ಕಲ್ಪ ನ್ಯೂಸ್ ಡಿಜಿಟಲ್ ಮೀಡಿಯಾ
ಅಪ್ಪನೆಂದರೆ
ಬಯಲ ಹಸಿರು, ಸೂರ್ಯನ ಧಗೆ, ಚಂದ್ರನ ತಂಪು;
ಬತ್ತಿದಂತೆ ಬೆಚ್ಚಿದಂತೆ ಕೆಲವೊಮ್ಮೆ ವಸಂತನ ಚೆಲುವು ! ಮತ್ತದೇ ನಿಶೆಯ ನಶೆ ! ತ್ರಾಣವಿಲ್ಲ ಅಮಲು ! ಅಮಲು !
ಅದೇ ಅವನ ಸೊಗಡು !
ಅಪ್ಪನೆಂದರೆ
ಕೋಟಿ ಕಲರವವ ಮೀಟಿದ ಬೆಳಕಲ್ಲೂ ಕಂಡ ಕತ್ತಲೆ !
ಕತ್ತಲಾಚೆ ಖುಷಿಯ ಪುಳಕ ! ನಡುನಡುವೆ ಬೆವತು ಬೆತ್ತಲು !
ಆತ ಹಮ್ಮುಬಿಮ್ಮುಗಳ ನಡುವೆ ಏಳು ಬೀಳು ಕಂಡ ಬದುಕ ಸೆಳೆತ
ಸಾಂತ್ವನದ ಹೆಗಲು ! ಹಾಗೆ ಬೈಗುಳದ ಬರಸಿಡಿಲು..!
ಅಪ್ಪನೆಂದರೆ
ಸದಾ ಪುಟಿಯುವ ಚೆಂಡು, ಮೋಡಿಗಾರ , ಮೋಜುಗಾರ !
ನೋವು ನಲಿವಿಗೆ ಭಾಗಿದಾರ_ ಮುಗಿಯದ ಮಮಕಾರ ;
ಅಲ್ಲಲ್ಲಿ ಸಾಲಗಾರ ! ಬದುಕು ಕೊಟ್ಟ ಸಾಹುಕಾರ !
ಆತ ನಾ ಹಿಡಿದ ಮೊದಲ ಊರುಗೋಲು! ಕೆಲವೊಮ್ಮೆ ಅರ್ಥವಾಗದ ಒಗಟು !
ಅಪ್ಪನೆಂದರೆ
ಸದಾ ವಟವಟ ! ವಾಗ್ಧೇವಿ ಪುತ್ರ , ಬದುಕಿನ ಮಿಡಿತ,
ಹಟ ಚಟಗಳ ಮರ್ಕಟ ! ನಿಷ್ಕಪಟ ! ಪರರಿಗೆ ಪರಮಾಪ್ತ !
ಸವೆದ ಚಪ್ಪಲಿ, ಮೊಬೈಲ್, ಕನ್ನಡಕ, ಯಕ್ಷಗಾನ ! ಪೇಪರ್, ಪುಸ್ತಕ, ಹಾಡು, ಭಜನೆ ಕುಣಿತಗಳ ರಸದೂಟ
ಆತ ಅಪಮಾನ,ಅನುಮಾನ, ಅಭಿಮಾನದ ಧ್ಯೋತಕ !
ಅಪ್ಪನೆಂದರೆ
ಒಲ್ಮೆಯ ತವರು,ಸ್ವಾಭಿಮಾನದ ಕಡಲು ! ಅಕ್ಕರೆಯ ಮಡಿಲು !
ವಸುದೇವನ ಹೊನಲು ! ದಶರಥನ ಅಳಲು !
ಯಯಾತಿಯಂತೆ ! ದಕ್ಷನಂತೆ ! ಹಿರಣ್ಯಕಶಪುವಿನಂತೆ !
ತರತರದ ಸವಾಲುಗಳೆಸೆದು ನಮ್ಮ ಹದಗೊಳಿಸಿದ ಧೀರ !
ಹಟ-ಹೋರಾಟ, ಹವ್ಯಾಸಗಳ ಆಳಕ್ಕಿಸಿದ ಮಹಾಗುರು !
ಅಪ್ಪನೆಂದರೆ
ಅಮ್ಮನುಸಿರ ಆಮ್ಲಜನಕ, ಬದುಕ ನಾವಿಕ, ಮಕ್ಕಳೆದೆಯ ಕಳಶ
ಆತ ನಿರ್ಜಾರಣ್ಯದ ಕಪ್ಪು ಮಣ್ಣಲಿ ಬೆಳೆದ ಹತ್ತಿಯಂತೆ,
ಮನೆ ಮನವ ಸದಾ ವಿಸ್ಮಯದಿ ಬೆಳಗಿದಂತೆ,
ಕೋಟಿ ತರುಲತೆಗಳ ಚಿಗುರಿಗೆ ಬೆಳಕನ್ನಿತ್ತು ಪೊರೆವ ‘ಸೂರ್ಯ’ನಂತೆ.
Get In Touch With Us info@kalpa.news Whatsapp: 9481252093
