ಫ್ಲಿಪ್‌ಕಾರ್ಟ್’ಗೆ ಶಿವಮೊಗ್ಗ ಕನ್ಸೂಮರ್ ಕೋರ್ಟ್ ದಂಡ, ಕಂಪೆನಿಗೆ ಚಾಟಿ | ಕಾರಣವೇನು?

ಕಲ್ಪ ಮೀಡಿಯಾ ಹೌಸ್  |  ಶಿವಮೊಗ್ಗ  |

ಆನ್‌ಲೈನ್ ಶಾಪಿಂಗ್ ವೇಳೆ ಗ್ರಾಹಕರು ಬುಕ್ ಮಾಡಿದ ಉತ್ಪನ್ನದ ಬದಲಿಗೆ ಬೇರೆ ಮಾದರಿಯ ಉತ್ಪನ್ನವನ್ನು ಕಳುಹಿಸಿ, ಅದನ್ನು ಸರಿಪಡಿಸಲು ವಿಫಲವಾದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಶಿವಮೊಗ್ಗ (Shivamogga) ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗ (Consumer Court) ಮಹತ್ವದ ತೀರ್ಪು ನೀಡಿದೆ. ಗ್ರಾಹಕರು ಆರ್ಡರ್ ಮಾಡಿದ್ದ ಟೈರ್ ಬದಲಿಗೆ ಬೇರೆ ಮಾದರಿಯ ಟೈರ್ ಕಳುಹಿಸಿದ ಫ್ಲಿಪ್‌ಕಾರ್ಟ್ (Flipkart) ಹಾಗೂ ಸಂಬಂಧಿತ ಸಂಸ್ಥೆಗಳಿಗೆ ಹಣ ಮರುಪಾವತಿ, ಮಾನಸಿಕ ಕಿರುಕುಳಕ್ಕೆ ಪರಿಹಾರ ಹಾಗೂ ದೂರುದಾರರ ಖರ್ಚು ವೆಚ್ಚ ಪಾವತಿಸುವಂತೆ ಆಯೋಗ ಆದೇಶಿಸಿದೆ.

ಶಿವಮೊಗ್ಗದ ಸಭಾ ಭವನ ರಸ್ತೆಯ ನೌಷಾದ್ ಮಂಜಿಲ್ ನಿವಾಸಿ ಮಹಬೂಬ್ ಮುದಾಸಿರ್ ಸಿ.ಎ. ಅವರು ಈ ಕುರಿತು ಗ್ರಾಹಕ ಆಯೋಗದ ಮೊರೆ ಹೋಗಿದ್ದರು.

₹2,211 ನೀಡಿ ಟೈರ್ ಬುಕ್ಕಿಂಗ್

ದೂರುದಾರರು 2025ರ ಸೆಪ್ಟೆಂಬರ್ 12ರಂದು ಫ್ಲಿಪ್‌ಕಾರ್ಟ್ ಆನ್‌ಲೈನ್ ವೇದಿಕೆಯ ಮೂಲಕ ‘GOOD YEAR KELLY 74T VFM2, 145/80/R12’ ಮಾದರಿಯ ಟೈರ್ ಅನ್ನು ಬುಕ್ ಮಾಡಿದ್ದರು. ಈ ಟೈರ್‌ಗೆ ₹2,211 ಪಾವತಿಸಲು ನಿಗದಿಯಾಗಿದ್ದು, ಗ್ರಾಹಕರು ಕ್ಯಾಶ್ ಆನ್ ಡೆಲಿವರಿ ಆಯ್ಕೆಯನ್ನು ಮಾಡಿಕೊಂಡಿದ್ದರು.

ಬುಕ್ ಮಾಡಿದ ಉತ್ಪನ್ನವನ್ನು ಸೆಪ್ಟೆಂಬರ್ 19ರಂದು ಗ್ರಾಹಕರಿಗೆ ತಲುಪಿಸಲಾಗಿತ್ತು. ಆದರೆ ಪಾರ್ಸೆಲ್ ತೆರೆಯುತ್ತಿದ್ದಂತೆ ಗ್ರಾಹಕರಿಗೆ ಅಚ್ಚರಿ ಎದುರಾಗಿತ್ತು. ಅವರು ಆರ್ಡರ್ ಮಾಡಿದ್ದ 74T ಮಾದರಿಯ ಟೈರ್ ಬದಲಿಗೆ ‘GOOD YEAR KELLY 74S VFM2, 145/80/R12’ ಎಂಬ ಬೇರೆ ಮಾದರಿಯ ಟೈರ್ ಕಳುಹಿಸಲಾಗಿತ್ತು.

