿಸಿರುವ ನಟಿಯರು ಈ ಚಿತ್ರದಲ್ಲಿ ಬಂದು ಹೋಗ್ತಾರೆ ಮತ್ತು ಹಳೆ ನಟ-ನಟಿಯರೊಂದಿಗೆ ಹೊಸ ನಟ-ನಟಿಯರು ಇರುತ್ತಾರೆ ಎನ್ನುತ್ತಾರೆ ಕಿರಿಕ್ ಕೀರ್ತನ್.

ಸಿನಿಮಾದ ಚಿತ್ರೀಕರಣ ಮುಗಿಯುವವರೆಗೂ ಮಾಧ್ಯಮದ ಮುಂದೆ ಸಂಪೂರ್ಣವಾಗಿ ಬರುವುದಿಲ್ಲ ಎನ್ನುವ ನಿರ್ದೇಶಕರು, ‘ಇದೊಂದು ದೊಡ್ಡ ಕಾಂಟ್ರೋವರ್ಸಿ ಚಿತ್ರವಾಗುವುದು ನಿಶ್ಚಿತ ಎನ್ನುತ್ತಾರೆ ಫೇಸ್’ಬುಕ್’ನಲ್ಲಿ.

ಇನ್ನು, ನಿರ್ದೇಶಕರು ಚಿತ್ರದ ಪೋಸ್ಟರ್’ವೊಂದನ್ನು ತಮ್ಮ ಫೇಸ್’ಬುಕ್ ಖಾತೆಯಲ್ಲಿ ಬಿಡುಗಡೆ ಮಾಡಿದ್ದಾರೆ. ಇನ್ನು ಈ ಚಿತ್ರದ ಪೋಸ್ಟರ್ ಕುತೂಹಲ ಮೂಡಿಸಿದೆ.

ಕೆಲವು ದಿನಗಳ ಹಿಂದೆಯಷ್ಟೇ ‘ಕಿರಿಕ್ ಪಾರ್ಟಿ’ ಚಿತ್ರದ ನಟಿ ಸಂಯುಕ್ತಾ ಹೆಗಡೆ ಅವರನ್ನು ನೀಲಿ ತಾರೆ ಸನ್ನಿಲಿಯೋನ್ ಗೆ ಹೋಲಿಸಿ, ಮಾಧ್ಯಮ ಮತ್ತು ಸೋಷಿಯಲ್ ಮೀಡಿಯಾದಲ್ಲಿ ‘ಕಿರಿಕ್’ ಕಾಂಟ್ರೋವರ್ಸಿಯಿಂದ ಕೀರ್ತನ್ ಸುದ್ದಿಯಾಗಿದ್ದರು ಎನ್ನುವುದನ್ನು ಇಲ್ಲಿ ಉಲ್ಲೇಖಿಸಬಹುದು.

ಇನ್ನು ಈ ಚಿತ್ರದಲ್ಲಿ ‘ಅಂಬಾರಿ’ ಖ್ಯಾತಿಯ ಸುಪ್ರಿತಾ ನಟಿಸಲು ಒಪ್ಪಿಕೊಂಡಿದ್ದಾರಂತೆ. ವಿಷಯವನ್ನು ನಿರ್ದೇಶಕ ಕೀರ್ತನ್ ಶೆಟ್ಟಿ ಖಚಿತ ಪಡಿಸಿದ್ದು, ಚಿತ್ರದ ಪೊಸ್ಟರ್ ವೊಂದನ್ನು ಸಹ ಬಿಡುಗಡೆ ಮಾಡಿದ್ದಾರೆ. ಚಿತ್ರ ಸೂರ್ಯ ಪಿಕ್ಚರ್ಸ್ ಅಡಿಯಲ್ಲಿ ಸೂರ್ಯಕುಮಾ,  ಎಸ್ ಸತೀಶ್,  ಕೋವಿರಾಜ್ ಅವರಿಂದ ನಿರ್ಮಾಣವಾಗುತ್ತಿದ್ದು, ನಿರ್ದೇಶಕರೇ ಈ ಚಿತ್ರಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದಿದ್ದಾರೆ. ತಾರಾಗಣದಲ್ಲಿ ಹೇಭಾ ಪಾಟೀಲ್, ಪೂನಂ ಪಾಂಡೆ, ರಿಚಾ ಪನ್ನೈ,  ಆಶಿಶ್ ವಿದ್ಯಾರ್ಥಿ, ಸತ್ಯಜಿತ್, ಉಮೇಶ್, ಮಠ ಕೊಪ್ಪಳ್ ಹೊಸ ಪ್ರತಿಭೆ ನಯನ ಗೌಡ, ಥಿಕ್ಷಣ್  ಸೇರಿದಂತೆ ಪ್ರಮುಖರು ಚಿತ್ರದಲ್ಲಿದ್ದಾರೆ.