ಹೊಳೆಹೊನ್ನೂರು | ದ್ಯಾಮಣ್ಣ ಕೆರೆ ಒತ್ತುವರಿ ತೆರವುಗೊಳಿಸಲು ಆಗ್ರಹ | ಜಿಲ್ಲಾಧಿಕಾರಿಗೆ ಮನವಿ

ಕಲ್ಪ ಮೀಡಿಯಾ ಹೌಸ್  |  ಶಿವಮೊಗ್ಗ  |

ಭದ್ರಾವತಿ ತಾಲೂಕು ಹೊಳೆಹೊನ್ನೂರು ಹೋಬಳಿ ಅರಕೆರೆ ಗ್ರಾಪಂ ವ್ಯಾಪ್ತಿಯ ಸ.ನಂ. 1ರ ಕೋಡಿ ಹೊಸೂರು ಗ್ರಾಮದಲ್ಲಿರುವ ದ್ಯಾಮಣ್ಣ ಕೆರೆ ಒತ್ತುವರಿಯಾಗಿದ್ದು, ತೆರವುಗೊಳಿಸಬೇಕೆಂದು ಆಗ್ರಹಿಸಿ ಅರಕೆರೆ ಗ್ರಾಮಸ್ಥರು ಜಿಲ್ಲಾಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದಾರೆ.

ಸುಮಾರು 86 ಎಕರೆ 29 ಗುಂಟೆ ವಿಸ್ತೀರ್ಣದ ದ್ಯಾಮಣ್ಣ ಕೆರೆ ಒತ್ತುವರಿ ಬಗ್ಗೆ ಹಿಂದೆ ಭದ್ರಾವತಿ ತಾಲೂಕು ತಹಶೀಲ್ದಾರ್, ರಾಜಸ್ವ ನಿರೀಕ್ಷಕರು, ಗ್ರಾಮ ಲೆಕ್ಕಾಧಿಕಾರಿ, ಗ್ರಾಪಂ ಪಿಡಿಒ, ಸಣ್ಣ ನೀರಾವರಿ ಇಲಾಖೆ ಅಧಿಕಾರಿಗಳು ಹಾಗೂ ಹೊಳೆಹೊನ್ನೂರು ಪೊಲೀಸ್ ಠಾಣೆಯ ಸಿಬ್ಬಂದಿಗಳ ಮತ್ತು ಗ್ರಾಮಸ್ಥರ ಸಮ್ಮುಖದಲ್ಲಿ ಸ್ಥಳ ಪರಿಶೀಲನೆ ಆಗಿರುತ್ತದೆ ಎಂದು ತಿಳಿಸಿದ್ದಾರೆ.

Also read: ಶಿವಮೊಗ್ಗ | ಪಾಲಿಕೆ ಪರಿಹರಿಸದ ಸಮಸ್ಯೆಗೆ ಇತಿಶ್ರೀ ಹಾಡಿದ ಪೊಲೀಸರು | ಏನಿದು ಮಹತ್ಕಾರ್ಯ?
ಸಾವಿತ್ರಮ್ಮ ಕೋಂ ಗುರುಶಾಂತಪ್ಪನವರು ಇದೇ ಕೆರೆಯ ಸುಮಾರು 12 ಎಕರೆ ಪ್ರದೇಶ ಅತಿಕ್ರಮಿಸಿ ಅಡಿಕೆ ಮತ್ತು ತೆಂಗಿನ ತೋಟ ಮಾಡಿದ್ದಾರೆ. ಈ ಅತಿಕ್ರಮಿತ ಭೂ ಪ್ರದೇಶ ಗುರುತಿಸಿ ಸದರಿ ಪಂಚಾಯಿತಿ ಪಿಡಿಒ ಕೆರೆಯ ಸಂಪೂರ್ಣ ಭೂ ಪ್ರದೇಶ ವಶಕ್ಕೆ ಪಡೆದು ಅವರಿಂದ ವಾರ್ಷಿಕ ಒಂದು ಲಕ್ಷ ರೂ.ಗಳನ್ನು ಪಂಚಾಯಿತಿ ಖಾತೆಗೆ ಪಾವತಿಸಿಕೊಂಡಿರುತ್ತಾರೆ. ತಾಲೂಕು ಆಡಳಿತದಿಂದ ಕೆರೆ ತೆರವುಗೊಳಿಸಿ ಪಂಚಾಯಿತಿ ವಶಕ್ಕೆ ನೀಡಿದ ನಂತರ ಕೆರೆಯ ಒತ್ತುವರಿಯನ್ನು ತೆರವುಗೊಳಿಸದೇ ಅತಿಕ್ರಮಣಕಾರರಿಗೆ ವಾರ್ಷಿಕ ಶುಲ್ಕ ಪಡೆದು ಸಹಕಾರಿಯಾಗುವಂತೆ ಸಭಾ ನಿರ್ಣಯ ಕೈಗೊಂಡಿರುವುದು ಕಂಡು ಬಂದಿದ್ದು, ಈ ಬಗ್ಗೆ ದೂರು ಸಲ್ಲಿಸಿದ್ದಾರೆ.

ಕಂದಾಯ ಅಧಿಕಾರಿಗಳಿಗೆ, ಉಪ ವಿಭಾಗಾಧಿಕಾರಿಗಳಿಗೆ ಈಗಾಗಲೇ ಗ್ರಾಮಸ್ಥರು ಕೆರೆ ಅತಿಕ್ರಮಣದ ಬಗ್ಗೆ ದೂರು ಸಲ್ಲಿಸಿದ್ದಾರೆ. ಆದ್ದರಿಂದ ಜಿಲ್ಲಾಧಿಕಾರಿಗಳೇ ಖುದ್ದಾಗಿ ಸ್ಥಳ ಪರಿಶೀಲನೆ ಮಾಡಿ ಈ ಕೆರೆಯ ಒತ್ತುವರಿ ತೆರವುಗೊಳಿಸಿ ಕೂಡಲೇ ರೈತರಿಗೆ ಅನುಕೂಲ ಮಾಡಿಕೊಡಬೇಕು. ಈ ವಿಚಾರದಲ್ಲಿ ತಪ್ಪೆಸಗಿರುವ ಎಲ್ಲಾ ಅಧಿಕಾರಿಗಳ ಮೇಲೆ ಶಿಸ್ತುಕ್ರಮ ಕೈಗೊಂಡು ಕೆರೆಯ ಜಾಗವನ್ನು ತೆರವುಗೊಳಿಸಿಕೊಡಬೇಕೆಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.
ಈ ಸಂದರ್ಭದಲ್ಲಿ ಎಸ್. ಶರತ್, ಜಿ. ಪ್ರಭಾಕರ್, ಜಿ.ಪಿ. ಶ್ರೀನಿವಾಸ್, ಜಿ.ಎಸ್. ಸಂದೀಪ್, ಪ್ರದೀಪ್ ಜಿ.ಆರ್., ಎ.ಜೆ. ರಾಘು, ಪ್ರಕಾಶ್, ಎಸ್.ಆರ್. ಸಿದ್ದಪ್ಪ ಮತ್ತಿತರರು ಇದ್ದರು.

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news