ಕಲ್ಪ ಮೀಡಿಯಾ ಹೌಸ್ | ಬೆಂಗಳೂರು |
● ದಿನದ 24 ಗಂಟೆಯೂ ಗ್ರಾಹಕರೊಂದಿಗೆ ವ್ಯವಹರಿಸಲು ಉದ್ಯಮಿಗಳಿಗೆ ಸಿಗಲಿದೆ ಎಐ (Meta Business) ನೆರವು
● ಬೃಹತ್ ಕಂಪನಿಗಳಿಗಾಗಿ ಮೆಟಾ ಬಿಸಿನೆಸ್ ಏಜೆಂಟ್ ಪ್ಲಾಟ್ ಫಾರ್ಮ್ ಮುಕ್ತ
ಜಾಗತಿಕ ತಂತ್ರಜ್ಞಾನ ದೈತ್ಯ ಮೆಟಾ ಮಾಲೀಕತ್ವದ ಪ್ರಸಿದ್ಧ ಮೆಸೇಜಿಂಗ್ ಆ್ಯಪ್ ವಾಟ್ಸಾಪ್, ಮುಂಬೈನಲ್ಲಿ ನಡೆದ ತನ್ನ ಮೂರನೇ ವಾರ್ಷಿಕ ಬಿಸಿನೆಸ್ ಶೃಂಗಸಭೆಯಲ್ಲಿ ಉದ್ಯಮಿಗಳಿಗಾಗಿ ಅತ್ಯಾಧುನಿಕ ಎಐ ತಂತ್ರಜ್ಞಾನ ಆಧಾರಿತ ಮೆಟಾ ಬಿಸಿನೆಸ್ (Meta Business) ಏಜೆಂಟ್ ಅನ್ನು ಅಧಿಕೃತವಾಗಿ ಬಿಡುಗಡೆ ಮಾಡಿದೆ.
ಈ ತಂತ್ರಜ್ಞಾನವು ಪ್ರತಿಯೊಂದು ಸಣ್ಣ ಮತ್ತು ದೊಡ್ಡ ವ್ಯವಹಾರ ಸಂಸ್ಥೆಗಳು ದಿನದ 24 ಗಂಟೆಯೂ, ವಾರದ ಏಳೂ ದಿನಗಳ ಕಾಲ ಗ್ರಾಹಕರಿಗೆ ನಿರಂತರ ಸೇವೆ ನೀಡಲು ಸಹಾಯ ಮಾಡಲಿದೆ.
ಇದರೊಂದಿಗೆ, ಬೃಹತ್ ಉದ್ಯಮಗಳು ತಮ್ಮದೇ ಆದ ಕಸ್ಟಮೈಸ್ಡ್ ಬಿಸಿನೆಸ್ ಏಜೆಂಟ್ ಗಳನ್ನು ದೊಡ್ಡ ಮಟ್ಟದಲ್ಲಿ ನಿರ್ಮಿಸಲು ಮತ್ತು ಕಾರ್ಯಗತಗೊಳಿಸಲು ಅಗತ್ಯವಿರುವ ಮೂಲಸೌಕರ್ಯವನ್ನು ಒದಗಿಸುವ ಮೆಟಾ ಬಿಸಿನೆಸ್ ಏಜೆಂಟ್ ಪ್ಲಾಟ್ ಫಾರ್ಮ್ ಅನ್ನು ಸಹ ಕಂಪನಿ ಬಿಡುಗಡೆ ಮಾಡಿದೆ.