ದೂರುದಾರರ ಪ್ರಕಾರ, ತಾವು ಬುಕ್ ಮಾಡಿದ್ದ ಟೈರ್ ಮತ್ತು ತಲುಪಿಸಲಾದ ಟೈರ್‌ಗಳ ಮಾದರಿಯಲ್ಲಿ ವ್ಯತ್ಯಾಸವಿದ್ದು, ಕಳುಹಿಸಲಾಗಿದ್ದ ಟೈರ್‌ನ ಬೆಲೆಯೂ ಕಡಿಮೆಯಾಗಿತ್ತು.

ತಪ್ಪಾದ ಟೈರ್ ವಾಪಸ್; ಮತ್ತೆ ಅದೇ ಮಾದರಿ!

ತಪ್ಪಾದ ಉತ್ಪನ್ನ ತಲುಪಿರುವುದನ್ನು ಗಮನಿಸಿದ ಮಹಬೂಬ್ ಮುದಾಸಿರ್ ಅವರು ಆ ಟೈರ್ ಅನ್ನು ವಾಪಸ್ ಕಳುಹಿಸಿ, ತಾವು ಬುಕ್ ಮಾಡಿದ್ದ ಸರಿಯಾದ 74T ಮಾದರಿಯ ಟೈರ್ ಅನ್ನು ನೀಡುವಂತೆ ಫ್ಲಿಪ್‌ಕಾರ್ಟ್ ಹಾಗೂ ಸಂಬಂಧಿತ ಸಂಸ್ಥೆಗಳಿಗೆ ಮನವಿ ಮಾಡಿದ್ದರು.

ಆದರೆ, ಸಮಸ್ಯೆ ಅಲ್ಲಿಗೇ ಮುಗಿಯಲಿಲ್ಲ. ವಾಪಸ್ ಪಡೆದ ಬಳಿಕವೂ ಗ್ರಾಹಕರು ಆರ್ಡರ್ ಮಾಡಿದ್ದ ಉತ್ಪನ್ನವನ್ನು ಕಳುಹಿಸುವ ಬದಲು ಮತ್ತೊಮ್ಮೆ ಅದೇ 74S ಮಾದರಿಯ ಟೈರ್ ಅನ್ನು ಕಳುಹಿಸಲಾಯಿತು ಎಂದು ದೂರಿನಲ್ಲಿ ತಿಳಿಸಲಾಗಿತ್ತು.

ಇದರಿಂದ ಅಸಮಾಧಾನಗೊಂಡ ಗ್ರಾಹಕರು ಸಂಬಂಧಿತ ಸಂಸ್ಥೆಗಳಿಗೆ ಇ-ಮೇಲ್ ಮೂಲಕ ದೂರು ಸಲ್ಲಿಸಿ, ಸಮಸ್ಯೆಯನ್ನು ಪರಿಹರಿಸುವಂತೆ ಮನವಿ ಮಾಡಿದ್ದರು. ಆದರೆ ಸೂಕ್ತ ಸ್ಪಂದನೆ ದೊರೆಯದ ಹಿನ್ನೆಲೆಯಲ್ಲಿ ಕಾನೂನು ನೋಟಿಸ್ ಕೂಡ ನೀಡಲಾಗಿತ್ತು.

Shivamogga: ಗ್ರಾಹಕ ಆಯೋಗದ ಮೊರೆ

ತಮ್ಮ ಸಮಸ್ಯೆಗೆ ಸೂಕ್ತ ಪರಿಹಾರ ಸಿಗದ ಹಿನ್ನೆಲೆಯಲ್ಲಿ ಮಹಬೂಬ್ ಮುದಾಸಿರ್ ಅವರು ಶಿವಮೊಗ್ಗ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗದ ಮೊರೆ ಹೋಗಿದ್ದರು.

