ನಾದಬ್ರಹ್ಮದ ಮಹೋತ್ಸವಕ್ಕೆ ನಿಮ್ಮೆಲ್ಲರಿಗೂ ಆತ್ಮೀಯ ಆಹ್ವಾನ

ಕಲ್ಪ ಮೀಡಿಯಾ ಹೌಸ್  |  ವಿಶೇಷ ಲೇಖನ  |
“ಸಂಗೀತವು ಭಾಷೆಗಳನ್ನು ಮೀರಿ ಹೃದಯಗಳನ್ನು ಸಂಪರ್ಕಿಸುವ ದೈವಿಕ ಸೇತು” ಎಂಬ ಮಾತಿನಂತೆ, ಮನಸ್ಸಿನಲ್ಲಿರುವ ಭಾವನೆಗಳಿಗೆ ನಾದದ ಮೂಲಕ ರೂಪ ನೀಡುವ ಅದ್ಭುತ ಶಕ್ತಿ ಸಂಗೀತಕ್ಕಿದೆ. ಭಾರತೀಯ ಸಂಸ್ಕೃತಿಯ ಅಮೂಲ್ಯ ಪರಂಪರೆಯಾಗಿರುವ ಸಂಗೀತವು ಕೇವಲ ಮನರಂಜನೆಯ ಸಾಧನವಲ್ಲ; ಅದು ಮನಸ್ಸಿಗೆ ಶಾಂತಿ, ಆತ್ಮಕ್ಕೆ ಆನಂದ ಹಾಗೂ ಬದುಕಿಗೆ ಸೌಂದರ್ಯವನ್ನು ನೀಡುವ ಆರಾಧನೆಯ ಮಾರ್ಗವಾಗಿದೆ.

ಅಂತಹ ನಾದೋಪಾಸನೆಯ ಸುವರ್ಣ ಕ್ಷಣಗಳನ್ನು ಎಲ್ಲರೊಂದಿಗೆ ಹಂಚಿಕೊಳ್ಳುವ ಉದ್ದೇಶದಿಂದ ಶ್ರೀಗಂಧ ಸಂಸ್ಥೆ ವತಿಯಿಂದ “ನಾದ ನಿನಾದ” ಎಂಬ ಸಂಗೀತ ಕಾರ್ಯಕ್ರಮವನ್ನು ಆಯೋಜಿಸಲಾಗಿದೆ.
ಈ ನಾದ ನಿನಾದದಲ್ಲಿ ಖ್ಯಾತ ಗಾಯಕರು ಪಂ॥ ಜಯತೀರ್ಥ ಮೆವುಂಡಿ ಇವರ ಗಾನ ಸುಧೆ ಇರಲಿದೆ. ಅವರು ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತ ಲೋಕದಲ್ಲಿ ತನ್ನ ವಿಶಿಷ್ಟ ಗಾನಶೈಲಿ, ಮಧುರ ಕಂಠ ಮತ್ತು ಭಾವಪೂರ್ಣ ಪ್ರಸ್ತುತಿಗಳ ಮೂಲಕ ಅಪಾರ ಜನಮನ ಗೆದ್ದ ಗಾಯಕರು. ಕಿರಾಣಾ ಘರಾನೆಯ ಪರಂಪರೆಯನ್ನು ಅತ್ಯಂತ ಸೊಗಸಾಗಿ ಮುಂದುವರಿಸುತ್ತಿದ್ದಾರೆ. ಅಲ್ಲದೇ ಸಂಗೀತ ಕ್ಷೇತ್ರದಲ್ಲಿ ಅಪಾರ ಗೌರವ ಮತ್ತು ಖ್ಯಾತಿಯನ್ನು ಗಳಿಸಿದ್ದಾರೆ.