Also Read>> WorldCup | ಮೆಸ್ಸಿ ಮತ್ತೆ ಇತಿಹಾಸ: ಅರ್ಜೆಂಟೀನಾ ಕ್ವಾರ್ಟರ್ಫೈನಲ್ಗೆ ಲಗ್ಗೆ
ಪ್ರಸ್ತುತ ಮಾರುಕಟ್ಟೆಯಲ್ಲಿ ಉದ್ಯಮಗಳು ಗ್ರಾಹಕರೊಂದಿಗಿನ ಬಾಂಧವ್ಯವನ್ನು ಸುಧಾರಿಸಲು ಮತ್ತು ದೈನಂದಿನ ವ್ಯವಹಾರ ಪ್ರಕ್ರಿಯೆಗಳನ್ನು ಸುಲಭಗೊಳಿಸಲು ಹೊಸ ಮಾರ್ಗಗಳನ್ನು ಹುಡುಕುತ್ತಿವೆ. ಈ ನಿಟ್ಟಿನಲ್ಲಿ, ಮೆಟಾ ಬಿಸಿನೆಸ್ ಏಜೆಂಟ್ ಗ್ರಾಹಕರ ಮೊದಲ ಸಂಪರ್ಕದಿಂದಲೇ ಅತ್ಯಂತ ಪ್ರಸ್ತುತ ಮತ್ತು ನಿಖರವಾದ ಸೇವಾ ಅನುಭವವನ್ನು ನೀಡಬಲ್ಲದು. ಗ್ರಾಹಕರ ಪ್ರಮುಖ ಪ್ರಶ್ನೆಗಳು ಮತ್ತು ಸಂವಹನಗಳನ್ನು ಆರಂಭದಿಂದ ಕೊನೆಯವರೆಗೆ ಯಶಸ್ವಿಯಾಗಿ ನಿರ್ವಹಿಸುವ ಸಾಮರ್ಥ್ಯವನ್ನು ಇದು ಹೊಂದಿದ್ದು, ಪ್ರಮುಖವಾಗಿ ಈ ಕೆಳಗಿನ ಸೇವೆಗಳನ್ನು ದಿನದ 24 ಗಂಟೆಯೂ ಒದಗಿಸಲಿದೆ:
● ಗ್ರಾಹಕರು ಕೇಳುವ ಕಂಪನಿ ಅಥವಾ ವ್ಯವಹಾರಕ್ಕೆ ಸಂಬಂಧಿಸಿದ ಪ್ರಶ್ನೆಗಳಿಗೆ ನಿಖರವಾದ ಉತ್ತರಗಳನ್ನು ನೀಡುತ್ತದೆ.
● ವ್ಯಾಪಾರ ಸಂಸ್ಥೆಯ ಉತ್ಪನ್ನಗಳ ಕ್ಯಾಟಲಾಗ್ ನಿಂದ ಗ್ರಾಹಕರ ಇಷ್ಟಕ್ಕೆ ತಕ್ಕಂತೆ ಸೂಕ್ತವಾದ ಉತ್ಪನ್ನಗಳನ್ನು ಶಿಫಾರಸು ಮಾಡುತ್ತದೆ.
● ಗ್ರಾಹಕರ ಭೇಟಿಯ ಸಮಯವನ್ನು ಕಾಯ್ದಿರಿಸುತ್ತದೆ ಹಾಗೂ ಸಂಭಾವ್ಯ ಗ್ರಾಹಕರನ್ನು ಗುರುತಿಸಿ ವರ್ಗೀಕರಿಸುತ್ತದೆ.
● ಕೃತಕ ಬುದ್ಧಿಮತ್ತೆಯ ಬದಲು ಕಂಪನಿಯ ಸಿಬ್ಬಂದಿ ಯಾವ ಸಂದರ್ಭದಲ್ಲಿ ಗ್ರಾಹಕರೊಂದಿಗೆ ನೇರವಾಗಿ ಮಾತನಾಡಬೇಕು ಎಂಬುದನ್ನು ನಿರ್ಧರಿಸುವ ಅಧಿಕಾರವನ್ನು ಉದ್ಯಮಿಗಳಿಗೆ ನೀಡುತ್ತದೆ.
● ಗ್ರಾಹಕರು ಉತ್ಪನ್ನಗಳನ್ನು ಖರೀದಿಸುವ ಪ್ರಕ್ರಿಯೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಲು ನೆರವಾಗುತ್ತದೆ.
