ಶಿವಮೊಗ್ಗ: ಹಿಮಾಲಯದ ಕುಲು ಮನಾಲಿ ಪ್ರದೇಶದೊಳಗಿನ ಚಂದ್ರಕಾಣಿ ಪಾಸ್ ಸಮೀಪ 12000 ಅಡಿ ಎತ್ತರದ ಪರ್ವತ ಪ್ರದೇಶದಲ್ಲಿ ದೇಶದ ನಾನಾ ಭಾಗಗಳಿಂದ ಬಂದ ಸಂಸ್ಕೃತ ವಿದ್ಯಾರ್ಥಿಗಳು ಸಂಸ್ಕೃತದಲ್ಲಿ ಮಾತನಾಡುತ್ತಾ, ದೇವ ಭೂಮಿ ಹಿಮಾಲಯದಲ್ಲಿ ಹೊಸ ದಾಖಲೆಯನ್ನು ಬರೆದಿದ್ದಾರೆ.
ನಗರದ ವಾಸವಿ ಪಬ್ಲಿಕ್ ಶಾಲೆಯ ಕಾರ್ಯದರ್ಶಿ ಎಸ್.ಕೆ. ಶೇಷಾಚಲ ಮತ್ತು ಸಂಸ್ಕೃತ ಭಾರತಿ ಶಿವಮೊಗ್ಗ ಜಿಲ್ಲಾ ಸಂಯೋಜಕ ಟಿ.ವಿ. ನರಸಿಂಹ ಮೂರ್ತಿ, ಯೂತ್ ಹಾಸ್ಟೆಲ್ ಅಸೋಸಿಯೇಷನ್’ನ ರಾಷ್ಟ್ರೀಯ ಸದಸ್ಯ ಅ.ನಾ. ವಿಜಯೇಂದ್ರ ಇವರುಗಳ ಕನಸಿನ ಯೋಜನೆಯಾದ ಹಿಮಾಲಯದಲ್ಲಿ ಸಂಸ್ಕೃತ ಧ್ವಜಾರೋಹಣ ಕಾರ್ಯಕ್ರಮ ಇಂದು ಯಶಸ್ವಿಯಾಗಿ ನಡೆದಿದೆ.
ಮೇ 3ರಿಂದು ಪರ್ವತಾರೋಹಣ ಆರಂಭಿಸಿದ ತಂಡ ಮೇ 5 ರಂದು ಧ್ವಜಾರೋಹಣ ಮಾಡುವ ಸ್ಥಳವನ್ನು ಸುಮಾರು 11 ಗಂಟೆಗೆ ತಲುಪಿತು.
ಇದಕ್ಕಾಗಿ ಇವರು ಸಿದ್ಧಪಡಿಸಿದ ಸಂಸ್ಕೃತ ಧ್ವಜದಲ್ಲಿ ಈ ದೇಶದ ಸೈನಿಕರ ತ್ಯಾಗ, ಸ್ಥೈರ್ಯ, ಭಾರತದ ಹಿರಿಮೆ, ಮತ್ತು ಸಂಸ್ಕೃತದ ಹಿರಿಮೆಯುಳ್ಳ ಶ್ಲೋಕವನ್ನು ಅಳವಡಿಸಿದರು.
ಶಿವಮೊಗ್ಗದ 21 ವಿದ್ಯಾರ್ಥಿಗಳಿಗೆ ಸಂಸ್ಕೃತ ಸಂಭಾಷಣೆ ತರಬೇತಿ, ಚಾರಣದ ತರಬೇತಿಯನ್ನು ಕಳೆದ ಆರು ತಿಂಗಳಿಂದ ನೀಡುತ್ತಾ ಬಂದಿದ್ದ ಈ ಕಾರ್ಯಕ್ರಮ ಇಂದು ಅಭಿವ್ಯಕ್ತಿಗೊಂಡಿತು.
ಯೂತ್ ಹಾಸ್ಟೆಲ್ಸ್ ಅಸೋಸಿಯೇಶನ್ ಆಫ್ ಇಂಡಿಯಾ ರಾಷ್ಟ್ರೀಯ ಘಟಕದ ಕಾರ್ಯಾಧ್ಯಕ್ಷ ವೆಂಕಟ ನಾರಾಯಣ್, ಕರ್ನಾಟಕದ ರಾಜ್ಯ ಘಟಕದ ಕಾರ್ಯಾಧ್ಯಕ್ಷರಾದ ಪುರುಷೋತ್ತಮ್, ಇವರ ಸಲಹೆ ಪಡೆದು ಮೇ ಒಂದರಂದು ಕುಲು ಮನಾಲಿ ಸಮೀಪವಿರುವ 15 ನೇ ಮೈಲಿಕಲ್ಲಿನಿಂದ ಚಾರಣಕ್ಕೆ ಹೊರಡಲು ಹೆಸರನ್ನು ನೋಂದಾಯಿಸಿದರು.