ಕರ್ನಾಟಕದ ಹುಬ್ಬಳ್ಳಿಯ ನೆಲದಲ್ಲಿ ಜನಿಸಿದ ಪಂ॥ ಜಯತೀರ್ಥ ಮೆವುಂಡಿ ಅವರು ಬಾಲ್ಯದಲ್ಲಿಯೇ ಸಂಗೀತಾಭ್ಯಾಸ ಆರಂಭಿಸಿ, ಅನೇಕ ಮಹನೀಯ ಗುರುಗಳ ಮಾರ್ಗದರ್ಶನದಲ್ಲಿ ತಮ್ಮ ಗಾನಯಾತ್ರೆಯನ್ನು ರೂಪಿಸಿಕೊಂಡರು. ರಾಗಗಳ ಭಾವ, ಸ್ವರಗಳ ಶುದ್ಧತೆ ಮತ್ತು ತಾಳದ ಸಮನ್ವಯವನ್ನು ಅದ್ಭುತವಾಗಿ ನಿರೂಪಿಸುವ ಅವರ ಗಾಯನ ಶೈಲಿ ಸಂಗೀತಾಸಕ್ತರನ್ನು ಮಂತ್ರಮುಗ್ಧರನ್ನಾಗಿಸುತ್ತದೆ.
ಅವರ ಗಾಯನದಲ್ಲಿ ಭಕ್ತಿ, ಭಾವ ಮತ್ತು ಆತ್ಮೀಯತೆ ಸಹಜವಾಗಿ ಮೂಡಿಬರುತ್ತದೆ. ವಿಶೇಷವಾಗಿ ಖಯಾಲ್, ಭಜನ, ಅಭಂಗ ಹಾಗೂ ದಾಸಸಾಹಿತ್ಯ ಗಾಯನಗಳಲ್ಲಿ ಅವರ ಪ್ರಸ್ತುತಿ ಶ್ರೋತೃಗಳಿಗೆ ದೈವಿಕ ಅನುಭವ ನೀಡುತ್ತದೆ.

ಭಾರತದ ಅನೇಕ ಪ್ರತಿಷ್ಠಿತ ಸಂಗೀತ ಉತ್ಸವಗಳಲ್ಲಿ ಅವರು ತಮ್ಮ ಗಾಯನದ ಮೂಲಕ ಅಪಾರ ಮೆಚ್ಚುಗೆ ಗಳಿಸಿದ್ದು, ದೇಶ–ವಿದೇಶಗಳಲ್ಲಿಯೂ ತಮ್ಮ ಗಾನ ವೈಭವವನ್ನು ಹರಡಿದ್ದಾರೆ. ಕರ್ನಾಟಕದ ಸಂಗೀತ ಪರಂಪರೆಯ ಹೆಮ್ಮೆಯ ಕಲಾವಿದರಾಗಿ ಅವರು ಗುರುತಿಸಿಕೊಂಡಿದ್ದಾರೆ. ಇವರು ಈ ಗಾನಸುಧೆಯ ಮೆರುಗು ಹೆಚ್ಚಿಸುವವರಾಗಿದ್ದಾರೆ.

ಇನ್ನು ಕೊಳಲಿನಲ್ಲಿ ವಾದ್ಯ ಸಂಗೀತದ ಮಾಂತ್ರಿಕ ಎಂದೇ ಹೇಳುವ ಪಂ॥ ಪ್ರವೀಣ್ ಗೋಡ್ಖಿಂಡಿ ಇವರು ಕಾರ್ಯಕ್ರಮದ ಮೆರುಗು ಹೆಚ್ಚಿಸಲಿದ್ದಾರೆ.
ಭಾರತೀಯ ಶಾಸ್ತ್ರೀಯ ಸಂಗೀತ ಲೋಕದಲ್ಲಿ ಕೊಳಲು ವಾದನಕ್ಕೆ ವಿಶಿಷ್ಟ ಮೆರುಗು ತಂದುಕೊಟ್ಟ ಮಹಾನ್ ಕಲಾವಿದರಲ್ಲಿ ಪಂಡಿತ್ ಪ್ರವೀಣ್ ಗೋಡ್ಖಿಂಡಿ ಅವರು ಪ್ರಮುಖರು. ತಮ್ಮ ಅದ್ಭುತ ಉಸಿರಾಟದ ನಿಯಂತ್ರಣ, ರಾಗಭಾವದ ಆಳವಾದ ಅಭಿವ್ಯಕ್ತಿ ಹಾಗೂ ಮನಮೋಹಕ ಕೊಳಲು ನಾದದ ಮೂಲಕ ಸಂಗೀತಾಸಕ್ತರ ಹೃದಯದಲ್ಲಿ ಅಚ್ಚಳಿಯದ ಸ್ಥಾನ ಪಡೆದಿದ್ದಾರೆ.