ಈ ಕುರಿತು ಮಾತನಾಡಿದ ಮೆಟಾ ಇಂಡಿಯಾದ ಮ್ಯಾನೇಜಿಂಗ್ ಡೈರೆಕ್ಟರ್ ಮತ್ತು ಕಂಟ್ರಿ ಹೆಡ್ ಅರುಣ್ ಶ್ರೀನಿವಾಸ್, “ಜಾಗತಿಕ ಮಟ್ಟದಲ್ಲಿ ಮೆಸೇಜಿಂಗ್ ಮೂಲಕ ವ್ಯವಹಾರ ನಡೆಸುವ ಅತ್ಯಂತ ವೇಗದ ಮತ್ತು ಕ್ರಿಯಾಶೀಲ ಮಾರುಕಟ್ಟೆಯಾಗಿ ಭಾರತ ಹೊರಹೊಮ್ಮಿದೆ. ಇಲ್ಲಿ ಜನರು ಮತ್ತು ಉದ್ಯಮಗಳು ಪರಸ್ಪರ ಸಂಪರ್ಕ ಸಾಧಿಸಲು ಮೆಸೇಜಿಂಗ್ ಅನ್ನು ಹೆಚ್ಚು ಇಷ್ಟಪಡುತ್ತಿದ್ದಾರೆ. ಉದ್ಯಮಗಳ ಕಾರ್ಯವೈಖರಿಯನ್ನು ಬದಲಾಯಿಸುವಲ್ಲಿ ಎಐ ಪ್ರಮುಖ ಪಾತ್ರ ವಹಿಸುತ್ತಿದ್ದು, ಮೆಟಾ ಬಿಸಿನೆಸ್ ಏಜೆಂಟ್ ಈ ಪ್ರಯಾಣದ ಮುಂದಿನ ಹೆಜ್ಜೆಯಾಗಿದೆ. ಇದು ಉದ್ಯಮಗಳು ಎಐ ತಂತ್ರಜ್ಞಾನವನ್ನು ಬಳಸಿಕೊಂಡು ಗ್ರಾಹಕರೊಂದಿಗಿನ ಬಾಂಧವ್ಯವನ್ನು ಗಟ್ಟಿಗೊಳಿಸಲು, ದಕ್ಷತೆಯನ್ನು ಹೆಚ್ಚಿಸಲು ಮತ್ತು ಹೊಸ ಬೆಳವಣಿಗೆಯ ಹಾದಿಗಳನ್ನು ಕಂಡುಕೊಳ್ಳಲು ಸಹಾಯ ಮಾಡುತ್ತದೆ” ಎಂದು ತಿಳಿಸಿದ್ದಾರೆ.
ಬೃಹತ್ ಕಂಪನಿಗಳಿಗಾಗಿ Meta Business ಏಜೆಂಟ್ ಪ್ಲಾಟ್ ಫಾರ್ಮ್ ಲಭ್ಯ
ದೊಡ್ಡ ಮಟ್ಟದಲ್ಲಿ ತಮ್ಮದೇ ಆದ ಮೆಟಾ ಬಿಸಿನೆಸ್ ಏಜೆಂಟ್ ಅನ್ನು ನಿರ್ಮಿಸಲು, ಕಸ್ಟಮೈಸ್ ಮಾಡಲು ಮತ್ತು ಅಳವಡಿಸಿಕೊಳ್ಳಲು ಅಗತ್ಯವಿರುವ ಮೂಲಸೌಕರ್ಯದ ಅಗತ್ಯವಿರುವ ಬೃಹತ್ ಉದ್ಯಮಗಳಿಗಾಗಿ ಈಗ ಮೆಟಾ ಬಿಸಿನೆಸ್ ಏಜೆಂಟ್ ಪ್ಲಾಟ್ ಫಾರ್ಮ್ ಲಭ್ಯವಿದೆ. ಇದು ಪ್ರಮುಖ ಕಂಪನಿಗಳಿಗೆ ಎಐ ಆಧಾರಿತ ಏಜೆಂಟ್ ಗಳನ್ನು ನಿರ್ಮಿಸಲು ನೆರವಾಗುವುದಲ್ಲದೆ, ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ಶಾಪಿಫೈ, ಝೆಂಡೆಸ್ಕ್ ಮತ್ತು ಶಾಪೀನಂತಹ ಪ್ರಮುಖ ಉದ್ಯಮ ಸಾಫ್ಟ್ ವೇರ್ ಗಳೊಂದಿಗೆ ಸುಲಭವಾಗಿ ಸಂಯೋಜನೆಗೊಳ್ಳುತ್ತದೆ. ವಾಟ್ಸಾಪ್ ಬಿಸಿನೆಸ್ ಪ್ಲಾಟ್ ಫಾರ್ಮ್ ಜೊತೆಗೂಡಿ ಕಾರ್ಯನಿರ್ವಹಿಸುವ ಈ ವ್ಯವಸ್ಥೆಯು, ಬೃಹತ್ ಕಂಪನಿಗಳಿಗೆ ಅಗತ್ಯವಿರುವ ಅತ್ಯುನ್ನತ ಮಟ್ಟದ ಬೆಳವಣಿಗೆ ಸಾಮರ್ಥ್ಯ, ನಿಯಂತ್ರಣಗಳು ಮತ್ತು ನಿಖರ ಕಾರ್ಯಕ್ಷಮತೆಯ ಮಾಪನವನ್ನು ಒದಗಿಸುತ್ತದೆ.