ಅಲ್ಲಿಗೆ ತಲುಪಿದ ಮೇಲೆ ಆ ತಂಡದಲ್ಲಿ ದೇಶದ ನಾನಾ ಭಾಗಗಳಿಂದ ಆಗಮಿಸಿದ ಸಹ ಚಾರಣಿಗರಾದ ಚತ್ತೀಸ್ ಘಡ, ಆಂದ್ರಾ, ಮಹಾರಾಷ್ಟ್ರ, ಒಡಿಸ್ಸಾದ ವಿದ್ಯಾರ್ಥಿಗಳು ಬಾಗವಹಿಸಿದ್ದರು.
ಸಂಸ್ಕೃತ ಭಾರತಿ, ವಾಸವಿ ಪಬ್ಲಿಕ್ ಶಾಲೆ, ಯೂತ್ ಹಾಸ್ಟೆಲ್ ಅಸೋಸಿಯೇಷನ್ ಆಫ್ ಇಂಡಿಯಾ ತರುಣೋದಯ ಘಟಕ ಶಿವಮೊಗ್ಗ ಸಂಯುಕ್ತಾಶ್ರಯದಲ್ಲಿ ಇಂದು ಕುಲು ಮನಾಲಿ ತಪ್ಪಲಿನ ಹಿಮಾಲಯ ಪರ್ವತದ 12000 ಸಾವಿರ ಅಡಿ ಎತ್ತರದಲ್ಲಿ ಸಂಸ್ಕೃತ ಧ್ವಜಾರೋಹಣವನ್ನು ಸಂಸ್ಕತ ಮಾತನಾಡುವ ಶಿವಮೊಗ್ಗ ಮೂಲದ 11ರಿಂದ 15ವರ್ಷದೊಳಗಿನ 21 ಮಕ್ಕಳು ಮಾಡಿದರು.
ಇದರ ಪೂರ್ವ ಬಾವಿ ತಯಾರಿಗಾಗಿ ಹೊಸನಗರ ತಾಲೂಕಿನ ಬರೇಕಲ್ ಬತೇರಿಗೆ ಕಳೆದ ಏ.31ರಂದು ಚಾರಣವನ್ನು ಹಮ್ಮಿಕೊಳ್ಳಲಾಗಿತ್ತು. ನೂತನವಾಗಿ ಆರಂಭಗೊಂಡ ಹೊಸನಗರ ಯೂತ್ ಹಾಸ್ಟೆಲ್ಸ್ ಅಸೋಸಿಯೇಷನ್ ಆಫ್ ಇಂಡಿಯಾ ಘಟಕದಿಂದ ಮಕ್ಕಳಿಗೆ ಅಭಿನಂದನಾ ಕಾರ್ಯವನ್ನು ಕಾರಣಗಿರಿ ಸಿದ್ಧಿವಿನಾಯಕ ದೇವಸ್ಥಾನದಲ್ಲಿ ಹಮ್ಮಿಕೊಳ್ಳಲಾಗಿತ್ತು.
ಸಮಾರಂಭದಲ್ಲಿ ರಾಷ್ಟ್ರೋತ್ಥಾನ ಪರಿಷತ್ತಿನ ಗುರುಮೂರ್ತಿ, ಯೂತ್ ಹಾಸ್ಟೆಲ್ಸ್ ಅಸೋಸಿಯೇಷನ್ ಆಫ್ ಇಂಡಿಯಾ ಹೊಸನಗರದ ಕಾರ್ಯದರ್ಶಿ ರಾಜೇಶ್ವರಿ, ವಾಸವಿ ಶಾಲೆಯ ಶ್ಯಾಮಸುಂದರ್, ಯೂತ್ ಹಾಸ್ಟೆಲ್ಸ್ ಅಸೋಸಿಯೇಷನ್ ಆಫ್ ಇಂಡಿಯಾ ರಾಷ್ಟ್ರೀಯ ಘಟಕ ಸಮಿತಿ ಸದಸ್ಯ ಅ.ನಾ. ವಿಜಯೇಂದ್ರ ರಾವ್, ಶಿಕ್ಷಕರುಗಳಾದ, ಆಶಾ, ಶ್ರೀದೇವಿ, ರಾಜೇಂದ್ರ, ಶೈಲಜಾ, ಉಪಸ್ಥಿತರಿದ್ದರು.