ಪ್ರಕರಣದ ವಿಚಾರಣೆ ವೇಳೆ ದೂರುದಾರರು ಸಲ್ಲಿಸಿದ ದಾಖಲೆಗಳು, ಆರ್ಡರ್ ವಿವರಗಳು ಹಾಗೂ ಸಂಬಂಧಿತ ದಾಖಲೆಗಳನ್ನು ಆಯೋಗ ಪರಿಗಣಿಸಿತು. ಎರಡೂ ಕಡೆಯ ವಾದ-ವಿವಾದಗಳನ್ನು ಆಲಿಸಿದ ಬಳಿಕ, ಗ್ರಾಹಕರು ಆರ್ಡರ್ ಮಾಡಿದ್ದ ಉತ್ಪನ್ನಕ್ಕೆ ಬದಲಾಗಿ ಬೇರೆ ಮಾದರಿಯ ಟೈರ್ ಪೂರೈಸಿರುವುದು ಹಾಗೂ ಸಮಸ್ಯೆಯನ್ನು ಸಮರ್ಪಕವಾಗಿ ಪರಿಹರಿಸದಿರುವುದು ಸೇವಾ ನ್ಯೂನ್ಯತೆಗೆ ಕಾರಣವಾಗಿದೆ ಎಂದು ಆಯೋಗ ತೀರ್ಮಾನಿಸಿತು.

ಆಯೋಗದಿಂದ ಪರಿಹಾರ ಹಾಗೂ ಬಡ್ಡಿ ಆದೇಶ

ಅಧ್ಯಕ್ಷ ಟಿ. ಶಿವಣ್ಣ ಹಾಗೂ ಸದಸ್ಯ ಬಿ.ಡಿ. ಯೋಗಾನಂದ ಅವರನ್ನೊಳಗೊಂಡ ಆಯೋಗದ ಪೀಠವು ದೂರುದಾರರ ಪರವಾಗಿ ಆದೇಶ ನೀಡಿದೆ.

ಆಯೋಗದ ಪ್ರಮುಖ ಆದೇಶಗಳು ಹೀಗಿವೆ:
– ಟೈರ್‌ನ ₹2,211 ಬೆಲೆ ಮರುಪಾವತಿ: ದೂರುದಾರರು ಪಾವತಿಸಿದ ₹2,211 ಮೊತ್ತವನ್ನು 2025ರ ಅಕ್ಟೋಬರ್ 4ರಿಂದ ಶೇ. 9ರ ವಾರ್ಷಿಕ ಬಡ್ಡಿಯೊಂದಿಗೆ ಪಾವತಿಸಬೇಕು.
– ಮಾನಸಿಕ ಕಿರುಕುಳಕ್ಕೆ ₹25,000 ಪರಿಹಾರ: ಸೇವಾ ನ್ಯೂನ್ಯತೆ ಹಾಗೂ ಇದರಿಂದ ಗ್ರಾಹಕರಿಗೆ ಉಂಟಾದ ಮಾನಸಿಕ ಕಿರುಕುಳಕ್ಕಾಗಿ ₹25,000 ಪರಿಹಾರ ನೀಡಬೇಕು.
– ದೂರುದಾರರ ಖರ್ಚು ವೆಚ್ಚಕ್ಕೆ ₹10,000: ಪ್ರಕರಣ ಹೂಡಲು ಹಾಗೂ ಕಾನೂನು ಹೋರಾಟ ನಡೆಸಲು ಉಂಟಾದ ಖರ್ಚು ವೆಚ್ಚವಾಗಿ ₹10,000 ಪಾವತಿಸಬೇಕು.

ಹೀಗಾಗಿ ಬಡ್ಡಿಯನ್ನು ಹೊರತುಪಡಿಸಿ ಒಟ್ಟು ₹37,211 ಮೊತ್ತವನ್ನು ಗ್ರಾಹಕರಿಗೆ ಪಾವತಿಸುವಂತೆ ಆಯೋಗ ಆದೇಶಿಸಿದೆ.

