ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ
ಕೊಟ್ಟು ಕೊತ್ತಲಿಗೆ ಪರ ಪಿಕ್ಕಾಸ್.ಕಡ್ಪರೆಗ್ ಕಡ್ಪಕತ್ತಿ.ಕೆತ್ತ್‌ದ್ ಕುದ್ಪ‌ರೆಗ್ ರಡ್ಡರುತ ಮಲ್ಲ ಬಿಸತಿ. ಮಡುಕುಡರಿ ಕರ್ಬದ ಸರಪೊಲಿ. ಪಜ್ಜಿ ಮರನ್ ಸಿಗಿತ್‌ದ್ ಮಲ್ತಿನ ದುನ್ನದಿಂಜಿನ ಬಡು ದೋಂಟೆಲೆನ್ ಕೈ ಬಲಕ್ ಬಲಟ್ ಪತ್ತೊಂದು ಬಿರ್ದ್‌ಡ್ ಬೀಸ ಬೀಸಡ್ ಪಜ್ಜೆದೀವೊಂದು ‘ದರಬರ ಬರಬರ’ ಸಬುದೊನು ಲಕ್ಕಾವೊಂದು ಪಜ್ಜೆಗ್ ತಿಕ್ಕಿ ಪಾಡಿ ಸಾದಿದ ಪುದೆಲ್ ಬಲ್ಲೆನ್ ಪೊಡಿರಟ್ಟಾವೊಂದು ಪಾರ್‌‌‌‌ದ್ ಬರೊಂದುಲ್ಲೆರ್ ಪತ್ತ್ ನಲ್ಪ ಜನಮಂದೆಲು ಅಲ್ಪಲ್ಪ ಪಸರೊಂದು. ಮುಲ್ಲು ಬಲ್ಲೆ ಪುದೆಲ್ ಮಲ್ಲ ಮಲ್ಲ ಮರೊಕುಲೆನ ಬೂರುದುಲಯಿ ನೂರ್‌ದ್ ಮುದೆಲ್‌ದ ಪಿರವುಡ್ ದೆಂಗ್‌ದ್ ಬಲಕೈ ಮಣ್ಣ್‌ಗ್ ಊರ್ದ್ ತರೆ ಬಗ್ಗಾದ್ ಪಿಲಿಕಣ್ಣ್ ಮಲ್ತೊಂದು ಕೈ ಕಾರ್‌ನ್ ಅಂಚಿಂಚಿ ಪಂದಾವೊಂದು ಪಿರದುಂಬು ಕಂಡ್‌ದ್ ತೂವೊಂದು ನಾಡೊಂದುಲ್ಲೆರ್ ಕಾಡ್‌ದರಸೆ ತಂಕ ಪಂಥ ದೈರ್ಯೊಗ್ ಪುದರ್ ಪೋತಿನ ಪಿರಣಿ ಪಿಲಿರಾಜೆ ಬೋಂಟೆಗ್ ಪಿದಡಿಲೆಕ್ಕ. ಬಂಜಿದ ಬಡವುಗಾದ್ ಕಾಡ್‌ದ ಕೊಡಿ ಅಡಿಟ್ ಪಿಲಿರಾಜೆ ಒರಿಯೇ ಬೋಂಟೆಗ್ ಪಿದಡಿಯೆಂಡ. ಮುಲ್ಪ ಊರು ಕೇರಿದ ಪತ್ತ್ ನಲ್ಪ ಪಿರಿಯಕುಲ್ ಜವನೆರ್ ಜನಮಂದೆಲು ಮಾತ ಒಟ್ಟಾದ್ ಪತ್ತ್ ಪದ್ರಾಡಡಿ ಅಂತರಡ್ ಅರ್ಕೆಲ್ ಅರ್ಕೆಲ್ ಪಾಡೊಂದು ಕಾಡ ಗಡುಟ್ ಕೂಪೆ ಕಟ್ಟೊಂದು ಓಟ್ಟೊಟ್ಟ್‌ಗ್ ಪಜ್ಜೆ ದೀವೊಂದು ಪಾರೊಂದು ಪತ್ತೊಂದು ‘ಹೈ ಹೈ ಹಿಡಿ ಹಿಡಿ ಅಲೆಲೆಲೆ ಬಲೆ ಪಾರ್ಲೆ ಪತ್ತ್‌ಲೆ’ ಬಾಯಿ ನಿಲಿಕೆ ಬೊಬ್ಬೆ ಅರೆಬಾಯಿ ದೀವೊಂದು ಕೈಟಿತ್ತಿ ಬಡು ದೋಂಟೆ ಕೊಟ್ಟುಡ್ ಬಲೆ ಬಲ್ಲೆ ಪುದೆಲ್‌ಲೆನ್ ದರ್ತೊಂದು ‘ದಡ್‌ಬುಡ್’ ಸಬುದೊದೊಟ್ಟ್‌ಗ್ ಮಟ್ಟ್‌‌ಕಟ್ಟ್‌ದ ಪೆಟ್ಟ್‌‌‌ದ ಬಲತೊಟ್ಟ್‌ಗ್ ಕಾಡ್ ಮಾಸದ ಬೋಂಟೆ ದೇರೊಂದುಲ್ಲೆರ್.
