ಕಲ್ಪ ಮೀಡಿಯಾ ಹೌಸ್ | ಮೈಸೂರು |
ಜನವರಿ 1 ಹೊಸ ವರ್ಷದ ಉದಯ. ಮೈಸೂರು ವಿಜಯನಗರದ ಶ್ರೀ ಯೋಗಾನರಸಿಂಹಸ್ವಾಮಿ ದೇವಸ್ಥಾನದಲ್ಲಿ #Shri Yoganarasimhaswamy Temple ಈ ದಿನ ಕೇವಲ ಹೊಸ ವರ್ಷವಷ್ಟೇ ಅಲ್ಲ, ಭಕ್ತಿ, ಶಿಸ್ತು ಮತ್ತು ಸಮರ್ಪಣೆಯ ಮಹೋತ್ಸವವೂ ಆಗಿರುತ್ತದೆ. ಕಳೆದ ಹಲವು ವರ್ಷಗಳಿಂದ ಅನೂಚಾನವಾಗಿ ನಡೆದುಕೊಂಡು ಬರುತ್ತಿರುವ ಪರಂಪರೆಯಂತೆ, ಈ ವರ್ಷವೂ ಜನವರಿ 1, 2026ರಂದು ಭಕ್ತಾದಿಗಳಿಗೆ ಎರಡು ಲಕ್ಷ ತಿರುಪತಿ ಮಾದರಿಯ ಲಡ್ಡು ಪ್ರಸಾದವನ್ನು ಉಚಿತವಾಗಿ ವಿತರಿಸಲು ದೇವಾಲಯ ಸಜ್ಜಾಗಿದೆ.
ಬೆಳಿಗ್ಗೆ 4 ಗಂಟೆಗೆ ವಿಶೇಷ ಅಲಂಕಾರದೊಂದಿಗೆ ಪೂಜೆ ಆರಂಭವಾಗಲಿದೆ. “ಶ್ರೀರಂಗಕ್ಷೇತ್ರ” ಹಾಗೂ ಮಧುರೈ ಕ್ಷೇತ್ರಗಳಿಂದ ತರಿಸಲಾದ ವಿಶೇಷ ತೋಮಾಲೆ ಮತ್ತು ಸ್ವರ್ಣಪುಷ್ಪಗಳಿಂದ ಶ್ರೀ ಯೋಗಾನರಸಿಂಹಸ್ವಾಮಿಗೆ ಸಹಸ್ರನಾಮಾರ್ಚನೆ ನೆರವೇರಿಸಲಾಗುತ್ತದೆ. ಇದಲ್ಲದೆ, ದೇವಾಲಯದ ಉತ್ಸವ ಮೂರ್ತಿಗಳಾದ ಶ್ರೀ ಮಲಯಪ್ಪಸ್ವಾಮಿ, ಪದ್ಮಾವತಿ ಮತ್ತು ಮಹಾಲಕ್ಷ್ಮಿ ದೇವರಿಗೆ ದೇವಾಲಯದ ಆವರಣದಲ್ಲಿ ಏಕಾದಶ ಪ್ರಾಕಾರೋತ್ಸವವೂ ನಡೆಯಲಿದೆ.
ಉತ್ಸವದ ಮತ್ತೊಂದು ವಿಶೇಷ ಆಕರ್ಷಣೆ ಎಂದರೆ ಇಪ್ಪತ್ತು ಕ್ವಿಂಟಾಲ್ ಪುಳಿಯೋಗರೆ ನಿವೇದನೆ. ದಿನವಿಡೀ ದೇವಾಲಯಕ್ಕೆ ಆಗಮಿಸುವ ಭಕ್ತಾದಿಗಳಿಗೆ ಯಾವುದೇ ಜಾತಿ, ಮತ, ಭೇದವಿಲ್ಲದೆ ಪ್ರಸಾದ ವಿತರಿಸಲಾಗುತ್ತದೆ. ಈ ಮಹತ್ವದ ಧಾರ್ಮಿಕ ಸೇವಾಕಾರ್ಯವನ್ನು ಪರಮ ಪೂಜ್ಯ ನಾಡೋಜ ಪ್ರೊ. ಭಾಷ್ಯಂ ಸ್ವಾಮೀಜಿಯವರ ದಿವ್ಯ ಸಾನಿಧ್ಯ ಮತ್ತು ನೇತೃತ್ವದಲ್ಲಿ ಆಯೋಜಿಸಲಾಗಿದೆ.