ಖ್ಯಾತ ಕೊಳಲು ವಿದ್ವಾಂಸರಾದ ಪಂಡಿತ್ ವೆಂಕಟೇಶ ಗೋಡ್ಖಿಂಡಿ ಅವರ ಪುತ್ರರಾಗಿರುವ ಪ್ರವೀಣ್ ಗೋಡ್ಖಿಂಡಿ ಅವರು ಬಾಲ್ಯದಲ್ಲಿಯೇ ಸಂಗೀತಾಭ್ಯಾಸ ಆರಂಭಿಸಿ, ತಮ್ಮ ಪರಿಶ್ರಮ ಮತ್ತು ಅಪಾರ ಪ್ರತಿಭೆಯಿಂದ ರಾಷ್ಟ್ರೀಯ ಹಾಗೂ ಅಂತರಾಷ್ಟ್ರೀಯ ಮಟ್ಟದಲ್ಲಿ ಖ್ಯಾತಿ ಗಳಿಸಿದ್ದಾರೆ. ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತ ಪರಂಪರೆಯ ಘನತೆಯನ್ನು ಉಳಿಸಿಕೊಂಡು, ಹೊಸ ತಲೆಮಾರಿಗೆ ಅದರ ಸೌಂದರ್ಯವನ್ನು ತಲುಪಿಸುವ ಕಾರ್ಯವನ್ನು ಅವರು ನಿರಂತರವಾಗಿ ಮಾಡುತ್ತಿದ್ದಾರೆ.

ಅವರ ಕೊಳಲಿನ ನಾದದಲ್ಲಿ ಭಾವ, ಭಕ್ತಿ ಮತ್ತು ಭಾವನಾತ್ಮಕ ಮಧುರತೆ ಒಂದೇ ವೇಳೆ ಮೂಡಿಬರುತ್ತದೆ. ರಾಗಗಳ ಸೂಕ್ಷ್ಮತೆಯನ್ನು ಸುಲಭವಾಗಿ ಶ್ರೋತೃಗಳ ಮನಸ್ಸಿಗೆ ತಲುಪಿಸುವ ಅವರ ಶೈಲಿ ಸಂಗೀತ ಲೋಕದಲ್ಲಿ ವಿಶಿಷ್ಟವಾಗಿದೆ. ವೇದಿಕೆ ಮೇಲೆ ಅವರ ಪ್ರದರ್ಶನ ಆರಂಭವಾದ ಕ್ಷಣದಿಂದಲೇ ಪ್ರೇಕ್ಷಕರು ಮತ್ತೊಂದು ಸಂಗೀತ ಲೋಕಕ್ಕೆ ಪ್ರವೇಶಿಸಿದ ಅನುಭವ ಪಡೆಯುತ್ತಾರೆ.