ಈ ಮೈತ್ರಿ ಕುರಿತು ಸ್ವಿಗ್ಗಿ ಫುಡ್ ಮಾರ್ಕೆಟ್ ಪ್ಲೇಸ್ನ ರೈಡರ್ ಮತ್ತು ಪೋಸ್ಟ್ ಆರ್ಡರ್ ಕನ್ಸ್ಯೂಮರ್ ಎಕ್ಸ್ಪೀರಿಯನ್ಸ್ ವಿಭಾಗದ ವೈಸ್ ಪ್ರೆಸಿಡೆಂಟ್ ರೋಹನ್ ಛಾಜೇಡ್ ಮಾತನಾಡಿ, “ತಂತ್ರಜ್ಞಾನವು ಬಳಕೆದಾರರ ದೈನಂದಿನ ಅನುಭವಗಳನ್ನು ಸರಳಗೊಳಿಸಿದಾಗ ಮಾತ್ರ ಅದಕ್ಕೆ ನಿಜವಾದ ಮೌಲ್ಯ ಸಿಗುತ್ತದೆ. ಮೆಟಾ ಬಿಸಿನೆಸ್ ಏಜೆಂಟ್ ನೆರವಿನೊಂದಿಗೆ ನಮ್ಮ ಡೆಲಿವರಿ ಪಾರ್ಟ್ ನರ್ ಗಳನ್ನು ವಾಟ್ಸಾಪ್ ಮೂಲಕವೇ ಉದ್ಯೋಗಕ್ಕೆ ಸೇರಿಸಿಕೊಳ್ಳುವ ಪ್ರಕ್ರಿಯೆಯನ್ನು ಆರಂಭಿಸಿದ್ದೇವೆ. ಲಕ್ಷಾಂತರ ಜನರಿಗೆ ಈಗಾಗಲೇ ಪರಿಚಿತವಾಗಿರುವ ವಾಟ್ಸಾಪ್ ವೇದಿಕೆಯಲ್ಲೇ ಅತ್ಯಂತ ವೇಗದ ಮತ್ತು ಸುಲಭವಾದ ವ್ಯವಸ್ಥೆಯನ್ನು ನಾವು ರೂಪಿಸಿದ್ದೇವೆ. ಸಂಭಾಷಣಾ ಆಧಾರಿತ ಕೃತಕ ಬುದ್ಧಿಮತ್ತೆಯನ್ನು (ಕನ್ವರ್ಸೇಷನಲ್ ಎಐ) ಬಳಸಿಕೊಂಡು ಜಟಿಲತೆಯನ್ನು ಕಡಿಮೆ ಮಾಡುವುದು ಮತ್ತು ಉದ್ಯಮದ ಸಂವಹನವನ್ನು ಹೆಚ್ಚು ಸುಲಭಗೊಳಿಸುವುದು ನಮ್ಮ ವಿಶಾಲ ದೃಷ್ಟಿಕೋನವಾಗಿದೆ. ಉದ್ಯಮಗಳು ತಮ್ಮ ಪರಿಸರ ವ್ಯವಸ್ಥೆಯೊಂದಿಗೆ ಸಂವಹನ ನಡೆಸಲು ಕನ್ವರ್ಸೇಷನಲ್ ಕಾಮರ್ಸ್ (ಸಂಭಾಷಣಾ ಆಧಾರಿತ ವಾಣಿಜ್ಯ) ಮುಂದಿನ ಭವಿಷ್ಯವಾಗಿದೆ. ಮೆಟಾ ಜೊತೆಗೂಡಿ ಈ ಮಹತ್ವದ ಬದಲಾವಣೆಯ ಮುಂಚೂಣಿಯಲ್ಲಿರಲು ನಾವು ಉತ್ಸುಕರಾಗಿದ್ದೇವೆ” ಎಂದು ತಿಳಿಸಿದ್ದಾರೆ.