ಈ ಪ್ರಸಾದ ಪರಂಪರೆ 1994ರಲ್ಲಿ ಕೇವಲ ಸಾವಿರ ಲಡ್ಡುಗಳಿಂದ ಆರಂಭವಾದುದು. ನಂತರ ವರ್ಷದಿಂದ ವರ್ಷಕ್ಕೆ ವಿಸ್ತರಿಸುತ್ತಾ, ಕಳೆದ ಹಲವು ವರ್ಷಗಳಿಂದ ಒಂದು ಲಕ್ಷಕ್ಕೂ ಅಧಿಕ ಲಡ್ಡುಗಳನ್ನು ವಿತರಿಸಲಾಗುತ್ತಿದೆ. ಈ ವರ್ಷ ಮೊದಲ ಬಾರಿಗೆ ಎರಡು ಲಕ್ಷ ಲಡ್ಡುಗಳನ್ನು ಭಕ್ತಾದಿಗಳಿಗೆ ನೀಡಲು ದೇವಾಲಯ ಸಕಲ ಸಿದ್ಧತೆ ಮಾಡಿಕೊಂಡಿದೆ. ಸುಮಾರು 2 ಕಿಲೋಗ್ರಾಂ ತೂಕದ 15,000 ಲಡ್ಡುಗಳು ಹಾಗೂ 150 ಗ್ರಾಂ ತೂಕದ 2 ಲಕ್ಷ ಲಡ್ಡುಗಳನ್ನು ವಿತರಿಸಲಾಗುವುದು.
ಲಡ್ಡು ತಯಾರಿಕೆಗೆ 60 ಮಂದಿ ನುರಿತ ಬಾಣಸಿಗರು ಕೈಜೋಡಿಸಿದ್ದು, ಡಿಸೆಂಬರ್ 20ರಿಂದ ಡಿಸೆಂಬರ್ 31ರವರೆಗೆ ನಿರಂತರವಾಗಿ ತಯಾರಿ ಕಾರ್ಯ ನಡೆಯಲಿದೆ. 100 ಕ್ವಿಂಟಾಲ್ ಕಡಲೆಹಿಟ್ಟು, 200 ಕ್ವಿಂಟಾಲ್ ಸಕ್ಕರೆ, 10,000 ಲೀಟರ್ ಖಾದ್ಯ ತೈಲ ಸೇರಿದಂತೆ ಗೋಡಂಬಿ, ಬಾದಾಮಿ, ದ್ರಾಕ್ಷಿ, ಪಿಸ್ತಾ, ಏಲಕ್ಕಿ, ಜಾಕಾಯಿ, ಜಾಪತ್ರೆ, ಪಚ್ಚೆ ಕರ್ಪೂರ ಮುಂತಾದ ಅಪಾರ ಪ್ರಮಾಣದ ಸಾಮಗ್ರಿಗಳನ್ನು ಬಳಸಿ ಪ್ರಸಾದವನ್ನು ಶುದ್ಧತೆ ಮತ್ತು ಶಿಸ್ತಿನೊಂದಿಗೆ ಸಿದ್ಧಪಡಿಸಲಾಗುತ್ತಿದೆ.
ಈ ಕಾರ್ಯಕ್ರಮದ ಉದ್ದೇಶ ಕೇವಲ ಪ್ರಸಾದ ವಿತರಣೆ ಅಲ್ಲ. ಹೊಸ ವರ್ಷದ ಸಂದರ್ಭವನ್ನು ಲೋಕಕಲ್ಯಾಣ, ವಿಶ್ವಶಾಂತಿ, ಭ್ರಾತೃತ್ವ ಮತ್ತು ಸರ್ವಧರ್ಮ ಸಮನ್ವಯತೆಯ ಸಂಕೇತವಾಗಿ ಆಚರಿಸುವ ಸಂಕಲ್ಪವೇ ಇದರ ಆತ್ಮ. ಯಾವುದೇ ಭೇದಭಾವವಿಲ್ಲದೆ ಎಲ್ಲರ ಒಳಿತಿಗಾಗಿ ಪ್ರಾರ್ಥಿಸುವ ಈ ಸೇವಾಯಜ್ಞದಲ್ಲಿ ಭಕ್ತಾದಿಗಳ ಸಂಪೂರ್ಣ ಸಹಕಾರವೂ ಇದೆ.
ದೇವಾಲಯದ ಆಡಳಿತಾಧಿಕಾರಿ ಎನ್. ಶ್ರೀನಿವಾಸನ್ ಅವರ ಮಾಹಿತಿ ಪ್ರಕಾರ, ಈ ಮಹತ್ಕಾರ್ಯವು ಶ್ರೀ ಯೋಗಾನರಸಿಂಹಸ್ವಾಮಿ ದೇವಸ್ಥಾನ, ‘ಸುದರ್ಶನ ನಾರಸಿಂಹ ಕ್ಷೇತ್ರ’, ವಿಜಯನಗರ ಮೊದಲ ಹಂತ, ಮೈಸೂರು ಎಂಬ ಧಾರ್ಮಿಕ ಕೇಂದ್ರವನ್ನು ಭಕ್ತಿ ಮತ್ತು ಸೇವೆಯ ಪ್ರಮುಖ ಸಂಕೇತವಾಗಿ ಮತ್ತೊಮ್ಮೆ ಸ್ಥಾಪಿಸಲಿದೆ.
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news
