ನಿರ್ಮಲ ತುಂಗಾ ಅಭಿಯಾನ: ಗಾಜನೂರಿನಿಂದ ಕೂಡಲಿವರೆಗೆ ಬೃಹತ್ ಪಾದಯಾತ್ರೆ

ಕಲ್ಪ ಮೀಡಿಯಾ ಹೌಸ್   |  ಶಿವಮೊಗ್ಗ  |

ಪರ್ಯಾವರಣ ಟ್ರಸ್ಟ್, ರಾಷ್ಟ್ರೀಯ ಸ್ವಾಭಿಮಾನ ಆಂದೋಲನ ಸಮಿತಿ ಹಾಗೂ ಶಿವಮೊಗ್ಗದ ವಿವಿಧ ಪರಿಸರಾಸಕ್ತರ ತಂಡಗಳ ಸಂಯುಕ್ತಾಶ್ರಯದಲ್ಲಿ ಜ.21 ಹಾಗೂ 22 ರಂದು ಗಾಜನೂರಿನಿಂದ ಶ್ರೀ ಕ್ಷೇತ್ರ ಕೂಡಲಿಯವರೆಗೆ ನಿರ್ಮಲ ತುಂಗಾ ಅಭಿಯಾನದ ಬೃಹತ್ ಪಾದಯಾತ್ರೆ ಮತ್ತು ಜನಜಾಗೃತಿ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದೆ ಎಂದು ಪರ್ಯಾವರಣ ಟ್ರಸ್ಟ್ ನ ಅಧ್ಯಕ್ಷ ಪ್ರೊ.ಬಿ.ಎಂ. ಕುಮಾರಸ್ವಾಮಿ ತಿಳಿಸಿದರು.

ಅವರು ಇಂದು ಮಥುರಾ ಪ್ಯಾರಡೈಸ್‌ನಲ್ಲಿ ನಡೆದ ಪತ್ರಿಕಾಗೋಷ್ಟಿಯಲ್ಲಿ ಮಾತನಾಡಿ, ಪಶ್ಚಿಮಘಟ್ಟ ಪರ್ವತದ ಕುದುರೆಮುಖ ಸಮೀಪ ಗಂಗಾ ಮೂಲದಲ್ಲಿ ಹುಟ್ಟುವ ತುಂಗಾ ನದಿಯು ಶ್ರೀ ಕ್ಷೇತ್ರ ಕೂಡಲಿ ಬಳಿ ಭದ್ರೆಯನ್ನು ಸೇರುತ್ತದೆ. ಗಂಗಾ ಸ್ನಾನಂ-ತುಂಗಾ ಪಾನಂ ಎಂಬ ನಾಣ್ನುಡಿಗೆ ತದ್ವಿರುದ್ಧವಾಗಿ ಇಂದು ತುಂಗಾ ನದಿ ಅಪವಿತ್ರಗೊಂಡಿದೆ ಎಂದರು.

ನಿತ್ಯವೂ ಶಿವಮೊಗ್ಗ ನಗರದ ಕಲುಷಿತ ನೀರು, ಯುಜಿಡಿ ಹಾಗೂ ರಾಜಕಾಲುವೆ ಮೂಲಕ ಅಪಾರ ಪ್ರಮಾಣದ ಕೊಳಚೆ ಮತ್ತು ತ್ಯಾಜ್ಯವು ತುಂಗೆಯ ಒಡಲಾಳವನ್ನು ಸೇರುತ್ತಿದೆ. ಎಷ್ಟೊಂದು ಮಲಿನಗೊಂಡಿದೆ ಎಂದರೆ ಇತ್ತ ಕುಡಿಯಲು ಯೋಗ್ಯವಿಲ್ಲ. ದೇವರ ಅಭಿಷೇಕಕ್ಕೂ ಬಳಸದ ಸುಸ್ಥಿತಿ ನಿರ್ಮಾಣಗೊಂಡಿದೆ. ಅಲ್ಲದೆ ನದಿಯ ನೈಸರ್ಗಿಕ ಹರಿವಿನ ಪ್ರಮಾಣವು ಗಣನೀಯವಾಗಿ ಕುಸಿಯುತ್ತಿದೆ. ಅವೈಜ್ಞಾನಿಕ ಮರಳುಗಾರಿಕೆ, ಆಧುನಿಕ ಕೃಷಿ ಪದ್ಧತಿಯ ಪರಿಣಾಮ ಕೀಟನಾಶಕಗಳಿಂದ ಜಲವು ವಿಷಯುಕ್ತವಾಗಿ ಜಲಚರ ಸಂತತಿಯು ನಾಶವಾಗುತ್ತಿದೆ ಎಂದರು.

ಹಾಗಾಗಿ ತುಂಗೆಯ ಪಾವಿತ್ರತೆ ಕಾಪಾಡದಿದ್ದರೆ ಭವಿಷ್ಯದಲ್ಲಿ ಶುದ್ಧ ಕುಡಿಯುವ ನೀರು ಮರಿಚಿಕೆಯಾಗುತ್ತದೆ. ಜಲವೆಂದರೆ ಬರಿ ನೀರಲ್ಲ, ಅದು ಪಾವನಗಂಗೆ ಹಾಗಾಗಿ ನದಿ ಪಾತ್ರದ ನಿವಾಸಿಗಳಿಗೆ, ಸಾರ್ವಜನಿಕರಿಗೆ ಅರಿವು ಮೂಡಿಸುವ ಹಿನ್ನಲೆಯಲ್ಲಿ ನಿರ್ಮಲ ತುಂಗ ಅಭಿಯಾನವನ್ನು ಹಮ್ಮಿಕೊಳ್ಳಲಾಗಿದೆ ಎಂದರು.

