ಕಲ್ಪ ಮೀಡಿಯಾ ಹೌಸ್ | ವಿಶೇಷ ಲೇಖನ |
ಕ್ರಿಕೆಟ್ #Cricket ಎನ್ನುವುದು ನಮ್ಮ ಪಾಲಿಗೆ ಕೇವಲ ಆಟವಲ್ಲ, ಅದೊಂದು ಭಾವನೆ. ಮೈದಾನದಲ್ಲಿ ಹೊಡೆಯುವ ಪ್ರತಿ ಸಿಕ್ಸರ್, ಬೀಳುವ ಪ್ರತಿ ವಿಕೆಟ್ ನಮ್ಮ ಎದೆಯ ಬಡಿತವನ್ನು ಹೆಚ್ಚಿಸುತ್ತದೆ. ಆದರೆ, ಈ ಕ್ಷಣಿಕ ಮನರಂಜನೆಯ ಅಮಲಿನಲ್ಲಿ ನಾವು ನಮ್ಮ ಅಮೂಲ್ಯವಾದ ಬದುಕನ್ನೇ ಪಣಕ್ಕಿಡುತ್ತಿದ್ದೇವೆಯೇ? ಒಮ್ಮೆ ಯೋಚಿಸಿ.
ಕ್ಷಣಿಕ ಆಸೆ, ಶಾಶ್ವತ ಕಣ್ಣೀರು
ನೀವು ಹಾಕುವ ಒಂದು ಬೆಟ್ಟಿಂಗ್ ಹಣ ಕೇವಲ ಕಾಗದದ ಚೂರುಗಳಲ್ಲ; ಅದು ನಿಮ್ಮ ತಂದೆಯ ಬೆವರಿನ ಹನಿ, ತಾಯಿಯ ಅಕ್ಕರೆಯ ಉಳಿತಾಯ, ನಿಮ್ಮ ಮಕ್ಕಳ ಉಜ್ವಲ ಭವಿಷ್ಯದ ಕನಸು. ಟಿವಿಯಲ್ಲಿ ಕಾಣುವ ಪಂದ್ಯಕ್ಕೂ, ವಾಸ್ತವಕ್ಕೂ ಸುಮಾರು 1 ರಿಂದ 2 ನಿಮಿಷಗಳ ಕಾಲ ವ್ಯತ್ಯಾಸವಿರುತ್ತದೆ (Delay). ಆ ಎರಡು ನಿಮಿಷಗಳಲ್ಲಿ ನಿಮ್ಮ ಹಣವನ್ನು ದೋಚುವ ಮಾಫಿಯಾ ಹದ್ದಿನ ಕಣ್ಣಿನಿಂದ ಕಾಯುತ್ತಿರುತ್ತದೆ. ಸೋಲು ಖಚಿತವೆಂದು ತಿಳಿದೂ ಮೋಹಕ್ಕೆ ಬಿದ್ದು ಹಣ ಕಳೆದುಕೊಂಡರೆ, ಕೊನೆಗೆ ಉಳಿಯುವುದು ಬರಿದಾದ ಜೇಬು ಮತ್ತು ತುಂಬಿದ ಕಣ್ಣುಗಳು ಮಾತ್ರ.
ಮನೆ ಮಠ ಕಳೆದುಕೊಳ್ಳಬೇಡಿ
ಬೆಟ್ಟಿಂಗ್ ಎನ್ನುವುದು ಜೇಡರ ಬಲೆಯಂತೆ. ಒಮ್ಮೆ ಸಿಲುಕಿದರೆ ಅದರಿಂದ ಹೊರಬರುವುದು ಅಸಾಧ್ಯ. ಗೆದ್ದಾಗ ಬರುವ ಆಸೆ, ಸೋತಾಗ ಅದನ್ನು ಮರಳಿ ಪಡೆಯಬೇಕೆಂಬ ಹಠ ನಿಮ್ಮನ್ನು ಸಾಲದ ಸುಳಿಗೆ ದೂಡುತ್ತದೆ. ಬೀದಿಗೆ ಬಿದ್ದ ಎಷ್ಟೋ ಕುಟುಂಬಗಳು, ಆತ್ಮಾಹುತಿ ಮಾಡಿಕೊಂಡ ಎಷ್ಟೋ ಜೀವಗಳು ನಮ್ಮ ಕಣ್ಣ ಮುಂದಿವೆ. ನೆನಪಿಡಿ, ಕ್ರಿಕೆಟಿಗರು ಮೈದಾನದಲ್ಲಿ ಆಡಿ ಕೋಟಿ ಗಳಿಸುತ್ತಾರೆ, ಆದರೆ ನೀವು ಬೆಟ್ಟಿಂಗ್ ಆಡಿ ಮನೆಯಲ್ಲಿದ್ದ ಅಲ್ಪಸ್ವಲ್ಪವನ್ನೂ ಕಳೆದುಕೊಂಡು ಬೀದಿಗೆ ಬರುತ್ತೀರಿ.
ಕಾನೂನಿನ ಕೈಗಳು ಕಠಿಣ
ಮನರಂಜನೆಯ ಹೆಸರಿನಲ್ಲಿ ಮಾಡುವ ಈ ಜೂಜಾಟ ಕೇವಲ ಆರ್ಥಿಕ ನಷ್ಟವಲ್ಲ, ಅದೊಂದು ಕಾನೂನು ಬಾಹಿರ ಕೃತ್ಯ. ಸಿಕ್ಕಿಬಿದ್ದರೆ ಸಮಾಜದಲ್ಲಿ ನಿಮ್ಮ ಗೌರವ ಮಣ್ಣು ಪಾಲಾಗುತ್ತದೆ, ಜೈಲು ಶಿಕ್ಷೆಯ ಕಳಂಕ ನಿಮ್ಮ ಬದುಕನ್ನು ಕಪ್ಪಾಗಿಸುತ್ತದೆ. ನಿಮ್ಮ ಒಂದು ತಪ್ಪು ನಿರ್ಧಾರದಿಂದ ಇಡೀ ಕುಟುಂಬ ಸಮಾಜದ ಮುಂದೆ ತಲೆತಗ್ಗಿಸಿ ನಿಲ್ಲುವಂತಾಗಬಾರದು.
ಕೊನೆಯ ಮಾತು:
ಪಂದ್ಯವನ್ನು ಪಂದ್ಯವಾಗಿ ನೋಡಿ ಆನಂದಿಸಿ. ಆಟಗಾರರ ಕೌಶಲಕ್ಕೆ ಚಪ್ಪಾಳೆ ತಟ್ಟಿ. ಆದರೆ ಗೆಲುವಿನ ಮೇಲೆ ಹಣ ಕಟ್ಟಿ ನಿಮ್ಮ ಮನೆಯ ಶಾಂತಿಯನ್ನು ಬಲಿ ಕೊಡಬೇಡಿ. ನಿಮ್ಮ ತಾಯಿ ಕಾಯುತ್ತಿರುವುದು ನಿಮ್ಮ ಗೆಲುವಿಗಾಗಿ ಅಲ್ಲ, ನೀವು ನೆಮ್ಮದಿಯಿಂದ ಮನೆಗೆ ಬರುವುದಕ್ಕಾಗಿ.
ಲೇಖನ.ಸತೀಶ ಶೆಟ್ಟಿ ಚೇರ್ಕಾಡಿ ದೊಡ್ಡಮನೆ
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news 