45 ದಿನಗಳ ಗಡುವು

ಆಯೋಗದ ಆದೇಶದ ಪ್ರಕಾರ, ಮೇಲ್ಕಂಡ ಮೊತ್ತವನ್ನು ತೀರ್ಪಿನ ದಿನಾಂಕದಿಂದ 45 ದಿನಗಳ ಒಳಗಾಗಿ ದೂರುದಾರರಿಗೆ ಪಾವತಿಸಬೇಕು.

ನಿಗದಿತ ಅವಧಿಯಲ್ಲಿ ಮೊತ್ತವನ್ನು ಪಾವತಿಸದಿದ್ದರೆ, ಪಾವತಿಸಬೇಕಾದ ಒಟ್ಟು ಮೊತ್ತಕ್ಕೆ ಶೇ. 12ರ ವಾರ್ಷಿಕ ಬಡ್ಡಿ ವಿಧಿಸಲಾಗುವುದು. ಸಂಪೂರ್ಣ ಮೊತ್ತವನ್ನು ಪಾವತಿಸುವವರೆಗೆ ಈ ಬಡ್ಡಿ ಮುಂದುವರಿಯಲಿದೆ ಎಂದು ಆಯೋಗ ಎಚ್ಚರಿಕೆ ನೀಡಿದೆ.

Also Read>> ಬೇಡ್ತಿ–ಅಘನಾಶಿನಿ ಉಳಿಸಿ: ಅ.10ರ ಬೆಂಗಳೂರು ಧರಣಿಗೆ ಮಲೆನಾಡಿನ ಮಣ್ಣಿನ ಮಕ್ಕಳಿಗೆ ಸ್ವಾಮೀಜಿ ಕರೆ

ಆನ್‌ಲೈನ್ ಖರೀದಿದಾರರಿಗೆ ಮಹತ್ವದ ಸಂದೇಶ

ಈ ತೀರ್ಪು ಆನ್‌ಲೈನ್ ಮೂಲಕ ಉತ್ಪನ್ನಗಳನ್ನು ಖರೀದಿಸುವ ಗ್ರಾಹಕರ ಹಕ್ಕುಗಳ ದೃಷ್ಟಿಯಿಂದ ಮಹತ್ವ ಪಡೆದಿದೆ. ಗ್ರಾಹಕರು ಬುಕ್ ಮಾಡಿದ ಉತ್ಪನ್ನದ ಬದಲಿಗೆ ಬೇರೆ ಉತ್ಪನ್ನ ತಲುಪಿದರೆ, ಅದನ್ನು ವಾಪಸ್ ಪಡೆಯುವುದಷ್ಟೇ ಅಲ್ಲದೆ, ಸೂಕ್ತ ಉತ್ಪನ್ನವನ್ನು ಒದಗಿಸುವುದು ಅಥವಾ ಗ್ರಾಹಕರಿಗೆ ಸೂಕ್ತ ಪರಿಹಾರ ನೀಡುವುದು ಸೇವಾ ಪೂರೈಕೆದಾರರ ಜವಾಬ್ದಾರಿಯಾಗಿದೆ ಎಂಬುದನ್ನು ಈ ಪ್ರಕರಣ ಮತ್ತೊಮ್ಮೆ ಎತ್ತಿ ತೋರಿಸಿದೆ.
ಆನ್‌ಲೈನ್ ಖರೀದಿಯಲ್ಲಿ ಉತ್ಪನ್ನದ ಮಾದರಿ, ಬೆಲೆ, ಆರ್ಡರ್ ವಿವರ, ಡೆಲಿವರಿ ದಾಖಲೆಗಳು, ಇ-ಮೇಲ್ ಸಂವಹನ ಹಾಗೂ ದೂರುಗಳ ಪ್ರತಿಗಳನ್ನು ಗ್ರಾಹಕರು ಸುರಕ್ಷಿತವಾಗಿ ಇಟ್ಟುಕೊಳ್ಳುವುದು ಮುಂದಿನ ದಿನಗಳಲ್ಲಿ ಯಾವುದೇ ವಿವಾದ ಎದುರಾದಲ್ಲಿ ಸಹಾಯಕವಾಗಬಹುದು.

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news