ನಮ್ಮ ಕುಟುಂಬದ ರಕ್ಷಣೆ ನಮ್ಮ ಕೈಯಲ್ಲಿದೆ

ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ

ಕುಟುಂಬ ಎಂಬ ಪರಿಕಲ್ಪನೆಯು ತುಂಬಾ ಪವಿತ್ರವಾದುದು. ಕುಟುಂಬ ಎಂಬ ಪರಿಕಲ್ಪನೆ ಇಲ್ಲದೇ ಹೋಗಿದ್ದರೆ ಈ ಜಗತ್ತನ್ನು ಊಹಿಸಿಕೊಳ್ಳಲೂ ಸಾಧ್ಯವಿಲ್ಲ. ಹೀಗಾಗಿ ಕುಟುಂಬ ಎಂಬ ಪದವು ತನ್ನದೇ ಆದ ಮಹತ್ವ ಮತ್ತು ಮೌಲ್ಯವನ್ನು ಹೊಂದಿದೆ. ಮೇ 14 ನೇ ದಿನಾಂಕವನ್ನು ಅಂತಾರಾಷ್ಟ್ರೀಯ ಕುಟುಂಬ ದಿನ ಎಂಬುದಾಗಿ ಆಚರಿಸಲಾಗುತ್ತದೆ. ಶಾಂತಿ, ಸಂಯಮ, ಪ್ರೀತಿ ಮುಂತಾದ ಹಾದಿಯಲ್ಲಿ ನಾವು ಸಾಗಬೇಕಿದ್ದರೆ ಕುಟುಂಬದ ತಳಪಾಯ ಅತೀ ಅಗತ್ಯವಾಗಿದೆ.

ಕೊರೋನಾ ಮಹಾಮಾರಿಯ ಪರಿಣಾಮದಿಂದ ಎಲ್ಲೆಲ್ಲೋ ಇದ್ದ ಕುಟುಂಬದ ಸದಸ್ಯರು ಈಗ ಒಂದೇ ಸೂರಿನಡಿಯಲ್ಲಿ ಸೇರಿದ್ದಾರೆ. ಅಲ್ಲದೇ ಹಲವಾರು ಹಬ್ಬಗಳನ್ನು ಮಿಸ್ ಮಾಡಿಕೊಳ್ಳುತ್ತಿದ್ದವರು ಇಂದು ಕುಟುಂಬ ಸದಸ್ಯರ ಜೊತೆ ಸೇರಿ ಸರಳವಾಗಿ ಹಬ್ಬಗಳನ್ನು ಆಚರಿಸುತ್ತಾ ಆರೋಗ್ಯವಾಗಿ ಇದ್ದಾರೆ. ಇದೆಲ್ಲವೂ ಕಾಲದ ಮಹಿಮೆ. ಮನೆ ಮಂದಿ ಜೊತೆ ಬೆರೆಯಲು ಟೈಮ್ ಸಿಕ್ತಾ ಇಲ್ಲ ಎನ್ನುತ್ತಿದ್ದವರಿಗೆ ಸಮಯ ಬೇಕಾದಷ್ಟು ಸಿಗುತ್ತಿದೆ.