ಜ.21ರ ನಾಳೆ ಬೆಳಿಗ್ಗೆ 7.30ಕ್ಕೆ ಗಾಜನೂರು ಡ್ಯಾಂನಲ್ಲಿ ತುಂಗೆಗೆ ಗಂಗೆ ಪೂಜೆ ಮಾಡುವುದರ ಮೂಲಕ ಪಾದಯಾತ್ರೆ ಆರಂಭಗೊಳ್ಳಲಿದ್ದು, ರಾಷ್ಟ್ರೀಯ ಸ್ವಾಭಿಮಾನ ಆಂದೋಲನ ಸಮಿತಿ ಸಂಸ್ಥಾಪಕ ಕೆ.ಎನ್.ಗೋವಿಂದಾಚಾರ್ಯ ಚಾಲನೆ ನೀಡಲಿದ್ದಾರೆ.
9.30ಕ್ಕೆ ಗಾಜನೂರು ಗ್ರಾಮದಲ್ಲಿ, 12ಕ್ಕೆ ಹೊಸಹಳ್ಳಿಯಲ್ಲಿ, 3.30ಕ್ಕೆ ಅರಕೆರೆ ದೇವಸ್ಥಾನದ ಆವರಣದಲ್ಲಿ ಸಭೆ ನಡೆದು ಪಾದಯಾತ್ರೆಯು ಹಳೆಮಂಡ್ಲಿ, ಸವಾಯಿಪಾಳ್ಯ, ಸೀಗೆಹಟ್ಟಿ ಮೂಲಕ ಸಂಜೆ 6ಕ್ಕೆ ಕೋಟೆ ಆಂಜನೇಯ ಸ್ವಾಮಿ ದೇವಸ್ಥಾನದ ಬಯಲು ರಂಗಮAದಿರ ತಲುಪಲಿದ್ದು, ಅಲ್ಲಿ ಕೆ.ಎನ್.ಗೋವಿಂದಾಚಾರ್ಯ ಅವರು ಸಾರ್ವಜನಿಕರನ್ನು ಉದ್ದೇಶಿಸಿ ಮಾತನಾಡುವರು. ನಂತರ ಸಂವಾದ ಹಾಗೂ ತುಂಗಾರತಿ ಕಾರ್ಯಕ್ರಮ ನಡೆದು ಬೆಕ್ಕಿನ ಕಲ್ಮಠದಲ್ಲಿ ರಾತ್ರಿ ತಂಗಲಿದೆ ಎಂದರು.

ಜ.22ರ ಬೆಳಿಗ್ಗೆ 8.30ಕ್ಕೆ ಪಾದಯಾತ್ರೆ ಆರಂಭಗೊಂಡು 9.30ಕ್ಕೆ ಹೊಳೆಬೆನವಳ್ಳಿಯಲ್ಲಿ, 10.30ಕ್ಕೆ ಪಿಳ್ಳಂಗಿರಿಯಲ್ಲಿ ಸಭೆ ನಡೆದು ಮಧ್ಯಾಹ್ನ 12ಕ್ಕೆ ಓಪನ್‌ಮೈಂಡ್ ವರ್ಲ್ಡ್ ಸ್ಕೂಲ್‌ನಲ್ಲಿ ವಿಶ್ರಾಂತಿ ಪಡೆದು 2.30ಕ್ಕೆ ಪಾದಯಾತ್ರೆ ಮುಂದುವರೆಯಲಿದೆ. 3.30ಕ್ಕೆ ಶ್ರೀ ಕ್ಷೇತ್ರ ಕೂಡಲಿಯಲ್ಲಿ ನದಿ ಸ್ವಚ್ಚತೆ ಹಾಗೂ ಸಮಾರೋಪ ಸಮಾರಂಭ ನಡೆಯಲಿದೆ ಎಂದರು.

ಪತ್ರಿಕಾಗೋಷ್ಠಿಯಲ್ಲಿ ಪರಿಸರ ಪ್ರೇಮಿ ಪ್ರೊ.ಎಲ್.ಕೆ.ಶ್ರೀಪತಿ, ಟ್ರಸ್ಟ್ನ ಉಪಾಧ್ಯಕ್ಷ ಪ್ರೊ.ಎ.ಎಸ್.ಚಂದ್ರಶೇಖರ್, ನಿರ್ದೇಶಕರಾದ ಎಂ.ಶಂಕರ್, ಡಾ.ಶ್ರೀಧರ್, ಎಸ್.ಬಿ.ಅಶೋಕ್ ಕುಮಾರ್ ಉಪಸ್ಥಿತರಿದ್ದರು.
ಸುದ್ಧಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ: Whatsapp: 9008761663, 9481252093 – info@kalpa.news