ಪತ್ತ್ ಪರ್ಲಾಂಗ್ ದೂರರ್ದ್ ಕೆಬಿತ ಪೂಪುಡವುಲೆಕ್ಕ ‘ಗುಜುಮ್ಮ್‌ಮ್ಮ್ ದಿಡಿಮ್ಮ್‌ಮ್ಮ್ ‘ ಪಂಡ್‌ದ್ ಒರಾನೆ ಬತ್ತೆತ್ತಿನ ಸಬುದೊನ್ ಕೇಂಡ್‌ದ್ ” ಅಲೆ ಕೃಷ್ಣಪ್ಪನ್ನೆ ಪಿರಣಿಗ್ ನೋಟ ದೀದ್ ಬೆಡಿಟ್ ಈಡ್ ದೀಯೆರ್ ತಾಂಪಣ್ಣೆ ತೋಟೆ ಪುಡತೆರ್” ಬೋಂಟೆ ಬೂರ್ದಿಪ್ಪೊಡ್ ಪೆಟ್ಟ್ ತಿಂಡ್‌ದ್ ಬಲ್ತ್‌ದ್ ತಪ್ಪಂದಿಲೆಕ್ಕ ತಡೆಪೊಡ್ ‘ಹೈ ಹಿಡಿ ಹೈ ಹಿಡಿ ಬುಡಡೆ ಪಾರ್ಲೆ ಬಲ್ಪುಲೆ ಪತ್ತ್‌ಲೆ” ಕೂಪೆಡೊಟ್ಟುತ್ತಿನ ಜನಮಂದೆಲು ಒರಿಯಗೊರಿ ಬೊಬ್ಬೆ ಅರೆಬಾಯಿ ಕೊರೊಂದು ಉಮೇದ್‌ದಿಂಜಾವೊಂದು ಕಾರಡಿಕ್ ತಿಕ್ಕೊಂದಿತ್ತಿನ ಕಾಡನಡುತ ಬಲ್ಲೆ ಪುದೆಲ್ ಕಲ್ಲ್ ಮುಲ್ಲ್ ಮಣ್ಣ್ ಮರೊ ಬೇರ್ ಬೂರುಲೆನ್ ಗೆನ್ಪಂದೆ ‘ದಡ್‌ಬುಡ್ ದಡ್‌ಬುಡ್’ ಸಬುದೊಲೆನ್ ಮಲ್ತೊಂದು ರಬೊಸೊಡ್ ಬೋಂಟೆ ಬೂರ್ದಿನ ಜಾಗೆದಂಚಿ ಬಲ್ತೊಂದುಲ್ಲೆರ್.
(ಬರ್ಪಿ ಎಸಲ್‌ಡ್ ದುಂಬರಿಯುಂಡ್)
Get in Touch With Us info@kalpa.news Whatsapp: 9481252093
Loading ...
Discussion about this post