ಪ್ರಸ್ತುತ ಪರಿಸ್ಥಿತಿಯಲ್ಲಿ ನಮ್ಮ ಕುಟುಂಬದ ರಕ್ಷಣೆ ನಮ್ಮ ಕೈಯಲ್ಲೇ ಇದೆ. ಹೌದು, ಕೊರೋನಾ ಮಹಾಮಾರಿಯು ತನ್ನ ಸ್ವರೂಪವನ್ನು ತೋರಿಸುತ್ತಿದೆ. ಅದೆಷ್ಟೋ ಜನರನ್ನು ಈಗಾಗಲೇ ಬಲಿ ತೆಗೆದುಕೊಂಡಿದೆ. ಒಬ್ಬ ವ್ಯಕ್ತಿಗೆ ತಗುಲಿದ ವೈರಸ್ ಆ ವ್ಯಕ್ತಿಯ ಕುಟುಂಬದವರಿಗೂ ಹರಡಿ, ಒಂದೇ ಕುಟುಂಬದ ವ್ಯಕ್ತಿಗಳು ಸಾವಿಗೀಡಾದ ಪ್ರಕರಣಗಳೂ ನಡೆದಿವೆ. ಹೀಗಾಗಿ ಕೊರೊನಾ ಹಾವಳಿಯಿಂದ ನಮ್ಮ ಕುಟುಂಬವನ್ನು ನಾವು ಉಳಿಸಿಕೊಳ್ಳಲೇ ಬೇಕಾಗಿದೆ.
ಇದಕ್ಕಾಗಿ ನಾವು ಲಾಕ್ ಡೌನ್ ನಿಯಮವನ್ನು ಪಾಲಿಸಲೇಬೇಕು. ನಮಗಾಗಿ ಹಾಗೂ ನಮ್ಮವರಿಗಾಗಿ, ನಾವು ಕೊರೊನಾ ವಿರುದ್ಧ ಹೋರಾಡಬೇಕಾಗಿದೆ. ಅನಗತ್ಯವಾಗಿ ಹೊರ ಹೋಗುವುದನ್ನು ನಿಲ್ಲಿಸಬೇಕು. ಅಗತ್ಯವಿದ್ದರೆ ಮಾತ್ರಾ ಹೊರಗೆ ಹೋಗಬೇಕು. ಹೋಗುವಾಗ ಮಾಸ್ಕ್‌ ಧರಿಸಿಕೊಂಡೇ ಹೋಗಬೇಕು. ಸಾಮಾಜಿಕ ಅಂತರವನ್ನು ಕಾಯ್ದುಕೊಳ್ಳಬೇಕು. ಇಲ್ಲವಾದಲ್ಲಿ ನಮಗೂ ನಮ್ಮ ಕುಟುಂಬದವರಿಗೂ ತೊಂದರೆ ತಪ್ಪಿದ್ದಲ್ಲ.

ವಿದೇಶದಿಂದ ಬಂದಿರುವವರು, ರೋಗ ಲಕ್ಷಣ ಉಳ್ಳವರು ಕ್ವಾರಂಟೈನ್ ವಿಧಾನವನ್ನು ಪಾಲಿಸಬೇಕು. ನಿರ್ಲಕ್ಷ್ಯ ತೋರಿದರೆ ಕೊರೊನಾ ವಿರುದ್ಧದ ಯುದ್ಧದಲ್ಲಿ ಆಟಕ್ಕೂ ಮುಂಚೆ ಸೋತಂತೆಯೇ. ಕೊರೊನಾ ವೈರಸ್‌ನಿಂದ ಬಚಾವಾಗಲು ವೈದ್ಯಕೀಯ ಸಲಹೆಗಳನ್ನು ಪಾಲಿಸುವುದು ಮುಖ್ಯವಾಗುತ್ತದೆ. ಜೊತೆಗೆ ನಮಗೆ ಕೊರೊನಾ ಬರುವುದೂ ಬೇಡ, ನಮ್ಮಿಂದ ಇತರರಿಗೆ ಹರಡುವುದೂ ಬೇಡ ಎಂಬ ಸಿದ್ಧಾಂತವನ್ನು ಅನುಸರಿಸೋಣ. ಕೊರೊನಾ ನಮ್ಮ ರಾಷ್ಟ್ರವನ್ನು, ವಿಶ್ವವನ್ನು ಬಿಟ್ಟು ಹೋಗುವವರೆಗೂ ಕೊರೊನಾ ವಿರುದ್ಧ ಯುದ್ಧ ಮಾಡೋಣ.

ನಮ್ಮ ಕುಟುಂಬವು ಕೊರೋನಾದಿಂದ ಮುಕ್ತವಾದರೆ ಉಳಿದ ಕುಟುಂಬವೂ ಕೊರೋನಾ ಮುಕ್ತವಾದಂತೆ. ಆಗ ರಾಷ್ಟ್ರವೇ ಕೊರೊನಾ ಮಾರಿಯಿಂದ ಪಾರಾಗುತ್ತದೆ. ಎಲ್ಲಾ ಕೊರೊನಾ ವಾರಿಯರ್ಸ್‌ಗಳಿಗೂ ಹಾಗೂ ತಮ್ಮ ತಮ್ಮ ಕುಟುಂಬದ ಬಗ್ಗೆ ಕಾಳಜಿ ವಹಿಸೋ ಎಲ್ಲರಿಗೂ ಅಂತಾರಾಷ್ಟ್ರೀಯ ಕುಟುಂಬ ದಿನದ ಶುಭಾಶಯಗಳು.

ದ್ವಿತೀಯ ಬಿ.ಎ.
ವಿವೇಕಾನಂದ ಪದವಿ ಕಾಲೇಜು ಪುತ್ತೂರು