ಶಿವಮೊಗ್ಗ | ಕ್ಲಾಟ್ ಪರೀಕ್ಷೆಯಲ್ಲಿ ರಾಜ್ಯಕ್ಕೇ 7ನೇ ರ‍್ಯಾಂಕ್ ಪಡೆದ ಅನಿಕೇತನ್

ಕಲ್ಪ ಮೀಡಿಯಾ ಹೌಸ್  |  ಶಿವಮೊಗ್ಗ  |

ಮೇಲಿನ ಹನಸವಾಡಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಶಿಕ್ಷಕಿ ಡಿ. ವತ್ಸಲ ಹಾಗೂ ಪತ್ರಕರ್ತ ವೈ.ಕೆ. ಸೂರ್ಯ ನಾರಾಯಣ ದಂಪತಿಯ ಪುತ್ರ ವೈ.ಎಸ್. ಅನಿಕೇತನ್ ಅವರು ಸಾಮಾನ್ಯ ಕಾನೂನು ಪ್ರವೇಶ ಪರೀಕ್ಷೆ (ಕ್ಲಾಟ್)ಯಲ್ಲಿ #CLET ಅಖಿಲ ಭಾರತ ಮಟ್ಟದಲ್ಲಿಯೇ 84ನೇ ಶ್ರೇಯಾಂಕದಲ್ಲಿ ತೇರ್ಗಡೆಯಾಗುವ ಮೂಲಕ ಅತ್ತುತ್ತಮ ಸಾಧನೆ ಮಾಡಿದ್ದಾರೆ.

ಅನಿಕೇತನ್ ಅವರದ್ದು ಕರ್ನಾಟಕಕ್ಕೆ 7ನೇ ರಾಂಕ್ ಆಗಿದ್ದು, ಭಾರತದಲ್ಲಿಯೇ ಅತ್ತುತ್ತಮ ಕಾನೂನು ವಿಶ್ವ ವಿದ್ಯಾಲಯ ಎಂದು ಹೆಸರು ಪಡೆದಿರುವ ಬೆಂಗಳೂರಿನ ರಾಷ್ಟ್ರೀಯ ಕಾನೂನು ಕಾಲೇಜಿಗೆ ಅವರು ಸುಲಭವಾಗಿ ಪ್ರವೇಶ ಪಡೆಯಲು ಇದು ಅನುಕೂಲ ಕಲ್ಪಿಸಿದೆ. ಕಾನೂನು ಪ್ರವೇಶಕ್ಕಾಗಿ ಅಖಿಲ ಭಾರತ ಮಟ್ಟದಲ್ಲಿ ನಡೆಯುವ ಸಾಮಾನ್ಯ ಕಾನೂನು ಪ್ರವೇಶ ಪರೀಕ್ಷೆ (ಕ್ಲಾಟ್)ಗೆ ಸರಿ ಸುಮಾರು 70 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಪರೀಕ್ಷೆಗೆ ಕುಳಿತಿದ್ದರು.

Also read: ತೊಗರಿಗೆ ಹೆಚ್ಚಿನ ಬೆಂಬಲ ಬೆಲೆ ನಿಗದಿಗೆ ವಿಚಾರ | ಕೃಷಿ ಸಚಿವ ಚಲುವರಾಯಸ್ವಾಮಿ ಹೇಳಿದ್ದೇನು?
ಕರ್ನಾಟಕದಿಂದಲೇ ಸುಮಾರು 7 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದರು. ಆ ಪೈಕಿ ಒಬ್ಬರಾಗಿದ್ದ ಅನಿಕೇತನ್ ಅವರು, ಅಖಿಲ ಭಾರತ ಮಟ್ಟದಲ್ಲಿಯೇ 84ನೇ ಶ್ರೇಯಾಂಕದ ಜತೆಗೆ ಕರ್ನಾಟಕಕ್ಕೆ 7ನೇ ರಾಂಕ್ ಪಡೆದು ತೇರ್ಗಡೆ ಯಾಗುವ ಮೂಲಕ ಅಪ್ರತಿಮ ಸಾಧನೆ ಮಾಡಿದ್ದಾರೆ. ಕ್ಲಾಟ್ ಪರೀಕ್ಷೆಯಲ್ಲಿ ಅನಿಕೇತನ್ ಮಾಡಿರುವ ಸಾಧನೆಗೆ ಈಗ ಬೆಂಗಳೂರಿನಲ್ಲಿರುವ ಪ್ರತಿಷ್ಟಿತ ರಾಷ್ಟ್ರೀಯ ಕಾನೂನು ಕಾಲೇಜು ಮಾತ್ರವಲ್ಲದೆ ದೇಶದ ಯಾವುದೇ ಪ್ರತಿಷ್ಟಿತ ಕಾನೂನು ಕಾಲೇಜಿನಲ್ಲೂ ಸುಲಭವಾಗಿ ಪ್ರವೇಶ ಪಡೆದು, ಕಾನೂನು ಪದವಿ ಓದಬಹುದಾಗಿದೆ.

ಸಾಮಾನ್ಯ ಕಾನೂನು ಪ್ರವೇಶ ಪರೀಕ್ಷೆ (ಕ್ಲಾಟ್)ಯಲ್ಲಿ ಅನಿಕೇತನ್ ಮಾಡಿರುವ ಈ ಸಾಧನೆ ಮಲೆನಾಡು ಮಾತ್ರವಲ್ಲದೆ ಮಧ್ಯ ಕರ್ನಾಟಕದಲ್ಲಿಯೇ ಇದು ಪ್ರಥಮ ಎಂದೇ ಹೇಳಲಾಗುತ್ತಿದೆ. ಕಾನೂನು ಪದವಿ ಓದಲು ಬಯಸಿದ ಸಾಕಷ್ಟು ಮಂದಿ ವಿದ್ಯಾರ್ಥಿಗಳು ಈ ಭಾಗದಿಂದ ಕ್ಲಾಟ್ ಪರೀಕ್ಷೆ ತೆಗೆದುಕೊಂಡಿದ್ದರೂ, ಇಷ್ಟು ಅಂಕಗಳೊಅದಿಗೆ ಇಂತಹ ಸಾಧನೆ ಮಾಡಿರಲಿಲ್ಲ. ಆದರೆ ಅನಿಕೇತನ್ ತನ್ನ ಓದು ಮತ್ತು ಶ್ರದ್ಧೆಯೊಂದಿಗೆ ಈ ಸಾಧನೆ ಮಾಡಲು ಸಾಧ್ಯವಾಗಿದೆ ಎಂದು ಶಿವಮೊಗ್ಗದ ಅನೇಕ ಮಂದಿ ವಕೀಲರು ಅಭಿಪ್ರಾಯಪಟ್ಟಿದ್ದಾರೆ.

ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news