ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ
ಅಮ್ಮ ನಾನು ಚಿಕ್ಕವಳಾಗಿದ್ದಾಗ ನಿನ್ನೆದೆಗೆ ಒದ್ದು ಸಂಭ್ರಮಿಸಿದ್ದೆ ಆಗ ನೀನು ನನ್ನ ಮುದ್ದಾಡಿ ಚುಂಬಿಸಿದ್ದೆ ನೆನಪಿದೆಯಾ ನಿನಗೆ! ಈಗಲೂ ನಾನು ನಿನ್ನ ಮಡಿಲಲ್ಲಿ ಮಲಗಿ ನಿದ್ರಿಸುತ್ತಿರುವೆ ಯಾಕೋ ಎಚ್ಚರವಿಲ್ಲದ ನಿದ್ರೆಗೆ ಜಾರಿದೆ ಅನಿಸುತ್ತಿದೆ ಆದರೇನಂತೆ ನಿನ್ನೊಡಲು ನನಗಲ್ಲದೇ ಪರರಿಗೆ ಬಿಟ್ಟುಕೊಡಲೇ.
ನನ್ನ ಕೈ ಹಿಡಿದು ನಡೆಸಿ, ಕೈತುತ್ತನಿಟ್ಟ ನಿನಗೆ ನನ್ನ ಮೇಲೆ ಹೆಮ್ಮೆ ಇರುವಾಗ ನನಗೆ ಇನ್ಯಾವ ಭಾಗ್ಯ ಬೇಕು ಹೇಳು. ನಾಡು ಸಂಭ್ರಮಿಸುವ ಮಗನಾಗು ಎಂದು ಆಗಾಗ ಬುದ್ದಿ ಹೇಳುತ್ತಿದ್ದೆಯಲ್ಲ ಈಗ ನೋಡು ಜಗವೆ ಸಂಭ್ರಮಿಸುತ್ತಿದೆ ಎಷ್ಟಾದರೂ ನಾನು ನಿನ್ನ ಮಗನಲ್ಲವೇ. ಎಡವಿದಾಗ ಅಮ್ಮಾ! ಸಣ್ಣ ಗಾಯವಾದಗ ಅಮ್ಮಾ! ಎಂದು ನೋವಾಗದಿದ್ದರು ಗಂಟಲು ಹರಿಯುವಂತೆ ಕೂಗುತ್ತಿದ್ದೆ. ಅದೆಲ್ಲಿರುತ್ತಿದ್ದೆಯೋ ಓಡೋಡಿ ಬಂದು ನನಗಿಂತ ಹೆಚ್ಚು ನೋವಾಗಿರುವಳಂತೆ ಅಳುತ್ತಿದ್ದೆ. ಇಂದು ನಿನ್ನೊಡಲ ನೋವನ್ನೇಕೆ ಬಚ್ಚಿಟ್ಟು ನಗುತಿರುವೆ ಹೆಮ್ಮೆಯಿಂದಲೋ ಅಥವಾ ನನ್ನ ನೋವ ನಾನು ಹೇಳದೆ ಮಲಗಿರುವೆ ಎಂದು ಕೋಪದಿಂದಲೋ?
ಅಮ್ಮ ನಾನು ಶಾಶ್ವತ ಚಿರನಿದ್ರೆಗೆ ಹೋದರೆ ಏನು ಮಾಡುತ್ತೀಯಾ ಎಂದು ಕೇಳಿದಾಗ ಈ ಕೆನ್ನೆಗೆ ಹೊಡೆದು ಅಪ್ಪಿಕೊಂಡಿದ್ದೆಯಲ್ಲ ಈಗಲೂ ಕೊನೆಯ ಬಾರಿ ಅಪ್ಪಿ ಮುದ್ದಾಡುವೆಯ ನಿನ್ನೊಡಲ ಹೂವಾಗಿ ಹೀಗೆ ಮಲಗಿಬಿಡುವೆ ಎಂದು ಏಳದಂತೆ.