ಶಾಸ್ತ್ರೀಯ ಸಂಗೀತ ಮಾತ್ರವಲ್ಲದೆ ಚಲನಚಿತ್ರ ಸಂಗೀತ, ಫ್ಯೂಷನ್ ಸಂಗೀತ ಹಾಗೂ ವಿವಿಧ ಸಂಗೀತ ಪ್ರಯೋಗಗಳಲ್ಲಿಯೂ ಅವರು ತಮ್ಮ ವೈಶಿಷ್ಟ್ಯವನ್ನು ಮೆರೆದಿದ್ದಾರೆ. ಅನೇಕ ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ವೇದಿಕೆಗಳಲ್ಲಿ ತಮ್ಮ ಕೊಳಲು ವಾದನದ ಮೂಲಕ ಭಾರತೀಯ ಸಂಗೀತದ ಘನತೆಯನ್ನು ಜಗತ್ತಿಗೆ ಪರಿಚಯಿಸಿದ್ದಾರೆ. ಈ ಕಾರ್ಯಕ್ರಮದಲ್ಲಿ ಗೋಡ್ಖಿಂಡಿ ಅವರ ಕೊಳಲು ವಾದನ ಸಂಗೀತಾಸಕ್ತರಿಗೆ ಅಪರೂಪದ ಅನುಭವವಾಗಲಿದೆ. ಅವರ ನಾದದ ಮಧುರತೆ ಈ ಸಂಗೀತ ಸಂಜೆಗೆ ವಿಶೇಷ ಕಳೆ ನೀಡಲಿದೆ. ಈ ಕಾರ್ಯಕ್ರಮವು ಶಿವಮೊಗ್ಗದ ಸಾಂಸ್ಕೃತಿಕ ವಾತಾವರಣಕ್ಕೆ ಹೊಸ ಮೆರುಗು ತರುವಂತೆ ಆಗುತ್ತದೆ.
ಸಂಗೀತದ ಸ್ವರಗಳಲ್ಲಿ ಭಾವಗಳ ಸುಂದರ ಲೋಕವನ್ನು ಕಾಣುವ ಅವಕಾಶ ಈ ಕಾರ್ಯಕ್ರಮದಲ್ಲಿ ದೊರೆಯಲಿದೆ. ನಾದದ ನುಡಿಗಳಲ್ಲಿ ಮನಸ್ಸು ಕರಗುವಂತಹ ಅನುಭವವನ್ನು ನೀಡಲಿದೆ.

ಸಂಗೀತಪ್ರಿಯರು, ಸಾಹಿತ್ಯಾಸಕ್ತರು, ಕಲಾಭಿಮಾನಿಗಳು ಹಾಗೂ ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಮೌಲ್ಯ ನೀಡುವ ಪ್ರತಿಯೊಬ್ಬರೂ ಕುಟುಂಬ ಸಮೇತರಾಗಿ ಆಗಮಿಸಿ ಕಾರ್ಯಕ್ರಮದ ಯಶಸ್ಸಿಗೆ ಕೈಜೋಡಿಸಬೇಕಾಗಿ ಆತ್ಮೀಯ ವಿನಂತಿಯನ್ನು ಸಪ್ತಸ್ವರ ಹಿಂದೂಸ್ತಾನಿ ಸಂಗೀತ ಸಭಾದ ಸಹಗದೊಂದಿಗೆ ಶ್ರೀಗಂಧ ಸಂಸ್ಥೆಯ ಅಧ್ಯಕ್ಷರಾದ ಮಾನ್ಯ ಈಶ್ವರಪ್ಪನವರು ಎಲ್ಲ ಕಲಾಭಿಮಾನಿಗಳಲ್ಲಿ ವಿನಂತಿಸಿಕೊಂಡಿದ್ದಾರೆ. ನಿಮ್ಮ ಉಪಸ್ಥಿತಿಯೇ ಕಲಾವಿದರಿಗೆ ಪ್ರೇರಣೆ, ಕಾರ್ಯಕ್ರಮಕ್ಕೆ ಶೋಭೆ ಮತ್ತು ಆಯೋಜಕರಿಗೆ ಸಂತೋಷವಾಗಲಿದೆ. ಬನ್ನಿ ಸ್ವರಗಳ ಸುಮಧುರತೆಯಲ್ಲಿ ತೇಲೋಣ…

ನಾದಬ್ರಹ್ಮದ ಆರಾಧನೆಯಲ್ಲಿ ಒಂದಾಗೋಣ… ಈ ಕಾರ್ಯಕ್ರಮ ನಾಳೆ ಸಂಜೆ ಅಂದರೆ ದಿನಾಂಕ: 17 ಮೇ 2026, ಭಾನುವಾರ, ಸಂಜೆ 6.00 ಗಂಟೆಗೆ ನಗರದ ಕುವೆಂಪು ರಂಗಮಂದಿರದಲ್ಲಿ ಆಯೋಜನೆಯಾಗಿದೆ.

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news