ಮಧುಲಿಕಾ ಎಂಟರ್ ಪ್ರೈಸಸ್ ನ ಸಂಸ್ಥಾಪಕಿ ಮಧುಲಿಕಾ ವಿಕ್ರಮ್ ಮಾತನಾಡಿ, “ಸೌಂದರ್ಯ ವರ್ಧಕ ಉದ್ಯಮದಲ್ಲಿ ಗ್ರಾಹಕರು ತಕ್ಷಣದ ಪ್ರತಿಕ್ರಿಯೆಯನ್ನು ನಿರೀಕ್ಷಿಸುತ್ತಾರೆ. ನಾವು ಕೆಲವೇ ನಿಮಿಷಗಳಲ್ಲಿ ಉತ್ತರಿಸದಿದ್ದರೆ, ಅವರು ಈಗಾಗಲೇ ಮತ್ತೊಂದು ಕಡೆ ಮುಖ ಮಾಡಿರುತ್ತಾರೆ. ಬ್ರೈಡಲ್ ಬುಕ್ಕಿಂಗ್, ಮೇಕಪ್ ಕೋರ್ಸ್ ಗಳು ಮತ್ತು ಬ್ಯೂಟಿ ಪ್ರಾಡಕ್ಟ್ಗಳಿಗೆ ಬೇಡಿಕೆ ಹೆಚ್ಚಾದಂತೆ, ನಾವು ಪ್ರತಿದಿನ ನೂರಾರು ಗ್ರಾಹಕರ ವಿಚಾರಣೆಗಳನ್ನು ನಿರ್ವಹಿಸಬೇಕಾಗುತ್ತಿತ್ತು. ಇಂತಹ ಸಂದರ್ಭದಲ್ಲಿ ಮೆಟಾ ಬಿಸಿನೆಸ್ ಏಜೆಂಟ್ ನಮಗೆ ಅತ್ಯಂತ ಸಹಕಾರಿಯಾಯಿತು. ಏಕೆಂದರೆ ಇದು ನಮ್ಮ ಉದ್ಯಮದ ಬಗ್ಗೆ ಸ್ವತಃ ಕಲಿತುಕೊಂಡು, ಗ್ರಾಹಕರೊಂದಿಗಿನ ಸಂಭಾಷಣೆಯನ್ನು ಅತ್ಯಂತ ಸುಲಭವಾಗಿ ನಿಭಾಯಿಸುತ್ತದೆ. ನಾವು ಮೆಟಾ ಬಿಸಿನೆಸ್ ಏಜೆಂಟ್ ಬಳಸಲು ಆರಂಭಿಸಿದಾಗಿನಿಂದ ವ್ಯಾಪಾರ ವೃದ್ಧಿಯಲ್ಲಿ ಶೇ. 25 ರಿಂದ 30 ರಷ್ಟು ಹೆಚ್ಚಳ ಕಂಡಿದ್ದೇವೆ. ಅಲ್ಲದೆ, ಇದು ನನ್ನ ದೈನಂದಿನ ಶೇ. 50 ರಿಂದ 60 ರಷ್ಟು ಪುನರಾವರ್ತಿತ ಕೆಲಸದ ಒತ್ತಡವನ್ನು ಕಡಿಮೆ ಮಾಡಿದೆ” ಎಂದು ತಿಳಿಸಿದ್ದಾರೆ.
ವೃತ್ತಿಪರವಾಗಿ ನಿರ್ವಹಿಸಲ್ಪಡುವ ಲಡಾಕ್ ಬೈಕ್ ಸಾಹಸಯಾತ್ರೆಗಳು ಮತ್ತು ಹಿಮಾಲಯನ್ ರೋಡ್ ಟ್ರಿಪ್ಗಳಲ್ಲಿ ಪರಿಣತಿ ಹೊಂದಿರುವ ಪ್ರಮುಖ ಅಡ್ವೆಂಚರ್ ಟ್ರಾವೆಲ್ ಕಂಪನಿ ಕೈಜೆನ್ ಅಡ್ವೆಂಚರ್ಸ್ ನ ಸಂಸ್ಥಾಪಕ ಅಮಿತ್ ಹೂಡಾ ಅವರು ಮೆಟಾ ಬಿಸಿನೆಸ್ ಏಜೆಂಟ್ ಕುರಿತು ತಮ್ಮ ಅನಿಸಿಕೆ ಹಂಚಿಕೊಂಡಿದ್ದು, “ಲಡಾಕ್ ಪ್ರವಾಸಗಳು, ಬೆಲೆಗಳು, ಇಟಿನರರಿ (ಪ್ರವಾಸದ ದಿನಚರಿ) ಮತ್ತು ಬೈಕ್ ಬಾಡಿಗೆಗೆ ಸಂಬಂಧಿಸಿದ ವಿಚಾರಣೆಗಳಿಗೆ ತಕ್ಷಣವೇ ಪ್ರತಿಕ್ರಿಯಿಸಲು ಕೈಜೆನ್ ಅಡ್ವೆಂಚರ್ಸ್ ಗೆ ಮೆಟಾ ಬಿಸಿನೆಸ್ ಏಜೆಂಟ್ ಸಹಾಯ ಮಾಡಿದೆ. ಇದು ಗ್ರಾಹಕರಿಗೆ ಉತ್ತರಿಸುವ ಸಮಯವನ್ನು ಕಡಿಮೆ ಮಾಡುತ್ತದೆ, ಪ್ರವಾಸಿಗರ ದಟ್ಟಣೆ ಇರುವ ಪೀಕ್-ಸೀಸನ್ ನಲ್ಲಿ ಭಾರಿ ಪ್ರಮಾಣದ ವಿಚಾರಣೆಗಳನ್ನು ಸುಲಭವಾಗಿ ನಿಭಾಯಿಸುತ್ತದೆ ಮತ್ತು ದಿನದ 24 ಗಂಟೆಯೂ ನಿಖರವಾದ ಮಾಹಿತಿಯನ್ನು ಖಾತ್ರಿಪಡಿಸುತ್ತದೆ. ಇದರಿಂದಾಗಿ ನಮ್ಮ ತಂಡವು ಪ್ರವಾಸದ ಇತರ ಪ್ರಮುಖ ಕಾರ್ಯಾಚರಣೆಗಳ ಮೇಲೆ ಗಮನ ಹರಿಸಲು ಸಾಧ್ಯವಾಗಿದ್ದು, ವ್ಯಾಪಾರ ವೃದ್ಧಿ ಮತ್ತು ಗ್ರಾಹಕರ ಅನುಭವ ಎರಡನ್ನೂ ಉತ್ತಮಗೊಳಿಸಿದೆ” ಎಂದು ಅವರು ಹೇಳಿದ್ದಾರೆ.
Meta Business | ಗ್ರಾಹಕರು ಉದ್ಯಮಗಳನ್ನು ಸುಲಭವಾಗಿ ಹುಡುಕಲು ನೆರವು
ಮೆಟಾ ಬಿಸಿನೆಸ್ ಏಜೆಂಟ್ ಮೂಲಕ ಕಾರ್ಯನಿರ್ವಹಿಸುವ ವ್ಯವಹಾರಗಳನ್ನು ಜನರು ಸುಲಭವಾಗಿ ಪತ್ತೆಹಚ್ಚಲು ವಾಟ್ಸಾಪ್ ಹೊಸ ವೈಶಿಷ್ಟ್ಯವನ್ನು ತರುತ್ತಿದೆ. ಶೀಘ್ರದಲ್ಲೇ, ಬಳಕೆದಾರರು ವಾಟ್ಸಾಪ್ ಸರ್ಚ್ ನಲ್ಲೇ ನೇರವಾಗಿ ಯಾವುದೇ ಉದ್ಯಮದ ಹೆಸರನ್ನು ಟೈಪ್ ಮಾಡಿ ಹುಡುಕಬಹುದು ಅಥವಾ ತಮಗೆ ನಂಬಿಕಸ್ಥ ಅನಿಸಿದ ಉದ್ಯಮಗಳ ಕಾಂಟ್ಯಾಕ್ಟ್ ಗಳನ್ನು ತಮ್ಮ ಸ್ನೇಹಿತರು ಮತ್ತು ಕುಟುಂಬದವರೊಂದಿಗೆ ಸುಲಭವಾಗಿ ಹಂಚಿಕೊಳ್ಳಬಹುದು. ಇದರಿಂದ ಗ್ರಾಹಕರು ಮತ್ತು ಉದ್ಯಮಿಗಳ ನಡುವೆ ನಂಬಿಕಸ್ಥ ಸಂಪರ್ಕ ಸಾಧಿಸುವುದು ಮತ್ತಷ್ಟು ಸುಲಭವಾಗಲಿದೆ.
ತಮ್ಮ ಉದ್ಯಮಕ್ಕಾಗಿ ಮೆಟಾ ಬಿಸಿನೆಸ್ ಏಜೆಂಟ್ ಅನ್ನು ಪಡೆದುಕೊಳ್ಳಲು ಆಸಕ್ತಿ ಇರುವ ವ್ಯಾಪಾರಸ್ಥರು ಇಲ್ಲಿ ಕ್ಲಿಕ್: https://business.facebook.com/ai/welcome/ ಮಾಡುವ ಮೂಲಕ ಕಾಯುವಿಕೆ ಪಟ್ಟಿಗೆ ಸೇರಬಹುದಾಗಿದೆ.
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news