ಅಮ್ಮ ಇಲ್ಲಿ ಕೊರೆಯುವ ಚಳಿಯಮ್ಮ ಹೊದ್ದು ಮಲಗಲು ನಿನ್ನ ಒಡಲು ಇಲ್ಲ. ಆಗ ಒಮ್ಮೊಮ್ಮೆ ಬಿಕ್ಕುತ್ತಿದ್ದೆ ಯಾರಾದರೂ ನಕ್ಕಾರು ಎಂದು ಯಾವುದೋ ಗುಡಾರದ ಹಿಂದೆ ಹೋಗಿ! ಹಸಿವಾದಾಗಲೆಲ್ಲಾ ನಿನ್ನ ಕೈತುತ್ತ ರುಚಿ ಮನವನ್ನು ಅಪಾರವಾಗಿ ಕಾಡುತ್ತಿತ್ತು. ಅದ್ಯಾಕೊ ಗೊತ್ತಿಲ್ಲ ನಿನಗ್ಯಾರಾದರು ಅಂದರೆ ಈ ಮನ ಹಸಿವನ್ನೆ ಒತ್ತೆ ಇಟ್ಟು ಕಾದಾಡಬೇಕು ಎಂದು ಅನಿಸಿಬಿಡುತ್ತಿತ್ತು ನನಗೆ. ಯಾಕೋ ಕಾಣೆ ಅಮ್ಮ ಇಂದು ನಿನ್ನ ತುಂಬಾ ನೆನಪಾಗುತಿದೆ ನಾನಾಡಿದ ಭಾರತ ನೆಲ, ನಾ ಕುಡಿದ ಗಾಳಿ, ನನ್ನ ಸ್ಪರ್ಶಿಸಿದ ಶ್ರೀಗಂಧದ ಮರ, ನಾನಾಡಿದ ಗಂಗೆಯ ನೀರಾಟ ಎಲ್ಲಾವೂ ಇಂದು ಶೂನ್ಯವೇ ಎನಿಸುತ್ತಿದೆ. ಬದುಕು ಇಷ್ಟೆನಾ ಎಂದು ಕೂಡ ಅನಿಸುತ್ತಿದೆ, ನೋವಾಗುತ್ತಿದೆ ಅಮ್ಮ ನನಗೆ ನನ್ನ ಜೊತೆ ನನ್ನಿಬ್ಬರು ಸಹೋದರು ಕುಳಿತು ಅಳುತ್ತಿದ್ದರು ನಮ್ಮ ಅಳಲ ಆಲಿಸಲು ಇನ್ನೂ ಹಲವಾರು ಆತ್ಮೀಯರು ಒಂದಾದರು ನಿನ್ನ ಮಡಿಲನ್ನೆ ಸೇರಿಬಿಟ್ಟರು.
ಇದು ನನ್ನ ನೆಲವಮ್ಮ ನಿನ್ನ ಎದೆಹಾಲಿನ ಶಕ್ತಿ ಇದು. ತಾಯಿಗೆ ಏನಾದರು ಅಂದರೆ ಸಹಿಸದ ನಮ್ಮ ನಾಡಿನ ಜನತೆ ದೇಶಕ್ಕೇನಾದರು ಅಂದರೆ ಸಹಿಸುತ್ತಾರಾ ಹೇಳಿ. ಹೋಗಲಿ ಬಿಡಮ್ಮ ನನ್ನ ಪುಟ್ಟ ಕಂದಮ್ಮ ಹೇಗಿದ್ದಾನೆ! ಮುದ್ದು ಕೂಸು ನಮ್ಮನೆಯ ವರಲಕ್ಷ್ಮೀ ನನ್ನ ನೆನೆಯುತ್ತಾಳಾ! ನನ್ನರಸಿ ರಾಧೆ ನನಗಾಗಿ ಅದೇಷ್ಟೂ ಹಂಬಲಿಸುತ್ತಾಳೇನೋ ಅಲ್ಲವೇ! ಅಮ್ಮ ನೀನಂತೂ ನನಗಾಗಿ ಬೆಲ್ಲದ ಪಾಯಸ ಮಾಡಿ ಬಡಿಸಲೆಂದೆ ಕಾದಿರುವೆ ಅನಿಸುತ್ತಿದೆ ಅಲ್ಲವೇ ನಾನೀಗ ಹೊರಟಿದ್ದೇನೆ ಅಮ್ಮ ಎಂದು ಬಾರದ ಲೋಕಕ್ಕೆ, ಇಂದು ನನಗಾಗಿ ಕೋಟಿ ತಾಯಂದಿರು ಕಾಯುತ್ತಿದ್ದಾರೆ ಅನಿಸುತ್ತಿದೆ. ಓಡೋಡಿ ಬಂದು ಅಪ್ಪಿಕೊಳ್ಳಲೇ ನಿನ್ನ ಮಗನೆಂದು ಸಂಭ್ರಮಿಸಿಬಿಡು.
ಹಾ..! ಅಮ್ಮಾ ನೋವಾಗುತ್ತಿದೆ ಗಟ್ಟಿಯಾಗಿ ಈ ಕೈಗಳನ್ನು ಒತ್ತಬೇಡ ನನ್ನ ಗೆಳೆಯನೊಂದಿಗೆ ಹೀಗೆ ಚಿಕ್ಕ ಜಗಳವಾದಾಗ ಕಲ್ಲಿನಿಂದ ಹೊಡೆದುಬಿಟ್ಟ, ತಂತಿಯ ಮುಳ್ಳುಗಳನ್ನು ತರಚಿಬಿಟ್ಟ ಇದು ಚಿಕ್ಕ ಗಾಯ ಅಷ್ಟೇ. ಅಮ್ಮ ನನ್ನ ತಮ್ಮಂದಿರು ಅವನನ್ನು ಬಿಟ್ಟಾರೆ ಹೇಳು ನೋಡೋಣ ನೀನ್ಯಾಕೆ ಅಳುತ್ತಿರುವೆ ನಿನ್ನ ಮಗನ ಮುಖ ಸರಿಯಾಗಿ ಕಾಣುತ್ತಿಲ್ಲ ಎಂದಾ. ಹೇ ಹುಚ್ಚು ಅಮ್ಮ ನಿನ್ನ ಹೃದಯದಲ್ಲಿ ನನ್ನ ಮೊಗವನ್ನೆ ಹಚ್ಚೆ ಹಾಕಿಸಿಕೊಂಡಾಗ ನನ್ನ ಮೊಗದ ಸೊಬಗು ಬೇರೆಲ್ಲರಿಗೂ ತೋರಿಸಲೇಬೇಕು ಎಂಬ ಹಠ ನಿನಗೆ ಯಾಕೆ. ಅಮ್ಮ ನಾನು ಎಂದಿಗೂ ನಿನ್ನವನೆ ಅದೇನೇ ಆದಾರು ಈ ನಾಡನ ತುಡಿತಕ್ಕಾದರು ಮತ್ತೆ ನಿನ್ನೊಡಲಲಿ ಹುಟ್ಟಿ ಬರುವೆ,
ಹಾ! ಅವಳಿಗೂ ಹೇಳಿಬಿಡು ಅತ್ತರೆ ನನಗೆ ಕೋಪ ಬರುತ್ತದೆ ಎಂದು. ಮಗನ ತುಂಟಾಟ, ಮಗಳ ಮುದ್ದಾದ ನೋಟದಲ್ಲಿ ನಾನಿರುವೆ ಎಂದು ಬೈದು ಬುದ್ದಿಹೇಳು ಮತ್ತೆ ನನ್ನ ಮಗನನ್ನು ನಾನಿಲ್ಲೇ ನೋಡಲು ಬಯಸುತ್ತೇನೆ ಎಂದು ಕೂಡ ಹೇಳಿ ಬಿಡು. ಅಮ್ಮ ನಾನು ನಿನ್ನೊಡಲಲಿ ಹೀಗೆ ಮಲಗಿ ಬಿಡಲೇ ಎಂದು ಏಳದಂತೆ. ಸದಾ ನಿನ್ನ ಲಾಲಿ ಪದವೇ ನನಗೆ ಸಾಕು.
Get In Touch With Us info@kalpa.news Whatsapp: 9481252093
